1, 2. Ahyɛlɛdeɛ mɔɔ hyia la boni a Nyamenle ɛva ɛmaa yɛ ɛnɛ a, na duzu ati ɔ?

YƐ ANWUMA Selɛ ne ɛhyɛ yɛ debie mɔɔ sonle bolɛ la​—ngoane nee adwenle mɔɔ yɛkola yɛfa yɛsukoa ye subane ne mɔ la. (Mɔlebɛbo 1:27) Ahyɛlɛdeɛ ɛhye ati, yɛkola yɛte Baebolo ngyinlazo bo na yɛnyia nuhua nvasoɛ. Saa yɛfa yɛbɔ yɛ ɛbɛla a, yɛbahola yɛanyi wɔ sunsum nu kɛ menli mɔɔ kulo Gyihova, mɔɔ “bɛzukoa na bɛkola bɛnwu ngakyile mɔɔ wɔ kpalɛ nee ɛtane nu la.”​—Hibuluma 5:14.

² Ɛnɛ a le mekɛ mɔɔ ɔhyia kɛ yɛdwenle Baebolo ngyinlazo nwo kpalɛ a, ɔluakɛ ninyɛne kɔ zo kakyi wɔ ewiade ne anu yemɔti bɛnrɛhola bɛnrɛyɛ mɛla mɔɔ bali debie biala mɔɔ bazi wɔ ɛbɛlabɔlɛ nu la anwo gyima a. Mɔɔ ɛlɛkɔ zo wɔ ayileyɛlɛ nu la maa yɛte ɛhye abo, titile, mɔɔ fane nyile nee adenle mɔɔ bɛdua zo bɛfa mogya bɛyɛ ayile la anwo. Edwɛkɛ ɛhye hyia menli kɔsɔɔti mɔɔ kulo kɛ bɛtie Gyihova la. Noko saa yɛte nwolɛ Baebolo ngyinlazo mɔɔ hyia la abo a, yɛbahola yɛazi kpɔkɛ mɔɔ nrɛlɛbɛ wɔ nu mɔɔ bamaa yɛ adwenle nu ade na yɛahɔ zo yɛazie yɛ nwo wɔ Nyamenle ɛhulolɛ ne anu la. (Mrɛlɛbulɛ 2:6-11) Suzu ngyinlazo ɛhye mɔ bie anwo nea.

3, 4. Mekɛ boni a Baebolo ne lumuale hanle mogya nwo edwɛkɛ a, na ngyinlazo boni a ɔgyi zo a?

³ Gyihova lumua hilele kɛzi ngoane nee mogya lua adenle ko azo yɛɛ kɛzi nwolɛ te na ɔle nwuanzanwuanza la wɔ mekɛ  mɔɔ Keen hunle Ebɛle la. Nyamenle zele Keen kɛ: “Ɛ diema ne mogya ne mɔɔ gua azɛlɛ ne anwo la ɛlɛsu avɛlɛ me.” (Mɔlebɛbo 4:10) Wɔ Gyihova anye zo, ɛnee Ebɛle mogya ne gyi ɛkɛ maa ye ngoane ne mɔɔ bɛpɛ zo atisesebɛ nu la. Yemɔti wɔ adenle bie azo, ɛnee Ebɛle mogya ne ɛlɛsu avɛlɛ Nyamenle kɛ ɔli nzenralɛ ɔmaa ye.​—Hibuluma 12:24.

⁴ Wɔ Nowa Azuyilɛ ne anzi, Nyamenle manle alesama adenle kɛ bɛkola bɛdi nane noko ɔnle kɛ bɛdi mogya. Nyamenle hanle kɛ: “Debie ko ala a metua bɛ kɛ bɛmmadi a, yemɔ a le nane mɔɔ mogya ne tɛbɔ nu la, ɔboalekɛ mogya ne anu a ye ngoane wɔ a. . . . , mebabiza ye mealie mogya ne wɔ ye ɛkɛ.” (Mɔlebɛbo 9:4, 5) Mɛla ɛhye wɔ ɛkɛ maa Nowa abozoamra kɔsɔɔti badwu ɛnɛ. Ɔsi zolɛ kɛ edwɛkɛ mɔɔ Nyamenle hanle hilele Keen kɛ mogya gyi ɛkɛ maa abɔdeɛ kɔsɔɔti ngoane la le zɔ. Zɔhane mɛla ne noko da ye ali kɛ Gyihova, ngoane Nzufeanvea ne nee awie biala mɔɔ ɛmbu ngoane nee mogya la bali.​—Edwɛndolɛ 36:9.

