1, 2. Tɛnlabelɛ boni anu a Samoɛle dendɛle hilele Yizilayɛma a, na duzu ati a ɛnee ɔwɔ kɛ ɔmaa bɛnu bɛ nwo a?

 SAMOƐLE nleanle ye menli ne anyunlu. Nrenya ɛhye mɔɔ ɔdi nɔhalɛ na yeva ɛvolɛ dɔɔnwo yezonle kɛ ngapezonli nee ndɛnebuavolɛ la a manle menli ne yiale wɔ Gelegale a. Saa ɛnɛ a anrɛɛ ɔbayɛ kɛ May anzɛɛ June; ɛnee ɔlɛbikye wawaa mekɛ. Ɛnee hwiiti ɛbuhenle ne ɛdwu. Menli ne yɛle koonwu. Kɛ ɔkɛyɛ na Samoɛle edwɛkɛ ne aha bɛ ahonle ɛ?

² Menli ne ande kɛzi ɛnee anyebolo wɔ bɛ edwɛkɛ ne anu la abo. Bɛhanle kɛ bɛkpondɛ belemgbunli bɛamaa yeali bɛ nwo zo. Bɛande ɔ bo kɛ mɔɔ bɛlɛyɛ la kile kɛ bɛmbu Gyihova Nyamenle nee ye ngapezonli ne. Nɔhalɛ nu, ɛnee bɛlɛkpo Gyihova bɛ Belemgbunli ne! Kɛ ɔkɛyɛ na Samoɛle amaa bɛanlu bɛ nwo ɛ?

3, 4. (a) Duzu ati a Samoɛle hanle ye mgbavolɛ nu edwɛkɛ a? (b) Duzu ati a Samoɛle diedi nwo neazo ne baboa yɛ ɛ?

³ Samoɛle zele bɛ kɛ: “Meyɛ kpanyinli; me ti zo ɛyɛ nwohyee.” Ɔti zo nwohyee ne lale ye ali kɛ nrɛlɛbɛ wɔ ye edwɛkɛ ne anu. Akee ɔzele bɛ kɛ: “Sumunli me mgbavolɛ nu, meli bɛ ti toonwo a yeradwu ɛnɛ a.” (1 Sam. 11:14, 15; 12:2) Ɛnee Samoɛle ɛnyi ɛdeɛ, noko ɛnee ɔkakye mɔɔ ɔyɛle wɔ ye mgbavolɛ nu la bɔkɔɔ. Kpɔkɛ mɔɔ ɔzile wɔ ye ngakula nu la manle ɔnyianle diedi na ɔdule ɔ nwo ɔmanle Gyihova Nyamenle.

⁴ Ɛnee ɔwɔ kɛ Samoɛle nyia diedi, ɔnva nwo kɛ fane dɔɔnwo ne ala menli mɔɔ ɛnee ɛbɔ ye ɛyia la ɛnlɛ diedi na bɛnli nɔhalɛ  la. Ɛnɛ noko, ɔyɛ se kɛ yɛbanyia diedi ɔluakɛ yɛde ewiade mɔɔ diedi ɛnle nu na yekpɔlɔ la anu. (Bɛgenga Luku 18:8.) Bɛmaa yɛnlea mɔɔ yɛbahola yɛazukoa yɛavi Samoɛle neazo ne anu la; yɛbɔ ɔ bo yɛvi ye ngakula nu.

5, 6. Adenle boni azo a ninyɛne yɛle ngakyile wɔ Samoɛle ngakula nu a, na duzu ati a ɛnee ye awovolɛ die di kɛ bɛbanlea ye a?

