1, 2. Gyisɛse ɛlɛkilehile wɔ Kapɛnayɛm la, duzu a ɛnee Pita anye la a, noko boni a zile a?

PITA nleanle Gyisɛse tievolɛma ne anyunlu kpalɛ. Ɛnee bɛwɔ Kapɛnayɛm nyianu sua ne anu. Ɛkɛ ne a Pita vi a, ɛnee ɔyɛ ye fɛlɛhyelɛ gyima ne wɔ Galeli Nyevile ne sɔlɔ; ɛkɛ ne a ɛnee ɔ gɔnwo mɔ dɔɔnwo, ye mbusua, nee menli mɔɔ ɔ nee bɛ di gua la wɔ a. Ɔnyɛ nwanwane kɛ ɛnee Pita anye la kɛ menli mɔɔ wɔ sua ne azo la bɛanwu Gyisɛse kɛmɔ yenwu ye la na bɛazukoa Nyamenle Belemgbunlililɛ ne anwo edwɛkɛ mɔɔ yɛ anyelielɛ la bɛavi kilehilevolɛ kpole ne ɛkɛ. Noko yeamba ye zɔ.

² Menli dɔɔnwo gyakyile edwɛkɛ ne ɛdielɛ. Bie mɔ dendɛle bɛ nzo abo na bɛkpole Gyisɛse edwɛkɛ ne. Mɔɔ gyegyele Pita kpalɛ la a le debie mɔɔ Gyisɛse ɛdoavolɛ ne mɔ bie yɛle la. Ɛnee bɛ nye ɛnlie nɔhalɛ ne mɔɔ Gyisɛse ɛlɛkilehile bɛ la anwo bieko. Bɛvale ɛya kpole. Bie mɔ dendɛle tiale ye na bɛhanle kɛ Gyisɛse ngilehilelɛ ne yɛ se. Bɛkpole kɛ bɛbadie na bɛvile nyianu sua ne anu kɛ bɛnrɛdoa Gyisɛse bieko.—Bɛgenga Dwɔn 6:60, 66.

3. Duzu a Pita diedi ne boale ye manle ɔyɛle ye fane dɔɔnwo a?

³ Ɛnee tɛnlabelɛ ne anu yɛ se maa Pita nee ɔ gɔnwo mɔ ɛzoanvolɛma ne. Pita ande mɔɔ Gyisɛse hanle wɔ zɔhane mekɛ ne la abo kpalɛ. Pita nwunle kɛ saa bɛfa Gyisɛse edwɛkɛ ne kɛmɔ yeha ye ala la a ɔbahola yeayɛ ngyegyelɛ. Duzu a Pita bayɛ a? Ɛnee tɛ mekɛ mɔɔ lumua anzɛɛ mɔɔ li awieleɛ mɔɔ bɛsɔ nɔhalɛ mɔɔ ɔdi yeamaa ɔ Menle ne bɛanlea la ɛne. Maa yɛnlea kɛzi Pita diedi ne boale ye manle ɔgyinlanle ngyegyelɛ ɛhye mɔ anloa la.

4, 5. Kɛzi Gyisɛse yɛle ninyɛne wɔ ndenle mɔɔ le ngakyile wɔ mɔɔ menli kpondɛ avi ye ɛkɛ la anwo ɛ?

⁴ Fane dɔɔnwo ne ala, ninyɛne mɔɔ Gyisɛse yɛle nee edwɛkɛ mɔɔ ɔhanle la zinle Pita anwo. Ɔdwu mekɛ ne bie a, ɔ Menle ne yɛ debie na ɔtendɛ wɔ adenle mɔɔ le ngakyile ɔfi mɔɔ menli kpondɛ avi Ye ɛkɛ la anwo. Ɛnee Gyisɛse ɛlumua ɛmaa menli apenle dɔɔnwo  aleɛ wɔ nwanwane adenle zo. Ɛhye ati ɛnee bɛkpondɛ kɛ bɛsie ye belemgbunli. Noko, ɔyɛle debie ɔmanle ɔzinle menli ne anwo, ɔmanle ye ɛdoavolɛ ne mɔ vale ɛlɛne hɔle Kapɛnayɛm. Mekɛ mɔɔ ɛnee ɛdoavolɛ ne mɔ lua azule ne azo nɔe ne la, Gyisɛse yɛle debie bieko ɔmanle ɔzinle bɛ nwo, ɔdiale Galeli Nyevile ne mɔɔ ɛnee anwoma kpole ɛlɛtu zolɛ la anye ɔvale ɔyɛle diedi nwo neazo ɔmanle Pita.

