ƐZUKOALƐDEƐ 56
Maa Koyɛlɛ Ɛdɛnla Asafo Ne Anu
Saa yɛwɔ yɛ mediema diedima avinli a, yɛte nganeɛ kɛ Belemgbunli Devidi la, ɔhanle kɛ: “Ɔle kpalɛ nee kɛnlɛma kɛ mediema babɔ nu adɛnla wɔ koyɛlɛ nu!” (Edwɛne 133:1) Yɛ koyɛlɛ ne ɛmba mgbane. Yɛ nuhua ko biala boa maa koyɛlɛ kɔ zo.
1. Duzu a le kɛnlɛma wɔ Nyamenle menli avinli a?
Saa ɛkɔ debiezukoalɛ wɔ maanle gyɛne nu a, bie a ɛnrɛde aneɛ mɔɔ bɛka la abo noko wɔ ndenle dɔɔnwo azo ɛbanwu ye kɛ ɛboka bɛ nwo. Kɛmɔti ɛ? Ɔluakɛ buluku ko ne ala a yɛfa yɛsukoa Baebolo ne wɔ ɛleka biala a. Eza yɛbɔ mɔdenle yɛkulo yɛ nwo ngoko. Ɔnva nwo ɛleka biala mɔɔ yɛwɔ la, yɛ muala ‘yɛbɔ Gyihova duma, na yɛsonle ye wɔ koyɛlɛ nu.’—Zɛfanaya 3:9.
2. Duzu a ɛbahola wɔayɛ wɔamaa koyɛlɛ ahɔ zo a?
“Bɛvi ahonle nu bɛhulo bɛ nwo ngoko kpalɛ.” (1 Pita 1:22) Kɛzi ɛbava folɛdulɛ ɛhye wɔali gyima ɛ? Kɛ anrɛɛ ɛbava wɔ adwenle wɔazie awie mɔ sinlidɔlɛ zo la, nea subane kpalɛ mɔɔ bɛlɛ la. Kɛ anrɛɛ ɛ nee menli mɔɔ le kɛ ɛdawɔ anzɛɛ bɛ nye die ninyɛne ko ne ala anwo badu la, bɔ mɔdenle kɛ ɛbanwu mediema mrenyia nee mraalɛ mɔɔ asolo bɛ anzɛɛ bɛkulo ninyɛne gyɛne la. Eza yɛbɔ mɔdenle kpalɛ yɛye menli nwo adwenletane biala mɔɔ yɛlɛ la yɛfi yɛ ti anu.—Kenga 1 Pita 2:17. a
3. Saa akɛsakɛsa ba ɛdawɔ nee ɛ gɔnwo Kilisienenli bie avinli a duzu a ɛbayɛ a?
Koyɛlɛ wɔ yɛ avinli, noko eza yɛnli munli. Ɔyɛ a yɛmaa yɛ mediema arɛle bɔ anzɛɛ yɛmaa bɛdi nyane bɔbɔ. Ɔti Nyamenle Edwɛkɛ ne ka kile yɛ kɛ “bɛhɔ zo . . . bɛva [ɛtane] bɛhyɛ bɛ nwo bɔkɔɔ,” ɔtoa zo kɛ: “Kɛ mɔɔ Gyihova ɛva bɛ ɛtane ɛhyɛ bɛ bɔkɔɔ la, bɛdabɛ noko bɛyɛ ye zɔhane ala.” (Kenga Kɔlɔsaema 3:13.) Yɛmaa Gyihova di nyane fane dɔɔnwo, noko ɔfa ɔkyɛ yɛ. Ɔti ɔkpondɛ kɛ yɛfa yɛ mediema ɛtane yɛkyɛ bɛ. Saa ɛnwu kɛ wɔyɛ debie wɔmaa awie ɛli nyane a, kɔ ye ɛkɛ ne na bɛziezie edwɛkɛ ne.—Kenga Mateyu 5:23, 24. b
SUKOA DƆƆNWO
Nea ndenle mɔɔ ɛbahola wɔalua zo wɔamaa koyɛlɛ nee anzodwolɛ mɔɔ wɔ asafo ne anu la adɛnla ɛkɛ ne la.
