Komaduan Awaran 24:1-27
24 Si Jehoas et mantaon na pitora sanen nagmaliw ya ari,+ tan 40 taon a nanuley ed Jerusalem. Say ngaran na ina to et Zibia a taga Beer-sheba.+
2 Si Jehoas et nantultuloy a nanggaway duga ed pakanengneng nen Jehova diad amin ya agew nen Jehoiada a saserdote.+
3 Amili si Jehoiada na duaran asawa parad sikato, tan sikatoy awalaan na ananak a lalaki tan bibii.
4 Ag-abayag et pinirawat na puso nen Jehoas ya apigeren so abung nen Jehova.+
5 Kanian tinipon to ray saserdote tan saray Levita tan inkuan tod sikara: “La kayod saray syudad na Juda tan mankolekta kayoy kuarta ed interon Israel parad tinaon a pangapiger ed abung na Dios yo;+ tan kiwas kayon tampol nipaakar ed saya.” Balet agkinmiwas a tampol iray Levita.+
6 Kanian tinawag na ari si Jehoiada a pangulo tan inkuan to:+ “Akin et agmo inobliga iray Levita ya alaen da ed Juda tan Jerusalem so sagradon buis ya ingganggan nen Moises+ a lingkor nen Jehova ya iter da, salanti, say sagradon buis na kongregasyon na Israel, parad tolda na Testimonya?+
7 Ta saray ananak na mauge-uges a biin si Atalia+ et nilooban day abung na tuan Dios,+ tan amin a masanton bengatla ed abung nen Jehova et inusar da parad si Baal.”
8 Kanian diad ganggan na ari et walay ginawan kaban+ tan inyan ed paway, diad puerta na abung nen Jehova.+
9 Kayari na satan, inyabawag ed interon Juda tan Jerusalem a mangiter irad si Jehova na sagradon buis+ unong ed samay ingganggan nen Moises a lingkor na tuan Dios ed Israel sanen wala rad kalawakan.
10 Et nanliket so amin a prinsipe tan amin a totoo,+ tan nantultuloy iran angawit na saray kontribusyon tan ipepelag da iratan ed kaban ya anggad napno la itan.*
11 Kapagno iyakar na saray Levita so kaban ed ari tan nanengneng dan dakdakel lay kuarta, say sekretaryo na ari tan samay ontutulong ed manunan saserdote et onla tan alaen dan amin so kargay kaban,+ insan da ipawil ed pasen to. Ontan so gagawaen da ed kada agew, tan dakdakel so atipon dan kuarta.
12 Insan iter iratan na ari tan si Jehoiada ed saramay manangasikaso na kimey a panaglingkor ed abung nen Jehova, tan mangupa ira na saray managtabas na bato tan saray marunong a komikimey pian parakepen so abung nen Jehova,+ ontan met iray managpanday na balatyang tan gansa pian apigeren so abung nen Jehova.
13 Et ginapoan itan na saray manangasikaso na kimey, tan diad panangasikaso ra et inmaligwas so kimey da a pangapiger, tan say abung na tuan Dios et nipawil dad datin kipapasen to tan pinaelet da itan.
14 Kasumpal da, inter da ed ari tan ed si Jehoiada so akeran kuarta, tan inusar da itan ed panggawa na saray kagawaan parad abung nen Jehova, saray kagawaan parad panaglingkor tan panangiyapay tan parad panggawa na saray kopa tan saray kagawaan a balitok tan pilak.+ Tan regular iran mangiyaapay na saray bagat a popoolan+ diad abung nen Jehova ed amin ya agew nen Jehoiada.
15 Sanen masiken lay Jehoiada tan napnek lad saray taon na impanbilay to, sikatoy inatey; 130 so taon to sanen inatey.
16 Kanian imponpon da diad Syudad nen David a kaiba na saray arari,+ lapud maabig so ginawa to diad Israel+ nipaakar ed tuan Dios tan ed abung To.
17 Kayari impatey nen Jehoiada, saray prinsipe na Juda et linmad ari tan dinmakmomo rad sikato, tan dinengel ira na ari.
18 Tinaynan day abung nen Jehova a Dios na inmuunan atateng da tan ginapoan day nanlingkor ed saray sagradon poste* tan saray idolo, kanian sinmanok so Dios* ed Juda tan Jerusalem lapud kasalanan da.
19 Et lanang a mangibabaki si Jehova ed sikara na saray propeta pian ompawil irad sikato, tan lanang da ran papasakbayan,* balet agda labay so ondengel.+
20 Say espiritu na Dios et niwala* ed si Zacarias ya anak nen Jehoiada+ a saserdote, tan sikatoy inmalagey ed arap na totoo tan inkuan tod sikara: “Oniay imbaga na tuan Dios, ‘Akin et susumlangen yo ray ganggan nen Jehova? Agkayo ontalona! Lapud tinaynan yoy Jehova, taynanan to kayo met.’”+
21 Balet nankokomplot ira sumpad sikato+ tan diad ganggan na ari et sikatoy tinutupak da diad sular na abung nen Jehova.+
22 Diad ontan et nilingwanan nen Arin Jehoas so matoor a panangaro ya impatnag ed sikato nen Jehoiada ya ama to,* tan pinatey toy anak to, ya angibagad sikato sanen ompapatey la: “Komon ta seguroen nen Jehova ya ebatan moy ginawam.”+
23 Diad kagapo na tinmumbok a taon, si Jehoas et inataki na armada na Sirya, tan nilooban da so Juda tan Jerusalem.+ Insan da pinapatey so amin a prinsipe+ na totoo, tan amin ya asamsam da et impawit da ed ari na Damasco.
24 Ta anggan dagdaiset so sundalo na onaatakin armada na Sirya, inyawat ed sikara nen Jehova so sakey a baleg ya armada,+ lapud tinaynan day Jehova a Dios na inmuunan atateng da; kanian impaakseb da* so panangukom ed si Jehoas.
25 Sanen inmalis la ra (ta sikatoy tinaynan da a grabe sugat* to), nankokomplot sumpad sikato iray mismon lingkor to lapud impaagus toy dala na ananak* nen Jehoiada+ a saserdote. Sikatoy pinatey da diad mismon dukolan to.+ Kanian inatey tan imponpon da diad Syudad nen David,+ balet aliwan diad ponponan na saray arari.+
26 Saraya may nankokomplot+ sumpad sikato: si Zabad ya anak nen Simeat a biin Ammonita tan si Jehozabad ya anak nen Simrit a biin Moabita.
27 Tan say nipaakar ed anak ton lalaki, say dakdakel a mensahe sumpad sikato,+ tan say impangapiger* ed abung na tuan Dios,+ amin iraya et nilaktip ed saray insulat* diad Libro na Saray Arari. Tan si Amazias ya anak to so nagmaliw ya ari a kasalat to.
Paimanod leksab
^ Odino posiblin, “anggad akapangiter la ran amin.”
^ Literal, “sinmabi sanok.”
^ Odino “mantatasi ira sumpad sikara.”
^ Literal, “nisulong.”
^ Salanti, ama nen Zacarias.
^ Salanti, saray Siryano.
^ Odino “dakdakel so sakit.”
^ Odino “anak.” Nayarin say inkausar dia na salitan “ananak” et mangipapatnag na panangigalang.
^ Literal, “impangiletneg.”
^ Odino “salaysay; komentaryo.”
