Komaduan Awaran 10:1-19
-
Impanrebelde na Israel ed si Rehoboam (1-19)
10 Si Rehoboam et linmad Siquem,+ ta diman so nila na interon Israel pian sikatoy gawaen dan ari.+
2 Sanen nadngelan iya nen Jeroboam+ ya anak nen Nebat (sikatoy wala nid Ehipto lapud binmatik nisengeg ed si Arin Solomon),+ sikatoy pinmawil manlapud Ehipto.
3 Et impatawag day Jeroboam, insan sikato tan say interon Israel et linmad si Rehoboam tan inkuan da:
4 “Pinabelat nen amam so pako mi.+ Balet no say mairap a panaglingkor ed amam et painomayen mo, tan palemewen moy ambelat* a pako ya impasakbat tod sikami, manlingkor kamid sika.”
5 Diad saman et inkuan tod sikara: “Pawil kayod siak kayari taloran agew.” Kanian inmalis iray totoo.+
6 Et kinmonsulta si Arin Rehoboam ed saray mamasiken* a nanlingkor ed si Solomon ya ama to sanen mabilay ni, a kuan to: “Antoy nisimbawa yo ya iyebat kod sarayan totoo?”
7 Et inmebat irad sikato: “No magmaliw kan maomaong ed sarayan totoo tan paliketen mo ra tan maabig so iyebat mod sikara, mansiansia ran lingkor mo.”
8 Balet agto dinengel so insimbawa ed sikato na saray mamasiken,* noagta kinmonsulta ed saray kalangweran a lalakin kaugawan to tan natan et manlilingkor lad sikato.+
9 Intepet tod sikara: “Antoy nisimbawa yo ya iyebat tayo ed sarayan totoo ya angibagad siak, ‘Palemew moy pako ya impasakbat ed sikami nen amam’?”
10 Et inkuan na saray kalangweran a lalakin kaugawan to: “Oniay ibagam ed saray totoon angibagad sikan, ‘Pinabelat nen amam so pako mi, balet palemew mo itan parad sikami’; ibagam ed sikara, ‘Say kiking ko et mas malapar nen say balangbang nen amak.
11 No si amak et pinasakbatan to kayo na ambelat a pako, siak balet, mas pabelaten ko ni so pako yo. No si amak et dinusa to kayo ed panamegley na saray siplat, siak balet, dusaen ta kayo ed panamegley na saray latiko.’”
12 Si Jeroboam tan say amin a totoo et linmad si Rehoboam diad mikatlon agew, unong ya imbaga na ari: “Pawil kayod siak diad mikatlon agew.”+
13 Balet aliwliway inyebat ed sikara na ari. Diad ontan et agdinengel nen Arin Rehoboam imay insimbawa na saray mamasiken.*
14 Sikatoy akitongtong ed sikara unong ed simbawa na saray kalangweran a lalaki, a kuan to: “Mas pabelaten koy pako yo, tan palooren ko ni itan. No si amak et dinusa to kayo ed panamegley na saray siplat, siak balet, dusaen ta kayo ed panamegley na saray latiko.”
15 Kanian agdinengel na ari iray totoo, ta sayan inkagawa et nanlapud tuan Dios,+ pian nasumpal imay imbaga nen Jehova ed si Jeroboam ya anak nen Nebat diad panamegley nen Ahias+ a Silonita.
16 Lapud aglabay na ari so ondengel ed interon Israel, oniay inkuan dad sikato: “Antoy nabebetangan mi ed si David? Anggapoy tawir mi ed anak nen Jesse. La ka lad dirios mo, O Israel! Akauley ka lad dilin sankaabungan mo, O David.”+ Diad ontan et sinmempet so interon Israel ed saray ayaman* da.+
17 Balet nantultuloy ya inuleyan nen Rehoboam iray Israelita a manaayam ed saray syudad na Juda.+
18 Diad saman si Hadoram,+ a mangaasikasod saramay tinawag a mankimey parad ari, et imbaki nen Arin Rehoboam ed saray Israelita, balet sikatoy tinutupak da ya anggad inatey. Balet si Arin Rehoboam et linmugan ed karwahe to tan batik ed Jerusalem.+
19 Tan saray Israelita et nantultuloy a nanrebelde ed sankaabungan nen David anggad sayan agew.
Paimanod leksab
^ Odino “makapairap.”
^ Odino “mamatatken.”
^ Odino “mamatatken.”
^ Odino “mamatatken.”
^ Literal, “saray tolda.”
