Baleg so impluensya na Diablo tan saray demonyo ed totoo kanian inkuan na Biblia: “Say Sakey a Mauges et kokontrolen toy mundo.” (1 Juan 5:19, New Century Version) Diad Biblia, naamtaan tayo no anto ray uusaren na Diablo pian impluensyaan so totoo.

•   Panagpalikdo. Bibilinen na Biblia iray Kristiano a “labanay panamalingo na Diablo.” (Efeso 6:11, Maung a Balita) Say sakey ed saray pakana to et palikdoen o palingoen so totoo pian napanisia to ran saray onsusuportad sikato et mandadayew ed Dios.​—2 Corinto 11:13-15.

•   Espiritismo. Ibabalang na Diablo iray totoo panamegley na saray espiritista, managpalar, managparles odino astrologo. (Deuteronomio 18:10-12) Diad pangusar na druga, hipnotismo, tan pambakante ed isip panamegley na meditation, say sakey et nayarin kontrolen na demonyo.​—Lucas 11:24-26.

•   Palson relihyon. Saray palson doktrina na relihyon et ibabalang day totoo kanian agda uunoren so Dios. (1 Corinto 10:20) Say tawag na Biblia ed saratan a doktrina et “bangabangat na demonyo.”​—1 Timoteo 4:1.

•   Seselepan na mauges ya espiritu so sakey a too. Wala ray nabasa ed Biblia nipaakar ed saray mauges ya espiritu ya sinmelep ed totoo. No maminsan, saramay sinelepan na demonyo et nabubulag odino agmakasalita odino susugatan da ni ingen so sarili da.​—Mateo 12:22; Marcos 5:2-5.

 No panon kan agnaimpluensyaan na Diablo

 Agka nepeg ya ontakot ya ompan kontrolen kay demonyo, ta ibabaga na Biblia no panon mon nalabanan so Diablo:

•   Nepeg ya antam no anto ray pakana na Diablo pian ‘aliwa kan andian na pikakabat ed saray paraan to.’​—2 Corinto 2:11.

•   Aral moy Biblia, tan gawam no antoy nanaaralan mo. No unoren mo ray prinsipyo ed Biblia, naprotektaan ka ed saray impluensya na Diablo.​—Efeso 6:11-18.

•   Iwasan moy antokaman ya mikonektaan ed saray gawa na demonyo. (Gawa 19:19) Kaiba ditan iray musika, libro, magasin, poster, tan video nipaakar ed espiritismo.