1, 2. Adenle boni a ɔwɔ kɛ Pɔɔlo tu a, na ninyɛne boni mɔ a bie a ɔlɛdwenle nwo a?

 PƆƆLO ɛlɛdwenle edwɛkɛ ne anwo ɔluakɛ ɔbaha ye kenle bie kpalɛ. Amɛnlado Fɛsetɛse hanle kɛ, “Siza ɛkɛ ne a ɛbahɔ a.” Pɔɔlo ɛla efiade too ɛvolɛ nwiɔ, ɔti adenle tendenle mɔɔ ɔpɛ yeahɔ Wulomu la bayɛ ngakyile ekyii. (Gyi. 25:12) Noko, nyevile zo adendulɛ dɔɔnwo mɔɔ Pɔɔlo kakye bɛ kpalɛ la ɛnyɛ anyelielɛ. Adenle ɛhye mɔɔ Pɔɔlo tu ahɔ Siza anyunlu la maanle ɔdwenlenle kpuya bie mɔ mɔɔ anwo hyia kpalɛ la anwo.

² Pɔɔlo ɛyia “azule nye esiane” fane dɔɔnwo, yebutu nyevile nye fane nsa yɛɛ yeli alehyenlɛ nee aledwolɛ wɔ nyevile kunlu bɔbɔ ɛlɛ. (2 Kɔl. 11:25, 26) Bieko, adendulɛ ɛhye ɛnle kɛ ye edwɛkpatɛlɛvolɛ adendulɛ ne mɔ mɔɔ ɛnee ɔlɛ fanwodi la. Pɔɔlo le pilizanli yɛɛ ɔbapɛ adenle tendenle​—ɔvi Sizalia mɔɔ kɔ Wulomu la bayɛ kɛyɛ mayɛlɛ 2,000. Asoo ɔbahola yeapɛ adenle ɛhye mɔɔ ɔnrɛyia ngyegyelɛ biala ɔ? Saa esiane biala ando ye bɔbɔ a, asoo bɛbabua ye ndɛne fɔɔnwo? Kakye kɛ, Seetan ewiade ne anu tumivolɛ kpole wɔ zɔhane mekɛ ne a babua ye ndɛne a.

3. Duzu a ɛnee Pɔɔlo ɛbɔ kpɔkɛ kɛ ɔbayɛ a, na duzu a yɛbazuzu nwo wɔ tile ɛhye anu a?

³ Ɛnea mɔɔ wɔgenga ye wɔ Pɔɔlo anwo la amuala a, ɛsuzu kɛ mɔɔ bahola ado ye la maanle ye anyelazo wiele ɔ? Kyɛkyɛ! Ɛnee ɔze kɛ ɔ nwo bahyele ye, noko ɛnee ɔnze ngyegyelɛ mɔɔ ɔbayia la. Duzu a ati a ɔwɔ kɛ ɔmaa ninyɛne mɔɔ bado ye mɔɔ ɔnlɛ zolɛ tumi la anwo adwenleadwenle sɛkye anyelielɛ mɔɔ ɔnyianle ye wɔ ye ɛzonlenlɛ gyima ne anu la ɛ? (Mat. 6:27, 34) Ɛnee Pɔɔlo ze kɛ ɔle Nyamenle ɛhulolɛdeɛ kɛ ɔbava nwolɛ adenle biala mɔɔ ɔbanyia la yeabɔ edwɛkpa ne nolo, na yeaha bie yeahile tumivolɛma bɔbɔ. (Gyi. 9:15) Ɛnee Pɔɔlo ɛbɔ kpɔkɛ kɛ ɔnva nwo mɔɔ bazi biala la ɔbawie gyima zɔhane. Asoo tɛ kpɔkɛ mɔɔ yɛdayɛ noko yɛbɔ la ɛne? Ɔti bɛmaa yɛdoa Pɔɔlo wɔ ye adendulɛ titili ɛhye anu na yɛnlea kɛzi ye neazo ne baboa yɛ la.

