Exodo 20:1-26
20 Insan imbaga na Dios irayan amin a salita:+
2 “Siak si Jehova a Dios mo, ya angipaway ed sika ed dalin na Ehipto, manlapud abung ya akaaripenan mo.+
3 Agka nepeg a nawalaan na arum a dirios nilikud ed siak.*+
4 “Agka manggagawa na imahen mo odino sakey a bengatlan kaparpara* na antokaman a walad tawen odino ed dalin odino ed karanuman ed dalin.+
5 Agka ondadakmomo odino naayat a manlingkor ed saratan,+ ta siak, si Jehova a Dios mo, et sakey a Dios a kakaukolanen ton sikato labat so dayewen,+ a manusa ed saray ananak lapud impakalingo na saray kaamaan, diad komatlon henerasyon tan diad komapat a henerasyon na saramay mamubusol ed siak,
6 balet ipapatnag koy matoor a panangaro ed koma-sanlibon henerasyon na saramay mangaaro ed siak tan manusumpal ed saray ganggan ko.+
7 “Agmo uusaren so ngaran nen Jehova a Dios mo ed andi-kakanaan,+ ta dusaen nen Jehova imay manguusar ed ngaran To ed andi-kakanaan.+
8 “Agmo lilingwanan a ngilinan so agew na Sabaton pian mansiansia itan a sagrado.+
9 Anem agew so pantrabahom tan panggawam ed amin a kimey mo,+
10 balet say komapiton agew et sabaton parad si Jehova a Dios mo. Agka mankikimey, sika odino say anak mon laki odino bii, odino say aripen mon laki odino bii, odino say ayep mo odino say dayo a walad loob na panaayaman mo.*+
11 Ta anemiran agew a pinalsa nen Jehova so tawen tan dalin, say dayat, tan amin a wadtan, tan sikatoy nampainawa ed komapiton agew.+ Kanian benendisyonan nen Jehova so agew na Sabaton tan ginawa ton sagrado.
12 “Igalang moy amam tan inam,+ pian andukey so pambilay mo diad dalin ya iter ed sika nen Jehova a Dios mo.+
13 “Agka mamapatey.+
14 “Agka mikakalugoran.+
15 “Agka mantatakew.+
16 “Agka mantatasi na tila sumpad kaparam a too.+
17 “Agmo pampipilalekan so abung na kaparam a too. Agmo pampipilalekan so asawa na kaparam a too,+ odino say aripen ton laki odino bii, odino say kalakian a baka to, odino say asno to, odino antokaman a kayarian na kaparam a too.”+
18 Natan et naiimatonan na amin a totoo so karol tan kirmat, say tanol na tambuyog, tan say panasewek na palandey; tan diad pakakanengneng da ed satan et ginmiwgiw tan inmarawi ra.+
19 Kanian inkuan da ed si Moises: “Mansalita kad sikami, tan dengelen mi ka, balet agkomon mansalita ed sikami so Dios, ta ompano ompatey kami.”+
20 Kanian inkuan nen Moises ed saray totoo: “Agkayo natatakot, ta linma dia so tuan Dios pian suboken to kayo,+ ta pian mansiansia so takot yod sikato tan agkayo mankasalanan.”+
21 Kanian nansiansian walad arawi iray totoo, balet inmasingger si Moises ed ambilunget a lurem a kawalaan na tuan Dios.+
22 Insan inkuan nen Jehova ed si Moises: “Oniay ibagam ed saray Israelita, ‘Anengneng yon mismo a nansalita ak ed sikayo manlapud tawen.+
23 Agkayo manggagaway pilak odino balitok a dirios,+ lapud anggapoy arum a nepeg yon dayewen, noagta siak.
24 Manggawa kay altar a gawad dalin parad siak, tan ibagat mo ditan iray apay mo a popoolan, saray bagat mo a pandurungoan,* saray karnerom, tan saray bakam. Onla ak ed sika ed kada pasen a gawaen kon nanodnonotan so ngaran ko+ tan bendisyonan ta ka ditan.
25 No manggawa kay baton altar parad siak, agka manguusar na saray baton tinabas na saray kagawaan diad pangipaalagey mo.+ Ta no usaran mo itan na sinsil, pabandayen mo itan.
26 Tan agka onsesegep ed altar ko diad panamegley na saray balitang, pian agnanengneng so pribado iran parte na laman mo.’*
Paimanod leksab
^ Odino “pian angatan mo ak.” Literal, “sumpad lupak.”
^ Odino “mangirepresenta.”
^ Literal, “saray puertam.”
^ Odino “saray apay mo parad pikakareenan.”
^ Literal, “so inkalakseb mo.”
