Komaduan Samuel 3:1-39
3 Binmayag so panlalaban ed baetan na sankaabungan nen Saul tan sankaabungan nen David; tan nantultuloy a binmiskeg si David,+ balet nantultuloy a kinmapuy so sankaabungan nen Saul.+
2 Kaleganan na satan et awalaay lalakin ananak si David diad Hebron.+ Say panguloan to et si Amnon+ ya anak tod si Ahinoam+ a taga Jezreel.
3 Say komadua et si Kileab ya anak tod si Abigail+ a datin asawa nen Nabal a Carmelita, tan say komatlo et si Absalom+ ya anak nen Maaca ya anak nen Talmai+ ya ari na Gesur.
4 Say komapat et si Adonias+ ya anak nen Hagit, tan say komalima et si Sefatias ya anak nen Abital.
5 Say komanem et si Itream ya anak nen Egla ya asawa nen David. Saraya so niyanak ed si David diad Hebron.
6 Legan a mantutultuloy so guerra ed baetan na sankaabungan nen Saul tan sankaabungan nen David, intultuloy met a pinabiskeg nen Abner+ so posisyon tod sankaabungan nen Saul.
7 Nensaman et walay sakey ya onkokomaduan asawa nen Saul a manngaray Rizpa+ ya anak nen Aias. Diad saginonor et inkuan nen Is-boset+ ed si Abner: “Akin et inakdolan mo imay onkokomaduan asawa nen amak?”+
8 Sinmanok a maong si Abner lapud saray salita nen Is-boset, tan inkuan to: “Sakey ak ta’n aso ed dalin na Juda? Anggad sayan mismon agew et impatnag ko so matoor a panangarok ed sankaabungan nen Saul ya amam tan ed saray agagi to tan kakaaro to, tan agta ka inyawat ed lima nen David; balet natan et pankakasalananen mo ak nipaakar ed sakey a bii.
9 Komon ta dusaen na Dios na ambelabelat si Abner no agko gawaen ed si David so unong ya insamba nen Jehova ed sikato:+
10 pian iyalis so panarian manlapud sankaabungan nen Saul tan iletneg so trono nen David diad Israel tan Juda, manlapud Dan ya anggad Beer-sheba.”+
11 Sikatoy agla akaebat ed si Abner ta natatakot ed sikato.+
12 Tampol ya angibaki si Abner na saray mensahero a mangibaga ed si David: “Siopay akankayarian na dalin?” Inkuan to ni: “Misipanan kad siak, tan gawaen koy nayarian ko* pian ondapag ed sika so interon Israel.”+
13 Diad saman et inyebat to: “Maabig! Misipanan ak ed sika. Say kerew ko labat et agka miaarapan ed siak no agmo awiten si Mical+ ya anak nen Saul sano onla ka dian minengneng ed siak.”
14 Insan angibaki si David na saray mensahero ed si Is-boset+ ya anak nen Saul, ya inkuan ton: “Iter mod siak si Mical ya asawak, ta angiter ak na 100 a katat na kayarian na saray Filisteo+ pian sikatoy naasawak.”
15 Kanian angibaki si Is-boset na mangala ed si Mical manlapud asawa ton si Paltiel+ ya anak nen Lais.
16 Balet sikatoy inulop nen asawa to, a manak-akis legan a manumtumbok ya anggad Bahurim.+ Diad saman et inkuan nen Abner ed sikato: “Pawil ka la!” Kanian sikatoy amawil la.
17 Kaleganan na satan et oniay impasabi nen Abner ed saray mamatatken na Israel: “Abayag lan labay yon magmaliw ya ari si David.
18 Kiwas kayo la natan, ta inkuan nen Jehova ed si David: ‘Diad panamegley na lima nen David+ a lingkor ko et iliktar koy Israel a totook ed saray Filisteo tan ed amin a kakabusol da.’”
19 Insan nansalitay Abner ed saray totoo na Benjamin.+ Linma met ed Hebron si Abner pian katongtongen ton bukor si David tan ibaga tod sikato no antoy nampaknaan na Israel tan say interon sankaabungan na Benjamin.
20 Sanen akasabi si Abner ed si David diad Hebron a kaiba toy 20 lalaki, nampaponsia si David parad sikara.
21 Insan inkuan nen Abner ed si David: “Abuloyan mo ak ya onla tan tiponen ko so interon Israel pian ondapag ed katawan kon ari, ta pian misipanan irad sika, tan magmaliw kan ari na amin a labay mo* ya uleyan.” Kanian pinasipot nen David si Abner tan sikatoy inmalis a walay kareenan.