4. Meli boni a Pɔɔlo vole a, na nwane mɔ a ɛnee boka ɔ nwo a?

⁴ Bɛvale Pɔɔlo nee pilizama bie mɔ bɛwulale Wulomu sogya kpanyinli bie mɔɔ bɛfɛlɛ ye Dwuleɛse la asa anu na ɔ nee bɛ vole gualilɛma meli  bie mɔɔ ɛra Sizalia la. Meli ne vi Adelameteɛm, habɔ bie mɔɔ wɔ Ehyia Ekyi adɔleɛ mɔɔ bikye suakpole Metelin mɔɔ wɔ Lesbos bɔra ne azo la a rale a. Meli ɛhye fa sɔlɔ na akee ɔkakyi ɔ nye ɔkɔ adɔleɛ na ɔgyinla adenle nu ɔye ninyɛne na eza ɔfa bie. Bɛanyɛ meli zɛhae mɔ kɛ bɛva menli, titili pilizama. (Nea ɛlɛka, “ Nyevile Zo Adendulɛ Nee Gualilɛ Ndenle.”) Ɔle kpalɛ kɛ ɛnee tɛ Pɔɔlo angome a le Kilisienenli wɔ pilizama ne anu a. Ɛnee ɔ gɔnwo mɔ diedima nwiɔ boka ɔ nwo​—Alesetaakɛse yɛɛ Luku. Luku a hɛlɛle kɛlɛtokɛ ne a. Yɛnze saa agɔnwolɛma nwiɔ ɛhye duale bɛ adendulɛ ne anwo kakɛ anzɛɛ ɛnee bɛle Pɔɔlo azonvolɛ a.​—Gyi. 27:1, 2.

5. Moalɛ boni a Pɔɔlo nyianle wɔ Saedɛn a, na duzu a yɛsukoa yɛfi nu a?

⁵ Mɔɔ bɛlile kenle ko wɔ nyevile zo na bɛpɛle mayɛlɛ kɛyɛ 70 la, meli ne gyinlanle Saedɛn wɔ Selea ɛnweazo. Kɛmɔ Pɔɔlo le Wulomunli mɔɔ bɛtɛbuale ye fɔlɛ la ati, bie a Dwuleɛse nee ye anli kɛ awule la. (Gyi. 22:27, 28; 26:31, 32) Dwuleɛse maanle Pɔɔlo dwule aze na ɔhɔnwunle ɔ mediema Kilisienema. Nea kɛzi ɔbayɛ kɛ mediema mrenyia nee mraalɛ zɔhane mɔ anye liele kɛ bɛholale bɛboale Pɔɔlo mɔɔ ɛnee yela efiade mekɛ tendenle la! Wɔnwu ndenle mɔɔ ɛbahola wɔalua zo wɔalie nyɛvolɛ na ɛdawɔ noko wɔanyia anwosesebɛ ɔ?​—Gyi. 27:3.

6-8. Kɛzi Pɔɔlo adendulɛ mɔɔ vi Saedɛn kɔ Kenaedɛse la yɛle ɛ, na adenle boni a Pɔɔlo nyianle lile daselɛ a?

⁶ Mɔɔ bɛdule bɛ bo bɛvile Saedɛn la, meli ne hɔvale Selesea mɔɔ bikye Pɔɔlo sua zo Taasɛse la. Luku anga kɛ bɛgyinlanle adenle nu bieko ɔnva nwo kɛ ɔhanle kɛ ‘ɛnee anwoma ne ɛlɛbɔ atia bɛ’ la. (Gyi. 27:4, 5) Noko, yɛze kɛ Pɔɔlo vale nwolɛ adenle biala mɔɔ ɔnyianle ye la ɔhanle edwɛkpa ne. Nɔhalɛ nu, ɔlile pilizama nee menli gyɛne le kɛ bɛdabɛ mɔɔ bɛyɛ gyima wɔ meli ne anu, sogyama nee menli mɔɔ ɛnee bɛwɔ habɔ mɔɔ bɛgyinlanle ɛkɛ ne la daselɛ. Asoo yɛfa adenle biala mɔɔ yɛnyia ye ɛnɛ la yɛdi daselɛ ɔ?