⁵ Ninyɛne yɛle ngakyile wɔ Samoɛle ngakula nu. Bɛpɛle ye nyɛfonlɛ mɔɔ ɛnee yeli ɛvolɛ nsa anzɛɛ mɔɔ bo ekyi la, yɛɛ ɔbɔle ɔ bo kɛ ɔsonle wɔ Gyihova ɛzonlenlɛ sua ne mɔɔ wɔ Hyaelo la anu a. Ɔvi ye sua zo Releema mɔɔ kɔ ɛkɛ la babo mayɛlɛ 20. Ye awovolɛ, Ɛlekana nee Hana dule ye manle Gyihova ɛzonlenlɛ titile bie na ɔrayɛle Nazalaenli wɔ ye ngoane mekɛ kɔsɔɔti anu. a Asoo ɛnee ɛhye kile kɛ Samoɛle awovolɛ ɛkpo ye na bɛngulo ye ɔ?

⁶ Ɔnle zɔ fee! Ɛnee bɛze kɛ bɛbanlea bɛ ra ne wɔ Hyaelo. Ɔda ali kɛ Ɛsɔfo Kpanyinli Yilae nleanle lile ninyɛne nwo gyima ɔluakɛ ɛnee ɔ nee Samoɛle a yɛ gyima a. Eza ɛnee bɛyɛ ngyehyɛleɛ bɛmaa mraalɛ bie mɔ sonle wɔ ɛzonlenlɛ sua ne anu.—Ade. 38:8; Maa. 11:34-40.

7, 8. (a) Kɛzi Samoɛle awovolɛ manle ye anwosesebɛ ɛvolɛ biala ɛ? (b) Duzu a awovolɛ bahola azukoa avi Samoɛle awovolɛ ɛkɛ a?

⁷ Bieko, Hana nee Ɛlekana ammaa bɛ rɛle anvi bɛ belamunli ralɛ ne mɔɔ ɛnee le bɛ nzɛlɛlɛ nwo mualɛ la. Ɛnee Hana ɛzɛlɛ Nyamenle kɛ ɔmaa ye ralɛ nrenya na ɔbɔle ɛwɔkɛ kɛ ɔbadu ye yeamaa Nyamenle. Ɛvolɛ biala, saa Hana kɔkpɔla Samoɛle a, ɔfa tɛladeɛ fofolɛ mɔɔ ɔbava yeayɛ ye gyima wɔ ɛzonlenlɛ sua ne anu la ɔkɔmaa ye. Kakula ne anye liele ɛkpɔlalɛ zɔhane mɔ anwo. Ɔda ali kɛ ɛlɔlɛ nu mɔɔ ye awovolɛ vile manle ye anwosesebɛ nee adehilelɛ na bɛmanle ɔnwunle nwolɛ adenle mɔɔ yenyia ɔlɛsonle wɔ Gyihova ɛzonlenlɛ sua nu la boale ye kpole.

⁸ Awovolɛ bahola azukoa ninyɛne dɔɔnwo avi Hana nee Ɛlekana ɛkɛ. Awovolɛ ta fa bɛ adwenle sie bɛ mra nwonane afoa nu ngyianlɛ zo na bɛbu bɛ nye bɛgua bɛ sunsum nu ngyianlɛ zo. Noko Samoɛle awovolɛ vale sunsum ninyɛne lumuale, na ɛhye manle bɛ ra ne nyinle yɛle sonlakpalɛ.—Bɛgenga Mrɛlɛbulɛ 22:6.

9, 10. (a) Ka ɛzonlenlɛ sua ne nee kɛzi Samoɛle dele nganeɛ wɔ nwolɛ la anwo edwɛkɛ. (Eza nea ɔ bo ɛkɛ edwɛkɛ ne.) (b) Duzu gyima a ɛnee Samoɛle yɛ a, na adenle boni azo a ngakula mɔɔ wɔ ɛkɛ ɛnɛ la bahola azukoa ye neazo ne a?

 ⁹ Pɛ kakula ne mɔɔ ɔlɛnyi na ɔlua Hyaelo awoka ne mɔ azo la anwo nvoninli nea. Ɔto ɔ nye wɔ bɔnza ne anu na ɔnwu suakpole ne nee Gyihova ɛzonlenlɛ sua ne a, ɔ nye die kpole. Ɛnee ɛzonlenlɛ sua ne le ɛleka nwuanzanwuanza amgba. b Mosisi a nleanle manle bɛzile sua ɛhye wɔ ɛvolɛ kɛyɛ 400 mɔɔ ɛpɛ nu la. Ɛnee ɛkɛ ne angomekye a bɛsonle Gyihova kpalɛ wɔ ewiade kɔsɔɔti a.

