First time ya agawad history na South Korea ya inmapela ed korte iray prosecutor na gobierno pian baliktaren so sentensia ed kaso na limaran agagi tayo ya agmalabay ya mansundalo. Bilang resulta, sigpot ya inabsuelto na korte so amin ya kaso na saratan ya agagi tayo. Lapud sayan desisyon na korte, abaliktad so desisyon na abeban korte ya angakusa ed saray agagi tayo ya labay da labat ya natakasan so pansundalo.

Say desisyon ya “not guilty,” ya inyanunsio nen Disyembre 14, 2018, et angiter na malinew ya basiyan ya absueltoen so masulok ya 900 agagi tayo ya peles nin lilitisen iray kaso da diad saray korte na Korea. Aalagaren na saray agagin naabsuelto so pangipaakseb ed uksoyan parad alternative service ya sarag dan gawaen imbes ya mansundalo.

Say desisyon na korte na apela et imbase to ed duara ya agnalinglingwanan iran desisyon na Constitutional Court tan Korte Suprema na Korea nen 2018. Lapud saratan ya desisyon, angangga lay 65-taon ya ley ya automatikon napriso iramay agda labay so mansundalo, anggano walay makatunongan ya rason na agda pansundalo lapud relihyon da.

Nandesisyon so duaran atagey ya korte ya amin et bulos ya mandesisyon no kasin mansundalo base ed iisipen dan duga odino aliwa. Pandinayewan iratan na saray organisasyon ed human rights. Oniay imbaga na National Human Rights Commission na Korea: “Lapud desisyon na Korte Suprema, angangga la so ansaki-sakit ya history na panamairap ed saramay agda labay so mansundalo ya ginmapo nen 1950’s, ya angapekta ed ngalngali 20,000 ya agmalabay ya mansundalo . . . Labay min ibalikas so aralem a respeto mi lapud sakripisyo na saray agmalabay ya mansundalo tan ed saray kapamilya dan nan-anos.”

Natan, kinerew ed saray agmalabay ya mansundalo ya pruebaan da no kasin say agda pansundalo et base ed “aralem, mapekder tan tudtua” iran papanisiaan da. Ingganggan ed saray huis ya nengnengen iray ebidensya ya talagan masimoon ed pananisia da iramay agmalabay ya mansundalo. Imbaga na Korte Suprema, “Diad interon bilay to et . . . nepeg ya nanengneng ya talagan kombinsido ed papanisiaan to.” Legan ya eebatan na saray agagi tayo iray tepet na saray huis, awalaan ira na balibalin pankanawnawa ya ipaliwawa so nipaakar ed personal a desisyon dan agmibiang ed guerra tan agmansundalo.​—1 Pedro 3:15.

Diad masulok ya anemiran dekada, sinungdoan na Saray Tasi nen Jehova diad Korea so pakapriso da lapud saray papanisiaan da. Tan makakombinsin prueba itan ya say pansiasiansia tayon neutral et lapud interon puso ya uunoren tayo so komaduan sankaimportantian ya ganggan, ya ‘aroen tayoy kapara tayon too a singa ed sarili tayo.’​—Mateo 22:39.