⁷ Yeangyɛ meli ne dwule Maela, habɔ  bie mɔɔ wɔ Ehyia Ekyi nyiakɛ ɛnweazo la. Bɛmaanle Pɔɔlo nee awie mɔ gyɛne hɔvole meli mɔɔ bava bɛ ahɔ Wulomu la anu. (Gyi. 27:6) Mekɛ zɔhane, ɛnee Wulomu nyia hwiiti dɔɔnwo fi Yigyibiti, na ɛnee meli mɔɔ fa hwiiti fi Yigyibiti ba la gyinla Maela. Dwuleɛse nwunle meli ɛhye bie na ɔmaanle sogyama nee pilizama ne hɔvole bie. Ɔbayɛ kɛ ɛnee meli ɛhye le kpole tɛla alimoa ɛdeɛ ne. Ɔvale hwiiti dɔɔnwo yɛɛ menli 276​—menli mɔɔ yɛ gyima wɔ meli ne anu, sogyama, pilizama yɛɛ menli gyɛne mɔɔ bɛlɛkɔ Wulomu la. Nɔhalɛ nu, meli ɛhye mɔɔ bɛvole la maanle Pɔɔlo nyianle adenle kɛ ɔbali menli dɔɔnwo daselɛ, na ɔda ali kɛ ɔvale nwolɛ adenle ne ɔlile gyima kpalɛ.

⁸ Bɛgyinlanle bieko wɔ Kenaedɛse mɔɔ wɔ Ehyia Ekyi nyiakɛ adɔleɛ ɛnweazo la. Saa anwoma ne anloa ɛnyɛ se a, meli kola fa kenle ko pɛ adenle ɛhye. Noko, Luku hanle kɛ “ɛnee yɛngola kɔ kpalɛ, yemɔti yɛlile kenle dɔɔnwo wɔ adenle nu, yɛ nwo hyelele yɛ kpalɛ na yɛaradwu Kenaedɛse.” (Gyi. 27:7a) Ɛnee adendulɛ ne ɛnla aze fee. (Nea ɛlɛka mɔɔ se “ Mɛdetɛlenia Anwoma Mɔɔ Bɔ Tia.”) Dwenle menli mɔɔ bɛlua anwoma kpole ne anu na azɛlɛkye ne ɛlɛbɔ kpole la anwo nea.

9, 10. Ngyegyelɛ boni mɔ a bɛyiale ye wɔ Kiliti a?

⁹ Mɔɔ bɛvile Kenaedɛse la, melikavolɛ ne yɛle kɛ ɔbadoa zo yeahɔ adɔleɛ, noko Luku mɔɔ nwunle mɔɔ hɔle zo la hanle kɛ ‘anwoma ne bɔle tiale bɛ.’ (Gyi. 27:7b) Mɔɔ meli ne dule ɔ bo vile ɛnwea ne anloa la, anwoma ɛsesebɛ bie mɔɔ vi sɔlɔ adɔleɛ la pianle meli ne kpole hɔle nyiakɛ, bie a ɔpianle ye ndɛndɛ. Mekɛ bie Saepelɛse bɔra ne bɔle meliɛ ne anwo bane vile anwoma ɛsesebɛ bie anwo na ɛhye bie a zile wɔ Kiliti bɔra ne azo a. Mekɛ mɔɔ meli ne dɛlale Salemoni mɔɔ wɔ Kiliti aduduleɛ la, tɛnlabelɛ ne yɛle kpalɛ ekyii. Duzu ati ɔ? Meli ne hɔdwule bɔra ne nyiakɛ mɔɔ ɛnee anwoma ne anloa ɛnyɛ se la. Nea kɛzi menli ne ahonle dɔle bɛ azule nu ɛkɛ ne ala ɛ! Noko mekɛ ala mɔɔ meli ne tɛbɔ nyevile zo la, kɛ ɔde ye biala la bɛbayia ɛyɛlɛ mekɛ. Ɛnee ɔle ngyegyelɛ ɔmaa bɛ.

