Komaduan Awaran 3:1-17
3 Et ginapoan nen Solomon ya ipaalagey so abung nen Jehova+ ed Jerusalem diad Palandey Moria,+ a ditan nampanengneng si Jehova ed kinen David+ ya ama to, diad pasen ya imparaan nen David a kawalaay panag-ilikan nen Ornan+ a Jebuseo.
2 Sikatoy ginmapon angipaalagey diad komaduan agew na komaduan bulan, diad komapat a taon na uley to.
3 Tan say pundasyon ya angiletnegan nen Solomon na abung na tuan Dios et 60 kasiko so karukey to tan 20 kasiko so kalapar to,+ unong ed datin sukat.*
4 Say balkonahe a walad arapan et 20 kasiko so karukey to, a miparad kalapar na abung, tan 120* so katagey to; tan say dalem na satan et tinapewan to na puron balitok.+
5 Say baleg a kuarto et inusaran toy tablan enebro, insan to itan tinapewan na maabig a klasen balitok,+ tan wala ray inyan ton dekorasyon a kiew a palma+ tan kadena.+
6 Ontan met, say abung et tinapewan to na saray mararakep tan mablin bato;+ tan saray balitok+ ya inusar to et nanlapud Parvaim.
7 Say abung, saray pagsen, saray entrada na puerta, saray dingding, tan saray kapot et tinapewan toy balitok;+ tan saray dingding et inukitan to na saray kerubin.+
8 Insan ginawa to so Sankasantosan a pasen;+ say karukey na satan et 20 kasiko a miparad kalapar na abung, tan say kalapar na satan et 20 kasiko. Tinapewan to itan na 600 a talenton* maabig a klase na balitok.+
9 Say belat na saray balitok a parad saray pasak et 50 siklo;* tan saray kuarto ed tagey et tinapewan to na balitok.
10 Insan nanggawa na duaran estatuan kerubin diad Sankasantosan a pasen tan binalkot to iratan na balitok.+
11 Say karukey na saray payak na saray kerubin+ et 20 kasiko; say sakey a payak na unonan kerubin et limaran kasiko so karukey to tan inmabot ed dingding na abung, tan say sakey nin payak to et limaran kasiko so karukey to tan inmabot ed payak na samay sakey nin kerubin.
12 Tan say payak na samay sakey nin kerubin et limaran kasiko so karukey to tan inmabot ed biek a dingding na abung, tan say sakey nin payak to et limaran kasiko so karukey to tan inmabot ed payak na samay unonan kerubin.
13 Saray akabuskag a payak na sarayan kerubin et 20 kasiko; akaalagey tan akaarap ira ed loob.*
14 Sikatoy nanggawa met na kurtina+ ya angusar na asul a tinebey, kolor-ube ya abel,* telan krimson, tan maabig a klase na tela, tan wala ray inyan ton desinyon kerubin.+
15 Insan diad arap na abung et nanggawa na duaran lusek,+ a 35 kasiko so karukey da, tan say ulo na kada lusek et limaran kasiko.+
16 Tan sikatoy nanggawa na saray kadena a singa kuwintas, tan insabit tod saray ulo na saray lusek, tan nanggawa na 100 a gansan granada tan inyan tod saray kadena.
17 Inletneg to ray lusek diad arap na templo, sakey ed kawanan* tan sakey ed kawigi;* samay walad kawanan et nginaranan to na Jakin* tan samay walad kawigi et Boaz.*
Paimanod leksab
^ Say kaslakan ya aawaten a sukat na sakey a kasiko et 44.5 sentimetro (17.5 pulgada), balet ipapasen na arum a say tutukoyen na “datin sukat” et samay andukey a kasiko a 51.8 sentimetro (20.4 pulgada). Nengnengen so Apendise B14.
^ Agnaseguro no anton klase na sukat.
^ Say sakey a talento et 34.2 kilo. Nengnengen so Apendise B14.
^ Say sakey a siklo et 11.4 gramo. Nengnengen so Apendise B14.
^ Salanti, diad Masanto.
^ Odino “kolor-ube ya abel a gawad bagoy karnero.”
^ Odino “abalaten.”
^ Odino “amianen.”
^ Kabaliksan toy “Komon ta Iletneg To [salanti, nen Jehova] a Malet.”
^ Nayarin mankabaliksay “Diad Biskeg.”