5, 6. Kɛzi Mosisi Mɛla ne manle ɔlale ali kɛ mogya le nwuanzanwuanza na ɔsonle bolɛ ɛ? (Eza nea ɛlɛka “ Bu Nane Ngoane.”)

⁵ Bɛmanle kɛzi nɔhalɛ edwɛkɛ nwiɔ ɛhye hyia kpalɛ la lale ali wɔ Mosisi Mɛla ne anu. Yɛkenga ye wɔ Sɛlɛvolɛma 17:10, 11 kɛ: ‘Saa awie biala, . . . di mogya a, mebahyi sonla zɔhane mɔɔ di mogya la, na meaye ye meavi ye menli ne avinli. Ɔluakɛ nwonane ne ngoane wɔ mogya ne anu, yɛɛ meva memaa kɛ bɛva bɛbɔ afɔle wɔ afɔlemokyea ne azo bɛyɛ mgbɔdalɛ bɛmaa bɛ nwo, ɔluakɛ mogya a bɛfa bɛkpɔda ɛtane a, ɔboalekɛ ngoane wɔ nu.’ *​—Nea ɛlɛka “ Mogya Lɛ Mgbɔdalɛ Tumi.”

⁶ Saa bɛanva nane bie mɔɔ bɛkɛhu ye la mogya bɛanli gyima wɔ afɔlemokyea ne azo a, ɛnee ɔwɔ kɛ bɛtwi bɛgua aze. Saa  bɛyɛ ɛhye a, ɛnee bɛlɛdua sɛkɛlɛneɛ adenle zo bɛaziane ngoane ne bɛamaa ɔ Menle. (Mɛla ne 12:16; Yizikeɛle 18:4) Noko, yɛ ye nzonlɛ kɛ, ɛnee ɔngyia kɛ Yizilayɛma yɛ ninyɛne maa ɔbo zo kɛ bɛtwi mogya mɔɔ vea nane ne kodoka biala anu la bɛagua kolaa na bɛali. Saa Yizilayɛnli bie ku nane na ɔtwi mogya ne ɔgua aze wɔ adenle kpalɛ zo a, ɔkola ɔfa adwenle mɔɔ anu te la ɔdi, ɔboalekɛ ɛnee yebu Ngoane Maavolɛ ne.

7. Kɛzi Devidi hilele kɛ ɔbu ngoane kɛ ɔle nwuanzanwuanza ɛ?

 ⁷ Devidi, ‘sonla mɔɔ sɔ Nyamenle anye la,’ dele mogya nwo mɛla mɔɔ Nyamenle vale manle la ngyinlazo ne abo. (Gyima ne 13:22) Kenle ko bie mɔɔ ɛnee nzuhɔne ɛlɛku ye kpalɛ la, ye menli ne anu nsa veale bɛ nwo hɔle agbɔvolɛ azokoɛleɛ hɔzale nzule wɔ bula bie anu rɛlɛle ye. Duzu a Devidi yɛle a? Ɔhanle kɛ saa ɔno nzule ne a ɛnee yenlo “menli ne mɔɔ vale bɛ ngoane dole nzeleba hɔzale la mogya.” Wɔ Devidi anye zo, ɛnee nzule ne le ye menli ne mogya anzɛɛ ngoane. Yemɔti ɔnva nwo kɛ ɛnee nzuhɔne ɛlɛku ye la, “ɔguale ye aze ɔmanle” Gyihova.​—2 Samoɛle 23:15-17.

8, 9. Asoo mekɛ mɔɔ bɛdele Keleseɛne asafo ne la Nyamenle adwenle mɔɔ ɔlɛ wɔ ngoane nee mogya nwo la hakyile? Kilehile nu.

