NEA anwumabɔvolɛ ne mɔɔ ɛbuke anlenkɛ ne wɔ ɛke la. Menli ne mɔɔ ɔlɛye bɛ la le Gyisɛse ɛzoanvolɛma. Maa yɛnlea deɛ mɔɔ manle bɛdole bɛ efiade la.

Sunsum nwuanzanwuanza ne rale Gyisɛse ɛdoavolɛma ne anwo zo la ɔ nzi mekɛ ekyi bie ala ɛne. Na mɔɔ zile la ɛne: Ɛnee Pita nee Dwɔn ɛlɛkɔ ɛzonlenlɛ sua ne mɔɔ Wɔ Gyɛlusalɛm la anu kenle ko ewiazo. Nrenya bie mɔɔ bɛwole ye abubura la de anlenkɛ ne anloa ɛkɛ ne. Dahuu biala menli soa ye ba ɛke amaa yeahola yeazɛlɛzɛlɛ menli mɔɔ ɛlɛkɔ ɛzonlenlɛ sua ne anu la ezukoa. Mɔɔ ɔnwunle Pita nee Dwɔn la, ɔzɛlɛle bɛ kɛ bɛmaa ye debie. Duzu a ɛzoanvolɛma ne kɛyɛ a?

Bɛgyinlanle na bɛnleanle nrenya anwo anwunvɔne ne. Pita zele ye kɛ: ‘Menlɛ ezukoa, na mɔɔ melɛ ye la a mefa meamaa wɔ la. Ɔlua Gyisɛse duma nu, dwazo tia!’ Pita akee zɔle ɔ sa fema ne, na ɛkɛ ne ala ɔwulule ɔpenle na ɔbɔle ɔ bo kɛ ɔtia. Mɔɔ menli ne nwunle ɛhye la ɔyɛle bɛ azibɛnwo na bɛ nye liele kpole wɔ nwanwane gyima ɛhye anwo.

Pita zele kɛ: ‘Ɔlua Nyamenle ne mɔɔ dwazole Gyisɛse vile ewule nu la, tumi zo a yɛyɛ nwanwane gyima ɛhye a.’ Mekɛ mɔɔ ɔ nee Dwɔn anloa wɔ zolɛ bɛlɛtendɛ la, ɛzonlenlɛ nu adekilevolɛma bie ravindele bɛ nwo zo. Bɛvale ɛya kpole ɔluakɛ ɛnee Pita nee Dwɔn ɛlɛkilehile menli ne mɔ kɛ bɛdwazo Gyisɛse bɛvi ewule nu. Ɛhye ati bɛhyele bɛ bɛhɔguale efiade.

Aleɛ hyenle la ɛzonlenlɛ nu adekilevolɛma ne yɛle ayia kpole bie. Bɛmanle Pita nee Dwɔn nee nrenya ne mɔɔ bɛyɛle ye ayile la ragyinlanle bɛ nyunlu ɛkɛ ne. Ɛzonlenlɛ nu adekilevolɛma ne bizale bɛ kɛ: ‘Tumi boni azo a bɛluale bɛyɛle zɛhae nwanwane gyima ne a?’

Pita zele bɛ kɛ ɔlua Nyamenle ne mɔɔ dwazole Gyisɛse vile ewule nu la tumi zo. Ɛnee ɛsɔfo ne mɔ ɛnnwu mɔɔ bɛyɛ a, ɔluakɛ bɛngola bɛnga kɛ nwanwane gyima ɛhye ɛnle zɔhane. Yemɔti bɛduale ɛzoanvolɛma ne kɛ bɛmmatendɛ Gyisɛse duma nu bieko, na akee bɛgyakyile bɛ kɛ bɛhɔ.

Mekɛ hɔle zolɛ la ɛzoanvolɛma ne hɔle zo hanle Gyisɛse anwo edwɛkɛ na bɛyɛle menli mɔɔ ɛnde kpɔkɛ la ayile. Nwanwane gyima ɛhye mɔ anwo edwɛkɛ salole ɛleka biala. Ɛhye ati menli mɔɔ vi azua mɔɔ bikye Gyɛlusalɛm azo la vale bɛ wuleravolɛma rale manle ɛzoanvolɛma ne yɛle bɛ ayile. Ɛhye manle ɛzonlenlɛ nu adekilevolɛma ne anye bolole, yemɔti bɛhyele ɛzoanvolɛma ne na bɛguale bɛ efiade. Noko bɛangyɛ wɔ ɛkɛ ne.

Nɔe ne Nyamenle anwumabɔvolɛ bukele efiade anlenkɛ ne, kɛmɔ ɛnwu ye wɔ ɛke la. Anwumabɔvolɛ ne zele bɛ kɛ: ‘Bɛhɔ ɛzonlenlɛ sua ne anu, na bɛhɔ zo bɛdendɛ bɛhile menli ne.’ Aleɛ hyenle nwonlomɔ ne mɔɔ ɛzonlenlɛ nu adekilevolɛma ne zoanle menli kɛ bɛhɔye ɛzoanvolɛma ne bɛvi efiade bɛrɛla la, ɛnee bɛnle ɛkɛ ne. Nzinlii menli ne nwunle bɛ kɛ bɛlɛkilehile wɔ ɛzonlenlɛ sua ne anu na bɛhyele bɛ bɛhɔle Sanhedelene asalo ɛkɛ ne.

Ɛzonlenlɛ nu adekilevolɛma ne zele kɛ: ‘Bɛmɛ yɛbɔ bɛ kɔkɔ kɛ bɛmmakilehile Gyisɛse anwo debie bieko. Noko bɛva bɛ ngilehilelɛ ne bɛkponde Gyɛlusalɛm amuala.’ Akee ɛzoanvolɛma ne buale kɛ: ‘Ɔwɔ kɛ yɛtie Nyamenle kɛ tumivolɛ yɛtɛla sonla.’ Yemɔti bɛhɔle zo bɛhilehilele “edwɛkpa” ne. Asoo yemɔ ɛnle neazo kɛnlɛma mɔɔ ɔwɔ kɛ yɛdi ɔ nzi a?