¹⁰ Luku hanle mɔɔ zile la wienyi kɛ: “Yɛsianenle [Kiliti] aze kpalɛ kpalɛ ɛdeɛ, noko yɛvɛle dedee na yɛrale ɛleka bie mɔɔ bɛfɛlɛ ye Ahonle Kɛnlɛmazo” la. Bɔra ne maanle bɛnyianle banebɔlɛ ɛdeɛ, noko ɛnee ɔyɛ se kɛ bɛbaha meli ne. Akee bɛnyianle ɛleka kpalɛ ekyi mɔɔ bikye ɛleka mɔɔ nyevile ne anye kile sɔlɔ la na bɛdole bɛ sɛkɛ ne wɔ ɛkɛ. Kenle nyɛ a bɛlile wɔ ɛkɛ a? Luku ka kɛ “yɛhyɛle ɛkɛ ne kpalɛ,” noko yeamboa bɛ. Ɛnee ɔdwu September nee October a nyevile zo ɛlualɛ le esiane.​—Gyi. 27:8, 9.

11. Folɛ boni a Pɔɔlo dule menli mɔɔ wɔ meli ne anu la a, noko kpɔkɛ boni a bɛzile a?

¹¹ Ɔbayɛ kɛ menli ne bie mɔ maanle Pɔɔlo dule bɛ folɛ ɔluakɛ ɛnee ɔta ɔdua Mɛdetɛlenia nyevile ne azo. Ɔzuzule kɛ bɛmmamaa meli ne tu ɔ bo. Saa ɔtu ɔ bo a, ɔbamaa “ninyɛne dɔɔnwo azɛkye na bɛaminli” na bie bɔbɔ a awie bawu.  Noko, melikavolɛ ne nee meli ne amenle yɛle kɛ bɛtoa adendulɛ ne azo, bie a bɛdele nganeɛ kɛ ɔhyia kɛ bɛkɔ ɛleka mɔɔ bɛbanyia banebɔlɛ la ndɛndɛ. Bɛlile Dwuleɛse adwenle na bɛ nuhua dɔɔnwo dele nganeɛ kɛ ɔwɔ kɛ bɛbɔ mɔdenle bɛkɔ Fonekese, habɔ bie mɔɔ wɔ moamoa la azo. Ɔbayɛ kɛ ɛnee habɔ kpole wɔ ɛkɛ mɔɔ bɛdi fɔsɛlɛ wɔ ɛkɛ a ɔbaboa a. Ɔti, mɔɔ nyiakɛ anwoma ne bɔle bɛtɛɛ la, meli ne dule ɔ bo.​—Gyi. 27:10-13.