⁵ Aleɛ hyenle la, bɛnwunle kɛ menli ne ɛva nlɛne ɛdoa bɛ wɔ azule ne anzi nehane. Ɔda ali kɛ, ɛnee menli ne mɔ kpondɛ kɛ Gyisɛse dua nwanwane adenle zo maa bɛ aleɛ na tɛ kɛ asɛɛ bɛkpondɛ nɔhalɛ edwɛkɛ bie bɛadie la ati ɔ. Gyisɛse hwile bɛ nyunlu kɛ bɛkulo nwonane nu ninyɛne. (Dwɔn 6:25-27) Bɛdoale zɔhane adawubɔlɛ ne azo wɔ Kapɛnayɛm nyianu sua ne anu, ɛleka mɔɔ Gyisɛse hilehilele nɔhalɛ edwɛkɛ ne anu ɔmanle ɔzinle menli ne anwo la.

6. Ndonwo boni a Gyisɛse yɛle a, na duzu a ye tievolɛma ne yɛle a?

⁶ Ɛnee Gyisɛse ɛmkpondɛ kɛ menli ne ba ye ɛkɛ ɔlua aleɛ ti, emomu ɛnee ɔkpondɛ kɛ bɛnwu kɛ saa bɛnyia diedi wɔ ye afɔlebɔlɛ ne anu na bɛdi ye neazo ne anzi a, Gyihova bamaa bɛ ngoane mɔɔ ɛnlɛ awieleɛ. Yemɔti ɔyɛle ndonwo bie, ɔvale ɔ nwo ɔtotole mana, kpanwo mɔɔ vi anwuma rale wɔ Mosisi mekɛ zo la anwo. Mekɛ mɔɔ bie mɔ kpole ye la, ɔvale ndonwo ɔhilehilele nu kɛ ɔwɔ kɛ bɛdi ye nwonane na bɛno ye mogya ne amaa bɛanyia ngoane. Edwɛkɛ ɛhye mɔɔ ɔhanle la akee manle menli ne vale ɛya kpole. Bie mɔ hanle kɛ: “Ngilehile ɛhye yɛ se. Nwane a kɛhola ɛhye azo di a?” Gyisɛse ɛdoavolɛma ne anu dɔɔnwo gyakyile ɔ nzi ɛlilɛ. *—Dwɔn 6:48-60, 66.

7, 8. (a) Duzu a Pita ande ɔ bo wɔ Gyisɛse gyinlabelɛ ne anwo a? (b) Kɛzi Pita buale kpuyia mɔɔ Gyisɛse bizale ɛzoanvolɛma ne la ɛ?

⁷ Duzu a Pita bayɛ a? Gyisɛse edwɛkɛ ne gyegyele ye kpalɛ. Yeande ɔ bo kɛ ɔwɔ kɛ Gyisɛse wu amaa yeali Nyamenle ɛhulolɛdeɛ nwo gyima. Asoo Pita nyianle adwenle kɛ ɔnrɛdoa Gyisɛse kɛmɔ ɛdoavolɛma mɔɔ ɛha la yɛle la? Kyɛkyɛ; ɛnee Pita lɛ subane titile bie mɔɔ le ngakyile ɔfi menli zɔhane ɛdeɛ ne anwo a. Duzu subane ɔ?

