Йесо нырма Иерусалиммӕ хӕстӕг хъӕутӕй кӕцыдӕры уыди, афтӕ йӕм дзуттӕгтӕй чидӕртӕ бацыдысты. Иуӕй-иуты сӕ фӕндыд фылдӕр базонын, иннӕтӕ та йӕ ракъахынмӕ хъавыдысты. Закъон хорз чи зыдта, иу ахӕм лӕг ӕй бафарста: «Ахуыргӕнӕг, цы кӕнын мӕ хъӕуы, цӕмӕй ӕнусон цардӕй хайджын уон?» (Лукайы 10:25).

Йесо уайтагъд бамбӕрста, уыцы лӕджы ӕцӕгӕй дзуапп базонын кӕй нӕ фӕндыд. Ӕвӕццӕгӕн, Йесойы къахӕджы фарст бакодта, кӕд, дзуттӕгтӕм хъыг цы фӕкӕса, ахӕм исты зӕгъид, зӕгъгӕ. Йесо йӕ ӕмбӕрста, уыцы адӕймагӕн йӕ фарстайы фӕдыл йӕхи хъуыды кӕй ис. Уымӕ гӕсгӕ йын дзуапп ахӕм хуызы радта, ӕмӕ лӕг, йӕ зӕрдӕйы цы уыди, уый раргом кодта.

Йесо йӕ бафарста: «Закъоны цы фыст ис? Цы дзы бакастӕ?» Уыцы адӕймаг Хуыцауы Закъон лӕмбынӕг иртӕста, ӕмӕ йын дзуапп дӕр уымӕ гӕсгӕ радта. Ӕрхаста йын Дыккаг закъоны 6:5 стихы ӕмӕ Левиты 19:18 стихы фыст ныхӕстӕ: «Дӕ Хуыцау Йегъовӕйы уарз ӕппӕт зӕрдӕйӕ, ӕппӕт удӕй, ӕппӕт хъаруйӕ ӕмӕ ӕппӕт зондӕй“, стӕй: „Иннӕты уарз, дӕхи куыд уарзыс, афтӕ“» (Лукайы 10:26, 27). Цымӕ уый уыди уыцы лӕджы фарстайӕн дзуапп?

Йесо йын загъта: «Раст зӕгъыс. „Афтӕ кӕн, ӕмӕ ӕнусон цардӕй хайджын уыдзынӕ“». Фӕлӕ цымӕ ууыл сӕ ныхас фӕци? Уыцы лӕг уымӕ не ’нхъӕлмӕ каст, цӕмӕй йын Йесо йӕ фарстайӕн комкоммӕ дзуапп радтаид. Уый фӕндыд, «рӕстаг адӕймаг» кӕй уыд, уый равдисын. Фӕндыди йӕ ахӕм ныхӕстӕ фехъусын, ӕцӕгдӕр раст хъуыды кӕныс ӕмӕ иннӕтӕм дӕр раст цӕстӕй кӕсыс, зӕгъгӕ. Уымӕ гӕсгӕ Йесойы бафарста: «Ӕмӕ, кӕй хъуамӕ уарзон, уыцы иннӕтӕ чи сты?» (Лукайы 10:28, 29). Афтӕ ахъуыды кӕнгӕйӕ уый хуымӕтӕг фарста у, фӕлӕ йын хуымӕтӕг дзуапп нӕ уыди раттӕн. Цӕуылнӕ?

Дзуттӕгтӕм афтӕ каст, ӕмӕ, кӕй хъуамӕ уарзой, уыцы иннӕтӕ сты, дзуттаг ӕгъдӕуттӕм гӕсгӕ чи цард, ӕрмӕстдӕр уыдон. Ӕмӕ, сӕ хъуыдымӕ гӕсгӕ, Левиты 19:18 стихы дӕр уый кой цыди. Афтӕ дӕр ма дзырдтой, зӕгъгӕ, дам, дзуттаг чи нӕу, уыдонимӕ ныхас кӕнын дӕр «не ’мбӕлы» (Хъуыддӕгтӕ 10:28). Уымӕ гӕсгӕ уыцы адӕймаг ӕмӕ, ӕвӕццӕгӕн, Йесойы ахуыргӕнинӕгтӕй дӕр чидӕртӕ хъуыды кодтой, зӕгъгӕ, кӕд ме ’мтуг дзуттӕгтӕн хорз дӕн, уӕд рӕстгӕнӕг дӕн. Дзуттаг чи нӕ уыди, уыдоны та уарзын ӕмӕ сӕм хорз цӕстӕй кӕсын цӕмӕн хъуыди?!

