TILE 3

“Sunsum Nwuanzanwuanza Ne Yile Bɛ”

BƆ

Gyima mɔɔ sunsum nwuanzanwuanza ne maanle bɛyɛle wɔ Pɛntekɔso la

1. Ka mɔɔ hɔle zo wɔ Pɛntekɔso Ɛvoyia ne abo la.

MENLI anye ɛlie wɔ Gyɛlusalɛm gua ne mɔ azo. a Esike vi ɛzonlenlɛsua ne afɔlemokyea ne azo ɛlɛkɔ anwuma. Livaema ne ɛlɛto Hallel edwɛne (Edwɛne 113 kɔdwu 118), ɔbayɛ kɛ ɔle edwɛne mɔɔ bɛto na bɛdie zo. Nyɛvolɛ dɔɔnwo ɛra gua ne mɔ azo. Bɛvi ɛleka mɔɔ wɔ moa le kɛ Yilam, Mɛsɔpɔteemea, Kapadosea, Pɔntɛse, Yigyibiti, yɛɛ Wulomu a bɛra a. b Duzu a ɛlɛkɔ zo a? Bɛlɛdi Pɛntekɔso ɛvoyia ne, mɔɔ eza bɛfɛlɛ ye ‘kenle mɔɔ bɛte ma mɔɔ limoa’ la. (Nɔm. 28:26) Bɛdi ɛvoyia ɛhye ɛvolɛ biala wɔ baale ɛdelɛ mekɛ ne awieleɛ nee hwiiti ɛdelɛ mekɛ ne mɔlebɛbo. Ɔle anyelielɛ kenle.

GYƐLUSALƐM—DWUUMA ƐZONLENLƐ ƐLEKA

Ninyɛne dɔɔnwo mɔɔ hɔle zo wɔ Gyima ne tile ne mɔ mɔɔ limoa la anu la zile wɔ Gyɛlusalɛm. Suakpole ɛhye gua Dwudiya awoka ne mɔ mɔɔ wɔ Mɛdetɛlenia Nyevile ne aduduleɛ kɛyɛ mayɛlɛ 34 la azo. Belemgbunli Devidi honle vale aranemgbole mɔɔ wɔ boka ɛhye azo la wɔ 1070 K.Y.M., na suakpole ne mɔɔ ɔkyekyele wɔ ɛkɛ ne la rayɛle tete Yizilayɛ maanle ne suakpole.

Molaya Boka ne bikye Zayɔn Boka ne. Dwuuma tetedwɛkɛ kile kɛ Molaya Boka ne azo a anrɛɛ Ebileham fa Ayezeke abɔ afɔle a. Edwɛkɛ ɛhye zile la kɛyɛ 1,900 pɛle nu kolaa na ninyɛne mɔɔ bɛha nwolɛ edwɛkɛ wɔ Gyima buluku ne anu la asisi. Mekɛ mɔɔ Sɔlɔmɔn zile Gyihova ɛzonlenlɛsua mɔɔ limoa la wɔ Molaya Boka ne azo la, ɔrabokale Gyɛlusalɛm anwo. Ɛzonlenlɛsua ɛhye a rayɛle ɛleka titili mɔɔ ɛnee Dwuuma ne ɛbɛlabɔlɛ nee bɛ ɛzonlenlɛ kɔ zo a.

Gyihova ɛzonlenlɛsua ne anu a Dwuuma kɔsɔɔti mɔɔ anye bolo bɛ ɛzonlenlɛ nwo la vi azɛlɛ ye azo ɛleka biala kɔyia bɛbɔ afɔle, bɛsonle na bɛdi bɛ ɛvoyia ngakyile ne mɔ a. Bɛyɛ zɔ bɛfa bɛdi Nyamenle mɛla ɛhye azo: “Ɔwɔ kɛ bɛ mrenyia ne mɔ amuala kɔ Gyihova bɛ Nyamenle ne anyunlu fane nsa wɔ ɛvolɛ ne anu wɔ ɛleka mɔɔ ɔkɛhile la.” (Dit. 16:16) Gyɛlusalɛm noko a ɛnee Sanhedelin Kpole ne, mɔɔ le Dwuuma kɔɔto kpole ne la wɔ a yɛɛ ɛnee bɛdi maanle ne ninyɛne ngakyile nwo gyima wɔ ɛkɛ.

2. Ninyɛne mɔɔ yɛ nwanwane la boni mɔ a zile wɔ Pɛntekɔso 33 Y.M. a?

² Ɛnee ɔle nwonlomɔ kɛyɛ dɔne ngɔnla wɔ nyenyesuo mekɛ wɔ 33 Y.M., debie bie zile mɔɔ ɛnee ɔbazi menli nwo wɔ ɛvolɛ dɔɔnwo anu a. Arɛlevilɛ nu ala, bɛdele “dede bie vi anwuma kɛ anwoma kpole bie” la. (Gyi. 2:2) Dede kpole ne rayile sua ne mɔɔ Gyisɛse ɛdoavolɛma kɛyɛ 120 wɔ nu la anu. Akee debie azibɛnwo bie zile. Senle mɔɔ zɔho ɛtafinlimalɛ la razinzele ɛdoavolɛma ne ko biala anwo zo. c “Sunsum nwuanzanwuanza ne yile” ɛdoavolɛma ne na bɛbɔle ɔ bo kɛ bɛka aneɛ ngakyile! Mɔɔ ɛdoavolɛma ne vi sua ne anu vindele la, ɔzinle nyɛvolɛ mɔɔ bɛyiale bɛ wɔ Gyɛlusalɛm gua ne mɔ azo la anwo kɛ ɛdoavolɛma ne kola ka bɛ aneɛ la! Nɔhalɛ nu, bɛ nuhua ko biala dele kɛ bɛlɛka “ye sua zo aneɛ.”—Gyi. 2:1-6.

