Walay akabat mo ya agustoan mo, kanian nandesisyon kayo ya magmaliw ya saninaro pian naamtaan yo no kasin magmaliw kayon maong ya sanasawa. Antoy ilaloan mo legan yon mas kakabaten so sakey tan sakey?

Diad sayan artikulo

•  Dapat mantongtong kayo tan ibaga yoy tua

•  Seguradon wala ray pandumaan yo

•  Makapa-stress so piinaroan

 Legan yon nakakaulop so sakey tan sakey, mas makapankabatan kayo. Wala ray naaralan mo nipaakar ed sikato legan mon oobserbaan so kakikiwas to ed nanduruman situasyon.

 Pero wala ray bengatlan dapat yon pantongtongan ya dua. Tan legan kayon mantotongtong, agmo papaulyanan ya impluensyaan na emosyon mo iray desisyon mo.

 Nia ray topic ya kaukolan yon pantongtongan:

•   Kuarta. Kasin walay utang yo? Kasin matmainomay yoy manggastos? No sanasawa ki la, panon kayon mandesisyon nipaakar ed sueldo tan gastos?

•   Kondisyon na laman. Kasin maksil so laman yo? Kasin wala lay datin graben sakit yo?

•   Saray goal. Antoy labay yon nagawa ed bilay yo? Pareho kasi goal mo ed goal na inarom? No sanasawa ki la tan ag-agawa so goal mo lapud ag-iyabuloy na situasyon, napansiansiam kasi liket mo?

•   Pamilya. Kasin wala ni ray obligasyon yo ed pamilya yo? Anto ray obligasyon ya nayarin nanenengneng yon onlesa ed arapen? Kasin labay yoy nawalaay ananak? No on, pigara?

 No pantotongtongan yo iratan ya topic, dapat ibagam so tua. Dapat anggapoy iyaamot mo tan agmo uumanen iray detalye pian labat nagustoan to ka.​—Hebreo 13:18.

 Isipen pa: Anto ray dapat mon naamtaan ed inarom? Anto ray dapat ton naamtaan nipaakar ed sika? No natan et apasalan yo lay mangibagay tua kada no mantongtong kayo, panon itan ya makatulong no bilang ta magmaliw kayon sanasawa?

 Prinsipyo na Biblia: “Kada sakey ed sikayo so mansalita na katuaan.”​—Efeso 4:25.

 “Ompan iisipen na sakey ya bii ya, ‘Kayari anem bulan, engaged kami la,’ pero parad samay laki et kayari sakey taon ni. No ontan so situasyon, ompan nasakitan may bii tan naguloan ta iilaloan ton man-engage la ran tampol. Importantin naamtaan da no antoy iisipen na balang sakey.”​—Ariana, sakey taon ya kasal.

 Anggapoy duaran too ya eksakton mankapareho. Kanian agmo iisipen ya lanang kayon manpaknaan ed amin ya bengatla tan lanang ya parehoy labay yo. Singa bilang, walay epekto na kultura tan impamabaleg ed sikayo.

 Isipen pa: No mandumaan so opinyon yo ed angkelag iran bengatla, kasin mabulos kayon dua ya manpalugar pian mansiansiay kareenan basta anggapoy nakokontran estandarte na Biblia?

 Prinsipyo na Biblia: “Naamtaan komon na amin a totoo a makatunongan kayo.”​—Filipos 4:5.

 “Anggan panon karakel so pamparehoan yo, walan wala ray pandumaan yo. Tua ya importante ya compatible kayo. Pero mas importante iray kualidad ya ipapanengneng yon dua kada mandumaan so labay yo.”​—Matthew, limay taon lan kasal.

 No miinaroan ka, talagan dakel so panaon ya alaen to, tan ompan makapa-stress ni ingen itan. Antoy makatulong?

 Dapat walay dugan limitasyon yo. Agmo masyadon uupoten so panaon mo ed inarom, ta ompan napaulyanan mo la ray arum ni ran responsabilidad mo singa saray arum ya kakaarom. Oniay imbaga nen Alana ya limaran taon lan kasal: “Kaukolan mo ni ray kaarom anggano wala lay asawam, tan kaukolan da ka met ni. Agmo ra ibabaliwala natan lapu labat ta wala lay inarom.”

 Tandaan ya no wala lay asawam kaukolan mon balansien so panaon tan biskeg mo ed amin ya parte na bilay mo. Sarag mo la yan ipasal anggano saninaro ki ni labat.

 Isipen pa: Kasin sobsobra so panaon tan atension ya aanapen mo ed inarom? Pakaliknam kasi et ontan to met ed sika? Panon kayon magmaliw ya balanse pian agkayo singa natitikel ed relasyon yo?

 Prinsipyo na Biblia: “Walay panaon na amin a bengatla, walay panaon na kada nagagawa.”​—Eclesiastes 3:1.

 “No say gagawaen labat na saninaro et puro panagpasyar tan panagrelaks, ompan nabigla ra no sanasawa la ra. Balibali no makapaniba so saninaro ya man-shopping, manggaway kimey ed abung, mandayew ed Dios, tan arum ni ran kimey ya gagawaen ed inagew-agew. Makatulong iratan pian nipasal da lay mankimey ya saniba no bilang ta magmaliw iran sanasawa.”​—Daniel, duay taon lan kasal.

 Tandaan ya temporaryo labat so panaon ya saninaro kayo. Onsabi panaon ya kaukolan yoy mandesisyon no kasin mankasal kayo odino pultoten yoy relasyon yon dua. Pantongtongan ed part 3 na sayan serye no anto ray kaukolan yon ikonsidera no mandesisyon kayo lad satan.