Mɔɔ Yizilayɛ busiama ne hɔle Gyɛleko la, bɛdɛnlanle raalɛ bie mɔɔ bɛfɛlɛ ye Releehabe la sua nu. Gyɛleko belemgbunli ne dele nwolɛ edwɛkɛ na ɔzoanle sogyama wɔ Releehabe sua nu ɛkɛ. Ɔvale busiama ne ɔveale ye sua ne ati zo anwuma na ɔmaanle sogyama ne vale ɛleka fofolɛ hɔle. Ɔhanle ɔhilele busiama ne kɛ: ‘Mebaboa bɛ ɔluakɛ meze kɛ Gyihova nee bɛ lua yɛɛ bɛbava azɛlɛ ne. Mesɛlɛ bɛ, bɛbɔ me ɛwɔkɛ kɛ bɛbalie me sua nu amra ngoane.’

Busiama ne hanle hilele Releehabe kɛ: ‘Yɛbɔ wɔ ɛwɔkɛ kɛ awie biala mɔɔ wɔ wɔ sua nu ɛke la ɛnrɛwu.’ Bɛhanle kɛ: ‘Fa nyɛma kɔkɔlɛ ɛhye kenda wɔ nvɛnzɛlɛ ne na wɔ abusua ne banyia ngoane.’

Releehabe vale nyɛma zɔle ye nvɛnzɛlɛ ne ɔmaanle busiama ne luale nwolɛ dwule aze. Bɛhɔveale awoka ne mɔ azo lɔ too kenle nsa na bɛahɔ Dwɔhyua anwo ɛkɛ. Akee Yizilayɛma pɛle Azule Dwɔdan ne kɛ bɛkava azɛlɛ ne. Gyɛleko sua ne a bɛlimoale bɛhonle bɛvale a. Gyihova hanle hilele menli ne kɛ bɛdia bɛbɔ suakpole ne anwo mgbɔlɔka kenle  ko biala too kenle nsia. Kenle nsuu ne azo, bɛdiale bɛbɔle suakpole ne anwo mgbɔlɔka fane nsuu. Akee ɛsɔfo ne mɔ bɔle bɛ aweɛne ndendenle ne, na sogyama ne deanle nuhua kpole kpalɛ. Suakpole ne bane ne dele guale! Noko Releehabe sua ɛdeɛ ne mɔɔ wɔ bane ne azo la ande angua. Releehabe nee ye sua nu amra nyianle ngoane ɔluakɛ ɔliele Gyihova ɔlile.