NAMOONNI yaanni isaan jireenyaa fi duʼaa ilaalchisee qaban baayʼee dha; akkasumas garaa garummaa qaba. Tokko tokko, duʼa booda bifa biraatiin ykn bakka biraa akka jiraatan itti dhagaʼama. Kaan immoo, haala biraatiin jiraachuuf lammata akka dhalatan yaadu. Duuti dhuma waan hundumaa ti kan jedhanis jiru.

Tarii atis, hawaasa ykn aadaa keessatti guddatte irratti hundaaʼuudhaan waaʼee kanaa yaada dhuunfaa qabda taʼa. Duʼa booda wanta taʼu ilaalchisee yaanni dubbatamu hedduu waan taʼeef, gaaffii bitaa namatti taʼu kanaaf deebii amansiisaa fi qabatamaa taʼe arg achuuf maaltu nu gargaaruu dandaʼa?

Geggeessitoonni amantii jaarraawwan hedduudhaaf lubbuun hin duutu jedhanii barsiisaa turaniiru. Hordoftoonni amantiiwwan gurguddaa hunda jechuun ni dandaʼama, jechuunis Kiristiyaana, Hinduu, Yihudii, Muslimaa fi kan biroon, lubbuu hin duunee fi yommuu foon duʼu addunyaa hafuuraa keessa jiraachuu ishii akka itti fuftu amanu. Gama biraatiin immoo, hordoftoonni amantii Budihaa, yeroo hedduu deddeebiʼanii dhalachuudhaan, annisni ykn humni sammuu sirna gammachuu guutuun itti argamuu fi Niirvaanaa jedhamu keessa galuun akka dandaʼamu amanu.

Barumsawwan akkasii irratti hundaaʼanii, namoonni addunyaa irra jiran harki caalaan isaanii duuti balbala gara jireenya addunyaa gara biraatti geessu akka taʼe amanu. Kanaaf, namoota baayʼeef duuti marsaa jireenyaa keessatti tarkaanfii isa guddaa, duʼuunis fedha Waaqayyoo keessaa tokko akka taʼe isaanitti fakkaata. Taʼus, dhimma kana ilaalchisee Dubbiin Waaqayyoo maal jedha? Mata duree itti aanu akka dubbistu si jajjabeessina. Tarii, deebiin isaa si ajaaʼibsiisuu hin oolu.