12. Mɔɔ bɛvile Kiliti la, ngyegyelɛ boni a meli ne yiale a, na kɛzi menli ne bɔle mɔdenle kɛ bɛdi nwolɛ gyima ɛ?

¹² Akee bɛyiale ngyegyelɛ kpole: “anwoma ɛsesebɛ bie” mɔɔ vi sɔlɔ aduduleɛ la dule. Wɔ mekɛ ekyi anu, “bɔra ekyi bie mɔɔ bɛfɛlɛ ye Kɔda” mɔɔ ɛkɛ ne nee Ahonle Kɛnlɛmazo avinli kɛyɛ mayɛlɛ 40 la bɔle bɛ nwo bane. Noko, ɛnee anwoma ne bahola abɔ meli ne ahɔ nyiakɛ yeamaa yeahɔnwe ɛnwea bie mɔɔ bikye Africa la azo. Amaa ɛhye ando bɛ la, menli ne hwenle ɛlɛne ekyi ne hɔle meli ne anu. Bɛvɛle kpalɛ na bɛahola bɛahwe ɛlɛne ne ɔluakɛ ɛnee nzule ɛhɔ nu. Bɛbɔle mɔdenle bɛvale nyɛma anzɛɛ kyeenyi bɛwulale meli ne abo bɛvale bɛkyekyele meli ndaboa ne. Bɛtutole nyɛma mɔɔ sosɔ avela ne la anu na bɛdwulale avela ne aze bɛmaanle anwoma ne vale meli ne hɔle. Nea kɛzi ɛhye maanle bɛ ahonle dule la! Ɛhye mɔ amuala mɔɔ bɛyɛle bɔbɔ la amboa bɛ, ɔluakɛ ‘ahumu ne dule kpole tiale’ meli ne. Kenle nsa ne azo, bɛvuandinle meli ne anu ninyɛne ne bie bɛguale ye lɔ amaa meli ne ahola kɔ.​—Gyi. 27:14-19.

13. Kɛzi menli mɔɔ nee Pɔɔlo wɔ meli ne anu la dele nganeɛ wɔ mekɛ mɔɔ ahumu ne ɛlɛtu la ɛ?

¹³ Ɔbayɛ kɛ ɛzulolɛ hanle menli ne. Noko Pɔɔlo nee ɔ gɔnwo mɔ nyianle akɛnrasesebɛ. Ɛnee Awulae ɛlimoa ɛha ɛhile Pɔɔlo kɛ ɔbali ɔ nwo daselɛ wɔ Wulomu, na nzinlii anwumabɔvolɛ bie noko zile zolɛ. (Gyi. 19:21; 23:11) Noko anwoma ɛsesebɛ ne bɔle aledwolɛ nee alehyenlɛ too dapɛne nwiɔ. Kɛmɔ ɛnee ezule ɛlɛtɔ na maanle nu ɛmunla kpalɛ la ati, melikavolɛ ne annwu ɛleka mɔɔ meli ne lua anzɛɛ ɔlɛkɔ la. Awie biala ati akunlu amba aleɛ zo bɔbɔ. Saa ɛnea ɛyɛlɛ ne, ezule ne, nyevile ne mɔɔ ɛmaa bɛ nwo ɛdo bɛ nee ɛzulolɛ mɔɔ ɛha bɛ la a, asoo bɛbadwenle aleɛ nwo?

14, 15. (a) Duzu ati a Pɔɔlo nee menli ne ɛlɛtendɛ la ɔhanle kɔkɔ mɔɔ ɔlimoale ɔbɔle bɛ la anwo edwɛkɛ a? (b) Duzu a yɛsukoa yɛfi anyelazo edwɛkɛ mɔɔ Pɔɔlo hanle la anu a?

¹⁴ Pɔɔlo dwazole gyinlanle. Ɔhanle kɔkɔbɔlɛ mɔɔ ɔlimoale ɔvale ɔmaanle bɛ la anwo edwɛkɛ noko yeanga kɛ, ‘Se menganle la bɛandie.’ Noko, ɛnee ninyɛne mɔɔ ɛlɛsisi la maa ɔda ali kɛ anrɛɛ ɔwɔ kɛ bɛtie ye. Akee ɔhanle kɛ: “Kɛkala, mesɛlɛ bɛ bɛnyia akɛnrasesebɛ, bɛ nuhua ko bɔbɔ ɛnrɛminli, meli ye ala a bazɛkye a.” (Gyi. 27:21, 22) Nea kɛzi edwɛkɛ zɔhane maanle menli ne ahonle dɔle bɛ azule nu la! Pɔɔlo noko anye liele kɛ Gyihova vale anyelazo edwɛkɛ ɛhye maanle ye kɛ ɔha ɔhile menli ne la. Ɔhyia kɛ yɛkakye kɛ Gyihova dwenle dasanli biala ngoane nwo. Awie biala anwo hyia ye. Ɛzoanvolɛ Pita hɛlɛle kɛ: ‘Gyihova ɛngulo kɛ bɛsɛkye awie biala, emomu ɔkulo kɛ menli kɔsɔɔti nu bɛ nwo.’ (2 Pita 3:9) Nea kɛzi ɔhyia ndɛndɛ kɛ yɛka Gyihova edwɛkɛ ne mɔɔ  maa anyelazo la yɛkile menli dodo biala mɔɔ yɛbahola la! Menli ngoane la esiane nu.

