ƐZE raalɛ anwofɛlɛko ne mɔɔ ɛlɛba arayia Devidi la ɔ? Bɛfɛlɛ ye Abegeli. Ɔze nrɛlɛbɛ kpalɛ, na ɔmanle Devidi gyakyile ɛtane mɔɔ anrɛɛ ɔyɛ la. Noko kolaa na yɛazukoa yemɔ anwo edwɛkɛ la, maa yɛnlea mɔɔ ɛlɛto Devidi la.

Devidi nriandile Sɔɔlo la anzi, ɔhɔveale bolɛ bɔne bie anu. Ɔ mediema mrenya ne mɔ nee ye abusua ne kɔsɔɔti doale ye wɔ ɛkɛ. Menli kɛyɛ 400 rale ɔ nwo ɛkɛ ne, na Devidi yɛle kpanyinli lile bɛ ti. Devidi akee hɔle Mowabema belemgbunli ne ɛkɛ na ɔzele ye kɛ: ‘Mesɛlɛ wɔ maa egya nee ɔmɔ ɛwoa ɛ nwo ɛke kɔkpula mekɛ mɔɔ menwɔnwu mɔɔ kɛzi me nwo zo la.’ Amozii Devidi nee ye menli ne mɔ hɔveale awoka ne mɔ anu.

Ɛhye anzi yɛɛ Devidi yiale Abegeli a. Ɔ hu Neebale le sukoavolɛ mɔɔ lɛ azɛlɛ. Ɔlɛ mboane 3,000 yɛɛ mbɔnkye 1,000. Neebale le nrenya mɔɔ ɔ ti yɛ se a. Na ɔ ye Abegeli anwo yɛ fɛ kpalɛ. Eza noko ɔze kpalɛ yɛ. Mekɛ bie bɔbɔ ɔliele ye abusua ne ngoane. Maa yɛnlea mɔɔ ɔyɛle la.

Devidi nee ye menli ne mɔ yɛle Neebale boɛ. Bɛbɔle ye mboane ne mɔ anwo bane bɛmanle ye. Ɔti kenle ko Devidi zoanle ye menli ne bie wɔ Neebale anwo kɛ ɔboa bɛ. Devidi menli ne mɔ radole Neebale nee ye sonvolɛma kɛ bɛlɛpepɛ mboane ne mɔ anwo enrinli. Ɛnee ɔle ɛvoyia mekɛ na ɛnee Neebale lɛ aleɛ dɔɔnwo. Yemɔti mɔɔ Devidi menli ne mɔ hanle la ɛne: ‘Yɛyɛ wɔ boɛ. Yɛboale yɛnleanle wɔ mboane ne mɔ, na yɛanwua bie. Yɛbodo wɔ, maa yɛ aleɛ.’

Neebale zele kɛ: ‘Menrɛva me aleɛ menrɛmaa menli mɔɔ le kɛ bɛdabɛ la.’ Ɔdendɛle koasea nu, na ɔhehanle edwɛkɛ ɛtane dɔɔnwo ɔvanenle Devidi anwo. Mekɛ mɔɔ menli ne ziale rale na bɛhanle mɔɔ zile la bɛhilele Devidi la, Devidi vale ɛya kpole. Ɔhanle ɔhilele ye menli ne kɛ: ‘Awie biala ɛva ye konle dadeɛ!’ Na bɛdɔle adenle zo kɛ bɛkahu Neebale nee ye menli ne mɔ.

Neebale mgbavolɛ ne mɔ anu ko mɔɔ dele mɔɔ Neebale hanle la, hɔbɔle Abegeli amaneɛ. Ndɛndɛ ne ala Abegeli zieziele aleɛ. Ɔvale ɔzoale asoaso ne mɔ na ɔdɔle adenle zo. Mekɛ mɔɔ ɔyiale Devidi la, ɔvi ye asoaso ne azo ɔdwule aze na ɔhotole ɔzele kɛ: ‘Yɛmenle, mesɛlɛ wɔ, mmadwenle me hu Neebale anwo. Ɔle koasea, na ngoaseade a ɔyɛ a. Ahyɛlɛdeɛ ɛne. Mesɛlɛ wɔ fa, na fa mɔɔ ɔzile la kyɛ yɛ.’

Devidi buale ye kɛ: ‘Ɛle raalɛ nrɛlɛbɛvolɛ. Wɔammaa meanli nzenralɛ meangu Neebale wɔ ye atisesebɛ nyɛleɛ ne anwo. Kɔ sua nu anzondwolɛ nu.’ Amozii, mɔɔ Neebale wule la, Abegeli rayɛle Devidi aye mɔ anu ko.