3. (a) Duzu ati a yɛkola yɛka kɛ Pɛntekɔso 33 Y.M. le mekɛ titili wɔ nɔhalɛ ɛzonlenlɛ nu ɛ? (b) Kɛzi Pita ɛdendɛlɛ ne fale “Belemgbunlililɛ ne sanvɛ” ne anwo ɛ?

³ Kɛlɛtokɛ ɛhye mɔɔ yɛ anyelielɛ la ka ninyɛne titili mɔɔ sisile wɔ nɔhalɛ ɛzonlenlɛ nu la anwo edwɛkɛ—sunsum nu Yizilayɛ ne, mɔɔ le Kilisienema mɔɔ bɛkpokpa bɛ la asafo ne mɔlebɛbo. (Gal. 6:16) Noko tɛ yemɔ ala ɛne. Mekɛ mɔɔ Pita ɛlɛtendɛ ahile menli ne la, ɔvale “Belemgbunlililɛ ne sanvɛ” mɔɔ limoa la ɔlile gyima. Ɛnee sanvɛ ko biala babuke nwolɛ adenle titili amaa menli ekpunli bie. (Mat. 16:18, 19) Sanvɛ ne mɔɔ limoa la maanle Dwuuma nee bɛdabɛ mɔɔ bɛhakyi bɛrayɛ Dwuuma la dele edwɛkpa ne na bɛvale Nyamenle sunsum nwuanzanwuanza ne bɛkpokpale bɛ. d Ɔti bɛrabokale sunsum nu Yizilayɛ ne anwo, na bɛnyianle anyelazo kɛ bɛbayɛ arelemgbunli nee ɛsɔfoma wɔ Mɛzaya Belemgbunlililɛ ne anu. (Yek. 5:9, 10) Nzinlii, bɛvale nwolɛ adenle zɔhane bɛmaanle Samɛleama nee maanle maanle ne anu amra noko. Duzu a Kilisienema mɔɔ wɔ ɛkɛ ne ɛnɛ la bahola azukoa avi ninyɛne mɔɔ sisile wɔ Pɛntekɔso 33 Y.M. la anu a?

“Bɛ Muala Bɛyiale Ɛleka Ko” (Gyima ne 2:1-4)

4. Adenle boni azo a Kilisiene asafo ne mɔɔ wɔ ɛkɛ ne ɛnɛ la ɛlɛtoa gyima mɔɔ asafo ne mɔɔ bɛdele ye wɔ 33 Y.M. la yɛle la azo a?

⁴ Bɛvale ɛdoavolɛma kɛyɛ 120 mɔɔ “bɛ muala bɛyiale ɛleka ko”—wɔ anwuma ekpumgbunli bie anu—na bɛvale sunsum nwuanzanwuanza ne bɛkpokpale bɛ la a bɛbɔle Kilisiene asafo ne abo a. (Gyi. 2:1) Kenle ko zɔhane ala, bɛzɔnenle menli apenle dɔɔnwo bɛbokale asafo ɛhye anwo. Kɛ ɔyɛle mɔɔ ahyehyɛdeɛ mɔɔ ɛlɛkɔ zo anyia anyuhɔlɛ ɛnɛ la bɔle ɔ bo la ɛne! Ɛhɛe, bɛlɛdua mrenyia nee mraalɛ mɔɔ sulo Nyamenle mɔɔ bɛwɔ Kilisiene asafo ne anu ɛnɛ la anwo zo “bɛabɔ Belemgbunlililɛ ne anwo edwɛkpa ɛhye nolo wɔ azɛlɛ ye azo bɛava bɛali maanle maanle ne amuala daselɛ” kolaa na mekɛ ɛhye ahɔ ye awieleɛ.—Mat. 24:14.

5. Nvasoɛ boni a menli mɔɔ ɛnee wɔ Kilisiene asafo ne anu wɔ ɛvoya mɔɔ limoa la anu nee ɛnɛ la ɛnyia a?

⁵ Kilisiene asafo ne eza maanle menli mɔɔ bɛkpokpa bɛ yɛɛ akee “mboane gyɛne” ne mɔɔ nzinlii bɛrabokale nwo la anwosesebɛ wɔ sunsum nu. (Dwɔn 10:16) Pɔɔlo hilele moalɛ mɔɔ ɔnyianle wɔ asafo ne anu amra ɛkɛ la anwo anyezɔlɛ wɔ mekɛ mɔɔ ɔhɛlɛle Kilisienema mɔɔ wɔ Wulomu la kɛ: “Me kunlu a anrɛɛ menwu bɛ na meboa bɛ wɔ sunsum nu, amaa bɛ nwo ayɛ se; mɔɔ mekpondɛ meaha la a le kɛ bɛ diedi bɛamaa me anwosesebɛ na medame noko me ɛdeɛ amaa bɛ anwosesebɛ.”—Wlo. 1:11, 12.

