Израилӕй скӕсӕнырдыгӕй цы бӕстӕ уыд, уым цӕрӕг адӕмы уырныдта, стъалытӕн сӕ бон кӕй у фӕндаг амонын. Иу ӕхсӕв уыцы бӕстӕйы цалдӕр нӕлгоймаджы арвыл федтой ирд стъалыйы хуызӕн цыдӕр, ӕмӕ уыцы «стъалы» арвыл размӕ цыди. Гъемӕ уыдон дӕр йӕ фӕдыл ацыдысты, ӕмӕ сӕ уый ӕркодта Иерусалиммӕ. Уыцы нӕлгоймӕгтӕ адӕмы фӕрсын райдыдтой: «Дзуттӕгты паддзах чи уыдзӕн, уыцы сывӕллон кӕм ис? Мах ӕрцыдыстӕм, цӕмӕй йын бакувӕм».

Иерусалимы паддзах Ирод ног паддзахы тыххӕй куы фехъуыста, уӕд мӕты бафтыд. Ирод сауджынты хистӕрты бафарста: «Ног паддзах кӕм хъуамӕ райгуыра?» Уыдон ын загътой: «Пехуымпартӕ дзырдтой, Вифлеемы кӕй райгуырдзӕн». Уӕд Ирод, Скӕсӕнӕй чи ӕрцыд, уыцы нӕлгоймӕгтӕм фӕдзырдта ӕмӕ сын загъта: «Ацӕут Вифлееммӕ ӕмӕ уыцы сывӕллоны ссарут. Ӕмӕ йӕ куы ссарат, уӕд-иу мӕм фӕхабар кӕнут, цӕмӕй йын ӕз дӕр бакувон». Фӕлӕ сӕ уый сайгӕ кодта.

«Стъалы» дарддӕр фӕндаг амыдта ӕмӕ уыцы нӕлгоймӕгты Вифлееммӕ ӕркодта. Уым иу хӕдзары сӕрмӕ ӕрлӕууыд, ӕмӕ нӕлгоймӕгтӕ мидӕмӕ бацыдысты. Уым федтой Йесойы йӕ мад Марийӕимӕ. Йесойӕн сӕрӕй ныллӕг акуывтой ӕмӕ йын радтой лӕвӕрттӕ: сызгъӕрин, стӕй урс буд ӕмӕ миррӕ. Цымӕ уыцы нӕлгоймӕгты ӕцӕгдӕр Йегъовӕ ӕрбарвыста? Нӕ.

Уыцы ӕхсӕв Йегъовӕ Иосифӕн фыны загъта: «Ирод Йесойы амарынмӕ хъавы. Дӕ усы ӕмӕ дӕ сывӕллоны ракӕн ӕмӕ Египетмӕ алидзут. Цалынмӕ дын нӕ зӕгъон, уӕдмӕ уым лӕуу». Ӕмӕ уӕд Иосиф йӕ бинонтимӕ Египетмӕ алыгъд.

Скӕсӕнӕй цы нӕлгоймӕгтӕ ӕрцыд, уыдонӕн та Йегъовӕ загъта, цӕмӕй Иродмӕ мауал аздӕхтаиккой. Ирод уый куы бамбӕрста, ӕмӕ нал фӕзындзысты, уӕд тынг смӕсты. Йесойы ссарын йӕ бон кӕй не сси, уымӕ гӕсгӕ Вифлееммӕ йӕ адӕмы арвыста, цӕмӕй, Йесойы карӕн чи уыд, уыцы лӕппуты се ’ппӕты дӕр амардтаиккой. Фӕлӕ уӕдмӕ Йесо уыди тынг дард, Египеты, ӕмӕ йын тӕссаг ницӕмӕйуал уыд.

 Цасдӕр рӕстӕг рацыд, ӕмӕ Ирод амард. Уӕд Йегъовӕ Иосифӕн загъта: «Ныр уӕ бон у фӕстӕмӕ аздӕхын, уымӕн ӕмӕ уӕ цардӕн тӕссаг ницӕмӕйуал у». Иосиф Марийӕимӕ ӕмӕ Йесоимӕ фӕстӕмӕ Израилмӕ ӕрыздӕхт, ӕмӕ горӕт Назареты ӕрцардысты.