1, 2. Ndenle boni azo a Baebolo ne le ahyɛlɛdeɛ kɛnlɛma mɔɔ vi Nyamenle ɛkɛ a?

ƐKAKYE mekɛ bie mɔɔ ɛnyianle ahyɛlɛdeɛ kɛnlɛma bie ɛvile ɛ gɔnwo kpalɛ bie ɛkɛ ne la ɔ? Kpolerazulɛ biala ɛnle nwolɛ kɛ ɔyɛle wɔ fɛ na ɛ nye noko liele kpole. Kɛ ɔde ye biala la, ahyɛlɛdeɛ maa ɛnwu ahenle ne mɔɔ vale manle wɔ la—kɛ ɔle awie mɔɔ anye die bɛ agɔnwolɛvalɛ ne anwo a. Kpolerazulɛ biala ɛnle nwolɛ kɛ ɛhilele anyezɔlɛ wɔ ahyɛlɛdeɛ ne mɔɔ ɛ gɔnwo ne zuzule ɛ nwo na ɔvale ɔmanle wɔ la anwo.

² Baebolo ne le ahyɛlɛdeɛ mɔɔ vi Nyamenle ɛkɛ ne, na ɔle ahyɛlɛdeɛ mɔɔ yɛbahola yɛavi ahonle nu yɛahile nwolɛ anyezɔlɛ a. Buluku ɛhye mɔɔ le ngakyile la maa yɛnwu ninyɛne bie mɔɔ anrɛɛ yɛnrɛnwu bɛ wɔ ɛleka biala la. Kɛ neazo la, ɔka anwuma mɔɔ nwɔlɔra ɛyi ɛkɛ ne tɛkɛɛ, azɛlɛ ne yɛɛ nrenya nee raalɛ mɔɔ lumua la ɛbɔlɛ nwo edwɛkɛ ɔkile yɛ. Ngyinlazo edwɛkɛ mɔɔ anwodozo wɔ nu mɔɔ boa yɛ ɔmaa yɛkola yɛgyinla asetɛnla nu ngyegyelɛ nee adwenledwenle nloa la wɔ Baebolo ne anu. Ɔkilehile kɛzi Nyamenle bamaa ye atiakunlukpɔkɛ ara nu na yeava tɛnlabelɛ kpalɛ yeara azɛlɛ ye azo la anu. Nea ahyɛlɛdeɛ kɛnlɛma mɔɔ Baebolo ne de a!

3. Duzu a Baebolo ne mɔɔ yɛ sa ɛha ye la maa yɛnwu ye wɔ Gyihova anwo a, na duzu ati a ɛhye maa yɛ ahonle tɔ azule nu a?

 ³ Baebolo ne eza le ahyɛlɛdeɛ mɔɔ maa ahonle tɔ azule nu a, ɔluakɛ ɔmaa yɛnwu Maavolɛ ne, mɔɔ le Gyihova Nyamenle la. Buluku ɛhye mɔɔ yeva yemaa yɛ la di daselɛ kɛ ɔkulo kɛ yɛnwu ye kpalɛ. Nɔhalɛ nu, Baebolo ne bahola aboa wɔ yeamaa wɔabikye Gyihova.

4. Duzu a ɛ nye die nwo wɔ Baebolo ne mɔɔ bɛmaa menli asa ɛha bie la anwo a?

⁴ Saa ɛlɛ Baebolo a, ɛnee nwu ye kɛ tɛ ɛ ngomekye a ɛlɛ bie a. Bɛyɛ Baebolo ne foa bie anzɛɛ ye mumua ne wɔ aneɛ mɔɔ bo 2,300 la anu na ɔlua ɛhye ati menli mɔɔ wɔ ewiade la anu dodo mɔɔ bo ɛya ko ngyɛnu 90 asa ɛha bie. Saa bɛkyehyɛ nu a, bɛfa Baebolo mɔɔ bo mgbe ko la bɛmaa dapɛne ko biala! Bɛyɛ Baebolo ne foa bie anzɛɛ ye mumua ne mgbe mgbe dɔɔnwo. Nɔhalɛ nu, buluku gyɛne biala nee Baebolo ne ɛnzɛ.

5. Adenle boni azo a ‘bɛvale Nyamenle sunsum a bɛhɛlɛle’ Baebolo ne a?

⁵ Bieko ‘bɛvale Nyamenle sunsum a bɛhɛlɛle’ Baebolo ne a. (2 Temɔte 3:16) Adenle boni azo? Baebolo mumua ne ye ɔ nloa kɛ: “Sunsum Nwuanzanwuanza ne a wolole bɛ manle bɛhanle zɔhane edwɛkɛ ne mɔɔ vi Nyamenle ɛkɛ ne la a.” (2 Pita 1:21) Kɛ  neazo la: Nrenya mɔɔ ɛyɛ ɛrelera la bahola amaa ɔ ra nrenya ahɛlɛ ye kɛlata amaa ye. Nrenya ne adwenle nee ye edwɛkɛ a wɔ zɔhane kɛlata ne anu a. Ɛhye ati ɔdaye ye edwɛkɛ a wɔ kɛlata ne anu a na tɛ ɔ ra nrenya ne ɔ. Zɔhane ala yɛɛ Baebolo ne de a, Nyamenle edwɛkɛ a wɔ nuhua a, na tɛ menli mɔɔ hɛlɛle la edwɛkɛ ɔ. Ɛhye ati, nɔhalɛ nu Baebolo ne amuala ‘le edwɛkɛ mɔɔ vi Nyamenle ɛkɛ a.’—1 Tɛsalonaekama 2:13.