WULOMU—MAANLE BIE SUAKPOLE

Wɔ mekɛ mɔɔ bɛlɛkɛlɛ Gyima buluku ne la, ɛnee Wulomu le suakpole mɔɔ ɛlie duma wɔ maanyɛlɛ nu wɔ ewiade amuala. Mɔɔ tumililɛ ɛhye liele duma la, ɔnleanle Britain kɔdwu North Africa yɛɛ Atlantic Ocean kɔdwu Persian Gulf ne azo.

Ɛnee amaamuo, menli, aneɛ nee diedi ngakyile dɔɔnwo wɔ Wulomu. Kɛmɔ ɛnee bɛ ndenle le kpalɛ la ati, adendulɛma nee gualilɛma dɔɔnwo vi maanle ne anu ɛleka ngakyile rale suakpole ne azo. Meli dɔɔnwo vale aleɛ nee ninyɛne ngɛnlɛma rale suakpole ne meli agyinlaleɛ ɛkɛ.

Ɔkadwu ɛvoya mɔɔ limoa Y.M. la, ɛnee menli mɔɔ bo mgbe ko la a wɔ Wulomu sua ne azo a. Ɔbayɛ kɛ ɛnee bɛ nuhua foa ko le ngɛkɛlɛ—nwule mɔɔ bɛbua bɛ fɔlɛ, ngakula mɔɔ bɛ awovolɛ ɛdɔne anzɛɛ ɛkpo bɛ yɛɛ pilizama mɔɔ Wulomu sogyama ɛho ɛva bɛ la. Mekɛ mɔɔ Wulomu Sogya Kpanyinli Pompey honle vale Gyɛlusalɛm wɔ 63 K.Y.M la, ɔvale Dwuuma bie mɔ ɔrale Wulomu kɛ ngɛkɛlɛ.

Menli mɔɔ ɛnle ngɛkɛlɛ la bie mɔ le ehyiavolɛma, na ɛnee bɛde ɛleka mɔɔ menli ne zonle na arane a nea bɛ la. Noko maanle mgbanyima mɔɔ lile tumi la zieziele suakpole ne azo kɛnlɛma yɛɛ bɛsisile azua mgbole wɔ zo. Bie mɔ le nwɔhoalilɛleka mɔɔ ɛkɛ ne a bɛsu ɛnriandilɛ, bɛko yɛɛ bɛfa ehwili bɛsu ɛnriandilɛ la—bɛyɛ ɛhye mɔ bɛfa bɛdielie menli ne anye mɔɔ bɛndua ezukoa biala a.

6, 7. Kɛzi Kilisiene asafo ne mɔɔ wɔ ɛkɛ ne ɛnɛ la ɛlɛdi Gyisɛse edwɛkɛ mɔɔ se yɛha edwɛkɛ ne yɛhile maanle maanle ne amuala la azo ɛ?

⁶ Kilisiene asafo ne mɔɔ wɔ ɛkɛ ne ɛnɛ la lɛ bodane ko ne ala mɔɔ ɛnee ɛvoya mɔɔ limoa asafo ne lɛ la bie. Gyisɛse vale gyima mɔɔ yɛ se noko ɔyɛ anyelielɛ la maanle ye ɛdoavolɛma. Ɔhanle ɔhilele bɛ kɛ: “Bɛyɛ maanle maanle kɔsɔɔti anu menli me ɛdoavolɛma, bɛzɔne bɛ wɔ Selɛ ne, Ralɛ ne nee sunsum nwuanzanwuanza ne duma nu, bɛhilehile bɛ bɛmaa bɛli ninyɛne kɔsɔɔti mɔɔ meha mehile bɛ la azo.”—Mat. 28:19, 20.

⁷ Gyihova Alasevolɛ Kilisiene asafo ne a le ahyehyɛdeɛ mɔɔ bɛlɛdua zo bɛayɛ gyima ɛhye ɛnɛ a. Nɔhalɛ nu, ɔnla aze kɛ bɛbali menli mɔɔ ka aneɛ ngakyile la daselɛ. Noko, Gyihova Alasevolɛ ɛyɛ mbuluku nee vidio wɔ aneɛ mɔɔ bo 1,000 la anu. Saa ɛwɔ Kilisiene asafo ne anu na ɛlɛyɛ Belemgbunlililɛ edwɛkɛhanlɛ nee ɛdoavolɛyɛlɛ gyima ne bie a, ɔwɔ kɛ ɛmaa ɛ nye die. Ɛboka menli ekyi mɔɔ wɔ azɛlɛ ye azo mɔɔ ɛnyia nwolɛ adenle ɛlɛdi Gyihova duma ne anwo daselɛ bɔkɔɔ la anwo!

