Dwɔhyua lile Nyamenle menli ne anyunlu ɛvolɛ dɔɔnwo, mɔɔ ɔnyianle ɛvolɛ 110 la ɔwule. Yizilayɛma zonlenle Gyihova wɔ mekɛ mɔɔ Dwɔhyua de aze la. Noko mɔɔ Dwɔhyua wule la, bɛbɔle ɔ bo kɛ bɛsonle awozonle kɛ mɔɔ ɛnee Keenama yɛ la. Kɛmɔ bɛyɛle Gyihova anwo anzosesebɛ la ati, ɔmaanle Keena Belemgbunli Gyeeben hilele bɛ nyane. Yizilayɛma zunle vɛlɛle Gyihova. Yemɔti Gyihova maanle bɛ adekilevolɛ fofolɛ, yemɔ a le Balake. Ɔbaboa menli ne yeamaa bɛazia bɛazonle Gyihova.

Ngapezonli raalɛ Dɛbola zoanle kɛ bɛhɔvɛlɛ Balake bɛrɛla. Ɛnee Gyihova ɛmaa ye nrɛlaleɛ kɛ ɔha ɔhile ye: ‘Fa mrenyia 10,000 na kɔyia Gyeeben sogyama ne wɔ azudenle Kaehyɔn ne anloa. Ɛbali Gyeeben sogya kpanyinli Sesɛla anwo zo konim wɔ ɛkɛ.’ Balake zele Dɛbola kɛ: ‘Mebahɔ, noko kyesɛ ɛkɔ bie.’ Ɔhanle kɛ: ‘Me nee wɔ bahɔ. Noko tɛ ɛdawɔ a ɛbahu Sesɛla a. Gyihova se raalɛ a bahu ye a.’

Dɛbola nee Balake yɛɛ ye sogyama ne hɔle Teebɔ Boka ne azo kɛ bɛkaziezie bɛ nwo bɛamaa konle ne. Mɔɔ Sesɛla dele la, ɔboɔboale ye  konle ehwili ne mɔ nee ye sogyama ne anloa wɔ bɔnza ne anu. Dɛbola zele Balake kɛ: ‘Ɛnɛ, Gyihova bamaa wɔali konim.’ Balake nee ye menli 10,000 ne hɔyiale Sesɛla sogyama mɔɔ ze konle nye zo la wɔ bɔnza ne anu.

Gyihova maanle azudenle Kaehyɔn ne yile. Sesɛla konle ehwili ne mɔ miminle ndɛtɛlɛ ne anu. Yemɔti ɔgyakyile ye konle ehwili ne ɛkɛ ne na ɔnriandile. Balake nee ye sogyama lile Sesɛla menli ne anwo zo konim, noko Sesɛla nriandile! Ɔnriandile ɔhɔveale raalɛ bie mɔɔ bɛfɛlɛ ye Gyeeyɛle la ɛdanlɛsua nu. Gyeeyɛle maanle ye meleke ɔnlonle na ɔvale kundu ɔhedale ɔ nwo. Sesɛla mɔɔ ɛvɛ la lafele botoo. Akee Gyeeyɛle yɛle nyaa hɔvale ɛdanlɛsua takola wɔle ɔ ti anu maanle ɔwule.

Balake rale kɛ ɔbakpondɛ Sesɛla. Gyeeyɛle vi ye sua ne anu rahanle hilele ye kɛ: ‘Bɛla banlea nrenyia ne mɔɔ ɛlɛkpondɛ ye la.’ Balake hɔle sua ne anu na ɔnwunle kɛ Sesɛla ɛwu ɔla ɛkɛ. Yemɔti Balake nee Dɛbola dole edwɛne yele Gyihova ayɛlɛ kɛ yemaa Yizilayɛma ɛli bɛ agbɔvolɛ nwo zo konim la. Yizilayɛma dɛnlanle anzodwolɛ nu too ɛvolɛ 40.