⁸ Gyisɛse hakyile ɔ nye nleanle ye ɛzoanvolɛma ne na ɔbizale bɛ kɛ: “Na bɛdabɛ noko ɛ bɛkɛhulo kɛ bɛkɛhɔ ɔ?” (Dwɔn 6:67) Ɔbizale 12 ne, noko Pita a dendɛle a. Ɛnee ɔta ɔyɛ zɔ. Ɔbayɛ kɛ ɛnee Pita a le kpanyinli wɔ bɛ nu a. Kɛ ɔde ye biala la, ɔdaye a ɛnee ɔta  ɔdumua ɔtendɛ wɔ ekpunli ne anu a; ɔbayɛ kɛ Pita andwelehwenle ɔ bo aze wɔ mɔɔ ɛnee wɔ ye adwenle nu la anwo. Ye biala anu, mɔɔ ɛnee wɔ ye adwenle nu la a le edwɛkɛ kɛnlɛma ɛhye mɔɔ yɛ rɛle ɛnrɛvi la: “Awulae, nwane ɛkɛ a yɛkɔ a? Wɔmɔ a ɛlɛ edwɛkɛ mɔɔ maa ngoane mɔɔ ɛnlɛ awieleɛ a.”—Dwɔn 6:68.

9. Kɛzi Pita hilele kɛ ɔdi nɔhalɛ ɔmaa Gyisɛse ɛ?

⁹ Asoo zɔhane edwɛkɛ ne mɔ ɛnga wɔ ahonle? Diedi mɔɔ Pita nyianle wɔ Gyisɛse anu la boale ye manle ɔlale subane titile bie ali—nɔhalɛlilɛ. Pita nwunle ye wienyi kɛ Gyisɛse angome a le Dievolɛ mɔɔ Gyihova vale manle la, na Gyisɛse fa Nyamenle Belemgbunlililɛ ne anwo ngilehilelɛ a die ngoane a. Pita nwunle kɛ saa bɔbɔ ɔnde ninyɛne bie mɔ abo a, ɛleka bieko ɛnle ɛkɛ mɔɔ ɔbahola yeahɔ a, saa ɔkulo kɛ ɔnyia Nyamenle anyunlu ɛlolɛ nee dahuu ngoane nyilalɛ ne bie a.

10. Kɛzi yɛbahola yɛazukoa Pita nɔhalɛlilɛ ne ɛnɛ ɛ?

¹⁰ Asoo zɔhane a ɛte nganeɛ a? Ɔyɛ alɔbɔlɛ kɛ ɛnɛ, menli dɔɔnwo ka kɛ bɛkulo Gyisɛse noko bɛnli nɔhalɛ bɛmmaa ye. Amaa yɛali nɔhalɛ yɛamaa Kelaese la ɔwɔ kɛ yɛnyia Pita adwenle ne bie wɔ Gyisɛse ngilehilelɛ ne anwo. Ɔwɔ kɛ yɛsukoa ye ngilehilelɛ ne, yɛte ɔ bo na yɛfa yɛbɔ yɛ ɛbɛla saa bɔbɔ yɛnde bie mɔ abo anzɛɛ bɛ nee yɛ adwenle ɛnnyia a. Saa yɛdi nɔhalɛ a, yɛbahola yɛanyia dahuu ngoane ne mɔɔ Gyisɛse kulo kɛ yɛnyia la.—Bɛgenga Edwɛndolɛ 97:10.

11. Nienwu a Gyisɛse nee ye ɛdoavolɛ ne mɔ hɔle a? (Eza nea ɔ bo ɛkɛ edwɛkɛ ne.)

¹¹ Mekɛ ekyii guale nu la, Gyisɛse nee ye ɛzoanvolɛma ne yɛɛ ɛdoavolɛma bie pɛle adenle tendenle hɔle sɔlɔ afoa nu. Ɔdwu mekɛ ne bie na awie wɔ Galeli Nyevile ne azo a, ɔkola ɔnwu Hɛmɔn Boka ne mɔɔ ezukɔtweaba ɛdɔ ɛgua zo mɔɔ wɔ Ɛwɔkɛ Azɛlɛ ne sɔlɔ nehane la. Ɛnee Gyisɛse nee ye ɛdoavolɛma ne ɛlɛkɔ namunamu mɔɔ bikye Felepe Sizalia la na bɛlɛbikye Hɛmɔn Boka ne. * Wɔ ɛleka ɛhye mɔɔ bɛkola bɛnwu Ɛwɔkɛ Azɛlɛ ne wɔ nyiakɛ la, yɛɛ Gyisɛse bizale ye ɛdoavolɛma ne kpuyia bie mɔɔ hyia la.