8. Adenle boni azo a Kilisiene asafo ne boa yɛ a?

⁸ Amaa wɔava anyelielɛ wɔagyinla kpundii wɔ mekɛ ɛhye mɔɔ anu yɛ se la anu la, Gyihova Nyamenle ɛmaa wɔnyia mediema wɔ ewiade amuala. Pɔɔlo hɛlɛle Hibulu Kilisienema kɛ: “Bɛmaa yɛzuzu yɛ nwo ngoko amaa yɛamaa yɛ nwo anwosesebɛ yɛahɔ ɛlɔlɛ nee gyima kpalɛ ɛyɛlɛ nu, bɛmmamaa yɛgyakyi kɛ yɛkɛhɔ yɛ nyianu ne mɔ, kɛ mɔɔ yeyɛ bie mɔ subane la, emomu bɛmaa yɛmaa yɛ nwo anwosesebɛ, titili wɔ mekɛ mɔɔ bɛkɛnwu kɛ kenle ne ɛlɛbikye la.” (Hib. 10:24, 25) Kilisiene asafo ne le nziezielɛ mɔɔ Gyihova ɛyɛ kɛ ɔboa wɔ ɔmaa ɛmaa awie mɔ anwosesebɛ na ɛdawɔ noko ɛnyia anwosesebɛ a. Kɔ zo bikye wɔ sunsum nu mediema mrenyia nee mraalɛ kpalɛ. Mmagyakyi Kilisiene nyianu ɛhɔlɛ ɛlɛ!

“Bɛ Nuhua Ko Biala Dele . . . Ye Sua Zo Aneɛ” (Gyima ne 2:5-13)

“Yɛte kɛ bɛlɛfa yɛ sua zo aneɛ bɛaha ninyɛne mgbole mɔɔ Nyamenle ɛyɛ la anwo edwɛkɛ.”—Gyima ne 2:11

9, 10. Duzu a bie mɔ ɛyɛ amaa baha edwɛkɛ ne bɛahile menli mɔɔ ka aneɛ gyɛne la ɛ?

⁹ Nea kɛzi Dwuuma nee bɛdabɛ mɔɔ bɛhakyi bɛrayɛ Dwuuma la anye liele wɔ Pɛntekɔso 33 Y.M. la a. Ɔbayɛ kɛ ɛnee bɛ nuhua dɔɔnwo mɔɔ wɔ ɛkɛ la ka Giliki anzɛɛ Hibulu. Noko akee, ‘bɛ nuhua ko biala dele kɛ ɛdoavolɛma ne ɛlɛka ye sua zo aneɛ.’ (Gyi. 2:6) Ɔda ali kɛ edwɛkɛ ne mɔɔ bɛdele ye wɔ bɛ sua zo aneɛ nu la hanle bɛ ahonle kpalɛ. Ɔle nɔhalɛ kɛ ɛnɛ Kilisienema ɛnlɛ ahyɛlɛdeɛ mɔɔ maa bɛka aneɛ gyɛne a. Noko bɛ nuhua dɔɔnwo ɛdu bɛ nwo ɛmaa bɛlɛka Belemgbunlililɛ edwɛkɛ ne bɛahile menli mɔɔ vi maanle ngakyile nu la. Adenle boni azo? Bie mɔ ɛzukoa aneɛ fofolɛ amaa bɛahola bɛazonle wɔ asafo mɔɔ bɛka aneɛ gyɛne la anu anzɛɛ bɛadu bɛahɔ maanle gyɛne nu. Fane dɔɔnwo ne ala, bɛnwu kɛ menli mɔɔ tie bɛ la anye die bɛ mɔdenlebɔlɛ ne anwo.

¹⁰ Kɛ neazo la, Christine nee Alasevolɛ nsuu zukoale Gujarati aneɛ ne. Mekɛ mɔɔ ɔyiale bɛlɛra bie mɔɔ ɔ nee ye yɛ gyima mɔɔ ka Gujarati la, ɔbizale ye ahye wɔ ye sua zo aneɛ nu. Ɔzinle bɛlɛra ne anwo na ɛnee ɔkulo kɛ ɔnwu deɛmɔti Christine ɛlɛbɔ mɔdenle azukoa Gujarati aneɛ mɔɔ yɛ se la. Christine lile ye daselɛ kɛnlɛma. Bɛlɛra ne hanle hilele Christine kɛ: “Bɛ edwɛkɛ mɔɔ bɛka la anwo hyia bɛ kpalɛ.”

