1, 2. (a) Duzu ati a ɛnee Hana anye ɛnlie wɔ mekɛ mɔɔ ɛnee ɔlɛboɔboa ɔ nwo yeamaa adendulɛ ne la ɛ? (b) Duzu a yɛsukoa yɛfi Hana edwɛkɛ ne anu a?

HANA anye ɛbolo ɛlɛboɔboa ɔ nwo amaa adendulɛ ne, na ɔlɛbɔ mɔdenle yeaye ye adwenle yeavi ye ngyegyelɛ zo. Ɛhye le anyelielɛ mekɛ; kɛmɔ ɔ hu Ɛlekana yɛ ye dɛba la, ɛvolɛ biala ɔ nee abusua ne kɔsɔɔti kɔsonle wɔ ɛzonlenlɛ sua ne anu wɔ Hyaelo. Ɛnee Gyihova kpondɛ kɛ mekɛ ɛhye yɛ anyelielɛ. (Bɛgenga Mɛla ne 16:15.) Hana ngakula nu amuala ɛnee ɔ nye die ɛvoyia zɔhane mɔ anwo. Noko kenlensa ye ninyɛne ɛhakyi wɔ ye ɛbɛlabɔlɛ nu.

² Hana ɛnee lɛ kunli mɔɔ ɔkulo ye. Noko ɛnee Ɛlekana gya raalɛ fofolɛ. Bɛfɛlɛ ye Pɛnena, na ɛnee ɔmkpondɛ kɛ Hana anye die wɔ ɛbɛlabɔlɛ nu. Ɔkpondɛle adenle mɔɔ ɔbalua zo yeamaa Hana ali nyane wɔ mekɛ ɛhye anu la. Adenle boni azo? Mɔɔ hyia kpalɛ la, kɛzi Gyihova anu diedi mɔɔ Hana nyianle la boale ye manle ɔgyinlanle ye ngyegyelɛ ne anloa ɛ? Saa ɛlɛyia ngyegyelɛ wɔ wɔ ɛbɛlabɔlɛ nu na yemaa wɔ anyelielɛ ne ɛha aze a, Hana edwɛkɛ ne bahola aboa wɔ.

3, 4. Ngyegyelɛ mgbole nwiɔ boni a Hana yiale a, na duzu ati a ɛnee biala anu yɛ se a?

³ Baebolo ne ka ngyegyelɛ mgbole nwiɔ mɔɔ Hana yiale la anwo edwɛkɛ. Ɛnee ɔbahola yeali mɔɔ lumua la anwo gyima ekyii yeadɛla mɔɔ tɔ zo nwiɔ la. Mɔɔ lumua la, ɛnee ɔ hu gya mraalɛ nwiɔ yɛɛ ɔ hola noko kpɔ ye. Mɔɔ tɔ zo nwiɔ, ɛnee ɔle mota. Ɛnee tɛnlabelɛ ɛhye anu yɛ se maa yelɛ biala mɔɔ kpondɛ kɛ ɔwo ngakula la; noko wɔ Hana mekɛ zo ɛnee ɛhye maa bɛdi nyane kpole. Ɛnee ngakula mɔɔ bɛwɔ abusua biala anu la a maa abusua ne duma tɛnla ɛkɛ a. Yemɔti saa awie anwo a bɛmbu ye, ɛnee ɔle anyiemgba kpole.

⁴ Saa tɛ Pɛnena mɔɔ ɛnee ta Hana anye zo a, anrɛɛ ɔbahola yeagyinla ye ngyegyelɛ ne anloa. Mraalɛ dɔɔnwo ɛgyalɛ fa  ngyegyelɛ ba dahuu. Nuhua nungule ɛhwenlɛ, butule nee nyanelilɛ ɛdeɛ, bɛnga. Ɛnee ɛhye nee raalɛ ko ɛgyalɛ nwo ngyehyɛleɛ mɔɔ Nyamenle yɛle ye wɔ Yidɛn tola ne anu la ɛnle ko. (Mɔl. 2:24) Ɛhye ati, Baebolo ne ɛnga mraalɛ dɔɔnwo ɛgyalɛ nwo edwɛkɛ kpalɛ, na mɔɔ ɔzile Ɛlekana abusua ne anu la le ɛhye anwo neazo.