¹⁰ Kakula Samoɛle anye liele ɛzonlenlɛ sua ne anwo. Wɔ edwɛkɛ mɔɔ ɔhɛlɛle ye nzinlii la anu, yɛkenga kɛ: “Kakula nrenya Samoɛle zonlenle wɔ Gyihova anyunlu na ɛnee ɔwula ɛsɔfo tɛladeɛ mɔɔ bɛva lenen bɛyɛ.” (1 Sam. 2:18, NW) Zɔhane tɛladeɛ ne di daselɛ kɛ Samoɛle boale ɛsɔfo ne mɔ wɔ ɛzonlenlɛ sua ne anu. Ɛnee Samoɛle ɛnle ɛsɔfo noko ɔyɛle gyima mɔɔ bie a le kɛ ɔbabukebuke ɛzonlenlɛ sua ne nlenkɛ ne mɔ mɔɔ finde alie nwo la nwonlomɔ biala, yɛɛ ɔzonlenle Yilae. Ɔ nye liele ye gyima ne anwo kpalɛ noko nzinlii ninyɛne bie gyegyele ye. Ɛnee ninyɛne ɛngɔ boɛ fee wɔ Gyihova sua nu ɛkɛ ne.

11, 12. (a) Nvonleɛ kpole boni a Hɔfenae nee Fenɛhaze yɛle a? (b) Ninyɛndane boni a Hɔfenae nee Fenɛhaze yɛle wɔ ɛzonlenlɛ sua ne anu a? (Eza nea ɔ bo ɛkɛ edwɛkɛ ne.)

¹¹ Wɔ Samoɛle ngakula nu, ɔnwunle ɛtanelilɛ nee ɛbɛlabɔlɛ mɔɔ ɛkpɔlɔ la. Ɛnee Yilae lɛ ɔ mra nwiɔ, Hɔfenae nee Fenɛhaze. Samoɛle edwɛkɛ ne kenga kɛ: “Nvasoɛ biala amba Yilae amra ne mɔ anwo zo. Bɛambu [Gyihova] bie.” (1 Sam. 2:12) Edwɛkɛ nwiɔ ɛhye kɔ ko. “Nvasoɛ biala amba” Hɔfenae nee Fenɛhaze anwo zo ɔboalekɛ ɛnee bɛmbu Gyihova. Bɛambu ye tenlene ngyinlazo ne mɔ. Nvonleɛ ko ɛhye manle bɛyɛle ɛtane dɔɔnwo.

¹² Nyamenle Mɛla ne hilele gyima titile mɔɔ ɔwɔ kɛ ɛsɔfo ne mɔ yɛ nee kɛzi ɔwɔ kɛ bɛbɔ afɔle wɔ ɛzonlenlɛ sua ne anu la. Adwenle kpalɛ bie ati ɔ! Ɛnee afɔlebɔlɛ zɔhane mɔ gyi ɛkɛ ne maa ɛtane fakyɛ nwo ngyehyɛleɛ mɔɔ Nyamenle ɛyɛ amaa ye menli ne  anwo ade na bɛanyia ye nyilalɛ nee ye adehilelɛ la. Noko Hɔfenae nee Fenɛhaze ammaa bɛ gɔnwo mɔ ɛsɔfoma angile ɛbulɛ ammaa afɔle ne mɔ. c

13, 14. (a) Kɛzi ɛbɛlatane mɔɔ hɔle zo wɔ ɛzonlenlɛ sua ne anu la hanle ahonlekpalɛma ɛ? (b) Adenle boni azo a Yilae anyɛ ye gyima kɛ selɛ nee ɛsɔfo kpanyinli ɛ?