11. Kɛ ɔkɛyɛ na yɛaziezie yɛ nwo yɛaha Belemgbunlililɛ ne anwo edwɛkpa ne yɛahile menli mɔɔ ka aneɛ gyɛne la ɛ?

¹¹ Nɔhalɛ nu, tɛ yɛ muala a yɛbahola yɛazukoa aneɛ fofolɛ a. Noko, yɛbahola yɛaziezie yɛ nwo yɛaha Belemgbunlililɛ edwɛkɛ ne yɛahile menli mɔɔ ka aneɛ gyɛne la. Adenle boni azo? Adenle ko a le kɛ ɛbalua JW Language^® app ne azo wɔazukoa kɛzi bɛbiza ahye wɔ aneɛ bie mɔɔ bɛka ye wɔ ɛleka mɔɔ ɛde la. Ɛbahola noko wɔazukoa kɛzi bɛka edwɛkɛ sikalɛ bie mɔ wɔ zɔhane aneɛ ne anu mɔɔ bamaa menli mɔɔ ka aneɛ zɔhane anye alie la. Kile bɛ maa bɛhɔ jw.org na kile bɛ vidio nee mbuluku ngakyile mɔɔ bɛyɛ wɔ bɛ aneɛ ne anu la. Saa yɛfa ninyɛne ɛhye mɔ yɛdi gyima wɔ yɛ ɛzonlenlɛ gyima ne anu a, yɛ nye balie kɛ ɛvoya mɔɔ limoa la anu mediema mɔɔ anye liele wɔ mekɛ mɔɔ ɔzinle menli mɔɔ vi ɛleka ngakyile la anwo, ɔluakɛ “bɛ nuhua ko biala dele . . . ye sua zo aneɛ” la.

DWUUMA MƆƆ WƆ MƐSƆPƆTEEMEA NEE YIGYIBITI

The History of the Jewish People in the Age of Jesus Christ (175 K.Y.M.–135 Y.M.) ka kɛ: “Mbusua bulu [Yizilayɛ] abozoamra nee Dwuda belemgbunlililɛ ne anu amra mɔɔ Aseleama nee Babelɔnoma nee bɛ vi akɛlɛzonlenlɛ nu rale la ɛnee de Mɛsɔpɔteemea, Midia yɛɛ Babelɔn.” Kɛ mɔɔ Ɛzela 2:64 kile la, Yizilayɛma 42,360 ala a vi Babelɔn akɛlɛzonlenlɛ nu ziale rale Gyɛlusalɛm a. Ɛhye zile wɔ 537 K.Y.M. Flavius Josephus hanle ye wɔ ɛvoya mɔɔ limoa Y.M. la anu kɛ ɛnee Dwuuma “mɔɔ de bikye Babelɔn” la dodo le apenle apenle. Wɔ ɛvoya nsa kɔdwu nnu Y.M., menli mɔɔ wɔ azua ɛhye mɔ azo la yɛle kɛlɛtokɛ bie mɔɔ bɛfɛlɛ ye Babylonian Talmud la.

Daselɛ wɔ ɛkɛ mɔɔ kile kɛ ɛnee Dwuuma bie mɔ de Yigyibiti wɔ ɛvoya nsia K.Y.M. Mekɛ zɔhane, Gyɛlɛmaya vale nrɛlaleɛ hɔmaanle Dwuuma mɔɔ ɛnee de Yigyibiti ɛleka ngakyile, bɔbɔ bɛdabɛ mɔɔ bɛwɔ Mɛmefese la. (Gyɛ. 44:1, ɔbdw.) Ɔbayɛ kɛ bɛ nuhua dɔɔnwo dɛnlanle Yigyibiti wɔ mekɛ mɔɔ ɛnee maanle maaanle dɔɔnwo anye die Gilikima amaamuo nwo la. Josephus hanle kɛ Dwuuma boka menli mɔɔ limoale dɛnlanle Alɛzandelea la anwo. Yeangyɛ bɛvale suakpole zɔhane foa kpole bie bɛmaanle bɛ. Wɔ ɛvoya mɔɔ limoa Y.M., Dwuunli kɛlɛvolɛ Philo hanle kɛ ɛnee ye sua zo amra mgbe ko de Yigyibiti, ɔvi “ye ɛleka mɔɔ bikye Lebea kɔdwu Yiteyopea ɛweɛne zo.”

“Pita . . . Dwazole Gyinlanle” (Gyima ne 2:14-37)

12. (a) Duzu a ngapezonli Dwowɛle hanle ye wɔ nwanwane debie mɔɔ hɔle zo wɔ Pɛntekɔso 33 Y.M. la anwo a? (b) Duzu ati a ɛnee ɛdoavolɛma ne anye la kɛ Dwowɛle ngapezo ne bara nu wɔ ɛvoya mɔɔ limoa la anu a?

¹² ‘Pita dwazole gyinlanle’ na ɔdendɛle ɔhilele menli dɔɔnwo ne mɔɔ ka aneɛ ngakyile la. (Gyi. 2:14) Ɔhilehilele nu ɔhilele menli mɔɔ badie la kɛ nwanwane adenle mɔɔ bɛluale zo bɛhanle aneɛ ngakyile la vi Nyamenle ɛkɛ amaa ngapezo mɔɔ Dwowɛle hanle la ara nu kɛ: “Mebawola me sunsum ne meagua nwonane biala anwo zo.” (Dww. 2:28) Kolaa na Gyisɛse ahɔ anwuma la, ɔhanle ɔhilele ye ɛdoavolɛma ne kɛ: “Mebabiza Selɛ ne, na yeamaa bɛ boavolɛ bieko,” na ɔhilele kɛ boavolɛ zɔhane a le “sunsum ne.”—Dwɔn 14:16, 17.

13, 14. Duzu a Pita yɛle amaa ye edwɛkɛ ne aha ye tievolɛma ne ahonle ɛ, na kɛ ɔkɛyɛ na yɛazukoa ye ɛ?

