Ɛnee menli mɔɔ de Yizilayɛ aduduleɛ maanle nu la die di kɛ nwɔlɔra kola kile bɛ adenle. Kenle ko nɔɔzo, menli bie mɔɔ bɛvi Aduduleɛ la nwunle debie mɔɔ le kɛ ɛwɔlɔra mɔɔ ɛlɛta la wɔ anwomanyunlu na bɛdoale ye. “Ɛwɔlɔra” ne lile bɛ nyunlu hɔle Gyɛlusalɛm. Menli ne mɔ bizebizale awie mɔ kɛ: ‘Nienwu a kakula ne mɔɔ bayɛ Dwuuma belemgbunli la wɔ a? Yɛra kɛ yɛbahoto ye.’

Mɔɔ Hɛlɔdo, Gyɛlusalɛm belemgbunli ne dele belemgbunli fofolɛ ne anwo edwɛkɛ la, ɔgyegyele ye kpole. Ɔbizale ɛsɔfo mgbanyinli ne mɔ kɛ: ‘Nienwu a bɛbawo belemgbunli ɛhye a?’ Bɛbuale ye kɛ: ‘Ngapezoma ne se bɛbawo ye wɔ Bɛtelɛhɛm.’ Yemɔti Hɛlɔdo vɛlɛle menli ne na ɔhanle ɔhilele bɛ kɛ: ‘Bɛhɔ Bɛtelɛhɛm bɛhɔkpondɛ kakula ɛhye. Bɛnwu ye a bɛraha bɛhile me na mengɔngoto ye bie.’ Noko ɛnee ɔle adalɛ.

“Ɛwɔlɔra” ne dule ɔ bo bieko. Menli ne doale ye hɔle Bɛtelɛhɛm. “Ɛwɔlɔra” ne hɔgyinlanle sua bie anwuma na menli ne wolole sua ne anu. Bɛnwunle Gyisɛse nee ye mame Mɛle wɔ ɛkɛ. Bɛhotole kakula ne na bɛhyɛle ye nvutuke, ɛyɛlɛvuanlɛ nee alufuanlɛ. Asoo Gyihova a amgba zoanle menli ɛhye kɛ bɛhɔkpondɛ Gyisɛse a? Kyɛkyɛ.

Zɔhane nɔe ne, Gyihova hanle hilele Dwosefi wɔ ɛlalɛ nu kɛ: ‘Hɛlɔdo kpondɛ kɛ ɔku Gyisɛse. Fa ɛ ye nee kakula ne nriandi kɔ Yigyibiti. Tɛnla ɛkɛ ne kɔkpula kɛ mebaha kɛ ɛzia ɛrɛla la.’ Ɛkɛ ne ala, Dwosefi nee ye abusua ne hɔle Yigyibiti.

Gyihova hanle hilele menli ne kɛ bɛmmasia bɛkɔ Hɛlɔdo ɛkɛ. Mɔɔ Hɛlɔdo nwunle kɛ bɛanzia bɛamba la, ɔvale ɛya kpole. Kɛmɔ yeannwu Gyisɛse la ati, ɔhanle kɛ bɛhu ngakula mɔɔ bɛbayɛ kɛ Gyisɛse mɔɔ bɛwɔ Bɛtelɛhɛm la amuala. Noko ɛnee Gyisɛse wɔ Yigyibiti, edwɛkɛ biala ando ye.

 Nzinlii, Hɛlɔdo wule. Gyihova hanle hilele Dwosefi kɛ: ‘Kɛkala ɛkola ɛsia ɛkɔ.’ Dwosefi, Mɛle yɛɛ Gyisɛse ziale hɔle Yizilayɛ na bɛhɔdɛnlanle Nazalɛte.