5. Duzu ati a ɛnee Pɛnena kpondɛ kɛ Hana di nyane a, na duzu a ɔvale ɔyɛle Hana a?

⁵ Ɛnee Ɛlekana kulo Hana kpalɛ. Dwuuma amaamuo kile kɛ ɔlumuale ɔgyale Hana kolaa na yeagya Pɛnena. Kɛ ɔde ye biala la, Pɛnena mɔɔ ɛnee twe Hana anwo nungule la manle ɔ hola ne anwo hyelele ye wɔ ndenle dɔɔnwo azo. Pɛnena holale gyegyele Hana ɔluakɛ ɛnee ɔnwo. Pɛnena wole mralɛ dɔɔnwo, na ɔmanle ɔdele nganeɛ kɛ ɔsonle bolɛ kpalɛ. Kɛ anrɛɛ ɔbali Hana anwo nyane na yeakyekye ɔ rɛle la, Pɛnena vale Hana tɛnlabelɛ ne gyegyele ye. Baebolo ne ka kɛ dahuu ɔ hola Pɛnena “si ye amgbu na ɔfa ye mota ɔse ye.” (1 Sam. 1:6) Pɛnena anye fuu a ɔyɛle zɔ a. Ɛnee ɔkpondɛ kɛ Hana di nyane, na ɔholale ɔyɛle zɔ.

6, 7. (a) Ɔnva nwo mɔdenle mɔɔ Ɛlekana bɔle kɛ ɔkyekye Hana arɛle la, duzu ati a Hana anga edwɛkɛ ne kɔsɔɔti angile ye ɛ? (b) Asoo Hana mota ne kile kɛ ɛnee Gyihova ɛkpo ye ɔ? Kilehile nu. (Nea ɔ bo ɛkɛ edwɛkɛ ne.)

⁶ Ɔbayɛ kɛ ɛvolɛ biala dwu na bɛtu adenle bɛahɔ Hyaelo a ɔyɛ Pɛnena fɛ kpole ɔluakɛ ɔbanyia adenle yeamaa Hana ali nyane. Mekɛ biala mɔɔ Ɛlekana kabɔ afɔle amaa Gyihova la, ɔtu ye afɔlebɔdeɛ ne anu ɛkpɔ ko ɔmaa ɔ ye Pɛnena na ɔmaa “ɔ mra mrenya nee mraalɛ” ne mɔ biala ɛkpɔ ko. Noko ɛnee ɔmaa ye kulovolɛ Hana ɛkpɔ titili bie. Pɛnena mɔɔ nungule ɛwie ye ku la si Hana amgbu na ɔfa ye mota ɔse ye ɔmaa ɔsu toonwo mɔɔ aleɛ bɔbɔ ɔnli bie a. Ɛlekana nwunle kɛ ye kulovolɛ Hana ɛlɛyia ngyegyelɛ yɛɛ ɔnli aleɛ yemɔti ɔbɔle mɔdenle kɛ ɔkyekye ɔ rɛle. Ɛlekana bizale ye kɛ, “Hana, duzu ati a ɛlɛsu a? Duzu ati a ɛnrɛli debie a? Duzu ati a dahuu ɛwɔ nyane nu a? Anzɛɛ me nwo ɛnlɛ nvasoɛ ɛmmaa wɔ ɛndɛla mralɛ mrenya bulu ɔ?”—1 Sam. 1:4-8.

