Mɔɔ Gyisɛse wule la, sukoavolɛ bie mɔɔ bɛfɛlɛ ye Dwosefi la zɛlɛle Paelɛte kɛ ɔmaa ɔhɔye ye funli ne ɔvi baka ne azo. Dwosefi vale lenen ɛdanlɛ kpalɛ nee nyile evuanlɛ kyekyele funli ne anwo na ɔdole ye wɔ nla fofolɛ bie anu. Bɛhundole bolɛ kpole bie bɛnyinle nla ne anloa. Ɛsɔfo mgbanyinli ne mɔ zele Paelɛte kɛ: ‘Yɛsulo kɛ Gyisɛse ɛdoavolɛma ne bie bahɔva ye funli ne na bɛaha kɛ yedwazo.’ Yemɔti Paelɛte zele bɛ kɛ: ‘Bɛnyi nla ne na bɛzinza.’

Ye kenle nsa anzi nwonlomɔ ne ala, mraalɛ bie hɔle nla ne anwo na bɛnwunle kɛ bɛye bolɛ ne. Wɔ nla ne anu, anwumabɔvolɛ bie zele bɛ kɛ: ‘Bɛmmasulo. Bɛdwazo Gyisɛse. Bɛhɔze ye ɛdoavolɛma ne kɛ bɛyia ye wɔ Galeli.’

Mɛle Magedalene yɛle ye ndɛ hɔkpondɛle Pita nee Dwɔn. Ɔzele bɛ kɛ: ‘Awie ɛva Gyisɛse funli ne!’ Pita nee Dwɔn nriandile hɔle nla ne anu. Mɔɔ bɛannwu funli ne wɔ nu la, bɛziale bɛhɔle bɛ azua nu.

Mɔɔ Mɛle ziale hɔle nla ne anu la, ɔnwunle anwumabɔvolɛma nwiɔ na ɔzele bɛ kɛ: ‘Mennwu ɛleka mɔɔ bɛva me Awulae bɛhɔ a.’ Akee ɔnwunle nrenyia bie, na kɛmɔ ɔdwenle kɛ yemɔ a nea ɛkɛ la ati, ɔhanle kɛ: ‘Yɛmenle, ka ɛleka mɔɔ wɔva ye wɔhɔ la kile me.’ Noko mɔɔ nrenyia ne hanle kɛ, “Mɛle!” la, ɔnwunle kɛ Gyisɛse ɔ. Ɔdeanle nu kɛ: “Kilehilevolɛ!” na ɔzɔle ye. Gyisɛse zele ye kɛ: ‘Kɔha kile me mediema ne mɔ kɛ wɔnwu me.’ Ɛkɛ ne ala, Mɛle nriandile hɔzele ɛdoavolɛma ne kɛ yenwu Gyisɛse.

Nzinlii, ɛnee ɛdoavolɛma nwiɔ vi Gyɛlusalɛm ɛlɛkɔ Ɛmeeyɛse. Nrenyia bie rabokale bɛ nwo wɔ adenle ne anu na ɔbizale bɛ debie mɔɔ bɛlɛka nwolɛ edwɛkɛ la. Bɛhanle kɛ: ‘Ɛtɛtele ɔ? Ɛsɔfo mgbanyinli ne mɔ hunle Gyisɛse la ye kenle nsa ɛne. Kɛkala akee mraalɛ bie ɛlɛka kɛ yedwazo!’ Nrenyia ne bizale bɛ kɛ: ‘Bɛnlie ngapezoma ne bɛnli ɔ? Bɛse Kelaese ne bawu na yeadwazo.’ Ɔhilehilele Ngɛlɛlera ne anu ɔhilele bɛ. Mɔɔ bɛdwule Ɛmeeyɛse la, ɛdoavolɛma ne zele nrenyia ne  kɛ ɔmaa bɛhɔ sua nu. Mɔɔ bɛlɛdi aleɛ nɔsolɛ nu na ɔyɛle asɔne la, bɛnwunle kɛ Gyisɛse ɔ. Akee ɔminliminlinle.

Ɛdoavolɛma nwiɔ ne yɛle ye ndɛ hɔhanle mɔɔ ɛzi la hilele ɛzoanvolɛma ne wɔ Gyɛlusalɛm. Mɔɔ bɛwɔ sua ne anu la, Gyisɛse vindele ɛkɛ. Mɔlebɛbo ne, ɛnee ɛzoanvolɛma ne ɛnlie ɛnli kɛ Gyisɛse ɔ. Akee ɔzele bɛ kɛ: ‘Bɛnlea me sa nu; bɛzɔ me. Bɛhɛlɛ ye kɛ Kelaese ne badwazo avi ewule nu.’