Saa awie bahɔ zo ayɛ ɛ gɔnwo a, ɔwɔ kɛ ɛ nee ye tendɛ. Ɛtie ye, na ɔdaye noko ɔtie wɔ. Eza noko ɔwɔ kɛ ɛka ɛ gɔnwo ne anwo edwɛkɛ kpalɛ ɛkile awie mɔ. Zɔhane ala a Nyamenle agɔnwo mɔɔ ɛbayɛ la de a. Suzu mɔɔ Baebolo ne ka ye wɔ ɛhye anwo la nea:

Ɛnee Gyihova ɛdendɛ dahuu wɔ asɔneyɛlɛ nu. “Bɛhɔ zo bɛyɛ asɔne.”​—Wulomuma 12:12.

Kenga Nyamenle Edwɛkɛ, Baebolo ne. “Ngɛlɛlera ne amuala vi Nyamenle sunsum nu, na ɔle kpalɛ ɔmaa ngilehilelɛ, bɛ nyunlu ɛhwilɛ, ninyɛne ɛdenrɛdenrɛlɛ, menli ɛtetelɛ wɔ tenleneyɛlɛ nu.”​—2 Timote 3:16.

Kilehile awie mɔ Nyamenle anwo debie. “Yemɔti, bɛhɔ, bɛyɛ maanle maanle kɔsɔɔti anu menli me ɛdoavolɛma, . . . bɛhilehile bɛ bɛmaa bɛli ninyɛne kɔsɔɔti mɔɔ meha mehile bɛ la azo.”​—Mateyu 28:19, 20.

 Bikye Nyamenle agɔnwo mɔ. “Sonla mɔɔ nee nrɛlɛbɛvolɛma tu la nwu nrɛlɛbɛ.”​—Mrɛlɛbulɛ 13:20.

Kɔ ayia wɔ Belemgbunlililɛ Asalo. “Bɛmaa yɛzuzu yɛ nwo ngoko, yɛmaa yɛ nwo anwosesebɛ yɛhɔ ɛlɔlɛ nee gyima kpalɛ ɛyɛlɛ nu, . . . bɛmaa yɛmaa yɛ nwo anwosesebɛ.”​—Hibuluma 10:24, 25.

Boa Belemgbunlililɛ gyima ne. “Bɛmaa awie biala [ɛye] mɔɔ yezuzu nwo wɔ ye ahonle nu la, ɔmmatwenlehwenle ɔ bo aze anzɛɛ ɔyɛ ye kɛ asɛɛ yemia la ati ɔ, ɔluakɛ Nyamenle kulo mɔɔ te ɔ nyunlu kyɛ debie la.”​—2 Kɔlentema 9:7.