12, 13. (a) Duzu ati a Gyisɛse bizale adwenle mɔɔ menli ne lɛ wɔ ɔ nwo la ɛ? (b) Kɛzi Pita hilele kɛ ɔlɛ nɔhalɛ diedi wɔ mekɛ mɔɔ ɔbua Gyisɛse edwɛkɛ ne la ɛ?

¹² Gyisɛse bizale ye ɛdoavolɛma ne kɛ, “Menli se mame a le nwane?” Yɛbahola yɛapɛ Pita mɔɔ ɛlɛnea Gyisɛse anyunlu na ɔlɛdwenle  ɔ Menle ne atiakunlukɛnlɛma, ye tumi nee ye nrɛlɛbɛ mɔɔ nuhua la ɛkɛ la anwo nvoninli. Ɛnee Gyisɛse kulo kɛ ɔnwu kɛzi ye tievolɛma ne nwu ye la. Gyisɛse ɛdoavolɛma ne yele kpuyia ne anloa, bɛhanle adwenle mɔɔ ɛndenrɛ mɔɔ menli lɛ wɔ ɔ nwo la. Noko ɛnee Gyisɛse kulo kɛ ɔnwu dɔɔnwo. Asoo ɛnee ye ɛdoavolɛma ne mɔɔ bikye ye la ɛlɛyɛ nvonleɛ ko ne ala bie? Akee ɔbizale bɛ kɛ, “Na bɛdabɛ noko ɛ? Bɛse mame a le nwane?”—Luku 9:18-20.

¹³ Pita yɛle ye ndɛ yele ɔ nloa bieko. Ɔvale akɛnrasesebɛ ɔhanle edwɛkɛ mɔɔ anu la ɛkɛ, na ɔhanle menli dɔɔnwo ne mɔɔ ɛnee bɛwɔ ɛkɛ la ahonle. Pita buale kɛ: “Wɔmɔ a ɛle Kelaese ne, mɔɔ le tease Nyamenle ne Ara ne.” Yɛbahola yɛapɛ kɛzi Gyisɛse zelele hilele Pita na ɔhanvole ye la anwo nvoninli. Gyisɛse manle Pita nwunle kɛ tɛ sonla a ɛye ɛhile ye a, emomu Gyihova Nyamenle a ɛye zɛhae nɔhalɛ ne ɛhile menli mɔɔ lɛ nɔhalɛ diedi la a. Pita holale nwunle nɔhalɛ edwɛkɛ mɔɔ Gyihova ɛye ɛhile la anu ko—Mɛzaya anzɛɛ Kelaese ne mɔɔ bɛbɔle ɔ nwo ɛwɔkɛ mekɛ tendenle la!—Bɛgenga Mateyu 16:16, 17.

14. Nwolɛ adenle titile boni a Gyisɛse vale manle Pita a?

¹⁴ Kelaese ɛhye a tete ngapezo bie hanle kɛ ɔle bolɛ ne mɔɔ suasivoma ne bakpo ye la. (Edw. 118:22; Luku 20:17) Ɛnee Gyisɛse ɛlɛka zɔhane ngapezo ne mɔ anwo edwɛkɛ wɔ mekɛ mɔɔ ɔhanle kɛ Gyihova bava ye asafo ne azie zɔhane bodane ne azo kɛmɔ ɛnee Pita ɛhile kɛ yemɔ a le Kelaese ne la. Akee Gyisɛse vale nwolɛ adenle bie mɔ mɔɔ hyia wɔ asafo ne anu la ɔmanle Pita. Yeammaa Pita dibilɛ titile bie yeandɛla ɛzoanvolɛma mɔɔ ɛha la kɛmɔ bie mɔ kile la, emomu ɔmanle ye gyima. Ɔvale “Anwuma Belemgbunlililɛ ne azanvɛ ne” ɔmanle Pita. (Mat. 16:19) Pita banyia adenle abuke anyelazo mɔɔ menli banyia kɛ bɛbawolo Nyamenle Belemgbunlililɛ ne anu la anwo adenle amaa menli ekpunli nsa—Dwuuma, Samɛleama, nee Maanle Maanle ne anu amra anzɛɛ menli mɔɔ bɛnle Dwuuma la.