6, 7. Duzu ati a Baebolo ne anu edwɛkɛ ne mɔɔ le ko la le debie titile mɔɔ nwolɛ hyia a?

⁶ Bɛvale ɛvolɛ mɔɔ bo 1,600 la a bɛhɛlɛle Baebolo ne a. Menli mɔɔ hɛlɛle la dɛnlanle aze wɔ mekɛ ngakyile nu yɛɛ ɛnee asolo biala gyima mɔɔ ɔyɛ a. Ɛnee bie mɔ le ɛyazovoma, fɛlɛkyevoma yɛɛ mboaneneavolɛma. Bie mɔ noko ɛnee le ngapezoma, ndɛnebuavolɛma yɛɛ arelemgbunli. Luku mɔɔ hɛlɛle edwɛkpa ne bie la ɛnee le dɔketa. Ɔnvane nwolɛ kɛ menli mɔɔ hɛlɛle Baebolo ne la lɛ anwubielɛ ngakyile la, nuhua edwɛkɛ ne le ko ɔvi ye mɔlebɛbo kɔdwu awieleɛ. *

⁷ Baebolo ne anu buluku mɔɔ lumua la ka kɛzi alesama ngyegyelɛ bɔle ɔ bo la anwo edwɛkɛ kile yɛ. Buluku ne mɔɔ li awieleɛ la maa yɛnwu ye kɛ azɛlɛ ye azo amuala bayɛ paladaese anzɛɛ tola. Edwɛkɛ mɔɔ wɔ Baebolo ne anu amuala fane ninyɛne mɔɔ sisile wɔ ɛvolɛ apenle apenle mɔɔ ɛze ɛhɔ la anwo na wɔ adenle bie azo, biala boa maa yɛte Nyamenle atiakunlukpɔkɛ nee mɔɔ ɔbayɛ yeava yeali nwolɛ gyima la abo. Baebolo ne anu edwɛkɛ ne mɔɔ le ko la yɛ nwanwane, noko kɛ yɛ nye la kɛ buluku mɔɔ vi Nyamenle ɛkɛ ne la bayɛ la ɛne.

8. Maa neazo fa kile kɛ Baebolo ne le nɔhalɛ wɔ abɔdeɛ nwo nrɛlɛbɛ nu.

⁸ Baebolo ne le nɔhalɛ wɔ abɔdeɛ nwo nrɛlɛbɛ nu. Ɔlumua ɔhanle edwɛkɛ dɔɔnwo bɔbɔ na nzinlii bɛanwu ye. Kɛ neazo la, ɛnee tete Yizilayɛma lɛ mɛla mɔɔ fane bɛ nwo enililɛ nee awie mɔɔ saa ɔ nwo ɛnde a bɛye ye bɛfi menli avinli la wɔ Sɛlɛvolɛma buluku  ne anu wɔ mekɛ mɔɔ ɛnee maanle maanle mɔɔ ɛbɔ bɛ nwo mgbɔlɛka ɛyia la ɛnze ɛhye anwo edwɛkɛ biala la. Mekɛ mɔɔ ɛnee menli lɛ azɛlɛ ne anwo adwenle dɔɔnwo mɔɔ ɛndenrɛ la, Baebolo ne hanle ye nɔhalɛ nu kɛ azɛlɛ ne ‘zinze mɔɔ debie ɛnlɛ nu a.’ (Dwobu 26:7) Nɔhalɛ nu, Baebolo ne ɛnle abɔdeɛ nwo nrɛlɛbɛ buluku. Noko saa ɔka abɔdeɛ nwo nrɛlɛbɛ edwɛkɛ a, ɔle nɔhalɛ pɛpɛɛpɛ. Asoo tɛ kɛ yɛ nye la kɛ buluku mɔɔ vi Nyamenle ɛkɛ ne la bayɛ la ɛne?

9. (a) Adenle boni azo a Baebolo ne da ɔ nwo ali kɛ nuhua edwɛkɛ le pɛpɛɛpɛ yɛɛ anwodozo wɔ nu wɔ tetedwɛkɛ nu ɛ? (b) Duzu a nɔhalɛ mɔɔ menli mɔɔ hɛlɛle la ka la maa ɛnwu ye wɔ Baebolo ne anwo a?

