ଯୋହନ ଏହା ପ୍ରଚାର କରୁଥିଲେ, ‘ମୋଠାରୁ ବି ବଡ଼ କେହି ଆସିବା ପାଇଁ ଯାଉଛନ୍ତି ।’ ଯୀଶୁ ପ୍ରାୟ ୩୦ ବର୍ଷର ଥିବା ବେଳେ ସେ ଗାଲିଲୀର ଯର୍ଦ୍ଦନ ନଦୀ ପାଖକୁ ଗଲେ । ସେଠାରେ ଯୋହନ ଲୋକମାନଙ୍କୁ ବାପ୍ତିସ୍ମ ଦେଉଥିଲେ । ଯୀଶୁ ଚାହୁଁଥିଲେ ଯେ ଯୋହନ ତାଙ୍କୁ ମଧ୍ୟ ବାପ୍ତିସ୍ମ ଦିଅନ୍ତୁ । କିନ୍ତୁ ଯୋହନ ତାଙ୍କୁ କହିଲେ, ‘ମୁଁ କିପରି ଆପଣଙ୍କୁ ବାପ୍ତିସ୍ମ ଦେଇପାରିବି ? ମୁଁ ନିଜେ ଆପଣଙ୍କ ହାତରୁ ବାପ୍ତିସ୍ମ ନେବା ପାଇଁ ଚାହେଁ ।’ ଯୀଶୁ ଯୋହନଙ୍କୁ କହିଲେ, ‘ଯିହୋବା ଚାହାନ୍ତି ଯେ ତମେ ମୋତେ ବାପ୍ତିସ୍ମ ଦିଅ ।’ ସେସମୟରେ ଦୁହେଁ ଯର୍ଦ୍ଦନ ନଦୀକୁ ଗଲେ ଓ ଯୋହନ ଯୀଶୁଙ୍କୁ ପାଣିରେ ପୂରାପୂରି ବୁଡ଼ାଇ ବାହାର କଲେ ।

ଯୀଶୁ ପାଣି ଉପରକୁ ଆସିବା ପରେ ସେ ପ୍ରାର୍ଥନା କଲେ । ସେସମୟରେ ଆକାଶ ଖୋଲିଗଲା ଏବଂ ଈଶ୍ୱରଙ୍କ ପବିତ୍ର ଶକ୍ତି ଗୋଟିଏ ପାରା ରୂପରେ ତାଙ୍କ ଉପରେ ଆସିଲା । ତାʼପରେ ଯିହୋବା ସ୍ୱର୍ଗରୁ କହିଲେ, ‘ତମେ ମୋ ପ୍ରିୟ ପୁତ୍ର, ମୁଁ ତମକୁ ସ୍ୱୀକାର କରିଛି ।’

ଯିହୋବାଙ୍କ ପବିତ୍ର ଶକ୍ତି ଯୀଶୁଙ୍କ ଉପରେ ଆସିବା ପରେ ସେ ମସୀହ ହୋଇଗଲେ । ଏହାପରେ ସେ ସେହି କାମ ଆରମ୍ଭ କଲେ ଯାହା ପାଇଁ ଯିହୋବା ତାଙ୍କୁ ପୃଥିବୀକୁ ପଠାଇଥିଲେ ।

ବାପ୍ତିସ୍ମର ତୁରନ୍ତ ପରେ ଯୀଶୁ ପ୍ରାନ୍ତରକୁ ଗଲେ ଏବଂ ସେଠାରେ ୪୦ ଦିନ ରହିଲେ । ସେଠାରୁ ଫେରିବା ପରେ ସେ ଯୋହନଙ୍କୁ ଦେଖା କରିବା ପାଇଁ ଗଲେ । ଯେବେ ଯୀଶୁ, ଯୋହନଙ୍କ ଆଡ଼କୁ ଆସୁଥିଲେ ତେବେ ଯୋହନ କହିଲେ, ‘ଏହି ଦେଖ ଈଶ୍ୱରଙ୍କ ମେଷଶାବକ ଯେ ଦୁନିଆର ପାପ ବହି ନେଇଯିବେ ।’ ଏହା କହି ଯୋହନ ଲୋକମାନଙ୍କୁ ଜଣାଇଲେ ଯେ ଯୀଶୁ ହିଁ ମସୀହ ଅଟନ୍ତି । କିନ୍ତୁ, କʼଣ ଆପଣ ଜାଣନ୍ତି, ଯେବେ ଯୀଶୁ ପ୍ରାନ୍ତରରେ ଥିଲେ ତେବେ ତାଙ୍କ ସହ କʼଣ ହେଲା ? ଆସନ୍ତୁ ଦେଖିବା ।