⁸ Bɛvale mogya nwo mɛla ne bɛmanle Nowa la anzi ɛvolɛ kɛyɛ 2,400, yɛɛ bɛvale Mɛla ne bɛmanle Yizilayɛma la anzi ɛvolɛ kɛyɛ 1,500, Gyihova luale ye sunsum nwuanzanwuanza ne azo manle alumua Keleseɛne asafo ne neazo eku ne hɛlɛle kɛ: ‘Sunsum Nwuanzanwuanza ne nee yɛdayɛ yɛdie yɛto nu kɛ yɛnrɛva Kpomgbolo kpole biala yɛnrɛkpolo bɛ kɔme kɛ ngyehyɛlɛ ɛhye mɔ mɔɔ hyia la ala. Bɛmmadi aleɛ mɔɔ bɛva bɛkpa munzule anzɛɛ bɛva bɛzɔ amonle la, bɛmmadi mogya, bɛmmadi nane mɔɔ bɛlofo ye na bɛampɛ ɔ kɔme la, na bɛhwe bɛ nwo bɛvi nla nwo ɛbɛlatane nwo.’​—Gyima ne 15:28, 29.

⁹ Ɔda ali wienyi kɛ, alumua neazo eku ne dele ɔ bo kɛ mogya le nwuanzanwuanza na saa awie anva anli gyima wɔ adenle kpalɛ zo a ɔle ɛtane kɛmɔ awozonlezonlenlɛ anzɛɛ nla nwo ɛbɛlatane de ala la. Nɔhalɛ Keleseɛnema mɔɔ wɔ ɛkɛ ne ɛnɛ la die ɛhye to nu. Bieko, kɛmɔ bɛsuzu Baebolo ngyinlazo nwo la ati, bɛkola bɛsi kpɔkɛ mɔɔ sɔ Gyihova anye la wɔ mogya nwo.

10, 11. (a) Kɛzi Gyihova Alasevolɛ bu mogya nee mogya nu ninyɛne titile nna ne mɔɔ bɛfa bɛmaa la ɛ? (b) Mogya nwo edwɛkɛ boni a Keleseɛnema bahola anyia nwolɛ adwenle ngakyile a?

¹⁰ Gyihova Alasevolɛ te ɔ bo kɛ “bɛmmadi mogya” kile kɛ ɔnle kɛ bɛdie mogya yɛɛ ɔnle kɛ bɛtwe bɛmaa awie anzɛɛ  bɛmaa bɛtwe bɛ mogya bɛsie na nzinlii bɛava bɛamaa bɛ. Kɛmɔ bɛbu Nyamenle mɛla ne la ati, bɛnlie mogya nu ninyɛne titile nna ne: mogya nu ngoane ngɛkɛba kɔkɔlɛ, mogya nu ngoane ngɛkɛba fufule, mogya nu ngoane ngɛkɛba ndɛbandɛba, yɛɛ mogya nu nzule.

¹¹ Ɛnɛ, bɛkola bɛdua adenle bie azo bɛnyia mogya nu ninyɛne ngyikyi ngyikyi bɛfi mogya nu ninyɛne titile nna ne anu na bɛfa bɛdi gyima wɔ ndenle ngakyile zo. Asoo Keleseɛnenli bahola alie mogya nu ninyɛne ngyikyi ngyikyi ne mɔ bie ɔ? Asoo ɔbu bɛ kɛ bɛle “mogya” ɔ? Ɔwɔ kɛ awie biala si ɔ ti anwo kpɔkɛ wɔ ɛhye anwo. Zɔhane ala a ɔwɔ kɛ awie biala si ɔ ti anwo kpɔkɛ wɔ ndenle mɔɔ bɛdua zo bɛyɛ ayile mɔɔ le kɛ hemodialysis, hemodilution, yɛɛ cell salvage mɔɔ bɛfa awie mogya bɛdi gyima wɔ nu la anwo a, noko ɔnle kɛ ɔyɛ mogya mɔɔ bɛhwe bɛzie ɛkɛ dɛba la.​—Nea Mokanwo edwɛkɛ “Mogya Nu Ninyɛne Ngyikyi Ngyikyi Nee Ndenle Mɔɔ Bɛdua Zo Bɛyɛ Apelehyɛne.”