22 Insan sinmabi si Joab tan saray lingkor nen David manlapud inlusob da, tan amayamay so awit dan samsam. Diad saman et agla kaiba nen David si Abner diad Hebron, ta sikatoy pinasipot ton walay kareenan.
23 Sanen sinmabi si Joab+ tan say interon armada a kaiba to, oniay nipaamta ed si Joab: “Linmad ari si Abner+ ya anak nen Ner,+ tan sikatoy pinasipot ton walay kareenan.”
24 Kanian linmad ari si Joab tan inkuan to: “Antoy ginawam? Linmad sikay Abner. Akin et bastam labat pinasipot?
25 Kabat moy Abner ya anak nen Ner! Sikatoy linma dia pian tilaan to ka tan amtaen to so amin a kiwas mo tan amin a gagawaen mo.”
26 Kanian tinaynan nen Joab si David tan angibaki na saray mensaheron manumbok ed si Abner, tan sikatoy pinapawil da manlapud bobon na Sira; balet ag-itan amta nen David.
27 Sanen akapawil si Abner ed Hebron,+ sikatoy intagar nen Joab ed loob na puerta na syudad pian pitongtongan ton bukor. Balet sikatoy dinuyok tod eges, kanian inatey;+ saya et parad impamatey ed si* Asael+ ya agi to.
28 Sanen nadngelan itan nen David, inkuan to: “Diad arapan nen Jehova, siak tan say panarian ko et agbalot nankasalanan ed dala+ diad impamatey ed si Abner ya anak nen Ner.
29 Ompawil komon itan ed ulo nen Joab+ tan ed interon sankaabungan nen ama to. Agnaandi komon ed sankaabungan nen Joab so lakin walay ompapaway ed kayarian to+ odino akating+ odino lakin mankikimey ya uusaren so panaggawaay tinibey,* odino lakin ompatey ed espada odino naerasan!”+
30 Kanian si Abner+ et pinatey na sanagin si Joab tan Abisai+ lapud impamatey tod si Asael ya agi ra diad samay panlalaban+ da ed Gibeon.
31 Insan inkuan nen David ed si Joab tan ed amin a totoon kaiba to: “Pilat yo iray kawes yo tan mansulong kayoy sakon abel tan mannangis kayo lapud si Abner.” Nanakar a mismoy Arin David legan ya itutulor so bangkay.
32 Imponpon day Abner diad Hebron; tan nanakis a maksil so ari diad lubok nen Abner, tan nannangis so amin a totoo.
33 Oniay inkansion na ari lapud si Abner:
“Nepeg kasin ompatey si Abner a singa ed ipapatey na makulangkulang a too?
34 Ag-ataker iray limam,Tan ag-abalor na saray gulonggulong* iray salim.
Atumba kan singa impakatumba na sakey diad arapan na saray kriminal.”*+
Diad saman et nanakis lamet so amin a totoo lapud sikato.
35 Diad saginonor et inmasingger so amin a totoo ed si David pian ikdan day tinapay a manligliwa* legan a maliwawa ni, balet oniay insamba nen David: “Dusaen ak komon na ambelabelat na Dios no ontaway ak na tinapay odino antokaman antis ya onselek so agew!”+
36 Naimano itan na amin a totoo, tan agustoan da. Singa saramay ginawa na ari, agustoan itan na amin a totoo.
37 Kanian diad saman ya agew et naamtaan na amin a totoo tan say interon Israel ya agnatetel so ari ed impamatey ed si Abner ya anak nen Ner.+
38 Insan inkuan na ari ed saray lingkor to: “Agyo ta amta a sakey a prinsipe tan makapanyarin laki so inatey ed sayan agew diad Israel?+
39 Makapuy ak ed sayan agew, anggaman alanaan ak ya ari,+ tan agko nayariay inkaruksa+ na sarayan lalaki ya ananak nen Zeruia.+ Si Jehova komon so ombales ed samay nanggaway kaugsan unong ed dilin kaugsan to.”+
Paimanod leksab
^ Literal, “tan nia! walad sika so limak.”
^ Odino “a labay na kamarerwam.”
^ Literal, “parad dala nen.”
^ Nayarin manutukoy ed lakin abaldado a naobligan manggaway kimey na bii.
^ Literal, “gansa.”
^ Literal, “saray lalakin ananak na ag-inkatunong.”
^ Odino “tinapay parad paneermen.”
