Gyihova kpondɛ kɛ menli mɔɔ bɛgya bɛ nwo la di nɔhalɛ maa bɛ agyalɛ ngyehyɛleɛ ne. Mekɛ mɔɔ Gyihova hanle nrenya nee raalɛ mɔɔ lumua bɔle nu la, ɔhanle kɛ: ‘Ɔwɔ kɛ nrenya . . . fa ɔ nwo bɔ ɔ ye anwo kyengye, na bɛ mu nwiɔ bɛbɔ nu bɛyɛ nwonane ko.’ Nzinlii, Gyisɛse Kelaese zile edwɛkɛ zɔhane azo, na ɔvale bie ɔbokale nwo kɛ: “Zɔhane ati mɔɔ Nyamenle ɛha ɛbɔ nu la, ɔnle kɛ awie biala kpakye nu.” (Mɔlebɛbo 2:24; Mateyu 19:3-6) Ɛhye ati, Gyihova nee Gyisɛse bu agyalɛ kɛ ɔle mekɛ tendenle agɔnwolɛvalɛ mɔɔ ewule a tete nu a. (1 Kɔlentema 7:39) Kɛmɔ agyalɛ le ngyehyɛleɛ nwuanzanwuanza la ati, ɔnle kɛ bɛbu ewolebɔlɛ kɛ ɔle debie ekyi. Nɔhalɛ nu, Gyihova kyi ewolebɔlɛ mɔɔ ɔngyi Ngɛlɛlera ne azo la.​—Malakae 2:15, 16.

 Ewolebɔlɛ ngyinlazo mɔɔ wɔ Baebolo ne anu la a le boni? Gyihova kyi agyalɛzɛkyelɛ nee nla nwo ɛbɛlatane. (Mɔlebɛbo 39:9; 2 Samoɛle 11:26, 27; Edwɛndolɛ 51:4) Nɔhalɛ nu, kɛmɔ ɔbu nla nwo ɛbɛlatane kɛ ɔle ɛtane kpole la ati, ɔmaa bɛkola bɛgyinla zolɛ bɛbɔ ewole. (Ɛkpondɛ kɛ ɛnwu mɔɔ nla nwo ɛbɛlatane kile la anwo edwɛkɛ a, nea Tile 9 ɛdendɛkpunli 7, ɛleka mɔɔ bɛhilehile nla nwo ɛbɛlatane nu wɔ ɛkɛ la.) Gyihova maa agyalɛ bokavolɛ mɔɔ anwo ɛnlɛ edwɛkɛ la adenle maa ɔsi ye kpɔkɛ kɛ ɔ nee mɔɔ bɔle ɛbɛlatane ne la kɛdɛnla anzɛɛ ɔkɛbɔ ewole a. (Mateyu 19:9) Ɛhye ati, saa bokavolɛ mɔɔ anwo ɛnlɛ edwɛkɛ la si kpɔkɛ kɛ ɔbɔ ewole a, ɛnee ɔtɛyɛle debie mɔɔ Gyihova kyi a. Noko akee, mekɛ ko ne ala, Keleseɛne asafo ne ɛnzi awie biala adua kɛ ɔbɔ ewole. Nɔhalɛ nu, gyinlabelɛ bie mɔ bahola amaa bokavolɛ ne mɔɔ ɔ nwo ɛnlɛ edwɛkɛ la azi kpɔkɛ kɛ ɔ nee bokavolɛ ne mɔɔ ɛbɔ ɛbɛlatane ne la kɛdɛnla, titile saa yenlu ɔ nwo nɔhalɛ nu a. Kɛ ɔde ye biala la, menli mɔɔ kola gyinla Ngɛlɛlera ne azo bɔ ewole la ɔwɔ kɛ si bɛ ti anwo kpɔkɛ na bɛdie ngyegyelɛ biala mɔɔ kɛvi bɛ kpɔkɛzilɛ ne anu kɛra la bɛto nu.​—Galeehyeama 6:5.

Wɔ gyinlabelɛ bie mɔ mɔɔ yɛ se la anu, Keleseɛnema bie mɔ ɛzi kpɔkɛ kɛ bɛtete bɛ agyalɛ ne anu anzɛɛ bɛbɔ ewole, ɔnva nwo kɛ bɛ bokavolɛ ne ɛtɛbɔle nla nwo ɛbɛlatane la. Saa ɔba ye zɛhae a, Baebolo ne tu ahenle mɔɔ ɛhwe ɔ nwo la folɛ kɛ “ɔmmakɔ agyalɛ fofolɛ anzɛɛ ɔ nee ɔ hu dɛba ne ɛhɔbɔ nu.” (1 Kɔlentema 7:11) Keleseɛnenli zɔhane ɛnlɛ adenle kɛ ɔkɛkpondɛ awie fofolɛ ɔkɛgya. (Mateyu 5:32) Suzu gyinlabelɛ ekyi mɔɔ anu yɛ se mɔɔ bie mɔ ɛbu ye kɛ bɛkola bɛgyinla zo bɛtete bɛ agyalɛ nu la anwo nea.

