MEKƐ mɔɔ Dwosaya rayɛle Yizilayɛ nyiakɛ mbusua nwiɔ ne azo belemgbunli la ɛnee yeli ɛvolɛ mɔtwɛ pɛ. Ɛnee ɔle kakula somaa kɛ ɔkɛli ebia. Ɔti alumua ne mgbanyima bie boale ye manle ɔnleanle manle ne azo.

Dwosaya lile belemgbunli ɛvolɛ nsuu anzi la yɛɛ ɔbɔle ɔ bo kɛ ɔkpondɛ Gyihova a. Ɔlile arelemgbunli mgbalɛ le kɛ Devidi, Gyɛhɔhyafate nee Hɛzikaya mɔ neazo ne anzi. Akee mekɛ mɔɔ ɛnee ɔtɛdile ɛvolɛ abulanwiɔ bɔbɔ la, Dwosaya yɛle debie bie akɛnrasesebɛ zo.

Yizilayɛma ɛli ɛtane mekɛ tendenle dɔɔnwo. Ɛnee bɛsonle awozonle. Bɛbɔ bɛ ti aze bɛmaa abaaba. Yemɔti Dwosaya nee ye menli ne hɔle na bɛbɔle ɔ bo kɛ bɛye adalɛ ɛzonlenlɛ bɛavi azɛlɛ ne azo. Ɛnee ɛhye le gyima ɛsesebɛ ɔluakɛ ɛnee menli dɔɔnwo ne ala sonle awozonle. Nea kɛ Dwosaya nee ye menli ne mɔ ɛlɛbubu abaaba ne mɔ wɔ ɛke ɛ.

Ɛhye anzi, Dwosaya kpale mrenya nsa kɛ bɛnlea bɛmaa bɛziezie Gyihova ɛzonlenlɛ sua ne. Bɛliele ndoloboa bɛvile menli ne ɛkɛ na bɛvale bɛmanle mrenya ɛhye mɔ kɛ bɛva bɛdua kakɛ mɔɔ bɛkɛbɔ ye wɔ gyima ne anwo la. Mekɛ mɔɔ bɛlɛyɛ ɛzonlenlɛ sua ne anwo gyima la, ɛsɔfo kpanyinli Helekaya nwunle debie bie mɔɔ anwo hyia kpalɛ la. Ɔnwunle mɛla buluku ne mɔɔ Gyihova manle Mosisi hɛlɛle ye mekɛ tendenle bie mɔɔ ɛnze ɛhɔ la. Ɛnee yeminli yehyɛ.

Bɛvale buluku ne bɛhɔmanle Dwosaya, na ɔzele bɛ kɛ bɛgenga bɛhile ye. Mekɛ mɔɔ ɔlɛtie la, ɔnwunle kɛ menli ne ɛnli Gyihova mɛla zo fee. Ɛhye yɛle ye nyane kpole, ɔti ɔsuosuanle ye adɛladeɛ ne mɔ anu, kɛmɔ ɛnwu ye wɔ ɛke la. Ɔse: ‘Gyihova ɛva yɛ nwo ɛya kpole, ɔluakɛ yɛ ze mɔ angola anli ye mɛla ne mɔɔ bɛhɛlɛ ye wɔ buluku ɛhye anu la azo.’

Dwosaya zele ɛsɔfo kpanyinli Helekaya kɛ ɔkpondɛ mɔɔ Gyihova bava ayɛ bɛ la anwo edwɛkɛ. Helekaya hɔle ngapezonli raalɛ Hɛleda ɛkɛ ne na ɔhɔbizale ye. Ɔvale edwɛkɛ ɛhye mɔɔ vi Gyihova ɛkɛ ne la ɔmanle ye kɛ ɔva ɔhɔmaa Dwosaya: ‘Gyɛlusalɛm nee menli mɔɔ wɔ zolɛ la amuala bɛanyia bɛ ndeanlɛ ɔluakɛ bɛzonle awozonle na ɛtanelilɛ ɛyi azɛlɛ ne tɛkɛɛ. Noko akee, ɔluakɛ wɔmɔ Dwosaya wɔyɛ mɔɔ le kpalɛ la ati, ndeanlɛ ɛhye bara wɔ ewule nzi.’