¹³ Pita edwɛkɛ mɔɔ li awieleɛ mɔɔ ɔhanle ɔhilele menli ne la anu la ɛkɛ wienyi: “Maa Yizilayɛma kɔsɔɔti ɛnwu ye kɛ Gyisɛse ɛhye mɔɔ bɛhunle ye wɔ baka zo la a Nyamenle ɛyɛ ye Awulae nee Kelaese a.” (Gyi. 2:36) Nɔhalɛ nu, tɛ bɛdabɛ mɔɔ bɛlɛtie ye la amuala a ɛnee wɔ ɛkɛ ne bie wɔ mekɛ mɔɔ bɛhunle Gyisɛse wɔ baka zo la a. Noko ɛnee bɛboka maanle ne mɔɔ yɛle zɔhane deɛ ne la anwo ɔti ɛnee bɛdi nwolɛ ɛzonle. Eza yɛ ye nzonlɛ kɛ Pita vile ɛbulɛ nu a ɔdendɛle ɔhilele ɔ mediema Dwuuma ne a yɛɛ ɔmaanle edwɛkɛ ne hanle bɛ ahonle. Ɛnee Pita bodane a le kɛ ɔmaa ye tievolɛma anlu bɛ nwo, na tɛ kɛ ɔbua bɛ ndɛne. Asoo Pita edwɛkɛ ne hanle menli dɔɔnwo ne mɔɔ ɛlɛtie ye la ɛya? Kyɛkyɛ. Emomu, “bɛlile nyane wɔ bɛ ahonle nu.” Bɛbizale kɛ: “Duzu a ɔwɔ kɛ yɛyɛ a?” Bie a adenle kpalɛ mɔɔ Pita luale zo dendɛle la hanle menli dɔɔnwo ahonle, ɔti ɔmaanle bɛnlunle bɛ nwo.—Gyi. 2:37.

¹⁴ Yɛbahola yɛazukoa kɛzi Pita maanle ye edwɛkɛ ne hanle menli ne ahonle la. Saa yɛlɛdi awie mɔ daselɛ a, ɔnle kɛ yɛsu nzuzulɛ bie mɔɔ suamenle ne lɛ mɔɔ ɔngyi Ngɛlɛlera ne azo la anwo kpolera. Emomu, yɛbɔ mɔdenle yɛfa yɛ adwenle yɛsie edwɛkɛ mɔɔ yɛ nee ye yɛ adwenle wɔ nwo la azo. Saa yɛnwu ninyɛne mɔɔ yɛ tievolɛma ne nee yɛ yɛ adwenle wɔ nwo la a, yɛbahola yɛalua Nyamenle Edwɛkɛ ne azo yɛ nee bɛ azuzu ninyɛne nwo. Fane dɔɔnwo ne ala, saa yɛka Baebolo ne anu edwɛkɛ ne wɔ adenle kpalɛ zo a, ahonlekpalɛma die to nu.

KILISIENE ƐZONLENLƐ WƆ PƆNTƐSE

Dwuuma mɔɔ bɛvi Pɔntɛse, maanzinli bie mɔɔ wɔ Ehyia Ekyi sɔlɔ la boka menli mɔɔ diele Pita wɔ Pɛntekɔso 33 Y.M. la anwo. (Gyi. 2:9) Ɔda ali kɛ bɛ nuhua bie mɔ vale edwɛkpa ne hɔle bɛ sua zo, ɔluakɛ Pita hanle diedima mɔɔ “ɛde ɛkponde” wɔ ɛleka le kɛ Pɔntɛse la anwo edwɛkɛ wɔ ye kɛlata ne mɔɔ limoa la anu. g (1 Pita 1:1) Ɔhɛlɛle kɛ Kilisienema zɔhane mɔ yiale “sɔnea ngakyile [mɔɔ] maa bɛ rɛle bɔ” la ɔlua bɛ diedi ne ati. (1 Pita 1:6) Bie a dwazotia nee kpɔdekpɔdeyɛlɛ boka nwo.

Bɛha sɔnea gyɛne mɔɔ Kilisienema mɔɔ wɔ Pɔntɛse yiale la anwo edwɛkɛ wɔ kɛlata bie mɔɔ Pliny, Wulomu amɛnlado mɔɔ nea Baetenea nee Pɔntɛse azo hɛlɛle hɔmaanle Maanle Kpanyinli Trajan la anu. Pliny hɛlɛle ye wɔ Pɔntɛse kɛyɛ 112 Y.M. kɛ Kilisiene ɛzonlenlɛ mɔɔ le “nzane” la ɛha awie biala ɔnva nwo bɛ ɛvolɛ anzɛɛ bɛ gyinlabelɛ. Pliny hanle kɛ menli mɔɔ bɛdo bɛ ɛzonle kɛ bɛle Kilisienema la ɛgyakyi bɛ ɛzonlenlɛ ne, na bɛhunle bɛdabɛ mɔɔ bɛangyakyi la. Bɛgyakyile bɛdabɛ mɔɔ bɛhanle munzule edwɛkɛ bɛtiale Kelaese anzɛɛ bɛyɛle asɔne bɛmaanle awozonle ne mɔ nee Trajan ananze ne la. Pliny liele dole nu kɛ “bɛdabɛ mɔɔ amgba bɛle Kilisienema la ɛnyɛ ninyɛne ɛhye mɔ.”

g Edwɛkɛ “ɛde ɛkponde” vi Giliki edwɛkpɔkɛ mɔɔ kile “Dwuuma mɔɔ wɔ maanle ngakyile zo” la anu. Ɔkile kɛ menli mɔɔ limoa rayɛle Kilisienema la anu dɔɔnwo le Dwuuma.