12. Kɛzi ɔwɔ kɛ yɛbu edwɛkɛ mɔɔ awie kola fa ye adwenle si nwolɛ kpɔkɛ la ɛ?

 ¹² Saa ɔwɔ kɛ yɛsi yɛ ti anwo kpɔkɛ wɔ edwɛkɛ bie anwo a, asoo ɔkile kɛ nwolɛ ɛngyia Gyihova ɔ? Kyɛkyɛ, ɔluakɛ mɔɔ wɔ yɛ adwenle nee yɛ ahonle nu la hyia Gyihova kpole. (Bɛgenga Mrɛlɛbulɛ 17:3; 24:12.) Yemɔti saa yɛfa asɔneyɛlɛ yɛyɛ ayile anzɛɛ adenle bie mɔɔ bɛdua zo bɛyɛ ayile la anwo neɛnleanu yɛwie a, ɔwɔ kɛ yɛtie yɛ adwenle ne mɔɔ yɛva Baebolo ne yɛtete ye la. (Wulomuma 14:2, 22, 23) Ɔnle kɛ yɛmaa awie mɔ si kpɔkɛ maa yɛ, yɛɛ ɔnle kɛ yɛbiza kɛ, “Saa ɛdawɔ a le medame a, anrɛɛ duzu a ɛbayɛ a?” Wɔ edwɛkɛ zɛhae mɔ anu, ɔwɔ kɛ Keleseɛnenli ko biala ‘soa ye adesoa.’ *​—Galeehyeama 6:5; Wulomuma 14:12; nea ɛlɛka “ Asoo Mebu Mogya Kɛ Ɔle Nwuanzanwuanza?”

13. Duzu a Gyihova mɛla nee ye ngyinlazo maa yɛnwu ye wɔ ɔ nwo a? Yɛ nwolɛ neazo.

¹³ Mɛla nee ngyinlazo mɔɔ wɔ Baebolo ne anu la maa yɛnwu kɛ Gyihova le mɛla Maavolɛ mɔɔ ze nrɛlɛbɛ yɛɛ Selɛ mɔɔ lɛ ɛlɔlɛ mɔɔ ɔdwenle ɔ mra boɛyɛlɛ nwo kpalɛ la. (Edwɛndolɛ 19:7-11) Ɔwɔ nuhua kɛ tɛ kpɔkɛdelɛ kpalɛ ti a bɛvale mɛla ne mɔɔ se “bɛhwe bɛ nwo bɛvi . . . mogya nwo” la bɛmanle a, noko ɔbɔ yɛ nwo bane ɔfi ngyegyelɛ mɔɔ menli mɔɔ die mogya nyia la anwo. (Gyima ne 15:20) Nɔhalɛ nu, dɔketama dɔɔnwo die to nu kɛ apelehyɛne mɔɔ bɛnva mogya a bɛyɛ la le “ayileyɛlɛ mɔɔ le kpalɛ tɛla biala” mɔɔ wɔ ɛkɛ ne ɛnɛ a. Wɔ nɔhalɛ Keleseɛnema afoa nu, edwɛkɛ zɛhae mɔ si zolɛ kɛ Gyihova lɛ nrɛlɛbɛ molozo yɛɛ ɔlɛ ɛlɔlɛ ɔmaa ɔ mra.​—Bɛgenga Ayezaya 55:9; Dwɔn 14:21, 23.

14, 15. (a) Mɛla boni a maa yɛnwu kɛ Nyamenle lɛ ɛlɔlɛ maa ye menli a? (b) Kɛ ɔkɛyɛ na wɔava banebɔlɛ mɛla ɛhye mɔ anu ngyinlazo wɔali gyima ɛ?

¹⁴ Nyamenle mɛla ne mɔ dɔɔnwo manle ɔlale ali kɛ ɔdwenle  ye menli mɔɔ ɛnee wɔ tete Yizilayɛ la boɛyɛlɛ nwo kpalɛ. Kɛ neazo la, ɛnee ɔwɔ kɛ Yizilayɛnli die ye sua ti zo bane amaa awie vi zo andɔ aze, ɔboalekɛ ɛnee bɛta bɛyɛ ninyɛne dɔɔnwo wɔ bɛ sua ti zo. (Mɛla ne 22:8; 1 Samoɛle 9:25, 26; Nihɛmaya 8:16; Gyima ne 10:9) Nyamenle manle bɛ mɛla noko kɛ ɔwɔ kɛ bɛnea ɛnlankɛ nyinli boɛ na yeamboda awie. (Adendulɛ 21:28, 29) Saa awie anli mɛla ɛhye mɔ azo a, ɛnee ɔkile kɛ ɔndwenle ɔ gɔnwo mɔ boɛyɛlɛ nwo na ɔbahola yeali mogya nwo fɔlɛ.

