Gyihova zele Samoɛle kɛ: ‘Kɔ Gyɛsi sua nu. Ɔ mra ne mɔ ko a bayɛ Yizilayɛ belemgbunli a.’ Yemɔti Samoɛle hɔle Gyɛsi sua nu. Mɔɔ ɔnwunle ɔ ra kpanyinli ne la, ɔzuzule kɛ: ‘Kpavolɛ ɛhye a bɛye ye a.’ Noko Gyihova zele Samoɛle kɛ, tɛ yemɔ ɔ. Eza ɔhanle kɛ: ‘Mame menea mɔɔ wɔ sonla ahonle nu la na tɛ kɛzi ɔde wɔ ɛnyelɛzo la ɔ.’

Gyɛsi vale ɔ mra mrenyia nsia hilele Samoɛle. Noko Samoɛle hanle kɛ: ‘Gyihova ɛtɛyele bɛ nuhua biala. Ɛlɛ ɛ mra mrenyia gyɛne wɔ ɛkɛ ɔ?’ Gyɛsi buale kɛ: ‘Yeha ekyi kpalɛ ne, bɛfɛlɛ ye Devidi. Yeva me mboane ne mɔ yehɔ adidi.’ Mɔɔ Devidi rale la, Gyihova zele Samoɛle kɛ: ‘Ɛhye a meye ye a.’ Yemɔti Samoɛle kpokpale Devidi kɛ ɔbayɛ Yizilayɛ belemgbunli kenle bie.

Nzinlii, Yizilayɛma nee Filisitiama hɔle konle. Ɛnee Golayate, nrenyia kakanyinli bie mɔɔ anwo yɛ se kpalɛ la boka Filisitiama anwo. Golayate golole Yizilayɛma anwo alehyenlɛ biala. Ɔdeanle nu kɛ: ‘Bɛye awie ko bɛmaa ɔ nee me ɛraho. Saa ɔdi konim a, yɛbayɛ bɛ ngɛkɛlɛ. Noko saa medi konim a, bɛbayɛ yɛ ngɛkɛlɛ.’

Devidi vale aleɛ hɔmaanle ɔ mediema ne mɔ mɔɔ bɛle sogyama la wɔ Yizilayɛma azokoɛleɛ ne. Mɔɔ ɔdele Golayate agolobɛnwo ne la, ɔhanle kɛ: ‘Me nee ye  baho!’ Belemgbunli Sɔɔlo zele ye kɛ: ‘Kyɛkyɛ ɛle kakula!’ Devidi buale kɛ: ‘Gyihova baboa me.’

Sɔɔlo bɔle mɔdenle kɛ ɔmaa Devidi ava ye konle ninyɛne ne ahɔho, noko Devidi hanle kɛ: ‘Menrɛhola, ɔyɛ ɛlomboɛ somaa.’ Akee Devidi vale ye totoabɔ ne na ɔhɔle azudenle bie anloa. Ɔsesale awolɛ nnu ɔguale ye baage ne anu. Akee ɔnriandile ɔhɔyiale Golayate. Golayate deanle nu hanle kɛ: ‘Kakula, wɔmɔ bɛla na mebava wɔ nwonane meamaa anwomanyunlu nloma nee ɛbɔ nu nane ali.’ Noko Devidi anzulo. Ɔdaye noko ɔdeanle nu kɛ: ‘Ɛlɛfa konle dadeɛ nee atwɛ a wɔara me nwo zo a, noko mame, Gyihova duma nu a melɛba ɛ nwo zo a. Tɛ yɛdayɛ a ɛ nee yɛ ɛlɛko a; ɛlɛko wɔatia Nyamenle. Awie biala mɔɔ wɔ ɛke la banwu kɛ Gyihova lɛ tumi tɛla konle dadeɛ nee atwɛ. Ɔbava bɛ muala yeawula yɛ sa nu.’

Devidi vale bolɛ ko wulale ye totoabɔ ne anu na ɔdole. Gyihova moalɛ zo, bolɛ ne hɔbɔle Golayate anwoma zo na ɔminli ɔhɔle nu. Nrenyia kakanyinli ne dɔle aze wule. Akee Filisitiama nriandile amaa bɛangu bɛ. Asoo ɛlɛ Gyihova anu anwodozo kɛ Devidi la ɔ?