Komaduan Arari 8:1-29
8 Et inkuan nen Eliseo ed samay bii ya akan-anak ed ugaw a laki a pinaoli to:+ “Manparaan ka a kaibay sankaabungan mo, tan manayam kayo bilang dayo ed inerman a sarag yon panayaman, ta imbaga nen Jehova a walay onsabin eras,+ tan nagawa iya ed dalin diad loob na pitoy taon.”
2 Kanian namparaan so bii tan ginawa to may imbaga na too na tuan Dios. Sikatoy inmalis a kaibay sankaabungan to tan nanayam ira ed dalin na saray Filisteo+ diad loob na pitoy taon.
3 Nen anampot lay pitoy taon, pinmawil imay bii manlapud dalin na saray Filisteo tan linmad ari pian mikasi ya ipawil ed sikato so abung tan uma to.
4 Diad saman et mitotongtong so ari ed si Gehazi a lingkor na too na tuan Dios, a kuan to: “Istoryam pad siak so amin a makapakelaw a ginawa nen Eliseo.”+
5 Legan ton iistoryaen ed ari so impamaoli nen Eliseo ed inatey,+ sinmabi may bii ya akan-anak ed ugaw a laki a pinaoli to tan akikasid ari ya ipawil ed sikato so abung tan uma to.+ Et inkuan a tampol nen Gehazi: “Katawan kon ari, saya may bii, tan saya may anak to a pinaoli nen Eliseo.”
6 Diad saman et tinepetan na ari imay bii, kanian inistorya toy agawa. Et sikatoy impaasikaso na ari ed sakey ya opisyal ed palasyo tan inkuan to: “Ipawil mod sikato so amin a kayarian to tan say bili na amin a produkto na uma to manlapud intaynan to ya anggad natan.”
7 Sanen linmay Eliseo ed Damasco,+ si Ben-hadad+ ya ari na Sirya et mansasakit. Kanian imbalita rad sikato: “Wadia may too na tuan Dios.”+
8 Et inkuan na ari ed si Hazael:+ “Mangawit kay regalo tan la ka, minengneng kad too na tuan Dios.+ Tupleg ka ed si Jehova diad panamegley to, ya itepet mo, ‘Onabig ak ni kasi?’”
9 Linmay Hazael pian minengneng ed sikato tan angawit na regalo, amin a klase na maabig a bengatla ed Damasco, a sarag ya awiten na 40 kamelyo. Kasabi to, inmalagey ed arapan to tan inkuan to: “Imbaki ak ed sika na anak mon si Ben-hadad ya ari na Sirya tan patetepet to, ‘Onabig ak ni kasi?’”
10 Inmebat si Eliseo: “La ka, ibagam ed sikato, ‘Onabig ka,’ balet impanengneng nen Jehova ed siak a sikatoy ompatey.”+
11 Tan sikatoy ninengneng nen Eliseo tan agto inalisay mata ya anggad abaingan la. Insan nanakis so too na tuan Dios.
12 Et tinepet nen Hazael: “Akin et onaakis so katawan ko?” Oniay ebat to: “Lapud amtak so gawaen mon kaugsan ed totoo na Israel.+ Poolan mo ray apadiran a pasen da, pateyen mo ed espada iray apilin lalaki ra, buybuyaken moy laman na ananak da, tan butyakan moy eges na saray malukon a bibii ra.”+
13 Et inkuan nen Hazael: “Say lingkor mo et singa labat aso, kanian panon ton nagawaan so ontan a bengatla?” Balet inkuan nen Eliseo: “Impanengneng nen Jehova ed siak a magmaliw kan ari ed Sirya.”+
14 Diad saman et tinaynan toy Eliseo tan linmad katawan to. Et tinepet na ari: “Antoy imbaga nen Eliseo ed sika?” Oniay ebat to: “Say kuan to et onabig ka.”+
15 Balet diad tinmumbok ya agew, si Hazael et angalay apis na dukolan, imbasa tod danum, tan inkubot* tod lupa na ari ya anggad inatey.+ Et si Hazael so nagmaliw ya ari a kasalat to.+
16 Diad komaliman taon na uley nen Jehoram+ ya anak nen Ahab ya ari na Israel, legan a si Jehosafat so ari na Juda, si Jehoram+ ya anak nen Arin Jehosafat na Juda et nagmaliw ya ari.
17 Sikatoy mantaon na 32 sanen nagmaliw ya ari, tan waloy taon a nanuley ed Jerusalem.
18 Sikatoy nanakar ed dalan a nanakaran na saray arari na Israel,+ a singa ed saramay kabiangan na sankaabungan nen Ahab,+ ta nagmaliw ya asawa to so anak a bii nen Ahab;+ tan nantultuloy a nanggaway mauges ed pakanengneng nen Jehova.+
19 Balet aglabay nen Jehova a deralen so Juda nisengeg ed si David a lingkor to,+ ta insipan tod si David a sikato tan saray ananak to et ikdan to ra na silew+ ya agbalot naerep.
20 Diad panaon nen Jehoram, say Edom et nanrebelde ed uley na Juda+ tan anuro na dilin ari to.+
21 Kanian linmad Zair si Jehoram, ya awit toy amin a karwahe to, tan diad labi et sikatoy namparaan tan tinalo to ray Edomita ya akapaliber ed sikato tan saray komandante na karwahe; tan batik iray sundalo ed saray tolda ra.
22 Balet say Edom et nantultuloy a nanrebelde ed uley na Juda anggad sayan agew. Diad saman et nanrebelde met so Libna.+
23 Tan saray arum nin agawa ed si Jehoram, say amin a kimey to, et akasulat ed libro na saray agawa diad panaon na arari na Juda.
24 Tan si Jehoram et nampainawa la a kaiba na saray inmuunan atateng to tan sikatoy imponpon a kaiba ra diad Syudad nen David.+ Tan si Ahazias+ ya anak to so nagmaliw ya ari a kasalat to.
25 Diad koma-12 taon na uley nen Jehoram ya anak nen Ahab ya ari na Israel, si Ahazias ya anak nen Arin Jehoram na Juda et nagmaliw ya ari.+
26 Si Ahazias et mantaon na 22 sanen nagmaliw ya ari, tan sakey taon a nanuley ed Jerusalem. Say ngaran na ina to et Atalia+ ya apo* nen Arin Omri+ na Israel.
27 Sikatoy nanakar ed dalan na sankaabungan nen Ahab+ tan nantultuloy a nanggaway mauges diad pakanengneng nen Jehova, a singa ed sankaabungan nen Ahab, ta kanayon toy sankaabungan nen Ahab.+
28 Kanian sikatoy akilad si Jehoram ya anak nen Ahab pian milaban ed kinen Arin Hazael na Sirya diad Ramot-gilead,+ balet ta asugatan na saray Siryano si Jehoram.+
29 Kanian pinmawil ed Jezreel+ si Arin Jehoram pian manpaabig ed saray sugat to, ta nakna na saray Siryano diad Rama sanen akilaban ed si Arin Hazael na Sirya.+ Tan si Ahazias ya anak nen Jehoram ya ari na Juda et linmad Jezreel pian bisitaen toy Jehoram ya anak nen Ahab lapud sikatoy asugatan.*