¹⁵ Adenle boni azo a ɛbahola wɔava ngyinlazo mɔɔ wɔ mɛla ɛhye mɔ anu la wɔali gyima ɛ? Duzu ati a ɛnnea kɛzi wɔ kale, kɛzi ɛka kale, wɔ nyɛmoa, wɔ sua nu, wɔ gyima nu, yɛɛ debie mɔɔ ɛfa ɛdie ɛ nye la de la ɛ? Wɔ maanle bie mɔ anu, esiane maa ngakula dɔɔnwo wu, ɔluakɛ bɛyɛ debie a bɛnnea boɛ. Noko ngakula mɔɔ bɛkulo kɛ bɛsie bɛ nwo wɔ Nyamenle ɛhulolɛ ne anu la bu ngoane kɛ ɔsonle bolɛ na bɛnva ninyɛne mɔɔ bahola aboda bɛ la bɛnlie bɛ nye. Bɛndwenle kɛ ngakula ɛngola ɛmboda. Emomu, bɛ nye die bɛ ngakula nu na bɛtwe bɛ nwo bɛfi ninyɛne mɔɔ esiane wɔ nu la anwo.​—Nolobɔvo ne 11:9, 10.

16. Baebolo ngyinlazo boni a fane ɛkolɛyelɛ nwo a? (Eza nea ɔbodwɛkɛ.)

¹⁶ Wɔ Nyamenle anye zo kakula mɔɔ la ɛkolɛ nu la bɔbɔ ngoane sonle bolɛ. Wɔ tete Yizilayɛ, awie boda nrenzɛvolɛ na saa raalɛ ne anzɛɛ ɔ ra ne wu a, Nyamenle bu ahenle kɛ yehu sonla na ɔwɔ kɛ ‘bɛku ye.’ * (Bɛgenga Adendulɛ 21:22, 23.) Ɛnee akee dwenle kɛzi Gyihova te nganeɛ wɔ ngakula dɔɔnwo mɔɔ menli mɔɔ bɛ ɛbɛla ɛzɛkye na bɛkpondɛ kɛ bɛ nwo tɔ bɛ la anye fuu ye bɛ gua ɛvolɛ biala la anwo nea.

17. Kɛzi ɛbakyekye awie mɔɔ yele ɔ ko kolaa na yeazukoa Nyamenle ngyinlazo la arɛle ɛ?

¹⁷ Na saa raalɛ bie yele ɔ ko kolaa na yeazukoa Baebolo ne  anu nɔhalɛ ne ɛ? Asoo ɔkile kɛ Nyamenle ɛnrɛze ye anwunvɔne ɔ? Kyɛkyɛ, ɔngile zɔ! Nɔhalɛ nu, awie biala mɔɔ kɛnlu ɔ nwo nɔhalɛ nu la bahola anyia anwodozo kɛ Gyihova balua Gyisɛse mogya ne mɔɔ ɔhwinle ɔguale la azo ava ye ɛtane ahyɛ ye.  (Edwɛndolɛ 103:8-14; Ɛfɛsɛsema 1:7) Gyisɛse mumua ne hanle kɛ: “Meamba kɛ mebavɛlɛ tenlenema, emomu mebavɛlɛ ɛtanevolɛma meamaa bɛanlu bɛ nwo.”​—Luku 5:32, NW.

