FOA 2
Belemgbunlililɛ Edwɛkɛhanlɛ—Edwɛkpa Ne Mɔɔ Bɛmaa Yeasalo Ewiade Amuala
KENLE ko wɔangɔ gyima na ɛzieziele ɛ nwo kɛ ɛkɔ daselɛlilɛ wɔ nwonlomɔ ne. Ɛtwehwe ɛ bo aze ekyii, ɛte nganeɛ kɛ wɔvɛ. Ɔzɔho kɛ nwonlomɔ nu nafelɛ bayɛ fɛ! Noko ɛyɛ nwolɛ asɔne na ɛbɔ kpɔkɛ kɛ ɛbahɔ. Ɛ nee adiema raalɛ kpanyinli bie mɔɔ di nɔhalɛ la a hɔle a, na ye kpundii ɛgyinlanlɛ nee ye atiakunlukɛnlɛma ne hanle wɔ ahonle. Mekɛ mɔɔ ɔrale kɛ bɛlɛbɔ nɔhalɛ ne nolo wɔ azua nu la, ɛnwunle kɛ ɛ mediema mɔɔ wɔ ewiade amuala la ɛlɛfa mbuluku ko ne ala abɔ edwɛkɛ ko ne ala nolo, na bɛ muala bɛlɛnyia ndetelɛ ko ne ala azo nvasoɛ. Ɛdwule sua nu la, ɛdele nganeɛ kɛ wɔnyia anwosesebɛ. Ɛ nye liele kɛ wɔandɛnla sua nu la!
Kɛkala, Nyamenle Belemgbunlililɛ ne gyima titile a le Keleseɛnema ɛzonlenlɛ gyima ne. Gyisɛse hanle kɛ bɛbayɛ edwɛkɛhanlɛ gyima ne kpole wɔ ewiade awieleɛ ne. (Mat. 24:14) Kɛzi ye ngapezo ɛhye ɛpe zo ɛ? Wɔ foa ɛhye anu, yɛbazuzu menli, adenle mɔɔ bɛdua zo nee ninyɛne mɔɔ anwo hyia wɔ Keleseɛnema ɛzonlenlɛ gyima ne anu, mɔɔ ɔlɛboa menli mgbe dɔɔnwo mɔɔ bɛwɔ ewiade amuala yeamaa bɛanwu Nyamenle Belemgbunlililɛ ne kɛ ɔwɔ ɛkɛ ne amgba la anwo.
WƆ FOA ƐHYE
TILE 6
Edwɛkɛkavolɛma—Azonvolɛ Tu Bɛ Nwo Maa
Duzu ati a ɛnee Gyisɛse lɛ anwodozo kɛ ɔbanyia menli mɔɔ bɛbavi bɛ ɛhulolɛ nu bɛagyinla ɔ nzi la wɔ awieleɛ mekɛ ne anu ɛ? Kɛ ɔkɛyɛ na wɔala ye ali kɛ ɛlɛdumua wɔakpondɛ Belemgbunlililɛ ne ɛ?
TILE 7
Edwɛkɛhanlɛ Ndenle—Bɛluale Adenle Biala Azo Bɛlile Menli Daselɛ
Sukoa ndenle mɔɔ Nyamenle menli ɛlua zo ɛha edwɛkpa ne ɛhile menli dodo biala mɔɔ bɛbahola kolaa na awieleɛ ne ara la.
TILE 8
Edwɛkɛhanlɛ Ninyɛne—Bɛyɛ Mbuluku Mɔɔ Bɛbava Bɛali Daselɛ
Kɛzi yɛ edwɛbohilelɛ gyima ne ɛhile kɛ Gyisɛse gyi yɛ nzi ɛ? Yɛ mbuluku ne mɔ anwo nɔhalɛ edwɛkɛ boni a ɔmaa ɛdie ɛdi kɛ Belemgbunlililɛ ne wɔ ɛkɛ amgba a?
TILE 9
Mɔɔ Fi Edwɛkɛhanlɛ Ne Anu Ba La—“Nzoleɛ Ɛbolo . . . Mɔɔ Ɔwɔ Kɛ Bɛbu”
Gyisɛse hilehilele ye ɛdoavolɛma sunsum nu ma ɛbulɛ kpole ne anwo ɛzukoalɛdeɛ nwiɔ mɔɔ hyia. Kɛzi ɛzukoalɛdeɛ ɛhye mɔ ka yɛ ɛnɛ ɛ?