15. Duzu a manle Pita hwile Gyisɛse anyunlu a, na duzu edwɛkɛ a ɔhanle a?

¹⁵ Noko akee, nzinlii Gyisɛse hanle kɛ menli mɔɔ bɛkɛmaa bɛ dɔɔnwo la, bɛkɛlie dɔɔnwo wɔ bɛ ɛkɛ, na ɛnee Pita boka menli ɛhye mɔ anwo. (Luku 12:48) Gyisɛse hɔle zolɛ hanle Mɛzaya ne anwo nɔhalɛ edwɛkɛ mɔɔ amaneɛ mɔɔ ɔbanwu ye nee ye ɛhunle wɔ Gyɛlusalɛm boka nwolɛ la. Pita dele ɛhye la, ɔgyegyele ye.  Ɔvale Gyisɛse ɔhɔle ahane na ɔhwile ɔ nyunlu ɔhanle kɛ: “Awulae, kosoɛ! Nyamenle ɛkpa ɛgua! Ɛhye ɛnrɛzi ɛ nwo zo ɛlɛ.”—Mat. 16:21, 22.

16. Kɛzi Gyisɛse denrɛle Pita ɛ, na folɛdulɛ mɔɔ baboa yɛ muala la boni a wɔ Gyisɛse edwɛkɛ ne anu a?

¹⁶ Ɛnee Pita dwenle kɛ ɔlɛboa ye, yemɔti bie a Gyisɛse nyelebɛnloa ne zinle ɔ nwo. Ɔhakyile ɔ nzi ɔzile Pita na ɔnleanle ɛdoavolɛma ne mɔɔ ɛha la, mɔɔ bie a ɛnee bɛdabɛ noko bɛlɛ adwenle zɔhane bie la na ɔhanle kɛ: “Seetan, se di me nzi nehae! Ɛndu folɛ kpalɛ. Wɔ adwenle ne le sonla adwenle. Ɔnvi Nyamenle ɛkɛ.” (Mat. 16:23; Mak. 8:32, 33) Folɛdulɛ mɔɔ baboa yɛ muala la wɔ Gyisɛse edwɛkɛ ne anu. Ɔnyɛ se kɛ yɛbamaa sonla adwenle avo Nyamenle ɛdeɛ ne azo. Saa yɛyɛ zɔ wɔ mekɛ bɔbɔ mɔɔ yɛkulo kɛ yɛboa awie la a, bie a ɛnee yɛlɛmaa ye anwosesebɛ yɛamaa yeayɛ mɔɔ bazɔ Seetan anye na tɛ mɔɔ bazɔ Nyamenle anye. Kɛzi Pita yɛle ye nyɛleɛ ɛ?

17. Mɔɔ Gyisɛse zele Pita kɛ “se di me nzi nehae” la, duzu a ɛnee ɔlɛkile a?

¹⁷ Bie a Pita nwunle kɛ ɛnee Gyisɛse ɛngile kɛ ɔle Seetan Abɔnsam amgba. Ɔluakɛ, Gyisɛse andendɛ angile Pita kɛmɔ ɔdendɛle ɔhilele Seetan la. Gyisɛse hanle hilele Seetan kɛ: “Dwazo ɛkɛ ne kɔ”; na ɔhanle ɔhilele Pita kɛ: “Se di me nzi nehae.” (Mat. 4:10) Gyisɛse amkpo ye ɛdoavolɛ ne mɔɔ ɔnwunle ninyɛne mgbalɛ wɔ ye nu la, emomu ɔdenrɛdenrɛle Pita adwenle ɛtane ne mɔɔ ɛnee ɔlɛ ye wɔ edwɛkɛ ɛhye anwo la. Ɛnee ɔnle kɛ Pita di ɔ Menle ne anyunlu na ɔtenda ɔ gyakɛ anu emomu, ɛnee ɔwɔ kɛ ɔdi ɔ nzi na ɔboa ye.