18. Kɛzi Baebolo ne maa yɛnwu debie titile mɔɔ maa bɛku menli dɔɔnwo la ɛ?

¹⁸ Saa ɛye awie mɔ mɔɔ ɔnle kɛ yɛboda bɛ la ɛsie ahane a, Gyihova kulo kɛ yɛye ɛkpɔlɛ mɔɔ maa bɛka mogya dɔɔnwo bɛgua la yɛfi yɛ ahonle nu. Ɛzoanvolɛ Dwɔn hɛlɛle kɛ: “Awie biala mɔɔ kpɔ ɔ diema la le kɔdiawu.” (1 Dwɔn 3:15) Tɛ kɛ sonla zɛhae ɛngulo ɔ diema ala, emomu ɔ kunlu a anrɛɛ yewu. Bie a ye ɛkpɔlɛ ne bahola ayɛ ɛzonledolɛ anzɛɛ adalɛbɔlɛ mɔɔ saa ɔle nɔhalɛ a anrɛɛ Gyihova babua ahenle ndɛne wɔ nwo la. (Sɛlɛvolɛma 19:16; Mɛla ne 19:18-21; Mateyu 5:22) Nea kɛzi ɔhyia kɛ yɛbɔ mɔdenle yɛye ɛkpɔlɛ biala mɔɔ vea yɛ ahonle nu la a!​—Gyemise 1:14, 15; 4:1-3.

19. Kɛzi awie mɔɔ fa Baebolo ngyinlazo di gyima la bu Edwɛndolɛ 11:5 nee Felepaema 4:8, 9 ɛ?

¹⁹ Menli mɔɔ bu ngoane kɛmɔ Gyihova bu ye na bɛkulo kɛ bɛsie bɛ nwo wɔ ye ɛhulolɛ ne anu la eza koati basabasayɛlɛ biala. Edwɛndolɛ 11:5 ka kɛ: “Ɔkyi mɔɔ kulo konle konle la.” Ngɛlɛlera ɛhye ɛnga Nyamenle subane nwo edwɛkɛ ala; ɔle ngyinlazo mɔɔ ɔwɔ kɛ yɛfa yɛbɔ yɛ ɛbɛla a. Ɔka menli mɔɔ kulo Nyamenle la ahonle yemɔti bɛnva debie biala mɔɔ basabasayɛlɛ wɔ nu la bɛnlie bɛ nye. Zɔhane ala a edwɛkɛ mɔɔ kile kɛ Gyihova a le ‘ Anzondwolɛ Nyamenle’ la ka ye azonvolɛ maa bɛfa ninyɛne mɔɔ le ngɛnlɛma, mɔɔ sɔ ɛnyelɛ, mɔɔ ayɛlɛyelɛ wɔ nwo, na ɔfa anzondwolɛ ɔba la bɛsie bɛ adwenle nee bɛ ahonle nu a.​—Bɛgenga Felepaema 4:8, 9.

20-22. Afoa boni a Keleseɛnema gyi wɔ ewiade ne anu a, na kɛmɔti ɛ?

²⁰ Seetan ewiade ne amuala ɛli mogya nwo fɔlɛ wɔ Nyamenle anyunlu. Bɛyɛ ye maanyɛlɛ ngyehyɛleɛ ne anwo nvoninli  wɔ Ngɛlɛlera ne anu kɛ nane anwo ɛzulolɛ mɔɔ ɛhu menli mgbe dɔɔnwo mɔɔ Gyihova menli boka nwo la. (Daneɛle 8:3, 4, 20-22; Yekile 13:1, 2, 7, 8) Ewiade tumililɛ mɔɔ bɛva nane bɛyɛ nwolɛ nvoninli la nee gualilɛma yɛɛ abɔdeɛ nwo nrɛlɛbɛvolɛma ɛyɛ ko na bɛyɛ akodeɛ mɔɔ yɛ ɛzulolɛ la na bɛlua zo bɛnyia bɛ nwo kpole. “Abɔnsam di ɛtane ewiade ye azo belemgbunli” amgba!​—1 Dwɔn 5:19.

²¹ Kɛmɔ Gyisɛse ɛdoavolɛma ‘ɛnle ewiade ɛdeɛ’ na bɛnva bɛ nwo bɛnwula maanyɛlɛ nee konle nu la ati, bɛdabɛ mumua ne bɛnli mogya nwo fɔlɛ yɛɛ bɛnli ɛzonle wɔ mogya nwo fɔlɛ mɔɔ bɛ maanle di la anwo. * (Dwɔn 15:19; 17:16) Kɛmɔ Kelaese yɛle la, saa awie mɔ yɛ bɛ kpɔdekpɔde a, bɛnyɛ bɛ bie. Emomu, bɛkulo bɛ kpɔvolɛma, na bɛsɛlɛ bɛmaa bɛ.​—Mateyu 5:44; Wulomuma 12:17-21.

