FILISITIAMA eza rale kɛ bɛ nee Yizilayɛma baho. Devidi amediema mrenya mgbanyinli nsa ne boka Sɔɔlo ɛlɔnema ne anwo. Yemɔti kenle ko Gyɛsi zele Devidi kɛ: ‘Fa ma nee kpanwo kɔmaa ɛ mediema ne mɔ. Na nea kɛ bɛ nwo si de la.’

Mekɛ mɔɔ Devidi dwule ɛlɔnema ne azokoɛleɛ ne la, ɔnriandile ɔhɔle ɛlɔne ne anu ɔhɔkpondɛle ɔ mediema ne mɔ. Filisitiama Golayate kakanyinli ne rale kɛ ɔbagolo Yizilayɛma anwo. Ɛnee yeyɛ ɛhye kenle 40, nwonlomɔ nee nɔsolɛ. Ɔdeanle nu kɛ: ‘Bɛye bɛ sonla ko bɛmaa ɔ nee me yɛva konle ne yɛbɔ zolɛ. Saa ɔkola, ɔdi konim na ɔku me a yɛkɛyɛ yɛ nwo ahanra yɛkɛmaa bɛ. Na saa medame noko medi ɔ nwo zo konim, na meku ye a, bɛdabɛ noko bɛkɛyɛ yɛ ahanra. Saa bɛle mrenya a ɛnee bɛye awie bɛmaa me nee ye ɛho.’

Devidi bizale ɛlɔnema ne bie kɛ: ‘Duzu ahyɛlɛdeɛ a sonla mɔɔ kɛhu Filisitianli ɛhye na ɔkɛlie Yizilayɛ ɔkɛvi anyiemgba ɛhye anu la banyia a?’

Bɛbuale ye kɛ: ‘Sɔɔlo bamaa nrenya zɔhane anwonyia dɔɔnwo. Na ɔbava ɔ ra raalɛ ne yeamaa yeagya ye.’

Noko ɛnee Yizilayɛma ne amuala sulo Golayate ɔluakɛ ɔle sonla kpole kpalɛ. Ye tendenle kɛyɛ mita nsa, na sogyanli fofolɛ a lɛ ye enyinlike ne a.

Ɛlɔnema ne bie mɔ hɔhanle hilele Belemgbunli Sɔɔlo kɛ Devidi kpondɛ kɛ ɔ nee Golayate ko. Na Sɔɔlo hanle kɛ: ‘Ɛ nee Filisitianli ne ɛnrɛhola ko. Wɔmɔ ɛle kakula, na yemɔ sumunli ye mbɛda nu yeho toonwo.’ Devidi buale ye kɛ: ‘Mengunle ezizile nee awenade mɔɔ rahyele me ze boane la. Na Filisitianli ɛhye bayɛ kɛ bɛ nuhua ko ala la. Gyihova baboa me.’ Sɔɔlo zele kɛ: ‘Kɔ, Gyihova nee wɔ ɛhɔ.’

Devidi hɔle azudenle bie anloa na ɔvale awolɛ nnu ɔguale ye kodoku ne anu. Akee ɔvale ye totoabɔ ne na ɔhɔle kɛ ɔkayia kakanyinli ne. Mɔɔ Golayate nwunle ye la, ɛnee ɔnnwu debie mɔɔ ɔzɔho a. Ɔzuzule kɛ Devidi ɛhunlɛ bayɛ debie ekyi bie amaa ye.

Golayate se: ‘Wɔmɔ bɛla, na mebava wɔ nwonane meamaa nloma nee nane ali.’ Devidi noko zele kɛ: ‘Wɔmɔ ɛ nee konle dadeɛ, atwɛ yɛɛ baka tendenle a ɛra a, na mame, melɛba wɔ Gyihova duma nu. Ɛnɛ kenle ye, Gyihova baye wɔ awula me sa nu, na mebabɔ wɔ meado aze.’

Devidi hanle zɔhane wiele la ɔvale ɛnriandilɛ ɔhɔle Golayate anwo zo. Ɔyele bolɛ ko ye kodoku ne anu, ɔvale ɔwulale ye totoabɔ ne anu, na ɔvale ye anwosesebɛ muala ɔdole. Bolɛ ne hɔbɔle Golayate ati, na ɔdɔle aze ɔwule! Mekɛ mɔɔ Filisitiama ne nwunle kɛ bɛ kakanyinli ne ɛdɔ aze ɛwu la, bɛ muala bɛhakyile bɛ nwo na bɛ nriandile. Yizilayɛma ne voanle bɛ na bɛlile konim wɔ konle ne anu.