⁷ Ɛlekana yɛle deɛ, ɔnwunle kɛ kɛmɔ Hana anwo la ati a ɔlɛdi nyane a. Hana anye liele ye arɛlekyekyelɛ mɔɔ ɛlɔlɛ wɔ nu la anwo. * Noko Ɛlekana anga Pɛnena nyɛleɛ ɛtane ne anwo edwɛkɛ; yɛɛ Baebolo  kɛlɛtokɛ ne noko ɛnga kɛ Hana hanle nwolɛ edwɛkɛ hilele ye. Bie a ɔnwunle kɛ saa ɔka Pɛnena adwenle ɛtane ne anwo edwɛkɛ ɔkile Ɛlekana a ɔbava edwɛkɛ dɔɔnwo yeara. Asoo Ɛlekana bamaa ninyɛne ayɛ boɛ? Asoo anrɛɛ ɛhye ɛnrɛmaa Pɛnena ɛkpɔlɛ ne ɛnrɛyɛ kpole, na asoo anrɛɛ Pɛnena amra ne mɔ nee ye azonvolɛ ne mɔ ɛnrɛyɛ bie ɔ? Anrɛɛ Hana bade nganeɛ dahuu kɛ bɛkpo ye.

8. Saa ɛyia ɛkpɔlɛ anzɛɛ nzisi a, duzu ati a ɛkakye kɛ Gyihova di pɛlepɛle a ɔbakyekye ɛ rɛle a?

⁸ Saa ɛnee Ɛlekana ze Pɛnena amgbuzilɛ ne anzɛɛ ɔnze bɔbɔ a, Gyihova Nyamenle ɛdeɛ, ɔnwunle ɔ muala. Ye Edwɛkɛ ne maa yɛnwu kɛ ɔnwunle debie biala, na ɛhye le kɔkɔbɔlɛ maa awie biala mɔɔ anye die nungule ɛhwenlɛ nee ɛkpɔlɛ nwo la. Noko akee, saa menli mɔɔ bɛnze nwolɛ bie na bɛkulo anzondwolɛ kɛ Hana la nwu kɛ pɛlepɛlelilɛ Nyamenle ne di ninyɛne nwo gyima wɔ ɔdaye mumua ne ye mekɛ nee ye adenle zo a, ɔmaa bɛ rɛle kyekye. (Bɛgenga Mɛla ne 32:4.) Kɛmɔ ɛnee Hana ze ɛhye la ati, ɔhɔkpondɛle moalɛ ɔvile Gyihova ɛkɛ.

9. Duzu a yɛsukoa yɛfi Hana ɛhulolɛ nu mɔɔ ɔvile ɔhɔle Hyaelo ɔnva nwo kɛ ɛnee ɔze mɔɔ ɔ hola ne bayɛ la anu a?

⁹ Wɔ nwonlomɔ ne, ɛnee awie biala anye ɛbolo ye gyima nwo. Awie biala, bɔbɔ ngakula ɛlɛboɔboa bɛ nwo amaa adendulɛ ne. Abusua ne amuala bɛadia kenle ko anzɛɛ kenle nwiɔ adenle mɔɔ ye tendenle bayɛ mayɛlɛ 20 la avi Yifelaem awoka ne mɔ azo ahɔ Hyaelo. * Ɛnee Hana ze kɛzi ɔ hola ne bayɛ ye nyɛleɛ la. Noko akee, Hana andɛnla sua nu. Ɛhye ati ɔyɛle neazo kɛnlɛma ɔmanle Nyamenle azonvolɛ ɛnɛ. Nrɛlɛbɛ ɛnle nuhua kɛ yɛbamaa awie mɔ nyɛleɛ mɔɔ ɛnle kpalɛ la aha yɛ Nyamenle ɛzonlenlɛ. Saa yɛyɛ ye zɔ a, nyilalɛ mɔɔ baboa yɛ amaa yɛagyinla yɛ ngyegyelɛ ne anloa la bakpa yɛ ti.

10, 11. (a) Duzu ati a Hana hɔle ɛzonlenlɛ sua ne anu ndɛndɛ ɛ? (b) Kɛzi Hana hanle ye ahonle nu edwɛkɛ hilele ye anwuma Selɛ ne wɔ nzɛlɛlɛ nu ɛ?