²² Mɔɔ tɛla ɔ amuala la, nɔhalɛ Keleseɛnema ɛnva bɛ nwo ɛmbɔnle ‘Babelɔn Kpole ne,’ ewiade adalɛ ɛzonlenlɛ maanle ne mɔɔ ɛli mogya nwo fɔlɛ kpole kpalɛ la. Nyamenle Edwɛkɛ  ne ka kɛ: “Babelɔn [Kpole ne anu] yɛɛ bɛnwunle Nyamenle kpɔmanvolɛma nee Nyamenle menli ne mogya a, yɛɛ bɛdabɛ mɔɔ bɛhunle bɛ wɔ ewiade la amuala mogya wɔ” a. Ɛhye ati, bɛbɔ yɛ kɔkɔ wɔ Babelɔn Kpole ne anwo kɛ: “Bɛvinde, me menli.”​—Yekile 17:6; 18:2, 4, 24.

23. Duzu a kile kɛ awie ɛhwe ɔ nwo ɛfi Babelɔn Kpole ne anwo a?

²³ Saa awie pɛ ye duma nu fi asɔne bie anu a ɔngile kɛ yehwe ɔ nwo yevi Babelɔn Kpole ne anwo bɔkɔɔ. Ɔwɔ kɛ eza ɔkyi nyɛleɛ ɛtane mɔɔ adalɛ ɛzonlenlɛ maa nwolɛ adenle anzɛɛ kanvo, mɔɔ bie a le ɛbɛlazɛkyelɛ, maanyɛlɛ mɔɔ bɛfa bɛ nwo bɛwulowula nu, yɛɛ anyebolo mɔɔ bɛfa bɛkpondɛ nwonane afoa nu ninyɛne la. (Bɛgenga Edwɛndolɛ 97:10; Yekile 18:7, 9, 11-17) Nea kɛzi nyɛleɛ ɛhye mɔ maa bɛta bɛka mogya bɛgua a!

24, 25. (a) Duzu a Nyamenle bagyinla zo aze awie mɔɔ di mogya nwo fɔlɛ mɔɔ kɛnlu ɔ nwo la anwunvɔne a? (b) Duzu a ngyehyɛleɛ ɛhye kakye yɛ wɔ Baebolo mekɛ zo ɛ?

²⁴ Kolaa na yɛanwu nɔhalɛ ɛzonlenlɛ ne la yɛ nuhua ko biala boale Seetan ewiade ne wɔ adenle bie azo na ɔlua zo yɛlile mogya nwo fɔlɛ. Noko akee, kɛmɔ yɛhakyile yɛ subane, yɛnyianle diedi wɔ Kelaese ɛkpɔnedeɛ afɔlebɔlɛ ne anu na yɛyilale yɛ ngoane zo yɛmanle Nyamenle la ati, yɛnyianle Nyamenle anwunvɔnezelɛ nee sunsum nu banebɔlɛ. (Gyima ne 3:19) Banebɔlɛ ɛhye kakye yɛ Baebolo mekɛ zo ɛvealeka suakpole ne mɔ.​—Ɛdianlɛ 35:11-15; Mɛla ne 21:1-9.