¹³ Pɛ Samoɛle mɔɔ ɛlɛnea ninyɛndane mɔɔ ɛlɛkɔ zo na bɛnyɛ nwolɛ ɛhwee na edwɛkɛ ne ɛzi ɔ nwo la anwo nvoninli nea.Ɔnwunle kɛ ehyiavolɛma nee menli mɔɔ bɛmbu bɛ la ɛra ɛzonlenlɛ sua ne anu kɛ bɛba barakpondɛ sunsum nu arɛlekyekyelɛ nee anwosesebɛ, noko bɛkavi ɛkɛ ne la ɛnee bɛ sa nu ɛdo na bɛlɛdi nyane. Kɛzi ɔdele nganeɛ wɔ mekɛ mɔɔ ɔnwunle kɛ Hɔfenae nee Fenɛhaze noko ɛmbu Gyihova mɛla mɔɔ fane nla nwo ɛbɛlatane nwo na bɛ nee mraalɛ mɔɔ sonle wɔ ɛzonlenlɛ sua ne anu la bie mɔ da la ɛ? (1 Sam. 2:22) Bie a ɛnee ɔ nye la kɛ Yilae bayɛ nwolɛ debie.

¹⁴ Ɛnee ɔwɔ kɛ Yilae di edwɛkɛ ne anwo gyima. Kɛ ɛsɔfo kpanyinli la, ɛnee ɔdaye a ɔdi mɔɔ ɔkɔ zo wɔ ɛzonlenlɛ sua ne anu la anwo ɛzonle a. Kɛ selɛ la, ɛnee ɔle ye gyima kɛ ɔbadea ɔ mra ne mɔ. Ye biala anu, ɛnee bɛlɛboda bɛ nwo na bɛamaa menli dɔɔnwo ali nyane. Noko akee, Yilae anyɛ ye gyima kɛ selɛ nee ɛsɔfo kpanyinli la. Yeandea bɛ anyebolo zo. (Bɛgenga 1 Samoɛle 2:23-25.) Ɛnee ɔwɔ kɛ ɔtea ɔ mra ne mɔ kpalɛ. Bɛyɛle ɛtane mɔɔ fɛta ewule a!

15. Kɔkɔbɔlɛ mɔɔ anu yɛ se la boni a Gyihova vale manle Yilae a, na kɛzi Yilae abusua ne yɛle bɛ nyɛleɛ wɔ nwolɛ ɛ?

¹⁵ Tɛnlabelɛ ne zɛkyele kolaa yemɔti Gyihova zoanle “Nyamenle kpɔmanvolɛ bie” mɔɔ bɛambɔ ye duma la ɔmanle ɔvale ndɛnebualɛ edwɛkɛ mɔɔ anu yɛ se la ɔhɔmanle Yilae. Gyihova zele Yilae kɛ: “Duzu ati a . . . ɛkɛli ɛ mra ne mɔ eni ɛkɛdɛla me a?” Nyamenle hanle kɛ Yilae amra ne mɔ bagulu nu awu kenle ko. Ye abusua ne banwu amaneɛ yɛɛ ɛsɔfolilɛ nwo adenle mɔɔ bɛlɛ la babɔ bɛ. Asoo kɔkɔbɔlɛ ɛhye mɔɔ anyebolo wɔ nu la manle abusua ne hakyile bɛ adwenle? Baebolo ne kile kɛ bɛangakyi.—1 Sam. 2:27–3:1.

16. (a) Samoɛle anwo edwɛkɛ boni a yɛkenga ye wɔ Baebolo ne anu a? (b) Asoo edwɛkɛ zɔhane mɔ ka wɔ ahonle? Kilehile nu.