18. Kɛzi Pita lale nɔhalɛlilɛ ali ɛ, na kɛzi yɛbahola yɛazukoa ye ɛ?

¹⁸ Asoo Pita zule kpolera, ɔvale ɛya anzɛɛ ɔ nye anlie nwolɛ? Kyɛkyɛ; ɔbɛlɛle ɔ nwo aze ɔdiele folɛdulɛ. Ɔlale nɔhalɛlilɛ ali bieko. Ɔdwu mekɛ ne bie a, menli mɔɔ li Kelaese anzi la amuala hyia folɛdulɛ. Saa yɛbɛlɛ yɛ nwo aze yɛtie folɛdulɛ na yɛfa yɛdi gyima a, yɛɛ yɛbabikye Gyisɛse Kelaese nee ɔ Ze, Gyihova Nyamenle a.—Bɛgenga Mrɛlɛbulɛ 4:13.

19. Edwɛkɛ mɔɔ yɛ azibɛnwo la boni a Gyisɛse hanle a, na duzu a ɔbayɛ kɛ ɛnee Pita ɛlɛdwenle nwo a?

¹⁹ Akee Gyisɛse hanle edwɛkɛ mɔɔ yɛ azibɛnwo bieko: ‘Bɛhakye ɛhye, menli bie gyigyi bɛ avinli ɛke mɔɔ bɛnrɛwu kyesɛ bɛnwu Sonla  Ra ne kɛ yera kɛ Belemgbunli la.’ (Mat. 16:28) Nɔhalɛ nu, zɔhane edwɛkɛ ne manle Pita hulole kɛ ɔbanwu dɔɔnwo. Duzu a ɛnee Gyisɛse ɛlɛkile a? Bie a Pita dwenlenle kɛ wɔannea a zɔhane folɛ ne mɔɔ anu yɛ se mɔɔ ɔdule ye la ɛnrɛmaa ɔnrɛnyia nwolɛ adenle titile ɛhye.

20, 21. (a) Ka ɛnyelɛzodeɛnwunlɛ ne mɔɔ Pita nwunle ye la anwo edwɛkɛ. (b) Kɛzi adawu ne mɔɔ menli ne lile wɔ ɛnyelɛzodeɛnwunlɛ ne anu la boale Pita ɛ?

²⁰ Kɛyɛ dapɛne ko anzi, Gyisɛse vale Gyemise, Dwɔn nee Pita hɔle “boka tendenle bie” azo—ɔbayɛ kɛ Boka Hɛmɔn mɔɔ ɛnee bikye bɛ la. Bie a ɛnee aleɛ ɛdwo ɔluakɛ ɛnee nafelɛ ɛlɛku mrenya nsa ne. Noko, mekɛ mɔɔ Gyisɛse ɛlɛyɛ nzɛlɛlɛ la, debie bie zile manle bɛ nye zo tetele bɛ.—Mat. 17:1; Luku 9:28, 29, 32.

²¹ Gyisɛse bɔle ɔ bo kɛ ɔkakyi wɔ bɛ nye zo. Ɔ nyunlu bɔle ɔ bo kɛ ɔta, na ɔyɛle nwohyee kɛ ewia ne la. Ye adɛladeɛ ne mɔ noko yɛle fufule nwohyee. Na menli nwiɔ rabokale Gyisɛse anwo, ko gyi  ɛkɛ maa Mosisi yɛɛ ko ne noko le Yilaegya. Bɛ nee ye hanle Nyamenle “ngyehyɛlɛ ne mɔɔ fane Gyisɛse ewule mɔɔ ɔbawu Gyɛlusalɛm la” nee ye ewudwazo nwo edwɛkɛ. Pita nwunle ye wienyi kɛ ɔvonle wɔ mekɛ mɔɔ ɔhanle kɛ ɔnle kɛ Gyisɛse nwu amaneɛ na ɔwu la!—Luku 9:30, 31.