¹⁵ Ɔbayɛ kɛ Pɔɔlo lile “ɛwɔkɛ mɔɔ Nyamenle bɔle” la anwo daselɛ hilele menli dɔɔnwo mɔɔ wɔ meli ne anu la. (Gyi. 26:6; Kɔl. 1:5) Kɛkala mɔɔ meli ne kpondɛ ahɔnwe la, Pɔɔlo bahola aha edwɛkɛ mɔɔ bamaa banyia anyelazo ɛkɛ ne ala la ahile bɛ. Ɔhanle kɛ: ‘Nɔe, Nyamenle ne mɔɔ mele ye ɛdeɛ la anwumabɔvolɛ rale me nwo ɛke na ɔhanle kɛ: “Pɔɔlo mmasulo. Ɔwɔ kɛ ɛkɔgyinla Siza anyunlu, na nea! Nyamenle balie bɛdabɛ mɔɔ ɛ nee bɛ lua la amuala ngoane.”’ Pɔɔlo hanle kɛ: “Ɔti ayi mɔ, bɛnyia akɛnrasesebɛ ɔluakɛ medie Nyamenle medi kɛ mɔɔ bɛha bɛhile me la bayɛ zɔ. Noko, ɔwɔ kɛ yɛkɔnwe bɔra bie ɛnweazo.”​—Gyi. 27:23-26.

16, 17. (a) Mekɛ boni a Pɔɔlo yɛle asɔne a, na duzu a vi nu rale a? (b) Kɛzi Pɔɔlo edwɛkɛ ne rale nu ɛ?

¹⁶ Mɔɔ bɛ kunlu tetele bɛ too dapɛne nwiɔ na anwoma ne bɔle meli ne pɛle adenle mayɛlɛ 540 la anzi, menli ne nwunle kɛ ninyɛne ɛhakyi, bie a bɛdele kɛ azɛlɛkye ne ɛlɛbɔ. Bɛdole sɛkɛ ne wɔ nyevile ne anu amaa anwoma ne ambɔ ye angɔ na bɛahola bɛahile meli ne adenle bɛahɔ ɛnweanloa. Zɔhane  mekɛ ne, bɛbɔle mɔdenle kɛ bɛfi meli ne anu bɛahɔ noko sogyama ne ammaa bɛ adenle. Pɔɔlo hanle hilele sogya kpanyinli ne nee sogyama ne kɛ: “Saa menli ɛhye mɔ andɛnla meli ye anu a, bɛnrɛnyia ngoane.” Kɛkala mɔɔ meli ne ɛgyinla ekyii la, Pɔɔlo hanle hilele bɛ muala kɛ bɛli debie na ɔmaanle bɛ anwosesebɛ bieko kɛ bɛnrɛwu. Pɔɔlo “[lale] Nyamenle ase wɔ bɛ kɔsɔɔti bɛ nyunlu ɛkɛ.” (Gyi. 27:31, 35) Asɔne ɛhye mɔɔ Pɔɔlo yɛle la ɛnee le neazo maa Luku, Alesetaakɛse yɛɛ Kilisienema ɛnɛ. Asoo asɔne mɔɔ ɛyɛ ye wɔ bagua nu la maa awie mɔ anwosesebɛ na ɔkyekye bɛ rɛle ɔ?