¹⁰ Mɔɔ abusua ne pɛle adenle tendenle ne mɔɔ la awoka ne azo wiele la, bɛradwule Hyaelo. Ɛnee Hyaelo wɔ boka zo yɛɛ awoka ɛbɔ ye ɛyia. Bɛlɛbikye sua ne azo la, bie a Hana dwenlenle edwɛkɛ mɔɔ ɔbaha wɔ ye nzɛlɛlɛ nu yeahile Gyihova la anwo kpalɛ. Bɛdwule na bɛlile debie bɛwiele la, Hana dwazole na ɔhɔle Gyihova ɛzonlenlɛ sua ne anu. Ɛnee Ɛsɔfo Kpanyinli Yilae de anlenkɛ ne anloa. Noko ɛnee Hana adwenle wɔ ye nzɛlɛlɛ ne azo ɛsesebɛ. Ɔnyianle anwodozo kɛ awie bade ye edwɛkɛ ne wɔ ɛzonlenlɛ sua  ne anu. Ɛnee ɔze kɛ saa awie ande ye alɔbɔlɛlilɛ ne abo bɔbɔ a, ɔ Ze mɔɔ wɔ anwuma la bade ɔ bo. Ɔlile nyane kpole na ɔbɔle ɔ bo ɔzunle.

¹¹ Mɔɔ ɛzunlɛ ne ɛlɛmaa Hana anwo awozo ye la, ɔyɛle asɔne ɔ ti anu ɔvale ye edwɛkɛ ɔdole Gyihova anyunlu. Ɔbukebukele ɔ nloa ala noko ɛnee ɔlɛsɛlɛ ɔ ti anu yeaha ye nyanelilɛ nwo edwɛkɛ. Ɔyɛle nzɛlɛlɛ mekɛ tendenle na ɔhanle ye edwɛkɛ muala ɔhilele ɔ Ze. Tɛ ralɛ mɔɔ ɛnee Hana kpondɛ kɛ ɔwo la anwo edwɛkɛ ala a ɔhanle ɔhilele Nyamenle a. Yeanva ye adwenle yeanzie nyilalɛ mɔɔ ɔbanyia ye la ala azo, emomu, mɔɔ ɔbahola yeayɛ yeamaa Nyamenle la. Ɔbɔle ɛwɔkɛ kɛ saa Gyihova maa ɔnyia ɛkolɛ ɔwo ralɛ nrenya a, ɔbadu ye nee ye ɛbɛlabɔlɛ muala yeamaa ye.—1 Sam. 1:9-11.

12. Kɛmɔ Hana neazo ne maa yɛnwu ye la, duzu a ɔwɔ kɛ yɛkakye wɔ nzɛlɛlɛyɛlɛ nwo a?

¹² Ɛhye ati Hana yɛle nzɛlɛlɛ nwo neazo manle Nyamenle azonvolɛ kɔsɔɔti. Kɛmɔ kakula ka ye edwɛkɛ kile wovolɛ mɔɔ ɔlɛ ɛlɔlɛ la, zɔhane ala a Gyihova kpondɛ kɛ ye menli ne kɔsɔɔti buke bɛ ahonle nu ka bɛ edwɛkɛ kile ye a. (Bɛgenga Edwɛndolɛ 62:8; 1 Tɛsalonaekama 5:17.) Sunsum ne manle ɛzoanvolɛ Pita hanle nzɛlɛlɛ nwo edwɛkɛ ɛhye mɔɔ kyekye yɛ rɛle la vanenle Gyihova anwo: “Bɛva bɛ adwenleadwenle muala bɛgua ɔ nwo zo, ɔboalekɛ ɔdwenle bɛ nwo.”—1 Pita 5:7.

13, 14. (a) Kɛzi Yilae bule Hana ɛ? (b) Adenle boni azo a Hana mualɛ ne le diedi nwo neazo kɛnlɛma ɛ?

