Kenle ko nɔɔzo, Nɛbukadenɛza hanle ɛlalɛ ɛzulolɛ bie. Ɔvɛlɛle ye nrɛlɛbɛvolɛma ne amuala kɛ bɛrahile ɔ bo bɛhile ye. Noko bɛ nuhua biala angola angile ye ɛlalɛ ne abo. Nzinlii akee belemgbunli ne hanle hilele Daneɛle.

Nɛbukadenɛza hanle hilele Daneɛle kɛ: ‘Menganle ɛlalɛ menwunle baka bie. Baka ne yɛle tendenle hɔle anwuma kpalɛ. Ɛgyinla ɛleka biala a ɛkola ɛnwu ye. Ye nya le ngɛnlɛma yɛɛ yezo ma dɔɔnwo. Ɛbɔ nu nane bada ye alubo ne anu yɛɛ nloma yɛ bɛ sane wɔ ye ngane ne mɔ anu. Akee anwumabɔvolɛ bie vi anwuma dwule aze. Ɔdeanle nu kɛ: ‘Bɛbu baka ne bɛdo aze, bɛpepɛ ye ngane ne mɔ. Bɛgyakyi ye dosinli ne nee ye ndinli ne mɔ azɛlɛ ne anwo na bɛva mbulalɛ nee kɔbele bɛnyinyi nwolɛ wɔ ndile ne anu. Bɛmaa ye sonla adwenle kpalɛ ne ɛminli, na ɔnyia nane adwenle too ɛvolɛ nsuu. Menli kɔsɔɔti banwu kɛ Nyamenle lɛ tumi wɔ ewiade belemgbunlililɛ zo, yɛɛ ɔfa ɔmaa awie biala mɔɔ ɔkulo la.’’

Gyihova hilele ɛlalɛ ne abo hilele Daneɛle. Mɔɔ Daneɛle dele ɛlalɛ ne abo la, ye ahonle dule. Ɔhanle kɛ: ‘O nana, me kunlu anu a anrɛɛ ɛlalɛ ne fale wɔ agbɔvolɛ anwo, noko ɔfale ɛ nwo. Baka ne mɔɔ bɛpɛle bɛdole aze la a le ɛdawɔ. Wɔ tumililɛ ne bavi ɛ sa, na ɛbali ndile kɛ ɛbɔ nu nane la. Noko kɛ mɔɔ anwumabɔvolɛ ne hanle kɛ bɛgyakyi ye dosinli ne nee ye ndinli ne la ati, ɛ sa baha wɔ tumililɛ ne bieko.’

Ɛvolɛ ko anzi, ɛnee Nɛbukadenɛza lua ye belemgbunli sua ne ati zo ɛlɛnea kɛzi Babelɔn le kɛnlɛma la. Ɔhanle kɛ: ‘Nea suakpole ko mɔɔ mekyekye a. Melɛ tumi kpole!’ Ɔ nloa ampe yɛɛ ɛnelɛ bie dendɛle vi anwuma kɛ: ‘Nɛbukadenɛza! Bɛlie wɔ belemgbunlililɛ ne bɛvi ɛ sa nu.’

Ɛkɛ ne ala, Nɛbukadenɛza adwenle kpalɛ ne minlinle na ɔyɛle kɛ ɛbɔ nu nane la. Bɛvoanle ye bɛvile ye belemgbunli sua nu ɛkɛ, na ɔ nee ɛbɔ nu nane dɛnlanle. Nɛbukadenɛza ati enrinli yɛle ndendenle kɛ kɔleɛ ndɛkɛ na ye bɔweɛlɛ vile yɛle kɛ aloma gyakɛ ati.

 Ɛvolɛ nsuu anzi, Nɛbukadenɛza nyianle adwenle kpalɛ bieko, na Gyihova maanle ɔyɛle Babelɔn belemgbunli. Akee Nɛbukadenɛza hanle kɛ: ‘Ayɛlɛyelɛ ɛha Gyihova, anwuma Belemgbunli ne. Kɛkala menwu kɛ Gyihova a le Tumivolɛ a. Ɔbɛlɛ anwomemaazoma aze, na ɔfa belemgbunlililɛ ɔmaa awie biala mɔɔ ɔkulo la.’