¹⁶ Kɛzi ninyɛndane ɛhye mɔ hanle Samoɛle ɛ? Ɔdwu mekɛ ne  bie a, yɛnwu ye wɔ Samoɛle ɛbɛlabɔlɛ nu kɛ, ɔnva nwo mɔɔ ɛnee ɛlɛkɔ zo la ɔnyianle anyuhɔlɛ. Kakye kɛ yɛgengale ye wɔ 1 Samoɛle 2:18 kɛ kakula nrenya Samoɛle vale nɔhalɛlilɛ “zonlenle wɔ Gyihova anyunlu.” Wɔ Samoɛle ngakula nu bɔbɔ, ɔmanle Nyamenle ɛzonlenlɛ hyianle ye. Yɛkenga edwɛkɛ mɔɔ ka ahonle la wɔ tile zɔhane ngyɛnu 21 ne kɛ: “Kakula Samoɛle kawie nyi la ɛnee yebe [Gyihova] ɛzonlenlɛ nu.” Ɔlɛnyi la ɔ nee ye anwuma Selɛ ne agɔnwolɛvalɛ ne anu mianle. Gyihova mɔɔ yɛ nee ye fa agɔnwolɛ wɔ adenle ɛhye azo la angome a babɔ yɛ nwo bane avi ninyɛndane kɔsɔɔti anwo a.

17, 18. (a) Saa Keleseɛne ngakula yia ninyɛndaneyɛlɛ nwo sɔnea a, kɛ ɔkɛyɛ na bɛazukoa Samoɛle neazo ne ɛ? (b) Duzu a kile kɛ Samoɛle kpale ɛbɛlabɔlɛ adenle mɔɔ le kpalɛ la ɛ?

¹⁷ Bie a anrɛɛ Samoɛle banyia adwenle kɛ saa ɛsɔfo kpanyinli ne nee ɔ mra ne mɔ bɔbɔ ɛlɛyɛ ɛtane a, ɛnee ɔdaye noko ɔbahola yeayɛ mɔɔ ɔkulo la. Noko, ninyɛndane mɔɔ awie mɔ yɛ, mɔɔ menli mɔɔ lɛ nwolɛ adenle titile boka nwo bɔbɔ la ɛngile kɛ ɔwɔ kɛ yɛdayɛ noko yɛyɛ ɛtane. Ɛnɛ, Keleseɛne ngakula dɔɔnwo sukoa Samoɛle neazo ne na ‘bɛbe Gyihova ɛzonlenlɛ nu’—saa bɔbɔ menli mɔɔ bɛ nee bɛ de la ɛnyɛ neazo kpalɛ a.

¹⁸ Kɛzi Gyihova mɔɔ Samoɛle diele ye la boale ye ɛ? Yɛkenga kɛ: “Kakula Samoɛle ɛdeɛ, ɔnyinle na ɔzɔle [Gyihova] nee menli anye.” (1 Sam. 2:26) Menli mɔɔ ɛnee bɛ edwɛkɛ hyia Samoɛle la anye liele ɔ nwo. Gyihova mumua ne anye liele kakula ɛhye anwo wɔ ye nɔhalɛlilɛ ti. Na ɛnee Samoɛle ze ye wienyi kɛ ye Nyamenle ne baye ninyɛndane mɔɔ kɔ zo wɔ Hyaelo la avi ɛkɛ, noko bie a ɔdwenlenle kenle  mɔɔ ɛhye bazi la anwo. Kenle ko nɔɔzo, bɛbuale Samoɛle edwɛkɛ ne.

19, 20. (a) Ka mɔɔ zile Samoɛle anwo zo nɔɔzo bie wɔ ɛzonlenlɛ sua ne anu la. (b) Kɛzi Samoɛle nwunle ɛleka mɔɔ nrɛlaleɛ ne vi la ɛ, na kɛzi ɔ nee Yilae lile ɛ?

¹⁹ Ɔle aleɛbahye na ɛnee kɛnlaneɛ ne mɔɔ wɔ ɛzonlenlɛ sua ne anu la ɛtɛnunle. Ɛnee maanle nu ɛyɛ diinyi kpalɛ, na Samoɛle dele kɛ ɛnelɛ bie ɛlɛfɛlɛ ye. Ɔdwenlenle kɛ Yilae mɔɔ ɛnyi na ɔnnwu debie kpalɛ la ɔ. Samoɛle dwazole na “ɔnriandile ɔhɔle” Yilae ɛkɛ. Ɛbahola wɔapɛ kakula ne mɔɔ ɔ gyakɛ gua aze na ɔlɛnriandi yeahɔnlea debie mɔɔ Yilae hyia nwolɛ la anwo nvoninli wɔ wɔ adwenle nu ɔ? Kɛzi Samoɛle bule Yilae na ɔyɛle atiakunlukɛnlɛma ɔmanle ye la ka yɛ ahonle kpalɛ. Ɔnva nwo ɛtane mɔɔ Yilae yɛle la, ɛnee ɔtɛde Gyihova ɛsɔfo kpanyinli.—1 Sam. 3:2-5.