⁹ Baebolo ne anu edwɛkɛ eza le pɛpɛɛpɛ yɛɛ anwodozo wɔ nu wɔ tetedwɛkɛ nu. Ɔka ye edwɛkɛ ne mɔ kpɔtee. Ɔmbɔ menli aluma ala na ɔka abusua mɔɔ bɛvi nuhua la noko. * Mɔɔ nee ewiade tetedwɛkɛ kɛlɛvolɛma, mɔɔ ɛnda ɛnga mekɛ mɔɔ bɛ menli anli konim nwo edwɛkɛ ɛnle ko la, Baebolo ne kɛlɛvolɛma hanle nɔhalɛ, na bɛhɛlɛle ɛleka bɔbɔ mɔɔ bɛdabɛ mumua ne anzɛɛ bɛ maanle ne vonle la anwo edwɛkɛ. Kɛ neazo la, Mosisi mɔɔ hɛlɛle Ɛdianlɛ Baebolo buluku ne la, hanle ɛtane mɔɔ anyebolo wɔ nu mɔɔ ɔyɛle na bɛhanle ɔ nyunlu kpole la anwo edwɛkɛ wɔ nuhua. (Ɛdianlɛ 20;2-12) Bɛnda bɛnnwu nɔhalɛlilɛ zɛhae wɔ tetedwɛkɛ mɔɔ ɛha la anu noko ɔda ali wɔ Baebolo ne anu ɔluakɛ ɔle buluku mɔɔ vi Nyamenle ɛkɛ ne la ati.

10. Duzu ati a ɔnyɛ nwanwane kɛ nvasoɛ wɔ Baebolo ne azo ɛ?

¹⁰ Kɛmɔ bɛvale Nyamenle sunsum a bɛhɛlɛle Baebolo ne la ati, “ɔle kpalɛ ɔmaa nɔhalɛ ne ɛhilehilelɛ, sonla nyunlu ɛhwilɛ, folɛdulɛ, yɛɛ menli ɛtetelɛ wɔ ɛbɛla kpalɛ ɛbɔlɛ nu.” (2 Temɔte 3:16) Ɛhɛe, nvasoɛ wɔ Baebolo ne azo. Ɔmaa yɛte kɛ dasanli si de la abo kpalɛ. Ɔnyɛ nwanwane, ɔboalekɛ Gyihova Nyamenle, mɔɔ le ye Kɛlɛvolɛ la a le Bɔvolɛ ne a! Ɔte yɛ nzuzulɛ nee yɛ nganeɛdelɛ bo kpalɛ ɔtɛla yɛ. Bieko, Gyihova ze mɔɔ yɛhyia nwolɛ na yɛanyia anyelielɛ a. Eza ɔze ndenle mɔɔ ɔnle kɛ yɛdua zolɛ a.

11, 12. (a) Ninyɛne boni a Gyisɛse hanle nwolɛ edwɛkɛ wɔ ye Boka ne azo Edwɛkɛhanlɛ ne anu a? (b) Ninyɛne gyɛne mɔɔ nvasoɛ wɔ zolɛ la boni a bɛha nwolɛ edwɛkɛ wɔ Baebolo ne anu a, na duzu ati a folɛdulɛ mɔɔ wɔ nuhua la wɔ ɛkɛ ne mekɛ biala ɛ?

 ¹¹ Suzu Gyisɛse edwɛkɛ ne mɔɔ bɛfɛlɛ ye Boka ne azo Edwɛkɛhanlɛ, mɔɔ wɔ Mateyu tile 5 kɔdwu 7 la anwo nea. Wɔ ngilehilelɛ ɛhye mɔɔ tɛla biala la anu, Gyisɛse hanle ninyɛne dɔɔnwo anwo edwɛkɛ, mɔɔ bie mɔ a le kɛzi yɛbahola yɛanyia nɔhalɛ anyelielɛ, kɛzi yɛbahola yɛaziezie yɛ nee awie mɔ avinli edwɛkɛ, kɛzi  yɛbahola yɛayɛ asɔne nee kɛzi yɛbahola yɛanyia anwonyia nwo adwenle kpalɛ la. Tumi nee nvasoɛ wɔ Gyisɛse edwɛkɛ ne mɔɔ ɔhanle la azo ɛnɛ kɛmɔ ɛnee ɔde wɔ mekɛ mɔɔ ɔhanle ala la.

¹² Baebolo ngyinlazo ne mɔ bie fane abusua asetɛnla, gyimayɛlɛ nu subane ngakyile yɛɛ abusuabɔlɛ mɔɔ yɛ nee awie mɔ lɛ la anwo. Baebolo ngyinlazo ne mɔ ka menli kɔsɔɔti, na nvasoɛ wɔ ye folɛdulɛ ne azo dahuu. Nyamenle edwɛkɛ ne mɔɔ ɔlua ngapezonli Ayezaya anwo zo ɔhanle la ka nrɛlