ƐZUKOALƐDEƐ 02

Baebolo Ne Maa Yɛnyia Anyelazo

BƆ

Menli dɔɔnwo mɔɔ wɔ ewiade ye la yia ngyegyelɛ mɔɔ maa bɛ nwo yɛ alɔbɔlɛ, bɛdwenledwenle na bɔbɔ bɛdi nyane a. Wɔyia tɛnlabelɛ mɔɔ ɛmaa wɔde nganeɛ zɛhae la bie ɛlɛ ɔ? Bie a anwodolɛ anzɛɛ wɔ kulovolɛ bie mɔɔ ɛwu la ɛlɛmaa wɔali nyane. Bie a ɛlɛbiza ɛ nwo kɛ, ‘Asoo ninyɛne bayɛ boɛ?’ Baebolo ne fa zɔhane kpuya ne anwo mualɛ mɔɔ yɛ anyelielɛ la maa.

1. Kɛzi Baebolo ne maa yɛnyia anyelazo ɛ?

Baebolo ne maa yɛnwu deɛmɔti ngyegyelɛ dɔɔnwo wɔ ewiade ye anu la. Eza ɔka kɛ ɔnrɛhyɛ ngyegyelɛ ɛhye mɔ amuala bavi ɛkɛ. “Kenle bie” nwo ɛwɔkɛ mɔɔ wɔ Baebolo ne anu la bahola amaa wɔanyia “anyelazo.” (Kenga Gyɛlɛmaya 29:11, 12.) Ɛwɔkɛ ɛhye mɔ boa maa yɛkola yɛgyinla yɛ ngyegyelɛ nloa ɛnɛ, yɛnyia adwenle kpalɛ na yɛ nye die dahuu.

2. Kenle bie boni a Baebolo ne ka nwolɛ edwɛkɛ a?

Baebolo ne ka kenle bie mɔɔ “ewule ɛnle ɛkɛ bieko, yɛɛ alɔbɔlɛ nee ɛzunlɛ nee nyane ɛnle ɛkɛ bieko” la anwo edwɛkɛ. (Kenga Yekile 21:4.) Ngyegyelɛ mɔɔ ɛmmaa menli nye ɛnlie ɛnɛ—le kɛ ehyia, nzisi, anwodolɛ yɛɛ ewule—ɛnrɛdɛnla ɛkɛ bieko. Baebolo ne bɔ ɛwɔkɛ kɛ alesama anye balie dahuu wɔ Paladaese wɔ azɛlɛ ye azo.

3. Kɛ ɔkɛyɛ na wɔalie wɔali kɛ ɛwɔkɛ mɔɔ wɔ Baebolo ne anu la bara nu ɛ?

Menli dɔɔnwo anye la kɛ ninyɛne bayɛ boɛ, noko bɛngola bɛnnwu ye saa bɛ anyelazo ne bara nu a. Ɛwɔkɛ mɔɔ wɔ Baebolo ne anu la le ngakyile. Yɛbahola yɛalie mɔɔ ɔka la yɛali saa ‘yɛneɛnlea Ngɛlɛlera ne anu kpalɛ a.’ (Gyima ne 17:11) Mekɛ mɔɔ ɛlɛsukoa Baebolo ne la, ɛbahola wɔazi kpɔkɛ saa ɔwɔ kɛ ɛdie mɔɔ ɔka kɛ ɔbara kenle bie la ɛdi a.

SUKOA DƆƆNWO

Suzu ninyɛne bie mɔ mɔɔ Baebolo ne bɔ nwolɛ ɛwɔkɛ la anwo. Nea kɛzi Baebolo ne anu ɛwɔkɛ ne ɛlɛboa menli ɛnɛ la.

4. Baebolo ne maa yɛnyia anyelazo kɛ yɛbadɛnla aze dahuu wɔ anyelielɛ nu

Nea ɛwɔkɛ ɛhye mɔ mɔɔ wɔ Baebolo ne anu la. Nuhua boni mɔ a ɛ nye die nwo kpalɛ a? Nzɔne ati ɔ?

Kenga Baebolo tɛkese mɔɔ wɔ ɛwɔkɛ ɛhye mɔ anwo la, na bɛzuzu kpuya ɛhye mɔ anwo:

Ɛnea a Baebolo tɛkese ɛhye mɔ maa ɛnyia anyelazo ɔ? Bɛbahola bɛamaa wɔ abusua ne nee ɛ gɔnwo mɔ anyia anyelazo ɔ?

Pɛ ye nvoninli kɛ ɛde ewiade zɛhae anu

AWIE BIALA . . .	AWIE BIALA . . .
ɛnde nyane, ɛnyɛ ɛrelera anzɛɛ ɛnwu.—Ayezaya 25:8.	banwu ye alɔvolɛ mɔɔ bɛdwazo bɛ bɛra ngoane nu la.—Dwɔn 5:28, 29.
anwo ɛndo ye anzɛɛ ɛnle wuliravolɛ.—Ayezaya 33:24; 35:5, 6.	bade kpɔkɛ na yeanyia anwosesebɛ.—Dwobu 33:25.
ɛnsisi awie.—Ayezaya 32:16, 17.	banyia aleɛ dɔɔnwo ali, anyia sua kɛnlɛma adɛnla nu na yeayɛ gyima mɔɔ yɛ anyelielɛ la.—Edwɛne 72:16; Ayezaya 65:21, 22.
ɛnnwu amaneɛ ɔlua konle ti.—Edwɛne 46:9.	banyia anzodwolɛ kpalɛ.—Edwɛne 37:11.
ɛngakye debie mɔɔ maa ɔdi nyane la.—Ayezaya 65:17.	badɛnla aze dahuu wɔ anyelielɛ nu.—Edwɛne 37:29.