²⁵ Kɛzi bɛyɛle zɔhane ngyehyɛleɛ ne ɛ? Saa Yizilayɛnli bie anye ɛnla nwo na ɔku awie a ɔwɔ kɛ ɔnriandi ɔkɔ ɛvealeka suakpole ɛhye mɔ ko azo. Saa ndɛnebuavolɛma mɔɔ fɛta la di edwɛkɛ ne wie a, ɔwɔ kɛ ahenle mɔɔ anye ɛnla nwo na ɔhunle sonla ne la tɛnla ɛvealeka suakpole ne azo kɔkpula kɛ ɛsɔfo kpanyinli ne kɛwu. Akee ɔbahola yeahɔdɛnla ɛleka biala mɔɔ ɔkulo la. Nea Nyamenle anwunvɔnezelɛ nee kɛzi ɔbu alesama ngoane la anwo neazo kɛnlɛma ko! Debie mɔɔ wɔ ɛkɛ ne ɛnɛ mɔɔ le kɛ zɛhae tete ɛvealeka suakpole ne mɔ la a le ngyehyɛleɛ mɔɔ Nyamenle ɛyɛ mɔɔ gyi Kelaese ɛkpɔnedeɛ afɔlebɔlɛ ne azo, kɛ ɔfa yeabɔ yɛ nwo bane yeavi ewule nwo kɛ tɛ yɛ nye fuu a yɛanli mɛla mɔɔ fane nwuanzanwuanza mɔɔ ngoane nee  mogya de la azo a. Asoo ɛ nye sɔ zɔhane ngyehyɛleɛ ne? Kɛ ɔkɛyɛ na wɔahile kɛ ɛ nye sɔ ɛ? Debie mɔɔ ɛbahola wɔayɛ la a le kɛ ɛbamaa awie mɔ alie banebɔlɛ nwo nziezielɛ mɔɔ Nyamenle ɛyɛ la ado nu, titile, wɔ mekɛ mɔɔ ‘anwongyelelɛ kpole ne’ ɛlɛbikye ndɛndɛ la.​—Mateyu 24:21; 2 Kɔlentema 6:1, 2.

26-28. Adenle boni azo a gyinlabelɛ mɔɔ yɛwɔ nu ɛnɛ la le kɛ ngapezonli Yizikeɛle ɛdeɛ ne a, na kɛ ɔkɛyɛ na yɛazie yɛ nwo wɔ Nyamenle ɛhulolɛ ne anu ɛ?

²⁶ Gyinlabelɛ mɔɔ Nyamenle menli wɔ nu wɔ yɛ mekɛ ye anu la maa yɛkakye mɔɔ ɛnee tete ngapezonli Yizikeɛle mɔɔ Gyihova yɛle ye Yizilayɛma sunsum nu sinzavolɛ wɔ nu la. Nyamenle hanle hilele ye kɛ: “Mekɛ biala mɔɔ ɛkɛde me nloa anu edwɛkɛ la kakye bɛ wɔ nwolɛ.” Saa Yizikeɛle bule ɔ nye guale ye gyima ne azo a, anrɛɛ ɔbali menli mɔɔ bɛhunle bɛ wɔ Gyɛlusalɛm ɛzɛkyelɛ ne anu la anwo fɔlɛ. (Yizikeɛle 33:7-9) Noko Yizikeɛle yɛle tieyɛ yemɔti yeanli mogya biala anwo fɔlɛ.

²⁷ Ɛnɛ, yɛbikye Seetan ewiade ne awieleɛ. Ɛhye ati, Gyihova Alasevolɛ bu ye kɛ ɔle bɛ gyima yɛɛ ɔle nwolɛ adenle mɔɔ bɛnyia kɛ bɛkɛbɔ ‘mekɛ ne mɔɔ bɛ Nyamenle ne fa ali nzenralɛ’ nee Belemgbunlililɛ edwɛkɛ ne nolo la. (Ayezaya 61:2; Mateyu 24:14) Asoo ɛfa ɛ nwo ɛwula gyima ɛhye mɔɔ hyia la ɛyɛlɛ nu kpalɛ ɔ? Ɛzoanvolɛ Pɔɔlo manle ɔ nye bolole ye edwɛkɛhanlɛ gyima ne anwo kpalɛ. Yemɔti ɔholale ɔhanle kɛ: “Saa bɛ nuhua biala minli a, menli nwolɛ ɛzonle. Ɔluakɛ meanva debie biala mɔɔ fane Nyamenle ngyehyɛlɛ ne anwo la meanvea bɛ.” (Gyima ne 20:26, 27) Neazo kɛnlɛma mɔɔ yɛbahola yɛazukoa la boni ɛ!

²⁸ Nɔhalɛ nu, amaa yɛazie yɛ nwo wɔ Gyihova ɛhulolɛ kpole mɔɔ ɔlɛ ɔmaa yɛ kɛ ɔ mra anu la, tɛ ngoane nee mogya ala a ɔwɔ kɛ yɛbu ye kɛmɔ Gyihova bu ye la a. Ɔwɔ kɛ yɛmaa yɛ nwo noko te anzɛɛ yɛyɛ nwuanzanwuanza wɔ ɔ nye zo, kɛmɔ yɛbanwu ye wɔ tile ne mɔɔ doa zo anu la.