Saninaro ki la pero diad ilalabas na panaon medyo wala ray panduaruwaan mo. Kasin ituloy mo ni relasyon yo odino mi-break ka la? Makatulong iyan artikulo pian makapandesisyon kay duga.

Diad sayan artikulo

•  No agka segurado

•  Mandesisyon

•  No akapandesisyon ka lan mi-break

 Legan ya saninaro so sakey ya laki tan bii, nayarin nadiskobre da ya dakel manayay agda pamparehoan. Singa bilang:

•   Labalabay na sakey so onlad dayat, pero say labalabay to may sakey et man-hiking.

•   Maistorya may sakey, pero amay sakey et aga masalita.

•   Mabetbet ya aliwan tua so ibabaga to may sakey, pero amay sakey et agbalot mantitila.

 Nanduruma irayay situasyon ya abitla. Amay unaan et agpareho so labay da; amay komadua et agpareho so ugali da; amay komatlo et agpareho iray prinsipyo da ed bilay.

 Isipen pa: Dinan ed sarayan taloran pandumaan so iisipen mon sankairapan ya arapen no sanasawa ki la? Dinan ed saratan, no bilang ta wala, so sarag yon itepel?

 Wala ray sanasawa ya malikeliket nin siansia anggano agmet ira pareho na labay odino ugali. Ta diad tua, anggapoy duaran too ya eksakton pareho. Pero wala ray sanasawa ya aaralen da no antoy labalabay na asawa da, tan minanabang ni ra ingen ed duman ugali na asawa ra. a

 Pero importante ya pareho kayoy prinsipyo na asawaen o piasawaan mo. Labay ton ibaga et pareho kayo na papanisiaan nipaakar ed relihyon, saray estandarte ed moral, tan no antoy duga tan aliwa. No mandumaan kayo na prinsipyo, sinyales itan ya dapat pultoten mo lay relasyon yo.

 Singa bilang, panon to no aliwan pareho so papanisiaan yo nipaakar ed relihyon? Oniay ibabaga na libron Fighting for Your Marriage: “Base ed research, lanang ya mas baleg so posibilidad ya mansian iramay sanasawan mandumaan so relihyon da.”

 Prinsipyo na Biblia: “Ag kayo nepeg ya mikasakey ed saray aliwan mananisia.”—2 Corinto 6:14, Maung a Balita.

 Ibabaga na Biblia ya saramay mangasawa o miasawa et “nawalaay irap ed laman.” (1 Corinto 7:28) Kanian agka nabibigla no naliliknam la itan anggano saninaro ki ni labat.

 Normal met labat ya wala ray melag ya agpantatalosan ed sakey ya relasyon. Pero say tepet, sarag yo kasin resolbien iratan ed mareen ya paraan? Diad tua et kaukolan ya ontan so gawaen yo, lalo la no sanasawa ki la.

 Prinsipyo na Biblia: “Ipanengneng yoy kaabigan ed sakey tan sakey, magmaliw kayon maabagey, a mabulos kayon manpeperdonaan.”—Efeso 4:32.

 Pero no mabetbet la odino seryoso la iray kolkolan yo, ompan talagan agkayo bagay. No ontan, maong ingen ta naamtaan mo la natan legan ya agki ni sanasawa!

 Tandaan: No alanganin ka ed inarom odino agka segurado no akaparaan ka lan mangasawa o miasawa, agmo iratan ibabaliwala!

 Prinsipyo na Biblia: “Say marunong et ompapaliis no nanenengneng toy peligro, balet say andiay kakabatan et ondidiretso tan aanien to ray pansumpalan.”—Proverbio 22:3.

 Talagan ansakisakit ed liknaan so mi-break. Pero no walay sakey ed sikayo o pareho kayon alanganin ed sakey tan sakey, mas maong no man-break kayo.

 Panon mon gawaen itan? Mas marakep no agka mibi-break diad text odino diad e-mail labat, puera labat no walay makatunongan ya rason no akin ya agka dapat mitongtong ed sikato ya personal. Imbes, manpili kay dugan panaon tan pasen pian napantongtongan yon dua iyan seryoson bengatla.

 Prinsipyo na Biblia: “Mansalita kayoy tua ed balang sakey.”—Zacarias 8:16.

 No man-break kayo, labay to kasin ibaga ya walay nankulangan mo? Andi. Tandaan ya legan ya saninaro kayo, makatulong itan ya panaon pian makapandesisyon ka no kasin mankasal kayo odino andi. Kanian anggano agkayo akapantuloyan, seguradon walay naaralan mod satan.

 Tepetay sarilim: ‘Antoy naaralan ko nipaakar ed sarilik legan ya saninaro kami? Kasin wala ni ray kaukolan kon paaligwasen ed sarilik antis ak ya mangasawa o miasawa? Antoy nepeg tan agko nepeg ya gawaen no bilang ta miinaroan ak lamet?’