5. Ɛwɔkɛ mɔɔ wɔ Baebolo ne anu la bahola aboa wɔ

Menli dɔɔnwo arɛle ɛbɔ anzɛɛ ɛva ɛya ɔlua ngyegyelɛ mɔɔ bɛnwu kɛ ɔlɛkɔ zo la ati. Bie mɔ bɔ mɔdenle kpalɛ kɛ bɛmaa ninyɛne ayɛ boɛ. Nea kɛzi ɛwɔkɛ mɔɔ Baebolo ne bɔ kɛ ninyɛne bayɛ boɛ la ɛlɛboa menli la. Ye VIDIO ne, na akee bɛzuzu kpuya ɛhye mɔ anwo.

VIDIO: Ɛnee Mekulo Kɛ Meko Metia Nzisi (4:07)

Wɔ vidio ne anu, nzisi boni a ɛnee gyegye Rafika a?
Ɔwɔ nu kɛ nzisi ne mɔɔ ɔnwunle ye la anvi ɛkɛ ne ɛdeɛ, noko kɛzi Baebolo ne boale ye ɛ?

Anyelazo edwɛkɛ mɔɔ wɔ Baebolo ne anu la kola boa yɛ maa yɛgyinla bɛsanudolɛ nee ngyegyelɛ nloa. Kenga Mrɛlɛbulɛ 17:22 nee Wulomuma 12:12, na akee bɛzuzu kpuya ɛhye mɔ anwo:

Ɛsuzu kɛ anyelazo edwɛkɛ mɔɔ wɔ Baebolo ne anu la bahola aboa wɔ kɛkala ɔ? Duzu ati ɔ?

BIE MƆ KA KƐ: “Bɛngola bɛnnwu ye saa ɛwɔkɛ mɔɔ wɔ Baebolo ne anu la bara nu a.”

Duzu ati a ɔhyia kɛ ɛsuzu daselɛ mɔɔ kile kɛ ɔbara nu la anwo a?

EDWƐKƐ TITILI

Baebolo ne maa yɛnyia anyelazo na ɔboa yɛ ɔmaa yɛkola yɛgyinla yɛ ngyegyelɛ nloa, ɔluakɛ ɔka kenle bie mɔɔ yɛ anyelielɛ la anwo edwɛkɛ.

Ndinu

Duzu ati a ɔwɔ kɛ menli nwu Baebolo ne anu ɛwɔkɛ ne mɔ a?
Duzu a Baebolo ne ka kɛ ɔbara kenle bie a?
Kɛzi ɛnyia mɔɔ bara kenle bie la anwo anyelazo a ɔbaboa wɔ kɛkala ɛ?

Yɛwiele ɛzukoalɛdeɛ ne wɔ:

Bodane

Kenga tɛkese mɔɔ wɔ ɛzukoalɛdeɛ ɛhye anu la bieko amaa wɔanwu Baebolo ne anu ɛwɔkɛ ne mɔ kpalɛ.

Bodane gyɛne:

Your other goal

KPONDƐ DƆƆNWO

Sukoa kɛzi anyelazo bahola aboa wɔ la anwo ninyɛne dɔɔnwo.

“Anyelazo—Nienwu A Ɛbanyia Ye A?” (Awake!, April 22, 2004)

Sukoa kɛzi mɔɔ bara kenle bie la anwo anyelazo bahola aboa menli mɔɔ lɛ ewule mɔɔ ɛnlɛ ye ayile la.

“Baebolo Ne Bahola Aboa Me Yeamaa Meagyinla Ewule Mɔɔ Ɛnlɛ Ye Ayile La Anloa Ɔ?”(Edwɛkɛ mɔɔ wɔ jw.org azo)

Saa ɛlɛnea edwɛne ɛhye mɔɔ bɛyɛ ye vidio la a, pɛ ye nvoninli kɛ ɛ nee wɔ abusua ne ɛlɛdie bɛ nye wɔ Paladaese ne mɔɔ bara kenle bie la anu.

Pɛ Mekɛ Ne Anwo Nvoninli 3:37

Kenga kɛzi awie mɔɔ ɛnee ɔkulo kɛ ninyɛne yɛ boɛ la hakyile ye adwenle wɔ mekɛ mɔɔ ɔzukoale anyelazo mɔɔ wɔ Baebolo ne anu anwo debie la.

“Mende Nganeɛ Kɛ Ɔwɔ Kɛ Mekakyi Ewiade Ne Bieko” (Ɛzinzalɛ Arane, July 1, 2013)

Bie A Eza Ɛ Nye Balie

KPUYA MƆƆ MENLI TA BIZA

Baebolo Ɛzukoalɛ Nwo Ngyehyɛleɛ Boni A Gyihova Alasevolɛ Yɛ A?

Wɔ Baebolo ɛzukoalɛ nwo ngyehyɛleɛ mɔɔ Gyihova Alasevolɛ ɛyɛ mɔɔ ɛndua ɛhwee la anu, ɛbahola wɔava Baebolo ngilebɛbo mɔɔ ɛ nye die nwo wɔali gyima. Saa ɛkulo kɛ ɛto ɛ sa ɛfɛlɛ wɔ abusua ne yɛɛ ɛ gɔnwo mɔ a, ɛbahola wɔayɛ zɔ.

NYIA ANYELIELƐ DAHUU!—BAEBOLO ƐZUKOALƐ MUKENYE