¹³ Gyihova ndelebɛbo nee ye anwunvɔnezelɛ le kpole tɛla menli ɛdeɛ. Mekɛ mɔɔ Hana ɛlɛsɛlɛ la, ɛnelɛ bie manle ɔbɔle mgbatike. Yilae, ɛsɔfo kpanyinli ne mɔɔ ɛnee ɔlɛnea ye la ane ɔ. Ɔzele ye kɛ: “Duzu ati a wɔbo zɛhae ɛ? Gyakyi nzanlonlɛ na yɛ ɛ nye gyɛlɛmgbɛɛnye.” Yilae nwunle Hana anloa ne mɔɔ ɔlɛbukebuke, ye ɛzunlɛ nee kɛzi ɔlɛyɛ ye nyɛleɛ la. Kɛ anrɛɛ ɔbabiza Hana debie mɔɔ ɛlɛgyegye ye la, yeanyɛ ye zɔ na ɔhanle kɛ yebo nza.—1 Sam. 1:12-14.

¹⁴ Nea kɛzi ɛhye baha Hana wɔ mekɛ mɔɔ ɔlɛdi nyane na awie mɔɔ lɛ gyinlabelɛ kpole la eza baha edwɛkɛ mɔɔ ɔnle nɔhalɛ la ado ɔ nwo zo a! Noko akee, ɔyɛle diedi nwo neazo kɛnlɛma bieko. Yeammaa awie sinlidɔlɛ angyegye ye wɔ Gyihova ɛzonlenlɛ nu. Ɔvile ɛbulɛ nu ɔbuale Yilae na ɔhilehilele ye edwɛkɛ ne anu ɔhilele ye. Akee Yilae buale ye wɔ adenle kɛnlɛma zo kɛ: “Kɔ anzonudwolɛ nu; wɔ nzɛlɛlɛ ne mɔɔ wɔva wɔdo Yizilayɛ Nyamenle ne anyunlu la, ɔyɛ ye zɔhane ɔmaa wɔ.”—1 Sam. 1:15-17.

15, 16. (a) Kɛzi Gyihova mɔɔ Hana bukele ye ahonle nu zɛlɛle ye na ɔzonlenle ye wɔ ɛzonlenlɛ sua ne anu la boale ye ɛ? (b) Saa yɛlɛyia ngyegyelɛ a kɛzi Hana neazo ne baboa yɛ ɛ?

 ¹⁵ Kɛzi Gyihova mɔɔ Hana bukele ye ahonle nu zɛlɛle ye na ɔzonlenle ye wɔ ɛzonlenlɛ sua ne anu la boale ye ɛ? Yɛkenga kɛ: “Akee Hana hɔle sua nu, ɔlile debie na ɔgyakyile ɔ nwo alɔbɔlɛ ɛyɛlɛ.” (1 Sam. 1:18) Hana ahonle dɔle ye azule nu. Wɔ adenle biala azo, ɔvale ye adesoa ne ɔdole ye anwuma Selɛ ne mɔɔ lɛ anwosesebɛ ɔtɛla ye la anwo zo. (Bɛgenga Edwɛndolɛ 55:22.) Asoo ngyegyelɛ bie wɔ ɛkɛ mɔɔ ɔbo ɔ nwo zo ɔ? Kyɛkyɛ—biala ɛmbo ɔ nwo zo!

¹⁶ Saa yɛ sa nu to na yɛlɛyia ngyegyelɛ kpole a, ɔbayɛ kpalɛ kɛ yɛbazukoa Hana na yɛabuke yɛ ahonle nu yɛava yɛ ngyegyelɛ yɛado Ahenle mɔɔ Baebolo ne ka kɛ ‘ɔtie yɛ nzɛlɛlɛ la’ anyunlu. (Edw. 65:2) Saa yɛfa diedi yɛyɛ zɔ a, “Nyamenle anzonudwolɛ ne mɔɔ bo sonla ndelebɛbo muala azo la” bamaa yɛ nye alie.—Fel. 4:6, 7.

17, 18. (a) Kɛzi Ɛlekana hilele kɛ ɔdie Hana ɛwɔkɛ ne ɔto nu ɛ? (b) Duzu a Pɛnena nwunle ye wɔ Hana anwo a?