Уӕдӕ сын Йесо сӕ рӕдыд зондахаст куыд хъуамӕ сраст кодтаид, цӕмӕй уыцы лӕджы дӕр ӕмӕ иннӕ дзуттӕгты дӕр ма фӕхъыг кодтаид? Йесо радзырдта иу хабар: «Иу лӕг Иерусалимӕй Иерихонмӕ ӕрцӕйцыд ӕмӕ фӕндагыл абырджыты къухтӕм бахауд. Уыдон ӕй сбӕгънӕг кодтой, фӕнадтой йӕ ӕмӕ йӕ уым ӕрдӕгмардӕй ныууагътой». Йесо йӕ ныхас адарддӕр кодта: «Ныр рауад афтӕ, ӕмӕ уыцы фӕндагыл ӕрцӕйцыд иу сауджын, ӕмӕ йӕ куы федта, уӕд фӕндагӕн йӕ иннӕ фарсмӕ ахызт ӕмӕ йӕ рӕзты аивгъуыдта. Афтӕ левит дӕр, уыцы бынатмӕ куы ’рхӕццӕ ӕмӕ йӕ куы федта, уӕд фӕндагӕн йӕ иннӕ фарсмӕ ахызт ӕмӕ йӕ рӕзты аивгъуыдта. Фӕлӕ ма уыцы фӕндагыл фӕцӕйцыд иу самариаг лӕг дӕр. Уый йӕ цурмӕ куы бахӕццӕ ӕмӕ йӕ куы ауыдта, уӕд ын фӕтӕригъӕд кодта» (Лукайы 10:30–33).

Йесо ацы хабар кӕмӕн радзырдта, уыцы лӕг ӕнӕмӕнг зыдтаид, сауджынтӕй ӕмӕ сын кувӕндоны чи ӕххуыс кодта, уыцы левиттӕй бирӕтӕ Иерихоны кӕй цардысты. Уыдон-иу кувӕндонӕй фӕстӕмӕ куы здӕхтысты, уӕд-иу сӕ уырдыджы цӕуын хъуыди 23 километры бӕрц. Уыцы фӕндагыл цӕуын тӕссаг уыд, уымӕн ӕмӕ-иу фӕндаггонты размӕ абырджытӕ бабадтысты. Сауджын ӕмӕ левит се ’мтуг дзуттаджы тыхст уавӕры куы федтаиккой, уӕд ын хъуамӕ ма баххуыс кодтаиккой? Фӕлӕ Йесо куыд радзырдта, афтӕмӕй йын нӕ баххуыс кодтой. Чи йын баххуыс кодта, уый уыди самариаг. Афтӕмӕй та дзуттӕгтӕ самариӕгты сӕ сӕрмӕ дӕр нӕ хастой (Иоанны 8:48).

Самариаг лӕг уыцы дзуттагӕн куыд баххуыс кодта? Йесо радзырдта: «Бацыд [ӕм], йӕ цӕфтыл ын сой ӕмӕ сӕн рауагъта ӕмӕ йын сӕ бабаста. Стӕй йӕ йӕ хӕрӕгыл сӕвӕрдта, фысымуатмӕ йӕ баласта ӕмӕ йӕм базылд. Дыккаг бон фысымуаты хицауӕн дыууӕ динары радта ӕмӕ йын загъта: „Ацы лӕгмӕ дӕ хъус фӕдар. Уымӕй уӕлдай ма йыл цы схардз кӕнай, уый та дын, куы ӕрыздӕхон, уӕд бафиддзынӕн“» (Лукайы 10:34, 35).

 Дӕсны Ахуыргӕнӕг Йесо ацы хабар куы радзырдта, уӕд уыцы лӕджы бафарста: «Куыд дӕм кӕсы, абырджыты къухтӕм чи бахауд, уыцы адӕймаджы уыцы ӕртӕйӕ чи уарзта?» Ӕвӕццӕгӕн, самариаг, зӕгъгӕ, зӕгъын йӕ сӕрмӕ не ’рхаста ӕмӕ йын дзуапп радта: «Чи йын фӕтӕригъӕд кодта ӕмӕ йын чи баххуыс кодта, уый». Ӕмӕ йын уӕд Йесо бӕлвырд бамбарын кодта, уыцы хабар цӕмӕн радзырдта, уый. Загъта йын: «Уӕдӕ ацу ӕмӕ ды дӕр афтӕ кӕн» (Лукайы 10:36, 37).

Йесо куыд ахуыр кодта, уымӕй йын ӕмбал нӕ уыд! Уыцы лӕгӕн ӕнӕуи куы загътаид, ӕрмӕст дзуттӕгты нӕ, фӕлӕ иннӕты дӕр кӕй хъуамӕ уарза, уӕд ын цымӕ йӕхӕдӕг дӕр ӕмӕ иннӕ дзуттӕгтӕ дӕр йӕ ныхӕстыл сразы уыдаиккой? Зынтӕй. Фӕлӕ Йесо радзырдта хуымӕтӕг хабар ӕмӕ йӕ ныхасмӕхъусджытӕн сӕ хъус ӕрдардта, хорз кӕй зыдтой, ахӕм лыстӕг хабӕрттӕм. Ӕмӕ афтӕмӕй уыцы адӕймаджы фарстайӕн, «кӕй хъуамӕ уарзон, уыцы иннӕтӕ чи сты?», зӕгъгӕ, лӕвӕрд ӕрцыд бӕлвырд дзуапп. Ӕцӕгдӕр уарзы, иннӕтыл чи тыхсы ӕмӕ бахъуаджы сахат сӕ фарсмӕ чи балӕууы, уый. Ӕмӕ Хуыцауы Ныхас махӕй алкӕй дӕр уымӕ разӕнгард кӕны.