Unonan Juan 2:1-29
2 Inad-arok ya ananak, insulat kod sikayo irayan bengatla pian agkayo makapankasalanan. Balet, no walay mankasalanan, walay sakey a mananulong tayo a kaiba na Ama, salanti, si Jesu-Kristo,+ a sakey a matunong.+
2 Tan sikatoy sakey a bagat a pipupulangan*+ parad saray kasalanan tayo,+ ingen ta aliwan parad sikatayo labat noagta parad interon mundo.+
3 Tan diad saya et amta tayo a sikatoy kabat tayo la no uunoren tayo ray ganggan to.
4 Samay mangibabagan, “Sikatoy kabat ko la,” ingen ta agto uunoren iray ganggan to et matila, tan say katuaan et anggapo ed satan a too.
5 Balet siopaman a manguunor ed salita to, sayan too et talagan nagnap lay panangaro to ed Dios.+ Lapud saya et amta tayon nikasakey itayo ed sikato.+
6 Samay mangibabaga a sikatoy mansiasiansian nikasakey ed sikato et nepeg met a mantultuloy a manbilay a singa ed impanbilay nen Jesu-Kristo.*+
7 Sikayo ran inad-arok, say isusulat kod sikayo et aliwan balon ganggan, noagta daan a ganggan a wala lad sikayo manlapud gapo.+ Sayan daan a ganggan et samay salitan nadngel yo.
8 Balet, isusulat ko ed sikayo so balon ganggan, say ganggan a tinumbok to tan tinumbok yo, lapud naaandi lay kabilungetan tan onsisinag lay tuan liwawa.+
9 Samay mangibabagan sikatoy walad liwawa ingen ta bubusolen toy+ agi to et wala nid kabilungetan.+
10 Samay mangaaro ed agi to et mansiasiansia ed liwawa,+ tan anggapoy pakagapolan to.*
11 Balet samay mamubusol ed agi to et walad kabilungetan tan manaakar ed kabilungetan,+ tan agto amta no iner so laen to,+ lapud sikatoy binulag na kabilungetan.
12 Inad-arok ya ananak, nansulat ak ed sikayo lapud aperdona la ray kasalanan yo nisengeg ed ngaran to.+
13 Kaamaan, nansulat ak ed sikayo lapud kabat yo la imay wala la manlapud gapo. Kalangweran a lalaki, nansulat ak ed sikayo lapud adaeg yo imay mauges.+ Inad-arok ya ananak, sinulatan ta kayo lapud kabat yo la so Ama.+
14 Kaamaan, sinulatan ta kayo lapud kabat yo la imay wala la manlapud gapo. Kalangweran a lalaki, sinulatan ta kayo lapud mabiskeg kayo+ tan mansiasiansia ed sikayo so salita na Dios+ tan adaeg yo imay mauges.+
15 Agyo aaroen so mundo odino saray bengatlan walad mundo.+ Siopaman a mangaaro ed mundo et anggapoy panangaro tod Ama;+
16 ta amin a bengatlan walad mundo—say pilalek na laman+ tan say pilalek na mata+ tan say panangipangta na sakey ed saray kaykayarian to—et agmanlalapud Ama, noagta manlalapud mundo.
17 Niarum ni, say mundo tan say pilalek na satan et naandi,+ balet samay manggagawa na linawa na Dios et mansiansia ya anggad angga.+
18 Inad-arok ya ananak, saya la so sampot ya oras, tan unong a nadngelan yo ya onsabi so antikristo,+ natan ni labat et dakel lay linmesan antikristo,+ kanian amta tayo a saya la so sampot ya oras.
19 Sinmian ira ed sikatayo lapud agtayo ra kapara;*+ ta no kapara tayo ra, nansiansia ra komon ed sikatayo. Balet sinmian ira pian napatnagan ya aliwan amin et kapara tayo.+
20 Tan sikayoy nilanaan na Masanton Dios,+ tan amin yo et walaan na kakabatan.
21 Sinulatan ta kayo, aliwan lapud agyo amta so katuaan,+ noagta lapud amta yo itan, tan lapud anggapoy katilaan a manlalapud katuaan.+
22 Siopa so matila noag samay mangibuburi a si Jesus et Kristo?+ Saya so antikristo,+ samay mangibuburi ed Ama tan ed Anak.
23 Siopaman a mangibuburi ed Anak et anggapod sikato so Ama.+ Balet samay mamibidbir ed Anak+ et walad sikato so Ama.+
24 Et diad sikayo, samay nadngel yo diad gapo et nepeg a mansiansia ed sikayo.+ No samay nadngel yo diad gapo et mansiasiansia ed sikayo, mansiansia kayo met a nikasakey ed Anak tan nikasakey ed Ama.
25 Niarum ni, saya may insipan ton mismo ed sikatayo—say bilay ya andi-anggaan.+
26 Insulat kod sikayo irayan bengatla a nipaakar ed saramay manasalin mangibalang ed sikayo.
27 Ingen ta sikayoy nilanaan na Dios diad panamegley na espiritu to+ tan mansiasiansia ed sikayo iyan espiritu, tan agla nakaukolan a wala ni mangibangat ed sikayo; balet sayan espiritu so mangibabangat ed sikayo nipaakar ed amin a bengatla+ tan satan et tua tan aliwan katilaan. Kanian mansiansia kayon nikasakey ed sikato unong ya imbangat na satan ed sikayo.+
28 Natan sirin, inad-arok ya ananak, mansiansia kayon nikasakey ed sikato, pian sano sikatoy nipatnag la et bulos itayon makapansalita+ tan ag-itayo onarawid sikato lapud kababaingan legan na kiwawala to.
29 No amta yo a sikatoy matunong, amta yo met a balang sakey a manggagaway inkatunong et anak na Dios.+
Paimanod leksab
^ Odino “bagat a manakbong; paraan na pikakareenan.”
^ Literal, “manakar a singa ed impanakar to.”
^ Odino posiblin, “anggapoy nagapol ed sikato.”
^ Odino “ag-ira kabiangan ed sikatayo.”