¹⁷ Aleɛ hyenle la, Hana nee Ɛlekana hɔle ɛzonlenlɛ sua ne anu. Ɔbayɛ kɛ ɔhanle ye nzɛlɛlɛ ne nee ye ɛwɔkɛ ne anwo edwɛkɛ ɔhilele ɔ hu ɔluakɛ ɛnee Mosisi Mɛla ne ka kɛ, saa raalɛ bɔ ɛwɔkɛ na ɔ hu ɛnlie ɛndo nu a ɔkola ɔsi ye adenle. (Ɛdi. 30:10-15) Noko Ɛlekana anzi ye adenle. Emomu, ɔ nee Hana hɔzonlenle Gyihova wɔ ɛzonlenlɛ sua ne anu kolaa na bɛahɔ bɛ sua zo.

¹⁸ Mekɛ boni a Pɛnena nwunle kɛ ye amgbuzilɛ ne ɛngyegye Hana bieko a? Baebolo ne anga, noko edwɛkɛ “ɔgyakyile ɔ nwo alɔbɔlɛ ɛyɛlɛ” kile kɛ ɔvi zɔhane mekɛ ne Hana anye liele. Kɛ ɔde ye biala la, Pɛnena akee nwunle kɛ ɔnrɛhola ɔnrɛyɛ Hana ɛhwee. Baebolo ne ambɔ ye duma bieko ɛlɛ.

19. Nyilalɛ boni a Hana nyianle a, na kɛzi ɔlale ye ali kɛ ɔ nye sɔ ahenle mɔɔ ɔyilale ye la ɛ?

¹⁹ Mekɛ ne hɔle bie la, Hana anzondwolɛ ne yɛle kpole. Ɔnrenzɛle! Hana anye liele, noko yeammaa ɔ rɛle anvi ahenle mɔɔ ɔyilale ye la. Mekɛ mɔɔ ɔwole la, ɔdonle kakula ne Samoɛle mɔɔ ɔ bo kile “Nyamenle Duma” la, na ɔtwe adwenle ɔsie Nyamenle duma mɔɔ yɛfa yɛali gyima kɛmɔ Hana yɛle la azo. Ɛvolɛ zɔhane, ɔ nee Ɛlekana nee abusua ne angɔ Hyaelo. Ɔ nee kakula ne dɛnlanle sua nu ɛvolɛ nsa hɔkpulale kɛ ɔpɛle nyɛfonlɛ la. Ɛnee ɔlɛfa yeaziezie ɔ nwo yeamaa kenle mɔɔ ɔbava ɔ ra ne yeahɔ ɛzonlenlɛ sua ne anu la.

20. Kɛzi Hana nee Ɛlekana yele ɛwɔkɛ mɔɔ bɛbɔle Gyihova la ɛ?

 ²⁰ Ɛnee ɔnla aze kɛ ɔbagyakyi ɔ ra ne wɔ Hyaelo. Ɛnee Hana ze kɛ bie a mraalɛ mɔɔ sonle wɔ ɛzonlenlɛ sua ne anu la banlea Samoɛle kpalɛ. Noko, ɛnee ɔtɛde kakula, na ninli boni a kɛhulo kɛ bɛkɛde ɔ ra ekyi zɛhae bɛkɛvi ɔ nwo mekɛ tendenle a? Noko akee, Hana nee Ɛlekana andwehwenle bɛ bo aze, bɛvile bɛ ahonle nu bɛvale kakula ne bɛhɔle. Bɛbɔle afɔle wɔ Nyamenle sua nu ɛkɛ bɛvale Samoɛle bɛmanle Yilae, na bɛhakyele ye ɛwɔkɛ ne mɔɔ Hana bɔle ye wɔ ɛkɛ mekɛ bie la.

21. Kɛzi Hana nzɛlɛlɛ mɔɔ ɔvale ɔdole Gyihova anyunlu la maa yɛnwu ye diedi ne ɛ? (Eza nea ɛlɛka “ Nzɛlɛlɛ Nwiɔ Mɔɔ Ɔyɛ Nwanwane.”)

