Komaduan Awaran 31:1-21
31 Kayari na piesta, amin ya Israelitan wadman et linmad saray syudad na Juda, tan minemekmek da ray sagradon lusek,+ intutumba da ray sagradon poste,*+ tan inggegeba da ray atagey a pasen+ tan saray altar+ diad interon Juda tan Benjamin, pati diad Efraim tan Manases,+ anggad aderal da lan amin, insan pinmawil so amin ya Israelita ed saray syudad da, a kada sakey et diad dilin kayarian to.
2 Insan tinuro nen Hezekias iray saserdote ed saray grupo ra+ ontan met iray Levita ed saray grupo ra,+ a kada sakey ed saray saserdote tan Levita et diad kimey da,+ nipaakar ed saray apay a popoolan tan saray bagat a pandurungoan, pian manlingkor tan misalamat tan idayew day Dios diad saray puerta na saray sular* na templo nen Jehova.+
3 Sakey a kabiangan na kayarian na ari so iiter parad saray apay a popoolan,+ kaiba iray apay diad kabuasan tan labi,+ pati saray apay a popoolan legan na Sabaton,+ balon bulan,+ tan panaon na piesta,+ unong a nisulat ed Ganggan nen Jehova.
4 Ontan met, ingganggan to ray totoon manaayam ed Jerusalem ya iter day nabebetangan na saray saserdote tan saray Levita,+ pian maalwar dan natumbok so ganggan nen Jehova.
5 Sanen niiter so ganggan, saray Israelita et angiter na dakdakel ya ilik, balon alak, larak,+ dilo, tan arum nin produkto na uma ra—saray unonan inani ra tan saray sankaabigan.+ Amayamay so inawit dan kakaplo na amin a bengatla.+
6 Tan saray totoo na Israel tan Juda a manaayam ed saray syudad na Juda et angawit met na kakaplo na saray baka tan karnero tan kakaplo na saray masanton bengatla+ a pinasanto parad si Jehova a Dios da. Inaawit da iratan tan imbunton da.
7 Diad komatlon bulan+ et ginapoan dan ibunton iray kontribusyon da; tan asumpal ira ed komapiton bulan.+
8 Sanen anengneng nen Hezekias tan saray prinsipe iray abunton a kontribusyon, indayew day Jehova tan benendisyonan day Israel a totoo to.
9 Tinepetan nen Hezekias iray saserdote tan Levita nipaakar ed saray abunton a kontribusyon,
10 tan inkuan ed sikato nen Azarias a manunan saserdote a nanlapud sankaabungan nen Zadok: “Manlapu la nen ginapoan na totoo so mangawit na saray kontribusyon ed abung nen Jehova,+ mamangan ira ya anggad napepesel ira tan dakdakel ni sulok, ta benendisyonan nen Jehova so totoo to, tan onian karakel so kera.”+
11 Diad ontan et imbaga nen Hezekias ya iparaan da ray kuarton panagsimpenan*+ diad abung nen Jehova, kanian imparaan da iratan.
12 Matoor iran mangaawit na saray kontribusyon, saray kakaplo,+ tan saray masanton bengatla; si Conanias a Levita so tinuron mangidaulo ed panangasikasod sarayan amin, tan si Simei ya agi to so onkokomadua.
13 Sikara di Jehiel, Azazias, Nahat, Asael, Jerimot, Jozabad, Eliel, Ismakias, Mahat, tan Benaias so manangasikason ontutulong ed si Conanias tan si Simei ya agi to, unong ed ganggan nen Arin Hezekias, tan si Azarias so manangasikaso diad abung na tuan Dios.
14 Tan si Kore ya anak nen Imnah, say Levita a bantay na puerta diad bukig,+ so mangaasikaso na saray boluntaryon apay+ ed tuan Dios, tan ibubunog to ray kontribusyon ya inter ed si Jehova+ tan saray sankasantosan a bengatla.+
15 Tan walad panangidaulo to si Eden, Miniamin, Jesua, Semaias, Amarias, tan Secanias, a walad saray syudad na saserdote,+ saramay angimatalekan ed kimey, pian patas so pangibunog ed saray agagi ra diad saray grupo,+ atagey man odino abebay kipapasen da.
16 Kaaruman ni iya ed samay ibubunog ed saray lalakin mantaon na talora a patagey a walad listaan na kapolian, saramay inagew-agew ya oonla pian manlingkor ed abung nen Jehova tan manumpal ed betang na saray grupo ra.
17 Say listaan na kapolian na saray saserdote et unong ed pamilya na kaamaan da,+ a singa ed saray Levita a mantaon na 20 a patagey,+ unong ed betang na saray grupo ra.+
18 Kaibad listaan na kapolian so amin ya ananak da, saray kaasawaan dan bibii, ananak dan lalaki, tan ananak dan bibii, say interon kongregasyon—ta papasantosen day inkasikara parad masanton panaglingkor lapud sikaray angimatalekan ed kimey—
19 pati saray kailalakan nen Aaron, saray saserdoten manaayam ed saray uma a panagpastolan a walad paliber na saray syudad da.+ Diad amin a syudad et wala ray lalakin tinuro unong ed ngaran da pian mangiter na naakan ed kada lalakin kabiangan na pamilya na saray saserdote tan ed siopaman a walad listaan na kapolian na saray Levita.
20 Ontan so ginawa nen Hezekias ed interon Juda, tan sikatoy nantultuloy a nanggawa na maabig tan duga tan nanmatoor diad arapan nen Jehova a Dios to.
21 Tan balang kimey a ginawa to pian anapen so tuan Dios, nipaakar man itan ed panaglingkor diad abung na tuan Dios+ odino ed Ganggan tan bilin, et ginawa to diad interon puso to, tan sikatoy tinmalona.
