Ester 4:1-17
4 Sanen naamtaan nen Mardokeo+ so amin ya agawa,+ pinilat toy kawes to, nansulong na sakon abel tan angiyan na dapol ed laman to. Insan linmad pegley na syudad tan nanakis a maksil tan ampaipait.
2 Diad arap labat na puerta na palasyoy ari so asabi to, ta anggapoy nayarin onloob ed puerta na palasyoy ari ya akasulong na sakon abel.
3 Tan diad kada probinsya*+ a nadngelan so salita tan ganggan na ari et pinasyay paneermen na saray Judio, a walay panag-ayunal,+ panak-akis, tan panugaog. Dakel so dinmudukol ed saray sakon abel tan dapol.+
4 Sanen linmad si Ester iray bibiin lingkor to tan saray eunoko to tan imbaga ray agawa, inmaburidon maong so reyna. Et impaiyakaran to na saray kawes si Mardokeo pian salatan so sulong ton sakon abel, balet agto iratan inawat.
5 Lapud saya, impatawag nen Ester si Hatac, sakey ed saray eunoko na ari a tinuro na ari a manlingkor ed sikato, tan ingganggan nen Ester pian amtaen ed si Mardokeo no antoy kabaliksan na saya tan no antoy nagagawa.
6 Kanian linmay Hatac ed si Mardokeo dimad plaza na syudad diad arap na puerta na palasyoy ari.
7 Et imbaga nen Mardokeo so amin ya agawad sikato tan say eksakton kantidad na kuarta+ ya insipan nen Haman ya iter to parad pasen a pangiinay kayamanan na ari pian deralen iray Judio.+
8 Inikdan to met si Hatac na kopya na nisulat a ganggan ya inter diad Susan*+ nipaakar ed pangupot ed sikara. Kaukolan ton ipanengneng tan ipaliwawa itan ed si Ester tan bilinen to+ ya onarap ed ari pian kerewen so panangasi to tan sikaton mismo so mikasi ed ari parad saray kabaleyan to.
9 Et pinmawil si Hatac tan impasabi tod Ester iray imbaga nen Mardokeo.
10 Oniay ebat nen Ester ed si Hatac ya imbilin ton ipaamtad si Mardokeo:+
11 “Amta na amin a lingkor na ari tan saray totood saray probinsya* na ari a no walay siopaman a laki odino biin onlad loob a sular na ari+ ya ag-impatawag et walay saksakey a ganggan: Sikatoy nepeg ya ipapatey; manbilay labat no iyunat na ari ed sikato so balitok a setro+ to. Et agak ni impatawag na ari diad loob na 30 agew.”
12 Sanen impasabid si Mardokeo so imbaga nen Ester,
13 oniay ebat tod si Ester: “Agmo iisipen a lapud kabiangan kad sankaabungan na ari et mas makaliktar ka nen say arum ni ran Judio.
14 Ta no mandeen ka labat ed sayan panaon, say tulong tan kililiktar parad saray Judio et sananey so panlapuan to,+ balet sika tan say sankaabungan nen amam et naandi. Tan antoy amtam ompan saya la may gagala na impagmaliw mon reyna?”+
15 Et oniay ebat nen Ester ed si Mardokeo:
16 “La ka, tipon mo ray amin a Judio a walad Susan* tan manayunal+ kayo parad siak. Agkayo mamangan odino oniinum ed agew tan labi diad loob na taloy agew.+ Manayunal ak met a kaiba iray bibiin lingkor ko. Onla ak ed ari anggano sumlang itan ed ganggan, et no kaukolan ak ya ompatey, ompatey ak.”
17 Kanian inmalis si Mardokeo tan ginawa toy amin ya imbilin nen Ester ed sikato.
Paimanod leksab
^ Odino “nasasakopan a distrito.”
^ Odino “Susa.”
^ Odino “saray nasasakopan a distrito.”
^ Odino “Susa.”
