Mosisi bɔle Falo ɛwɔkɛ kɛ ɔnrɛra ye ɛkɛ ne bieko. Noko kolaa na yeahɔ la, ɔhanle ɔhilele Falo kɛ: ‘Nɔe, belamunli ralɛ biala mɔɔ wɔ Yigyibitinli la bawu, ɔvi Falo anwo zo kɔdwu akɛlɛ nwo zo.’

Gyihova hanle kɛ Yizilayɛma ɛli aleɛ titili bie. Ɔhanle kɛ: ‘Bɛhu boane anzɛɛ abɔnkye ralɛ nyinli mɔɔ yeli ɛvolɛ ko ala la, na bɛva ye mogya ne bie bɛha bɛ azua ne mɔ nlenkɛ ne felɛmo ne mɔ anwo. Bɛdondo nane ne na bɛva bɛboka paano mɔɔ mgbɔvonle ɛnle nu la anwo bɛli. Bɛwula bɛ adɛladeɛ nee bɛ mgbɔlaboa, na bɛziezie bɛ nwo bɛzie. Ɛnɛ nɔe mebamaa bɛahɔ.’ Ɛkola ɛnwu kɛzi ɛhye maanle Yizilayɛma anye liele la ɔ?

Nɔe ne, Gyihova anwumabɔvolɛ hɔle Yigyibitinli biala sua nu. Na ɔhunle belamunli ralɛ biala mɔɔ wɔ awuke mɔɔ mogya ɛnle ye nlenkɛ ne mɔ felɛmo ne anwo anu la. Noko yeangu awie biala wɔ awuke mɔɔ mogya wɔ ye nlenkɛ ne felɛmo ne mɔ anwo la anu. Yigyibitinli biala belamunli ralɛ wule. Noko Yizilayɛma belamunli mralɛ ne mɔ ko bɔbɔ anwu.

Falo bɔbɔ ara nrenyia wule. Ɛhye bole Falo anwo zo. Ɛkɛ ne ala ɔhanle ɔhilele Mosisi nee Aalɔn kɛ: ‘Bɛha bɛ nwo bɛhɔ, bɛhɔzonle bɛ Nyamenle ne. Bɛva bɛ nyɛmoa kɔsɔɔti bɛhɔ!’

 Yizilayɛma hyehyɛle bɛ nwo abusua abusua na bɛvile Yigyibiti wɔ mekɛ mɔɔ ɛnee siane ne ɛyɛ mumua la. Ɛnee Yizilayɛ mrenyia ne mɔ le 600,000 yɛɛ mraalɛ nee ngakula dɔɔnwo boka nwo. Menli gyɛne dɔɔnwo nee bɛ hɔle amaa bɛdabɛ noko bahola bɛazonle Gyihova. Akee Yizilayɛma anwo dɔle bɛ!

Ɛnee Yizilayɛma di zɔhane aleɛ titili ne ɛvolɛ biala amaa bɛahakye kɛzi Gyihova liele bɛ la. Bɛfɛlɛ ye Akpabɛnwo.