²⁰ Samoɛle dunwuele Yilae na ɔhanle kɛ: “Ɛvɛlɛle me, mera.” Yilae hanle kɛ ɔtɛfɛlɛle ye na ɔmanle ɔhɔlale. Deɛ ko ne ala hɔle zo fane nsa! Awieleɛ ne, Yilae nwunle kɛ Gyihova a ɛlɛfɛlɛ ye a. Ɛnee ɔnda ɔnzi kɛ menli banwu ɛnyelɛzodeɛnwunlɛ anzɛɛ Gyihova baha ngapezo edwɛkɛ ahile ye menli, na yɛte deɛmɔti ɔrale ye zɔ la abo. Noko Yilae nwunle kɛ Gyihova ɛbɔ ɔ bo ɛlɛyɛ ɛhye bieko—ɔlɛtendɛ yeahile kakula ɛhye! Yilae manle Samoɛle hɔlale na ɔhanle mɔɔ saa ɛnelɛ ne fɛlɛ ye bieko a ɔha la ɔhilele ye. Samoɛle diele. Yeangyɛ, ɔdele ɛnelɛ ne bieko: “Samoɛle, Samoɛle!” Kakula ne buale kɛ: “Tendɛ, wɔ sonvolɛ ɛlɛtie.”—1 Sam. 3:1, 5-10.

21. Kɛzi yɛtie Gyihova ɛnɛ ɛ, na duzu ati a ɔhyia kɛ yɛyɛ zɔ a?

²¹ Akee Gyihova ranyianle sonvolɛ wɔ Hyaelo mɔɔ tie ye a. Ɛhye rayɛle Samoɛle ɛbɛlabɔlɛ adenle. Na ɛdawɔ noko ɛ? Ɔnle kɛ yɛkendɛ kɛ yɛbade ɛnelɛ bie nɔɔzo kɛ ɔlɛtendɛ yeahile yɛ. Ɛnɛ, yɛte Nyamenle ane mekɛ biala wɔ adenle bie azo. Ɔwɔ ye Edwɛkɛ, Baebolo ne anu. Mekɛ mɔɔ yɛlɛtie Nyamenle na yɛali ye edwɛkɛ zo la, yɛ diedi ne anu bamia. Zɔhane ala a Samoɛle yɛle a.

22, 23. (a) Kɛzi edwɛkɛ ne mɔɔ mɔlebɛbo ne ɛnee Samoɛle sulo kɛ ɔbaha la rale nu ɛ? (b) Kɛzi Samoɛle hɔle zo nyianle duma kpalɛ ɛ?

²² Nɔɔzo zɔhane wɔ Hyaelo rayɛle mekɛ titile wɔ Samoɛle ɛbɛlabɔlɛ nu, ɔluakɛ ɔranwunle Gyihova wɔ adenle fofolɛ zo na ɔrayɛle Nyamenle ngapezonli nee ye kpɔmanvolɛ. Mɔlebɛbo ne, ɛnee kakula ne sulo kɛ ɔkɛha Gyihova nrɛlaleɛ ne ɔkɛhile Yilae, ɔboalekɛ ɔle ndeanlɛ mɔɔ ɔnrɛhyɛ Gyihova bava ara Yilae abusua ne anwo zo a. Noko Samoɛle vale akɛnrazilɛ hanle na Yilae liele ndeanlɛ ne dole nu. Yeangyɛ, edwɛkɛ biala mɔɔ Gyihova hanle la rale nu: Yizilayɛma nee Filisitiama hɔle konle, bɛhunle Hɔfenae nee  Fenɛhaze kenle ko ne, na Yilae dele kɛ bɛho bɛva Gyihova ngyekyeleɛ Ɛlɛka ne la, ɔwule.—1 Sam. 3:10-18; 4:1-18.