“Bɛ Nuhua Ko Biala Ɛmaa Bɛzɔne Ye” (Gyima ne 2:38-47)

15. (a) Edwɛkɛ boni a Pita hanle a, na duzu a menli ne yɛle ye wɔ nwo a? (b) Duzu ati a ɛnee ɔfɛta kɛ bɛsɔne menli dɔɔnwo ne mɔɔ diele edwɛkpa ne wɔ Pɛntekɔso la kenle ko zɔhane a?

¹⁵ Wɔ anyelielɛ kenle zɔhane wɔ Pɛntekɔso 33 Y.M., Pita hanle hilele Dwuuma nee bɛdabɛ mɔɔ bɛhakyi bɛrayɛ Dwuuma mɔɔ bɛdiele ye la kɛ: “Bɛnlu bɛ nwo, na bɛ nuhua ko biala ɛmaa bɛzɔne ye.” (Gyi. 2:38) Ɔlua zo, bɛzɔnenle menli kɛyɛ 3,000 wɔ azule mɔɔ wɔ Gyɛlusalɛm anzɛɛ mɔɔ ɔbikye ɛkɛ ne la anu. e Asoo bɛpelele bɛ nwo bɛmaanle bɛzɔnenle bɛ ɔ? Asoo kɛlɛtokɛ ɛhye kile kɛ ɔwɔ kɛ Baebolo sukoavoma nee ngakula mɔɔ bɛ awovolɛ le Kilisienema la pele bɛ nwo sɔne mɔɔ bɛtɛsieziele bɛ nwo la ɔ? Kyɛkyɛ. Kakye kɛ, ɛnee Dwuuma nee menli mɔɔ bɛhakyi bɛrayɛ Dwuuma mɔɔ bɛzɔnenle bɛ wɔ Pɛntekɔso 33 Y.M la sukoa Nyamenle Edwɛkɛ ne dɛba yɛɛ bɛboka maanle mɔɔ bɛyila bɛ nwo zo bɛmaa Gyihova la anwo. Bieko, ɛnee bɛla ye ali kɛ bɛbɔ mɔdenle—wɔ bie mɔ afoa nu, bɛpɛle adenle tendenle bɛrale ɛvoyia ɛhye bie. Mekɛ mɔɔ bɛliele gyima titili mɔɔ Gyisɛse Kelaese di wɔ Nyamenle bodane nu bɛdole nu la, ɛnee bɛziezie bɛ nwo kɛ bɛbahɔ zo bɛazonle Nyamenle kɛ Kelaese ɛdoavolɛma mɔɔ bɛzɔne bɛ la.

NWANE MƆ A RAYƐLE DWUUMA LA?

“Dwuuma nee bɛdabɛ mɔɔ bɛrayɛ Dwuuma la” diele Pita edwɛkɛ ne wɔ Pɛntekɔso 33 Y.M.—Gyi. 2:10.

Mrenyia mɔɔ fɛta mɔɔ bɛkpale bɛ kɛ bɛnlea aleɛ mɔɔ bɛkyɛ ye alehyenlɛ biala “mɔɔ nwolɛ hyia la” anu ko a le Nekɔlɔso, “mɔɔ vi Anteɔko na yerayɛ Dwuunli la.” (Gyi. 6:3-5) Menli ɛhye mɔ ɛnle Dwuuma, bɛle maanle maanle ne anu amra mɔɔ bɛhakyi bɛra Dwuuma ɛzonlenlɛ nu a. Kɛmɔ bɛlie Nyamenle nee Yizilayɛ Mɛla ne bɛdo nu, bɛkpo nyamenle gyɛne kɔsɔɔti, bɛpɛ bɛ mrenyiazo, na bɛraboka Yizilayɛ maanle ne anwo la ati, bɛbu bɛ kɛ Dwuuma wɔ adenle biala azo.

Mɔɔ bɛyele Dwuuma bɛvile akɛlɛzonlenlɛ nu wɔ Babelɔn wɔ 537 K.Y.M. la, bɛ nuhua dɔɔnwo dɛnlanle moamoa mɔɔ ɛmbikye Yizilayɛ azɛlɛ zo la noko bɛhɔle zo bɛlile Dwuuma ɛzonlenlɛ ne anzi. Ɛhye kile kɛ ɛleka biala mɔɔ Dwuuma dɛnlanle la, menli mɔɔ bikye bɛ la nwunle Dwuuma ɛzonlenlɛ ne. Tetedwɛkɛ kɛlɛvoma le kɛ Horace nee Seneca di nwolɛ daselɛ kɛ maanle ngakyile anu amra dɔɔnwo mɔɔ bɛ nye liele Dwuuma nee bɛ diedi ne anwo la hɔbokale bɛ nwo na bɛrayɛle Dwuuma.

