MENLI mgbe mgbe dɔɔnwo lɛ ɛbulɛ maa meanubaka ne na bɛyeyɛ ye. The Encyclopædia Britannica ka meanubaka ne anwo edwɛkɛ kɛ ɔle “Keleseɛne ɛzonlenlɛ nu sɛkɛlɛneɛ titile.” Noko akee, nɔhalɛ Keleseɛnema ɛnva meanubaka ne ɛnli gyima wɔ ɛzonlenlɛ nu. Duzu ati ɔ?

Debie ko mɔɔ hyia kpole kpalɛ la a le kɛ Gyisɛse Kelaese anwu meanubaka zo. Giliki edwɛkɛkpɔkɛ [Stau·ros′] a bɛta bɛkile ɔ bo “meanubaka” a. Noko mɔɔ ɔkile titile la a le “mgbunla anzɛɛ baka ko mɔɔ bɛkpɔnla.” The Companion Bible kile kɛ “[Stau·ros′] ɛngile mbaka azinli nwiɔ mɔɔ bɛva bɛbea nu wɔ ɛleka biala a . . . Debie biala ɛnle Giliki aneɛ mɔɔ bɛvale bɛhɛlɛle [Ngyekyeleɛ Fofolɛ] ne la anu mɔɔ kile mbaka azinli nwiɔ bɔbɔ a.”

 Bɛvale edwɛkɛkpɔkɛ fofolɛ a bɛhanle deɛ mɔɔ bɛhunle Gyisɛse wɔ zolɛ la anwo edwɛkɛ a. Yemɔ a le Giliki edwɛkɛkpɔkɛ xy′lon. (Galeehyeama 3:13) Mɔɔ ɛhye kile la ala a le “mgbunla” anzɛɛ “baka.”

Mekɛ mɔɔ buluku ne mɔɔ bɛhile ɔ bo kɛ Meanubaka ne nee Baka nu Mɔɔ Bɛbɔ Menli mɔɔ Hermann Fulda hɛlɛle la, kile deɛ mɔɔ ɔti ɛnee bɛku menli wɔ baka mɔɔ debie biala ɛmbea nu la azo la, ɔhanle kɛ: “Ɛnee mbaka dɔɔnwo ɛnle ɛleka mɔɔ bɛta bɛku menli la. Yemɔti ɛnee baka ko mɔɔ debie biala ɛmbea nu la a bɛkpɔnla ye aze a. Bɛkenda ɛtanevolɛ ne wɔ baka ɛhye azo, bɛkyekye ɔ sa wɔ ɔ ti zo na bɛkyekye ɔ gyakɛ anzɛɛ bɛbɔ nuhua pɛlɛko.”—Das Kreuz und die Kreuzigung.

Nyamenle Edwɛkɛ ne a le daselɛ mɔɔ tɛla biala mɔɔ kile kɛ Gyisɛse anwu meanubaka zo a. Ɛzoanvolɛ Pɔɔlo se: “Kelaese ɛralie ndeanlɛ mualɛ, na yelie yɛ yevi munzule mɔɔ anrɛɛ mɛla ne fa yɛ ahɔ nu la anu, ɔluakɛ Nyamenle Edwɛkɛ ne se, ‘Mɔɔ bɛkɛhenda ye wɔ baka zo la munzule ɛha ye.’” (Galeehyeama 3:13) Pɔɔlo vale ye edwɛkɛ ne vile Mɛla ne 21:22, 23 mɔɔ ka baka na tɛ meanubaka nwo edwɛkɛ la. Kɛmɔ adenle zɛhae azo mɔɔ bɛku awie la le “munzule” la ati, ɔnle kpalɛ kɛ Keleseɛnema kɛva Kelaese mɔɔ bɛhenda ye baka zo la anwo sɛkɛlɛneɛ bie kɛziezie bɛ sua nu.

Daselɛ biala ɛnle ɛkɛ mɔɔ kile kɛ wɔ ɛvolɛ 300 ne mɔɔ lumua Kelaese ewule nzi la anu, bɛdabɛ mɔɔ ɛnee bɛkile kɛ bɛle Keleseɛnema la vale meanubaka lile gyima wɔ ɛzonlenlɛ nu. Noko, wɔ ɛvoya nna ne anu Belemgbunli Constantine mɔɔ ɛnee sonle awozonle la rabokale Keleseɛne ɛzonlenlɛ mɔɔ ɛkpɔkye la anwo na ɔvale meanubaka ɔziele ɛkɛ ne kɛ ɛzonlenlɛ ne sɛkɛlɛneɛ. Kɛ ɛnee Constantine adwenle de ye biala la, ɛnee meanubaka ne ɛnvane Gyisɛse Kelaese anwo wɔ adenle biala azo. Nɔhalɛ nu, meanubaka ne vi awozonle ɛzonlenlɛ nu. New Catholic Encyclopedia ne ka kɛ: “Menli mɔɔ dɛnlanle aze na Keleseɛne ɛzonlenlɛ ara nee menli mɔɔ ɛnee bɛnle Keleseɛnema la vale meanubaka lile gyima.” Mbuluku gyɛne dɔɔnwo noko kile kɛ meanubaka ne vi abɔdeɛ ɛzonlenlɛ nee awozonle ɛzonlenlɛ amaamuo nu.

Ɛnee akee, duzu ati a bɛvale awozonle ɛzonlenlɛ nu sɛkɛlɛneɛ ɛhye bɛlile gyima a? Ɔda ali wienyi kɛ ɛnee bɛmkpondɛ kɛ ɔyɛ se  kɛ awozonle ɛzonlenlɛma kɛralie mɔɔ ɛnee bɛsuzu kɛ yemɔ a le “Keleseɛne ɛzonlenlɛ” la kɛdo nu. Noko akee, Baebolo ne tendɛ tia awozonle ɛzonlenlɛ nu sɛkɛlɛneɛ biala mɔɔ yɛbava yɛali gyima wɔ ɛzonlenlɛ nu la. (2 Kɔlentema 6:14-18) Eza Ngɛlɛlera ne tua awozonle ɛzonlenlɛ biala. (Adendulɛ 20:4, 5; 1 Kɔlentema 10:14) Ɛhye ati, nɔhalɛ Keleseɛnema lɛ adwenle kpalɛ mɔɔ ɔti bɛnva meanubaka bɛnli gyima wɔ ɛzonlenlɛ nu a. *