Duzu a ɛbayɛ wɔava wɔakpondɛ anzodwolɛ a?
4. Mmanyia menli nwo adwenletane
Yɛkpondɛ kɛ yɛkulo yɛ mediema kɔsɔɔti. Noko bie a ɔyɛ se kɛ yɛbahulo awie mɔɔ asolo ye la. Duzu a baboa yɛ a? Kenga Gyima ne 10:34, 35, na akee bɛzuzu kpuya ɛhye mɔ anwo:
-
Gyihova die ye Alasevolɛ kɔsɔɔti to nu. Kɛzi ɔwɔ kɛ ɛhye ka adwenle mɔɔ ɛlɛ ye wɔ menli mɔɔ asolo bɛ la anwo ɛ?
-
Menli nwo adwenletane boni mɔ a ɛbu zo wɔ bɛ ɛkɛ ne mɔɔ ɔwɔ kɛ ɛtwe ɛ nwo ɛfi nwo a?
Kenga 2 Kɔlentema 6:11-13, na akee bɛzuzu kpuya ɛhye anwo:
-
Ɛnea a kɛzi ɛbahola wɔabikye mediema mrenyia nee mraalɛ mɔɔ asolo bɛ la ɛ?
5. Fa ɛtane kyɛ bɔkɔɔ na kpondɛ anzodwolɛ
Gyihova fa yɛ ɛtane kyɛ yɛ bɔkɔɔ ɔnva nwo kɛ ɔnyɛ yɛ ɛtane na yɛava yɛahyɛ ye la. Kenga Edwɛne 86:5, na akee bɛzuzu kpuya ɛhye mɔ anwo:
-
Kɛzi Gyihova ɛtanefakyɛ ne kpole de ɛ?
-
Duzu ati a ɛ nye die ye ɛtanefakyɛ ne anwo a?
-
Tɛnlabelɛ boni mɔ a bahola yeamaa yeayɛ se kɛ yɛ nee awie mɔ badɛnla anzodwolɛ nu a?
Kɛzi yɛbahola yɛazukoa Gyihova na yɛamaa koyɛlɛ adɛnla yɛdayɛ nee yɛ mediema mrenyia nee mraalɛ avinli ɛ? Kenga Mrɛlɛbulɛ 19:11, na akee bɛzuzu kpuya ɛhye anwo:
-
Saa awie ka wɔ ɛya anzɛɛ ɔfo wɔ a, duzu a ɛbahola wɔayɛ amaa yeanyɛ edwɛkɛ kpole a?
Ɔyɛ a yɛfo awie mɔ. Saa ɔba ye zɔ a duzu a ɔwɔ kɛ yɛyɛ a? Ye VIDIO ne, na akee bɛzuzu kpuya ɛhye anwo.
-
Wɔ vidio ne anu, duzu a adiema raalɛ ne yɛle ɔvale ɔkpondɛle anzodwolɛ a?
6. Fa wɔ adwenle sie subane kpalɛ mɔɔ mediema mrenyia nee mraalɛ lɛ la azo
Saa yɛbikye mediema mrenyia nee mraalɛ a, yɛnwu bɛ mɔdenlebɔlɛ nee bɛ sinlidɔlɛ ne mɔ. Kɛ ɔkɛyɛ na yɛava yɛ adwenle yɛazie bɛ mɔdenlebɔlɛ ne azo ɛ? Ye VIDIO ne, na akee bɛzuzu kpuya ɛhye anwo.
-
Duzu a baboa wɔ yeamaa wɔanwu subane kpalɛ mɔɔ mediema mrenyia nee mraalɛ lɛ la ɛ?
