Daniel 8:1-27
8 Diad komatlon taon na panuuley nen Arin Belsazar,+ wala ni pasingawey ya anengneng ko kayari na samay akauna,+ on siak, si Daniel.
2 Anengneng ko so pasingawey tan legan kon manbabantay et wala ak ed Susan*+ a panag-amotan,* diad probinsya* na Elam;+ anengneng kod pasingawey a wala ak ed abay na aagusay danum na Ulai.
3 Sanen tinmangwa ak, anengneng kon walay kalakian a karnero+ ya akaalagey ed abay na aagusay danum, tan walaan itan na duaran saklor.+ Ataragey so duaran saklor, balet mas atagey imay sakey, tan samay mas atagey so unor a tinmubo.+
4 Anengneng ko a samay kalakian a karnero et maples a mamapaarap ed sagur tan ed amianen tan ed abalaten, tan anggapoy atap ya ayep a makatalo ed sikato, tan anggapoy makapangiliktar ed saratan ed pakayari* to.+ Ginawa toy panlabayan to, tan intandoro toy inkasikato.
5 Intuloy koy nambantay tan walay anengneng kon kalakian a kanding+ ya onsasabi manlapud sagur,* a liliberen toy interon mundo tan ag-ondadapo ed dalin. Tan sayan kanding et walaay sankanengneng a saklor ed baetan na saray mata to.+
6 Mamapaarap iya ed samay kalakian a karnero a walaay duaran saklor, ya anengneng kon akaalagey ed abay na aagusay danum; ombabatik iyan paarap ed samay karnero diad baleg a sanok to.
7 Anengneng ko itan a manasingger ed kalakian a karnero, tan agaylay pambusol to. Inataki to so karnero tan pinuter toy duaran saklor to, tan anggapoy pakayari na karnero ya onlaban ed sikato. Intumba to itan ed dalin tan ginatinan to, tan anggapoy makapangiliktar ed samay karnero diad pakayari* to.
8 Tan agaylay impanpasirayew na kalakian a kanding, balet sanen sikatoy nagmaliw a makapanyari, aputer imay balbaleg a saklor; insan asalatan iya na apatiran sankanengneng a saklor, ya akaarap ed apatiran dagem na tawen.+
9 Tinmubo so sakey nin saklor diad sakey ed sikara, sakey a melag a saklor, tan binmaleg iyan maong tan akaarap ed abalaten tan ed bukig* tan ed Dekorasyon.*+
10 Binmaleg iyan maong ya anggad asabi toy armada na katawenan, tan impelag tod dalin so arum ed saray armada tan bitewen, tan ginagatinan to ra.
11 Sikatoy nampasirayew ni ingen ed Prinsipe na armada, tan naandi ed Prinsipe so inagew-agew a bagat, tan ageba so pasen ya akaletnegan na santuaryo to.+
12 Tan lapud impankasalanan et niiter ed samay saklor so sakey ya armada, pati say inagew-agew a bagat; tan intultuloy ton imbantak so katuaan diad dalin, tan sikatoy onkikiwas tan ontatalona.
13 Tan nadngel kon mansasalita so sakey a masanto, tan walay sananey a masanto ya oniay inkuan tod samay mansasalita: “Panon kabayag so pasingawey nipaakar ed inagew-agew a bagat tan say impakasumlang a sengegay kadederal,+ tan say pangigatin ed masanton pasen tan ed armada?”
14 Kanian inkuan tod siak: “Anggad onlabas so 2,300 a labi tan kabuasan; insan nipawil so masanton pasen ed manepeg a kipapasen to.”
15 Legan a siak, si Daniel, et manbabantay ed samay pasingawey tan sasalien kon talosan itan, biglan walay anengneng kon singa sakey a laki ya akaalagey ed arapan ko.
16 Insan nadngel koy boses na sakey a too diad pegley na Ulai,+ tan inyeyag to: “Gabriel,+ ipaliwawam ed sikato so kabaliksan na anengneng to.”+
17 Kanian sikatoy inmasingger ed akaalageyan ko, balet kaasingger to, ataktakot ak a maong kanian insubsob koy lupak. Insan imbaga tod siak: “Talosan mo, O anak na too, a say pasingawey et nasumpal ed panaoy anggaan.”+
18 Balet legan ton mitotongtong ed siak, akaugip ak ya akasubsob ed dalin. Kanian diniwit to ak tan pinaalagey to ak ed datin akaalageyan ko.+
19 Insan inkuan to: “Ipaamtak ed sika so nagawa diad pansampot na panangukom, lapud nagawa itan diad aturon panaon na anggaan.+
20 “Say anengneng mon kalakian a karnero a walaay duaran saklor et irerepresenta toy arari na Media tan Persia.+
21 Say mabagon kalakian a kanding et irerepresenta toy ari na Gresya;+ tan say balbaleg a saklor a walad pegley na saray mata to et irerepresenta toy unonan ari.+
22 Nipaakar ed samay aputer a saklor ya apatira so sinmalat ed sikato,+ walay apatiran panarian ya ontalindeg manlapud nasyon to, balet aliwan singa ed pakayari to.
23 “Tan diad pansampot na panuuley da, sano saray makasalanan et alablabas lay gagawaen dan mauges,* walay ontalindeg ya ari a masebeg so itsura to tan natalosan to iray makawetwet a salita.*
24 Sikatoy ombiskeg a maong, balet aliwan diad panamegley na dilin biskeg to. Sikatoy manderal diad nikadkaduman paraan,* tan ontalona ed antokaman a gawaen to. Deralen to iray makapanyari, pati saray masanton totoo.+
25 Tan diad inkasilib to et sikatoy mansaol pian ontalona; tan diad puso to et itandoro toy inkasikato; tan dakel so deralen to legan na panaoy kaligenan.* Sikatoy onsumpa ni ingen ed Prinsipe na saray prinsipe, balet sikatoy naderal aliwan diad panamegley na lima na too.
26 “Tua imay nibaga ed pasingawey nipaakar ed saray labi tan kabuasan, balet pansiansiam a sekreto so pasingawey, lapud nipaakar iya ed panaon kayari na dakel ya agew manlapud natan.”*+
27 Balet siak, si Daniel, kinmapuy ak tan nansakit ak ed pigaran agew.+ Insan binmangon ak tan ginawak so kimey ko ed ari;+ balet ameneng ak lapud samay anengneng ko, tan anggapoy makatalos ed satan.+
Paimanod leksab
^ Odino “Susa.”
^ Odino “palasyo; panagsalimbengan.”
^ Odino “nasasakopan a distrito.”
^ Literal, “lima.”
^ Odino “seselekay agew.”
^ Literal, “lima.”
^ Odino “bubutayan na agew.”
^ Odino “Karakpan.”
^ Odino “et asabi da lay anggaay nayarian da.”
^ Odino “tan marundunong ed saray pakana.”
^ Odino “Makapataktakot so paneral to.”
^ Odino posiblin, “tan dakel so deralen to ya anggapoy pasakbay.”
^ Odino “ed mabayag nin arapen.”
