«Иуӕй-иу хатт мӕ бон вӕййы ме ’взаджы рохтыл хӕцын, иннӕ хатт та ме ’взаг цытӕ фӕкӕрды, уый мӕхӕдӕг дӕр нӕ фембарын!» (Джеймз).

 «Куы фӕтыхсын, уӕд, цы фӕдзурын, ууыл нӕ фӕхъуыды кӕнын, куы ницӕуыл фӕтыхсын, уӕд та ӕгӕр бирӕ фӕдзурын. Иу ныхасӕй – бӕллӕх!» (Мэри).

 Библи зӕгъы: «Ӕвзаг... у зынг» ӕмӕ «Ӕнӕхъӕн хъӕдыл арт бандзарынӕн чысыл зынг йеддӕмӕ нӕ хъӕуы» (Иаковы 3:5, 6). Дӕ ныхӕсты тыххӕй фыдбылызы арӕх бахауыс? Кӕд о, уӕд дын ацы статья баххуыс кӕндзӕн.

•  Ӕнӕпайда ныхӕстӕ цӕмӕн фӕкӕнын?

•  Де ’взаджы рохтыл хӕцын зон

•  Де ’мгӕрттӕ цы дзурынц

 Ӕнӕххӕстдзинад. Библи зӕгъы: «Мах не ’ппӕт дӕр арӕх рӕдийӕм. Ныхасӕй чи нӕ рӕдийы, уый та у алцӕмӕй ӕххӕст адӕймаг» (Иаковы 3:2). Мах стӕм ӕнӕххӕст адӕм ӕмӕ фӕкӕлӕм ӕрмӕст цӕугӕ-цӕуын нӕ, фӕлӕ ма дзургӕ-дзурын дӕр – ӕнӕпайда ныхӕстӕ куы фӕкӕнӕм, уӕд.

 «Мӕ зонд дӕр ӕнӕххӕст у ӕмӕ ме ’взаг дӕр, уымӕ гӕсгӕ афтӕ нӕ хъуыды кӕнын, ӕмӕ ныхасӕй никуы фӕрӕдидзынӕн» (Аннӕ).

 Бирӕ дзурын. Библи зӕгъы: «Бирӕ чи дзуры, уымӕн ӕнӕфӕрӕдийгӕ нӕй» (Ӕмбисӕндтӕ 10:19). Бирӕ чи дзуры ӕмӕ хъусын чи нӕ уарзы, уый иннӕты арӕх фӕхъыг кӕны, ӕнӕпайда ныхӕстӕ кӕй фӕкӕны, уый тыххӕй.

 «Зондджын адӕймаг уый нӕу, бирӕ чи дзуры. Зӕххыл ӕппӕты зондджындӕр адӕймаг Чырысти уыди, фӕлӕ ӕдзух дзургӕ нӕ кодта» (Джулия).

 Ӕлхыскъ ныхас. Библи зӕгъы: «Ӕнӕрхъуыды адӕймагӕн йӕ ныхӕстӕ сты карды цӕфау» (Ӕмбисӕндтӕ 12:18). Ӕнӕрхъуыды ныхӕстӕм хауынц ӕлхыскъ ныхӕстӕ, ома иннӕты кад адӕмы цӕсты чи дӕлӕмӕ кӕны, ахӕм ныхӕстӕ. Ӕлхыскъ ныхас чи фӕкӕны, уый арӕх фӕзӕгъы: «Цӕй, хынджылӕг кодтон!» Фӕлӕ иннӕты кад дӕлӕмӕ кӕнын худӕг нӕу. Библи нӕ разӕнгард кӕны, цӕмӕй ныууадзӕм «ӕфхӕрӕн ныхас, стӕй, ӕвзӕрӕй цыдӕриддӕр ис, уый» (Ефесӕгтӕм 4:31).

 «Цыргъзонд ныхӕстӕ кӕнын ӕмӕ иннӕты худын кӕнын бирӕ уарзын, фӕлӕ уый ӕркӕны ӕлхыскъ ныхасмӕ. Ӕмӕ уый тыххӕй арӕх мӕхи масты хай бакӕнын» (Оксанӕ).

 Ӕвзаджы рохтыл хӕцын ӕнцон нӕу, фӕлӕ дын Библийы уагӕвӕрдтӕ баххуыс кӕндзысты. Ӕркӕсӕм дзы цалдӕрмӕ:

 «Уӕ зӕгъинӕгтӕ-иу уӕхицӕн уӕ зӕрдӕты радзурут... ӕмӕ-иу мацыуал зӕгъут» (Псалом 4:4).

 Иуӕй-иу хатт ӕппӕты хуыздӕр вӕййы, куы ницы зӕгъай. Ӕрыгон сылгоймаг, Лаурӕ, дзуры: «Мӕстыйӕ мӕ бон вӕййы зӕгъын, ӕнӕуи хъуыды дӕр кӕуыл нӕ акодтаин, ахӕм ныхӕстӕ. Куы ’рсабыр вӕййын, уӕд фӕцин кӕнын, уӕлдай цыдӕртӕ мӕ кӕй не схауд, ууыл». Цалдӕр секунды дӕхиуыл куы фӕхӕцай, уӕд уый дӕр фаг вӕййы, цӕмӕй ӕнӕрхъуыды ныхас ма зӕгъай.

 «Ӕвзаг хӕринаджы ад куыд ӕвзары, афтӕ ныхӕстӕ та хъус не ’взары?» (Иов 12:11).

 Цӕмӕй дӕ ныхӕстыл ма фӕсмон кӕнай, уый тыххӕй хорз уаид ахӕм фарстатыл ахъуыды кӕнын:

•   Хабар ӕцӕгдӕр афтӕ у? Пайда у? Ӕнӕмӕнг ӕй хъӕуы зӕгъын? (Ромӕгтӕм 14:19).

•   Мӕнӕн исчи афтӕ куы зӕгъид, уӕд мын ӕхсызгон уаид? (Матфейы 7:12).

•   Уый ууыл дзурӕг уыдзӕн, ӕмӕ иннӕ адӕймаджы хъуыдыйӕн аргъ кӕнын? (Ромӕгтӕм 12:10).

•   Ныртӕккӕ ууыл дзурын ӕмбӕлы? (Екклесиаст 3:7).

 «Ут сӕрныллӕг ӕмӕ иннӕты уӕхицӕй уӕлдӕр ӕвӕрут» (Филиппӕгтӕм 2:3).

 Ацы уынаффӕ дын баххуыс кӕндзӕн иннӕты тыххӕй хорз хъуыды кӕнын, ӕмӕ дын уый та баххуыс кӕндзӕн, цӕмӕй де ’взаджы рохтыл хӕцай ӕмӕ-иу исты зӕгъыны размӕ ахъуыды кӕнай. Искӕй ныхасӕй куы фӕхъыг кӕнай, уӕд дзы сӕрныллӕгдзинады фӕрцы хатыр ракурдзынӕ –уый ӕвӕстиатӕй саразын фӕхъӕуы! (Матфейы 5:23, 24). Уый фӕстӕ ахъуыды кӕн, дӕ бон куыд у де ’взаджы рохтыл хӕцын.