²¹ Akee Hana yɛle nzɛlɛlɛ bie mɔɔ Nyamenle nwunle kɛ ɔfɛta kɛ bɛfa bɛboka ye Edwɛkɛ ne anwo la. Saa ɛkenga ye edwɛkɛ ne mɔɔ wɔ 1 Samoɛle 2:1-10 la a, ɛbanwu kɛzi ko biala da ye diedi ne ali la. Ɔyele Gyihova ayɛlɛ wɔ ye tumi kpole ne anwo—kɛzi ɔbɛlɛ anwomemaazoma aze, ɔyila menli mɔɔ bɛsisi bɛ, na ɔmaa ngoane ba awieleɛ anzɛɛ ɔdie ngoane la. Ɔyele ɔ Ze ne ayɛlɛ wɔ ye nwuanzanwuanzayɛlɛ, ye pɛlepɛlelilɛ nee ye nɔhalɛlilɛ ne anwo. Adwenle kpalɛ bie ati, Hana holale hanle kɛ: “Boavolɛ biala ɛnle ɛkɛ kɛ wɔmɔ yɛ Nyamenle ne ala.” Yɛfa yɛ nwo yɛto Gyihova anwo zo a ɔyɛ boɛ bɔkɔɔ, ɔngakyi, yɛɛ ɔle ɛvealeka ɔmaa menli mɔɔ bɛlɛsisi bɛ, bɛbu bɛ nye bɛgua bɛ nwo zo na bɛkɔ ye ɛkɛ ne kɛ ɔboa bɛ la.

22, 23. (a) Duzu a maa yɛdie yɛdi kɛ ɛnee Samoɛle ze kɛ ye awovolɛ kulo ye edwɛkɛ a? (b) Kɛzi Gyihova yilale Hana bieko ɛ?

²² Samoɛle ati yɛle boɛ kɛ ɔnyianle ninli mɔɔ lɛ diedi wɔ Gyihova anu la. Ɔwɔ nuhua kɛ ɛnee ɔ nwo dɔ ɔ nli wɔ mekɛ mɔɔ ɛnee ɔlɛnyi la, noko yeande nganeɛ kɛ bɛ rɛle ɛvi ye. Ɛvolɛ biala Hana kɔ Hyaelo na ɔfa tɛladeɛ mɔɔ yenwo la ɔkɔmaa ye  wɔ ɛzonlenlɛ sua ne anu. Tɛladeɛ ne mɔɔ Hana mumua ne nwonle la di daselɛ kɛ ɔkulo ɔ ra ne na ɔdwenle ɔ nwo. (Bɛgenga 1 Samoɛle 2:19.) Yɛbahola yɛapɛ Hana mɔɔ ɔlɛfa tɛladeɛ ne yeawula ɔ ra ne, yeaziezie ye, yeanlea ɔ nyunlu yeaha edwɛkɛ yeamaa ye anwosesebɛ la anwo nvoninli wɔ yɛ adwenle nu. Samoɛle nyianle nyilalɛ kɛ ɔnyianle ninli ɛhye la, na ɔnyinle ɔrayɛle nyilalɛ ɔmanle ye awovolɛ nee Yizilayɛma kɔsɔɔti.

²³ Gyihova arɛle anvi Hana noko. Ɔyilale ye ɔmanle ɔwole ngakula nnu ɔmanle Ɛlekana. (1 Sam. 2:21) Noko ɔbayɛ kɛ nyilalɛ kpole mɔɔ Hana nyianle la a le agɔnwolɛvalɛ mɔɔ ɛnee la ɔ nee ɔ Ze Gyihova avinli mɔɔ anu yɛle se ɛvolɛ biala la. Ɔrɛla ye kɛ ɛdawɔ noko ɛbayɛ ye zɔhane ala wɔ mekɛ mɔɔ ɛlɛsukoa Hana diedi ne la.