²³ Noko akee Samoɛle ranyianle duma kpalɛ kɛ ngapezonli mɔɔ ɔdi nɔhalɛ. Kɛlɛtokɛ ne ka kɛ ‘Gyihova nee ye luale,’ na ɔtoa zo kɛ Gyihova manle edwɛkɛ biala mɔɔ Samoɛle hanle la yɛle nɔhalɛ.—Bɛgenga 1 Samoɛle 3:19.

24. Nzinlii, duzu kpɔkɛ a Yizilayɛma zile a, na duzu ati a ɛnee ɛhye le ɛtane kpole a?

²⁴ Asoo Yizilayɛma lile Samoɛle neazo ne anzi na bɛyɛle sunsum nu menli mɔɔ bɛdi nɔhalɛ ɔ? Kyɛkyɛ. Nzinlii bɛzile kpɔkɛ kɛ bɛmkpondɛ kɛ ngapezonli yɛ bɛ ndɛnebuavolɛ. Bɛkpondɛ kɛ bɛyɛ kɛ maanle maanle mɔɔ ɛha la na bɛsie bɛ belemgbunli. Samoɛle diele Gyihova na ɔyɛle mɔɔ bɛkpondɛ la. Noko ɛnee ɔwɔ kɛ ɔmaa Yizilayɛma nwu anyebolo mɔɔ wɔ bɛ edwɛkɛ ne anu la. Tɛ sonla a ɛnee bɛlɛkpo ye a, emomu, Gyihova! Ɛhye ati ɔmanle menli ne rayiale Gelegale.

25, 26. Kɛzi Samoɛle boale menli ne manle bɛnwunle ɛtane kpole mɔɔ bɛyɛle bɛtiale Gyihova la wɔ Gelegale ɛ?

²⁵ Bɛmaa yɛzia yɛhɔ mekɛ mɔɔ ɛnee ɔlɛtendɛ yeahile Yizilayɛma wɔ Gelegale la azo. Samoɛle mɔɔ ɛnee ɛnyi la hanle ye munli nu mɔɔ ɔgyinlanle ɔlile nɔhalɛ la anwo edwɛkɛ ɔhilele mgbanyima ne mɔ. Akee yɛkenga kɛ: ‘Samoɛle zɛlɛle Gyihova.’ Ɔzɛlɛle kɛ ɔmaa maanle nu ɛhulu.—1 Sam. 12:17, 18.

²⁶ Maanle nu ɛhululɛ, wɔ wawaa mekɛ nu? Ɛnee bie ɛtɛsile ɛlɛ! Saa menli ne bie mɔ zelele ye anzɛɛ bɛanlie bɛanli bɔbɔ a, ɛhye angyɛ. Arɛlevilɛ nu ala, ezule ne munlanle. Anwoma ne hanle hwiiti mɔɔ wɔ ɛya nu la aze fɛɛnye. Ɛsɛnlɛmanye ne kpakyekpakyele. Akee ezule ne dɔle. Duzu a bɛyɛle a? “Menli ne kɔsɔɔti zulole [Gyihova] nee Samoɛle.” Awieleɛ bɔkɔɔ ne, bɛnwunle ɛtane kpole mɔɔ bɛyɛle la.—1 Sam. 12:18, 19.

27. Kɛzi Gyihova bu menli mɔɔ sukoa Samoɛle diedi ne la ɛ?

²⁷ Tɛ Samoɛle a manle edwɛkɛ ne hanle menli mɔɔ ɛnee bɛsolo la ahonle a, emomu, ye Nyamenle Gyihova ne ɔ. Samoɛle nyianle Nyamenle anu diedi ɔvi ye ngakula nu ɔhɔdwule ye mgbanyifoa. Na Gyihova yilale ye. Ɛnɛ noko, Gyihova ɛtɛkakyile. Ɔboa menli mɔɔ sukoa Samoɛle diedi ne la.