Ɛnee Wulomu sogya kpanyinli bie mɔɔ bɛfɛlɛ ye Kɔnileɛse la wɔ Sizalia. Ɔnle Dwuunli, noko ɛnee Dwuuma bu ye kpalɛ. Ɔboale ehyiavolɛma nee menli mɔɔ bɛhyia moalɛ la. Ɛnee Kɔnileɛse die Gyihova di na ɔyɛ asɔne dahuu. Kenle ko, anwumabɔvolɛ bie rale Kɔnileɛse ɛkɛ na ɔzele ye kɛ: ‘Nyamenle ɛde wɔ asɔneyɛlɛ. Yemɔti soa menli maa bɛhɔ Dwɔpa na bɛhɔvɛlɛ Pita.’ Ɛkɛ ne ala, Kɔnileɛse zoanle mrenyia nsa wɔ Dwɔpa mɔɔ wɔ nyiakɛ afoa nu kɛyɛ mayɛlɛ 30 la.

Mekɛ ɛhye anu, Pita nwunle ɛnyelɛzodeɛnwunlɛ wɔ Dwɔpa. Ɔnwunle nane ngakyile mɔɔ bɛdua Dwuuma kɛ bɛmmadi la na ɔdele kɛ ɛnelɛ bie se ɔli bie. Pita anyɛ na ɔhanle kɛ: ‘Metɛdile nane mɔɔ nwolɛ ɛnde la ɛlɛ.’ Akee ɛnelɛ ne zele ye kɛ: ‘Mmaka kɛ nane ɛhye mɔ anwo ɛnde. Nyamenle ɛde nwolɛ.’ Eza ɔzele Pita kɛ: ‘Menli nsa bie ɛlɛkpondɛ wɔ. Dwu aze na ɛ nee bɛ ɛhɔ.’ Pita hɔbukele anlenkɛ ne na ɔbizale mrenyia nsa ne deɛmɔti bɛra ɛkɛ la. Bɛhanle kɛ: ‘Wulomu sogya kpanyinli Kɔnileɛse a ɛzoa yɛ a. Ɔse ɛrɛla ye sua nu wɔ Sizalia.’ Pita maanle bɛlale ye ɛkɛ nɔe ne. Aleɛ hyenle la, ɔ nee bɛ yɛɛ mediema bie mɔ mɔɔ bɛvi Dwɔpa la hɔle Sizalia.

 Mɔɔ Kɔnileɛse nwunle Pita la, ɔhotole. Noko Pita hanle kɛ: ‘Dwazo; medame noko mele sonla kɛ ɛdawɔ ala la. Dwuuma ɛngɔ menli mɔɔ bɛnle Dwuuma la sua nu, noko Nyamenle se membɛla wɔ sua nu. Yemɔti mesɛlɛ wɔ, ka deɛmɔti ɛmaanle bɛravɛlɛle me la kile me.’

Kɔnileɛse zele Pita kɛ: ‘Ye kenle nna ɛne, ɛnee melɛyɛ asɔne na anwumabɔvolɛ bie hanle kɛ menzoa memaa bɛravɛlɛ wɔ. Mesɛlɛ wɔ ka Gyihova edwɛkɛ ne bie kile yɛ.’ Pita hanle kɛ: ‘Menwu kɛ Nyamenle ɛnnea sonla nyunlu, ɔdie awie biala mɔɔ ɔkulo kɛ ɔsonle ye la ɔto nu.’ Pita hilehilele bɛ Gyisɛse anwo ninyɛne dɔɔnwo. Akee sunsum nwuanzanwuanza ne rale Kɔnileɛse nee menli mɔɔ bɛ nee ye wɔ ɛkɛ la anwo zo na bɛzɔnenle bɛ muala.