ƐZUKOALƐDEƐ 9
Kɛ Ɔkɛyɛ Na Wɔ Abusua Ne Anyia Anyelielɛ Ɛ?
1. Kɛmɔti a agyalɛ hyia na abusua anyia anyelielɛ ɛ?
Edwɛkpa ne vi Gyihova, anyelielɛ Nyamenle ne mɔɔ kulo kɛ mbusua nye die la ɛkɛ. (1 Timote 1:11) Ɔdaye a ɔhyehyɛle agyalɛ a. Saa menli nwiɔ dua adenle kpalɛ zo gya a ɔmaa bɛ abusua ne anye die ɔluakɛ bɛnyia adenle bɛtete ngakula na bɛbɔ bɛ nwo bane. Ɔwɔ kɛ Kilisienema fa bɛ agyalɛ wula arane mɛla mɔɔ wɔ bɛ ɛkɛ ne la abo.—Kenga Luku 2:1, 4, 5.
Kɛzi Nyamenle bu agyalɛ ɛ? Ɔkpondɛ kɛ agyalɛ ka raalɛ nee nrenyia bɔ nu dahuu. Gyihova kulo kɛ kunli nee yelɛ di nɔhalɛ maa bɛ nwo. (Hibuluma 13:4) Ɔkyi ewolebɔlɛ. (Malakae 2:16) Noko saa Kilisienenli aye anzɛɛ ɔ hu sɛkye agyalɛ a ɔmaa adenle kɛ bɛkola bɛbɔ ewole na bɛgya fofolɛ.—Kenga Mateyu 19:3-6, 9.
2. Nyɛleɛ boni a ɔwɔ kɛ kunli nee yelɛ da ye ali kile bɛ nwo a?
Gyihova bɔle nrenyia nee raalɛ kɛ bɛboa bɛ nwo wɔ agyalɛ nu. (Gyɛnɛsese 2:18) Kɛmɔ kunli le abusua tile la ati, ɔwɔ kɛ ɔnea kɛ abusua ne asa baha bɛ nwonane afoa nu ngyianlɛ na yeahilehile bɛ Nyamenle anwo debie. Ɔwɔ kɛ ɔda anwofamaa ɛlɔlɛ ali ɔkile ɔ ye. Ɔwɔ kɛ kunlima nee yelɛma nyia ɛlɔlɛ nee ɛbulɛ maa bɛ nwo. Kɛmɔ kunlima nee yelɛma kɔsɔɔti ɛnli munli la ati, bɛsukoa ɛtanefakyɛ a agyalɛ ne bayɛ anyelielɛ.—Kenga Ɛfɛsɛsema 4:31, 32; 5:22-25, 33; 1 Pita 3:7.
3. Ɔwɔ kɛ ɛgyakyi agyalɛ mɔɔ anyelielɛ ɛnle nu la ɔ?
Saa ngyegyelɛ ba wɔ agyalɛ nu a, ɔwɔ kɛ bɛ mu nwiɔ bɛbɔ mɔdenle bɛnyia ɛlɔlɛ bɛmaa bɛ nwo. (1 Kɔlentema 13:4, 5) Nyamenle Edwɛkɛ ne ɛnzi agyalɛ nu ɛtetelɛ adua kɛ yemɔ a le adenle mɔɔ bɛdua zo bɛdi ngyegyelɛ mɔɔ ta ba agyalɛ nu la anwo gyima a.—Kenga 1 Kɔlentema 7:10-13.
4. Ngakula, duzu a Nyamenle kpondɛ kɛ bɛnyia a?
Gyihova kpondɛ kɛ bɛ nye die. Ɔtu bɛ folɛ kpalɛ mɔɔ bamaa bɛ nye alie wɔ bɛ ngakula nu la. Ɔkpondɛ kɛ bɛnyia bɛ awovolɛ nrɛlɛbɛ nee bɛ anwubielɛ ne azo nvasoɛ. (Kɔlɔsaema 3:20) Eza Gyihova kulo kɛ bɛyɛ ninyɛne mɔɔ bɛ Bɔvolɛ ne nee ɔ Ra ne kulo la na bɛ nye die.—Kenga Nolobɔvo 11:9–12:1; Mateyu 19:13-15; 21:15, 16.
5. Awovolɛ, kɛ ɔkɛyɛ na bɛ mra anyia anyelielɛ ɛ?
Ɔwɔ kɛ bɛyɛ gyima ɛsesebɛ bɛkpondɛ aleɛ, dabelɛ nee adɛladeɛ bɛmaa bɛ mra. (1 Timote 5:8) Noko amaa bɛ mra anye alie la, ɔwɔ kɛ bɛkilehile bɛ bɛmaa bɛkulo Nyamenle na bɛsukoa ye. (Ɛfɛsɛsema 6:4) Nyamenle anwo ɛlɔlɛ nwo neazo kpalɛ mɔɔ ɛyɛ la baha ɛ mra ne mɔ ahonle. Saa ɛfa wɔ ngilehilelɛ ne ɛgyinla Nyamenle Edwɛkɛ ne azo a, ɔbaboa ɛ mra ne mɔ wɔ adenle kpalɛ zo. —Kenga Ditilɔnomi 6:4-7; Mrɛlɛbulɛ 22:6.
Saa bɛmaa ngakula anwosesebɛ na bɛkanvo bɛ a, ɔboa bɛ. Eza ɔwɔ kɛ bɛtenrɛdenrɛ bɛ na bɛtea bɛ. Ndetelɛ zɛhae bɔ bɛ nwo bane fi subane mɔɔ bamaa bɛali nyane la anwo. (Mrɛlɛbulɛ 22:15) Noko, ɔnle kɛ bɛfa ɛya bɛtea bɛ atisesebɛ nu.—Kenga Kɔlɔsaema 3:21.
Gyihova Alasevolɛ yɛ mbuluku dɔɔnwo mɔɔ boa awovolɛ nee bɛ mra titili a. Mbuluku ɛhye mɔ gyi Baebolo ne azo.—Kenga Edwɛne 19:7, 11.
Bie A Eza Ɛ Nye Balie
WƆ ABUSUA BAHOLA ANYIA ANYELIELƐ
Tie Nyamenle Amaa Wɔ Agyalɛ Ayɛ Anyelielɛ
Kpuyia nwiɔ bie bahola aboa wɔ yeamaa wɔ agyalɛ ayɛ anyelielɛ.
WƆ ABUSUA BAHOLA ANYIA ANYELIELƐ
Kɛzi Bɛdi Ngyegyelɛ Nwo Gyima La
Saa bɛdua adenle kpalɛ zo a, ɔbahola yeamaa bɛ agyalɛ ne ayɛ anyelielɛ mɔɔ ɛlɔlɛ wɔ nu.