16. Kɛzi ɛvoya mɔɔ limoa Kilisienema lale tunwomaa subane ali ɛ?

¹⁶ Ɔda ali kɛ ɛnee Gyihova ɛlɛyila ekpunli ɛhye. Edwɛkɛ ne toa zo kɛ: “Bɛdabɛ mɔɔ bɛrayɛle diedima la kɔsɔɔti yiale nu na bɛhyɛle debie biala mɔɔ bɛlɛ la bɛmaanle bɛ nwo, na bɛdɔnenle bɛ ninyɛne nee bɛ agyapadeɛ na bɛhyɛle ezukoa mɔɔ bɛnyianle bɛvile nuhua la, kɛ mɔɔ bɛ nuhua ko biala ngyianlɛ ne de la.” f (Gyi. 2:44, 45) Ɔda ali kɛ, nɔhalɛ Kilisienema kɔsɔɔti kulo kɛ bɛsukoa bɛ tunwomaa subane ne.

17. Ninyɛne boni mɔ a ɔwɔ kɛ awie yɛ amaa yeafɛta yeamaa ɛzɔnenlɛ a?

¹⁷ Kolaa na Kilisienenli bie ayila ɔ nwo zo na yeafɛta yeamaa ɛzɔnenlɛ la, ɔwɔ kɛ ɔyɛ ninyɛne dɔɔnwo mɔɔ gyi Ngɛlɛlera ne azo la. Ɔwɔ kɛ ɔsukoa Nyamenle Edwɛkɛ ne. (Dwɔn 17:3) Ɔwɔ kɛ ɔda ye ali kɛ ɔlɛ diedi na ɔnu ɔ nwo ɔfi ye ɛbɛla mɔɔ ɛnee ɔbɔ ye dɛba la anwo ɔfa ɔkile kɛ ɔdi nwolɛ nyane. (Gyi. 3:19) Akee ɔwɔ kɛ ɔkakyi ye ɛbɛlabɔlɛ na ɔbɔ ɔ bo ɔyɛ ninyɛne mɔɔ nee Nyamenle ɛhulolɛdeɛ le ko la. (Wlo. 12:2; Ɛfɛ. 4:23, 24) Ɔyɛ ɛhye mɔ ɔwie a akee yeayila ɔ nwo zo yeamaa Nyamenle wɔ asɔneyɛlɛ nu na bɛazɔne ye.—Mat. 16:24; 1 Pita 3:21.

18. Nwolɛ adenle boni a wɔ ɛkɛ ne maa Kelaese ɛdoavolɛma mɔɔ bɛzɔne la a?

¹⁸ Ɛle Gyisɛse Kelaese ɛdoavolɛ mɔɔ wɔyila ɛ nwo zo na bɛzɔne wɔ ɔ? Saa ɔle zɔ a, ɛnee maa ɛ nye ɛlie nwolɛ adenle mɔɔ ɛbuke ɛmaa wɔ la anwo. Kɛ mɔɔ ɛvoya mɔɔ limoa ɛdoavolɛma ne nyianle sunsum nwuanzanwuanza ne la, ɛdawɔ noko ɛbahola wɔanyia anwosesebɛ wɔali daselɛ bɔkɔɔ na wɔayɛ Gyihova ɛhulolɛdeɛ!

a Nea ɛlɛka mɔɔ se “ Gyɛlusalɛm—Dwuuma Ɛzonlenlɛ Ɛleka.”

b Nea nlɛka “ Wulomu—Maanle Bie Suakpole,” “ Dwuuma Mɔɔ Wɔ Mɛsɔpɔteemea Nee Yigyibiti,” nee “ Kilisiene Ɛzonlenlɛ Wɔ Pɔntɛse.”

c “Ɛtafinlimalɛ” ne ɛnle senle emomu ɔle kɛ “senle mɔɔ zɔho” ɛtafinlimalɛ, mɔɔ kile kɛ deɛ mɔɔ bɛnwunle ye wɔ ɛdoavolɛ ko biala ati zo la le kɛ senle mɔɔ ɛlɛsɔ la.

d Nea ɛlɛka “ Nwane Mɔ A Rayɛle Dwuuma La?”

e Ɛhye bie zile wɔ Gyihova Alasevolɛ maanle maanle avinli nyianu bie mɔɔ bɛyɛle ye wɔ August 7, 1993 wɔ Kiev, Ukraine la abo, bɛzɔnenle menli 7,402 wɔ nyianu ne abo. Bɛvale dɔnehwele nwiɔ yɛɛ mitini bulu nee nnu a bɛzɔnenle menli ne bɛwiele a.

f Mekɛ ezinra nu ngyehyɛleɛ ɛhye mɔɔ bɛyɛle la boale kpalɛ ɔluakɛ nyɛvolɛ mɔɔ rale la dɛnlanle Gyɛlusalɛm hyɛle ekyii amaa bɛazukoa sunsum nu ninyɛne dɔɔnwo. Ɛhye le ninyɛne mɔɔ bɛvile bɛ ɛhulolɛ nu bɛvale bɛhyɛle a na tɛ kɛ ɔle maanyɛlɛ ngyehyɛleɛ bie la ati ɔ.—Gyi. 5:1-4.

‘DI NYAMENLE BELEMGBUNLILILƐ NE ANWO DASELƐ BƆKƆƆ’