NEA kɛ menli ne ɛlɛgolo nrenya ne anwo ɛ. Ɛze ye ɔ? Bɛfɛlɛ ye Gyɛlɛmaya. Ɔle Nyamenle ngapezonli mɔɔ anwo hyia kpalɛ a.

Mekɛ mɔɔ Belemgbunli Dwosaya bɔle ɔ bo kɛ ɔsɛkye abaaba ne mɔ mɔɔ wɔ azɛlɛ ne azo la, yɛɛ Gyihova yele Gyɛlɛmaya kɛ ɔyɛ ye ngapezonli a. Noko akee, ɛnee Gyɛlɛmaya suzu kɛ ɔle kakula somaa kɛ ɔkɛyɛ ngapezonli. Na Gyihova hanle kɛ ɔbaboa ye.

Gyɛlɛmaya hanle hilele Yizilayɛma kɛ bɛgyakyi ninyɛndane ɛyɛlɛ. Ɔhanle kɛ: ‘Awozonle ne mɔ mɔɔ menli ne sonle bɛ la le adalɛ nyamenle.’ Noko Yizilayɛma dɔɔnwo hulole kɛ bɛkɛzonle awozonle tɛla kɛ bɛkɛzonle nɔhalɛ Nyamenle Gyihova. Mekɛ mɔɔ Gyɛlɛmaya zele menli ne kɛ Nyamenle badea bɛ wɔ bɛ ninyɛndane ne anwo la, bɛzelele ye.

Ɛvolɛ dɔɔnwo pɛle nu. Dwosaya wule, na siane nsa anzi ɔ ra Gyɛhɔyakem rayɛle belemgbunli. Gyɛlɛmaya hɔle zo zele menli ne kɛ: ‘Saa bɛangakyi bɛ subane a, bɛbazɛkye Gyɛlusalɛm.’ Ɛsɔfo ne mɔ hyele Gyɛlɛmaya na bɛdeanle nu kɛ: ‘Edwɛkɛ ɛhye mɔɔ wɔha la, ɔfɛta kɛ bɛku wɔ.’ Akee bɛhanle bɛhilele Yizilayɛ mgbanyima ne mɔ kɛ: ‘Ɔwɔ kɛ bɛku Gyɛlɛmaya, ɔluakɛ yedendɛ yetia yɛ suakpole ne.

Duzu a Gyɛlɛmaya bayɛ a? Ɛnee ɔnzulo! Ɔzele bɛ muala kɛ: ‘Gyihova a zoanle me kɛ menga edwɛkɛ ɛhye mengile bɛ a. Saa bɛangyakyi bɛ nyɛleɛ ɛtane ne a, Gyihova bazɛkye Gyɛlusalɛm. Bɛyɛ ɛhye nzonlɛ: saa bɛku me a, ɛnee bɛhu sonla mɔɔ ɔtɛyɛle ɛtane biala a.’

Mgbanyima ne mɔ angu Gyɛlɛmaya, noko Yizilayɛma angyakyi bɛ nyɛleɛ ɛtane ne mɔ. Amozii Nɛbukadenɛza, Babelɔnma belemgbunli ne, nee Gyɛlusalɛm rahonle. Awieleɛ kolaa ne Nɛbukadenɛza vale Yizilayɛma yɛle ye ngɛkɛlɛ. Ɔvale bɛ nuhua dɔɔnwo ɔhɔle Babelɔn. Nea kɛzi ɔbayɛ a kɛ nyɛvolɛ bie bava wɔ avi wɔ sua zo ahɔ maanle bie mɔɔ ɛnze zo la azo a!