22, 23. (a) Kɛzi Pita lale subane ngɛnlɛma ali ɛ? (b) Duzu nyilalɛ bieko a Pita, Gyemise nee Dwɔn nyianle ye nɔe ne a?

²² Pita dele nganeɛ kɛ ɔwɔ kɛ ɔfa ɔ nwo ɔwula ɛnyelɛzodeɛnwunlɛ ɛhye mɔɔ le ngakyile la anu—bie a amaa ɛnyelɛzodeɛnwunlɛ ne ahyɛ. Ɛnee ɔbayɛ kɛ Mosisi nee Yilaegya ɛlɛgyakyi Gyisɛse ɛkɛ ahɔ. Yemɔti, Pita zele kɛ: “Yɛmenle, ɔle kpalɛ kɛ yɛwɔ ɛke a. Maa yɛbɔ nzeseɛ nsa, wɔ ɛdeɛ ko, Mosisi ɛdeɛ ko yɛɛ Yilaegya ɛdeɛ ko.” Nɔhalɛ nu, ɛnee Gyihova azonvolɛ nwiɔ ɛhye mɔɔ bɛwu mekɛ tendenle mɔɔ bɛwɔ ɛnyelɛzodeɛnwunlɛ ne anu la ɛngyia nzeseɛ. Ɛnee Pita ɛnze edwɛkɛ mɔɔ ɔdaye mumua ne ɔlɛka la. Asoo ɛ nye ɛnlie Pita subane ngɛnlɛma ne anwo?—Luku 9:33.

²³ Pita, Gyemise nee Dwɔn nyianle nyilalɛ bieko wɔ nɔe ne. Amungu rahedale bɛ nwo zo wɔ boka ne azo. Bɛdele ɛnelɛ bie wɔ amungu ne anu—Gyihova ane ɔ! Ɛnelɛ ne hanle kɛ: “Me Ra mɔɔ mekpa nu meye ye la ɛne, bɛdie ye.” Akee ɛnyelɛzodeɛnwunlɛ ne rale awieleɛ, na ɔhale Gyisɛse nee ɛdoavolɛ ne mɔ wɔ boka ne azo.—Luku 9:34-36.

24. (a) Kɛzi ɛhakyilɛ ɛnyelɛzodeɛnwunlɛ ne boale Pita ɛ? (b) Kɛzi ɛnyelɛzodeɛnwunlɛ ne baboa yɛ ɛ?

²⁴ Nea kɛzi ɛhakyilɛ ɛnyelɛzodeɛnwunlɛ ne boale Pita a—nea kɛzi ɔbaboa yɛdayɛ noko a! Ɛvolɛ dɔɔnwo anzi, ɔhɛlɛle nwolɛ adenle mɔɔ ɔnyianle ye nɔe ne kɛ ɔlumuale ɔnwunle Gyisɛse kɛ anwuma Belemgbunli mɔɔ ɔlɛ anyunlunyia na ‘ɔnwunle ye anyunlunyia kpole ne ɔ nye zo’ la anwo edwɛkɛ. Zɔhane ɛnyelɛzodeɛnwunlɛ ne lale ngapezo dɔɔnwo mɔɔ wɔ Nyamenle Edwɛkɛ ne anu la ali na bɛmanle Pita diedi nu mianle amaa yeahola yeagyinla sɔnea mɔɔ ɔbayia ye kenlebie la anloa. (Bɛgenga 2 Pita 1:16-19.) Kɛmɔ Pita yɛle la, saa yɛdi nɔhalɛ yɛmaa yɛ Menle ne mɔɔ Gyihova ɛkpa ye ɛmaa yɛ la, yɛsukoa ye na yɛdie ye folɛdulɛ nee ye ɛdenrɛdenrɛlɛ yɛto nu na yɛtoa ye dahuu a, yɛ diedi nu bamia kpalɛ.