Saa ɔtu ɔ gye kɛ ɔnrɛboa a. Ehyia kpole bahola aha abusua ne mɔɔ ɔmmaa bɛnnyia ninyɛne mɔɔ bɛhyia wɔ ɛbɛlabɔlɛ nu la, ɔluakɛ kunli ne ɛkpo kɛ ɔkɛnlea bɛ ɔnva nwo kɛ ɔkola ɔyɛ zɔ la. Baebolo ne ka kɛ: ‘Saa awie ɛngola ye sua nu amra nea a, ɛnee yekpo diedi ne na ɔle sonla ɛtane ɔtɛla mɔɔ ɛnlɛ diedi bɔbɔ la.’ (1 Temɔte 5:8) Saa nrenya zɛhae mɔɔ yɛ zɔ la angakyi ye subane a, bie a raalɛ ne bazi kpɔkɛ kɛ ɔ nee ngakula ne mɔ boɛyɛlɛ ti ɔbalua mɛla adenle zo yeatete agyalɛ  ne anu. Nɔhalɛ nu, ɔwɔ kɛ asafo nu mgbanyinli suzu ɛzonle mɔɔ bɛkɛdo Keleseɛnenli bie kɛ ɔnnea ye abusua la anwo boɛ. Awie kpo kɛ ɔnrɛnlea ye abusua a, bɛkola bɛtu ye bɛfi asafo ne anu.

Basabasayɛlɛ mɔɔ anu yɛ se. Agyalɛ bokavolɛ bie bahola ayɛ basabasa dedee yeamaa ye bokavolɛ ngoane anzɛɛ ye kpɔkɛdelɛ ala esiane nu. Saa agyalɛ bokavolɛ ne mɔɔ yɛ basabasa la le Keleseɛnenli a, ɔwɔ kɛ mgbanyima ne mɔ neɛnlea edwɛkɛ ne anu nwu nɔhalɛ mɔɔ wɔ nu la. Bɛkola bɛtu awie mɔɔ ɔfa ɛya kpole na ɔboda awie mɔ la bɛfi asafo ne anu.​—Galeehyeama 5:19-21.

Awie ɛzonlenlɛ mɔɔ bɛmaa ɔyɛ se. Agyalɛ bokavolɛ bie bahola abɔ mɔdenle biala kɛ ɔnrɛmaa ye bokavolɛ ɛnrɛzonle Nyamenle anzɛɛ ɔbabɔ mɔdenle kɛ, ɔmaa yeabu Nyamenle mɛla zo wɔ adenle bie azo. Saa ɔba ye zɛhae a, bie bokavolɛ ne mɔɔ bɛlɛgyegye ye la bahola azi kpɔkɛ kɛ, ɔdua mɛla adenle zo ɔtete agyalɛ ne anu a, yemɔ ala a le adenle kokye mɔɔ bamaa ‘yeadie Nyamenle yeadɛla sonla’ a.​—Gyima ne 5:29.

Saa edwɛkɛ mɔɔ anu yɛ se mɔɔ yɛha nwolɛ edwɛkɛ la bie si a, ɔnle kɛ awie biala bɔ mɔdenle kɛ ɔdi bokavolɛ ne mɔɔ anwo ɛnlɛ edwɛkɛ la anzo kɛ ɔhwe ɔ nwo ɔvi agyalɛ ne anwo anzɛɛ ɔdɛnla nwolɛ. Yɛ gɔnwo mɔ Keleseɛnema mɔɔ ɛnyi wɔ sunsum nu nee asafo nu mgbanyinli bahola agyinla Baebolo ne azo adu yɛ folɛ na bɛaboa yɛ ɛdeɛ, noko bɛnrɛhola bɛnrɛnwu edwɛkɛ mɔɔ si wɔ kunli nee yelɛ avinli la amuala. Gyihova ala a kola nwu ɛhye a. Nɔhalɛ nu, saa Keleseɛne raalɛ anzɛɛ nrenya wudu ye sua nu edwɛkɛ nu maa ɔyɛ kpole kɛ ɔgyinla zo yeahwe ɔ nwo yeavi ɔ hu anzɛɛ ɔ ye anwo a, ɛnee ɔnli Nyamenle anzɛɛ agyalɛ ngyehyɛleɛ ne eni. Saa awie bɔ adwenle ɛtane bie fea kɛ ɔdua zo yeatete ye agyalɛ nu a, Gyihova ze. Nɔhalɛ nu, ‘debie biala anwo la zo yɛɛ zolɛ ɛbuke wienyi, wɔ mɔɔ yɛbabu yɛ mgbonda yeahile ye la anyunlu.’ (Hibuluma 4:13) Noko saa gyinlabelɛ bie mɔɔ anu yɛ se la kɔ zo mekɛ tendenle na Keleseɛnenli bie si kpɔkɛ kɛ ɔtete ye agyalɛ ne anu a, ɔbamaa ɔ nwo adɔ ye a, ɔnle kɛ awie biala tendɛ tia ye. Awieleɛ ne, “yɛ muala yɛbagyinla Nyamenle ndɛnebualɛ ebia ne anyunlu.”​—Wulomuma 14:10-12.