¹⁷ Pɔɔlo yɛle asɔne ne wiele la, “bɛ muala bɛnyianle akɛnrasesebɛ na bɛdabɛ noko bɛbɔle ɔ bo bɛlile debie.” (Gyi. 27:36) Bɛbɔle ɔ bo bɛvuandinle hwiiti ne mɔɔ wɔ meli ne anu la bɛguale nyevile ne anu amaa nuhua ayɛ felafela na yeahola yeahɔ ɛnwea ne anloa. Mɔɔ aleɛ hyenle la, gyimayɛvoma ne pepɛle sɛkɛ ne mɔ amuala, bɛzianyinle ɛdahoma ne mɔ mɔɔ wɔ meli ne anzi la na bɛvolale ɔ nyunlu avela ne mɔ amaa bɛahola bɛahile meli ne adenle. Akee meli ne anyunlu hɔnwenle na azɛlɛkye ne bubule ɔ bo ne bɔkɔɔ. Ɛnee sogyama bie mɔ kpondɛ kɛ bɛku pilizama ne amaa bie angola nriandi, noko Dwuleɛse ammaa bɛ adenle. Ɔmaanle bɛ muala anwosesebɛ kɛ bɛweɛ bɛhɔ file zo anzɛɛ bɛbutubutu ndaboa zo bɛhɔ. Pɔɔlo edwɛkɛ mɔɔ ɔhanle la rale nu​—menli 276 nyianle ngoane. Ɛhɛe, “bɛ muala bɛholale bɛdwule aze.” Noko ɛnee bɛwɔ ni?​—Gyi. 27:44.

18-20. Kɛzi menli mɔɔ wɔ Mɔleta la yɛle “nyele kpalɛ” ɛ, na nwanwane debie boni a Nyamenle maanle Pɔɔlo yɛle a?

¹⁸ Ɛnee menli mɔɔ ɛnyia ngoane la wɔ Mɔleta, bɔra bie mɔɔ wɔ Sicily nyiakɛ la azo. (Nea ɛlɛka mɔɔ se “ Mɔleta​—Ɔwɔ Ni?”) Menli mɔɔ wɔ bɔra ne azo mɔɔ asolo aneɛ mɔɔ bɛka la yɛle bɛ “nyele kpalɛ.” (Gyi. 28:2) Bɛhuanle senle bɛmaanle nyɛvolɛ ne mɔ mɔɔ ɛnee bɛ nwo ɛloa na ɛyɛlɛ ɛlɛku bɛ la. Senle ne  maanle bɛ nwo yɛle bɛ wuluwulu ɔnva nwo kɛ ɛnee ɛyɛlɛ wɔ nu na ezule ɛlɛtɔ la. Eza ɔmaanle nwanwane debie bie zile.

¹⁹ Pɔɔlo boale bɛ. Ɔsesale ɛyɛne ɔguale senle ne anu. Mɔɔ ɔlɛyɛ ɛhye la, bɔna bie vi ɛyɛne ne anu vindele rahale ye na ɔbɛkale ɔ sa. Ɛnee Mɔleta amra dwenle kɛ Nyamenle ɛlɛtwe ɔ nzo. a

²⁰ Bɔra ne azo amra mɔɔ nwunle kɛ ɛwɔlɛ ɛha Pɔɔlo la zuzule kɛ ɔ sa “banwu.” Neɛnleanu bie ka kɛ, edwɛkɛ kpɔkɛ mɔɔ bɛfa bɛdi gyima wɔ “ayileyɛlɛ nu” la a bɛvale bɛlile gyima wɔ ɛke a. Ɔnyɛ nwanwane kɛ Luku mɔɔ le “ayileyɛvolɛ kulovolɛ” la nwunle edwɛkɛ ɛhye ndɛndɛ la. (Gyi. 28:6; Kɔl. 4:14) Noko, Pɔɔlo kpondenle ɛwɔlɛ ne guale na ɛhwee anyɛ ye.