Gyihova fa ye adwenle sie yɛ subane mgbalɛ ne mɔ azo. Kenga 2 Edwɛkɛsisilɛ 16:9a, na akee bɛzuzu kpuya ɛhye anwo:
-
Kɛzi Gyihova mɔɔ wɔnwu kɛ ɔfa ye adwenle ɔsie wɔ subane kpalɛ ne azo la maa ɛte nganeɛ ɛ?
Saa debie ɛnle kpalɛ wɔ daemɔn ngɛba kɛnlɛma nwo bɔbɔ a, ɔsonle bolɛ. Zɔhane ala a yɛ mediema mrenyia nee mraalɛ ɛnli munli noko bɛsonle bolɛ bɛmaa Gyihova a
BIE MƆ KA KƐ: “Kyesɛ awie dimoa kpa me kyɛlɛ, kolaa na meava ye ɛtane meahyɛ ye.”
-
Duzu ati a ɔwɔ kɛ yɛfi yɛ ɛhulolɛ nu yɛfa awie mɔ ɛtane yɛkyɛ bɛ a?
EDWƐKƐ TITILI
Saa ɛfa ɛtane ɛkyɛ na ɛkulo mediema mrenyia nee mraalɛ kɔsɔɔti a ɛbaboa wɔamaa koyɛlɛ adɛnla asafo ne anu.
Ndinu
-
Kɛ ɔkɛyɛ na wɔannyia menli nwo adwenletane ɛ?
-
Saa akɛsakɛsa ba ɛdawɔ nee ɛ gɔnwo Kilisienenli bie avinli a duzu a ɛbayɛ a?
-
Duzu ati a ɔwɔ kɛ ɛsukoa neazo mɔɔ Gyihova ɛyɛ wɔ awie mɔ ɛtane mɔɔ ɔfa ɔkyɛ bɛ la anwo a?
KPONDƐ DƆƆNWO
Sukoa kɛzi Gyisɛse ndonwo ne mɔ ko boa yɛ ɔmaa yɛgyakyi awie mɔ ndɛnebualɛ la.
Saa yɛte nganeɛ kɛ yɛtɛyɛle ɛtane biala a asoo ɔwɔ kɛ yɛkpa kyɛlɛ ɔ?
“Kyɛlɛkpalɛ—Ɔle Debie Mɔɔ Yɛfa Yɛkpondɛ Anzodwolɛ” (Ɛzinzalɛ Arane, November 1, 2002)
Nea kɛzi bie mɔ ɛzukoa kɛ bɛnrɛyɛ nyeyenu la.
Sukoa kɛzi ɛbahola wɔali ngyegyelɛ nwo gyima amaa yeanzɛkye anzodwolɛ mɔɔ wɔ asafo ne anu la.
a Awieleɛdwɛkɛ 6 ka kɛzi ɛlɔlɛ ka yɛ maa yɛnea boɛ amaa ewulenzane anga awie mɔ la anwo edwɛkɛ.
b Awieleɛdwɛkɛ 7 kile kɛzi bɛsiezie gyima nee mɛla nu edwɛkɛ la.
Bie A Eza Ɛ Nye Balie
KPUYA MƆƆ MENLI TA BIZA
Baebolo Ɛzukoalɛ Nwo Ngyehyɛleɛ Boni A Gyihova Alasevolɛ Yɛ A?
Wɔ Baebolo ɛzukoalɛ nwo ngyehyɛleɛ mɔɔ Gyihova Alasevolɛ ɛyɛ mɔɔ ɛndua ɛhwee la anu, ɛbahola wɔava Baebolo ngilebɛbo mɔɔ ɛ nye die nwo wɔali gyima. Saa ɛkulo kɛ ɛto ɛ sa ɛfɛlɛ wɔ abusua ne yɛɛ ɛ gɔnwo mɔ a, ɛbahola wɔayɛ zɔ.
