KƐYƐ siane nwiɔ anzi mɔɔ Yizilayɛma ne vile Yigyibiti la, bɛradwule Saenae Boka ne, mɔɔ eza bɛfɛlɛ ye Hɔlɛbe la abo. Ɛke a le ɛleka ko ne ala mɔɔ Gyihova dendɛle vile ndile ne mɔɔ ɛnee ɛlɛsɔ la anu hilele Mosisi a. Menli ne zokoɛle ɛke na bɛdɛnlanle ɛkɛ ne ekyii.

Mɔɔ menli ne ɛlɛkendɛ wɔ boka ne abo la, Mosisi vole hɔle boka ne azo. Wɔ boka ne azo, Gyihova hanle hilele Mosisi kɛ Ɔkulo kɛ Yizilayɛma ne tie Ye na bɛyɛ Ye menli titile. Mosisi dwule rale la, ɔhanle mɔɔ Gyihova ɛha la ɔhilele Yizilayɛma ne. Menli ne noko hanle kɛ bɛbadie Gyihova, ɔluakɛ bɛkulo kɛ bɛyɛ ye menli.

Akee Gyihova yɛle nwanwane debie. Ɔmanle boka ne azo dule esike, na maanle nu hulule. Eza ɔdendɛle ɔhilele menli ne kɛ: ‘Mame a mele Gyihova bɛ Nyamenle ne mɔɔ yele bɛ vile Yigyibiti’ la. Akee ɔzele kɛ: ‘Bɛmmasonle nyamenle gyɛne biala kɛ me ngome ala.’

Nyamenle vale mɛla ngɔnla bokale mɛla ɛhye anwo ɔmanle Yizilayɛma ne mɔ. Menli ne zulole kpole. Bɛzele Mosisi kɛ: ‘Wɔmɔ tendɛ kile yɛ, ɔluakɛ yɛsulo kɛ Nyamenle tendɛ kile yɛ a yɛbawu.’

Amozii Gyihova hanle hilele Mosisi kɛ: ‘Bɛla me nwo ɛke wɔ boka ye azo. Mebava awolɛ ndɛbandɛba nwiɔ mɔɔ mehɛlɛ mɛla ne mɔɔ mekulo kɛ menli ne di zolɛ wɔ zolɛ la meamaa wɔ.’ Mosisi eza hɔle boka ne azo bieko. Ɔlile nɔɔzo nee ewiazo kenle 40 wɔ ɛkɛ.

Ɛnee Nyamenle lɛ mɛla dɔɔnwo maa ye menli ne. Mosisi hɛlɛle mɛla ne amuala. Eza Nyamenle vale awolɛ ndɛbandɛba nwiɔ ne manle Mosisi. Nyamenle mumua ne hɛlɛle mɛla 10 ne mɔɔ ɔhanle ɔhilele menli ne la wɔ zolɛ. Bɛfɛlɛ bɛ Mɛla Bulu.

Mɛla Bulu ne anwo hyia kpalɛ. Zɔhane ala yɛɛ mɛla gyɛne mɔɔ Nyamenle vale manle Yizilayɛma ne mɔ la noko anwo hyia a. Mɛla ne anu ko a le kɛ: ‘Fa wɔ ahonle muala, wɔ ɛkɛla muala, nee wɔ adwenle muala kulo Gyihova wɔ Nyamenle ne.’ Bieko a le kɛ: ‘Kulo ɛ gɔnwo kɛ ɛdawɔ ɛ nwo.’ Gyisɛse Kelaese, Nyamenle Ara ne, zele kɛ Gyihova mɛla mɔɔ ɔvale ɔmanle ye menli Yizilayɛma la, nwiɔ ɛhye a le titile kpalɛ mɔɔ anwo hyia a. Amozii yɛbazukoa Nyamenle Ara ne nee ye ngilehilelɛ ne anwo ninyɛne dɔɔnwo.