21. (a) Edwɛkɛ mɔɔ le pɛpɛɛpɛ la anwo neazo boni a wɔ Luku kɛlɛtokɛ ɛhye anu a? (b) Nwanwane debie boni mɔ a Pɔɔlo yɛle a, na kɛzi ɔhanle Mɔleta amra ɛ?

²¹ Ɛnee Pɛbeleɛse, sukoavolɛ bie mɔɔ le azɛlɛ menle la de ɛkɛ. Bie a ɔdaye a ɛnee ɔle Wulomu sogya kpanyinli wɔ Mɔleta a. Luku hanle ɔ nwo edwɛkɛ kɛ ɔle “bɔra ne azo kpanyinli ne,” ɔvale amodinli mɔɔ bɛnwu ye wɔ Mɔleta ninyɛne nwiɔ bie anwo la ɔlile gyima. Pɛbeleɛse liele Pɔɔlo nee menli mɔɔ ɔ nee bɛ lua la kɛnlɛma na ɔzonlenle bɛ ɛyɛvolɛ kenle nsa. Noko ɛnee ye papa ɛnde kpɔkɛ. Ɛke noko, Luku hanle anwodolɛ ne anwo edwɛkɛ pɛpɛɛpɛ. Ɔhɛlɛle kɛ ‘ebunlu ɛhye nrenyia ne yɛɛ ɔ kunlu ɛlɛtu na ɔla ɛkpa zo,’ ɔhanle ewule fɔɔnwo mɔɔ ɛlɛgyegye nrenyia ne la. Pɔɔlo yɛle asɔne na ɔvale ɔ sa ɔguale nrenyia ne anwo zo, na ɔyɛle ye ayile. Nwanwane deɛ ɛhye zile menli ne anwo, ɔti bɛvale menli gyɛne mɔɔ ɛnde kpɔkɛ la bɛrale kɛ bɛyɛ bɛ ayile na bɛvale ninyɛne mɔɔ Pɔɔlo nee menli mɔɔ ɔ nee bɛ lua la hyia nwo la bɛrɛlɛle bɛ.​—Gyi. 28:7-10.

22. (a) Kɛzi nwomanli bie anye ɛlie Wulomu adendulɛ ne anwo kɛlɛtokɛ mɔɔ Luku yɛle la anwo ɛ? (b) Duzu a yɛbazuzu nwo wɔ tile bieko anu a?

²² Bɛhɛlɛle Pɔɔlo adendulɛ ne mɔɔ yɛzuzu nwo la pɛpɛɛpɛ yɛɛ ɔle nɔhalɛ. Nwomanli bie hanle kɛ: “Luku kɛlɛtokɛ ne . . . ala a le Baebolo ne anu edwɛkɛ ko mɔɔ bɛhilehile nuhua kpalɛ a. Mɔɔ ɔhanle ye wɔ ɛvoya mɔɔ limoa nyevile zo adendulɛ nwo la le pɛpɛɛpɛ yɛɛ ninyɛne mɔɔ kɔ zo wɔ Mɛdetɛlenia aduduleɛ nehane mɔɔ ɔhanle la le nɔhalɛ,” ɔti ɔbayɛ kɛ ɔnleanle edwɛkɛ mɔɔ bɛhɛlɛ bɛdo ɛkɛ ne dɛba la azo. Bie a Luku yɛle kɛlɛtokɛ ne wɔ mekɛ mɔɔ ɔ nee Pɔɔlo ɛlɛtu adenle ne la. Saa ɔle zɔ a, ɛnee ɔhɛlɛle edwɛkɛ dɔɔnwo wɔ bɛ adendulɛ ne mɔɔ doa zo la anu. Saa akee bɛdwu Wulomu a, duzu a bado Pɔɔlo a? Maa yɛnlea.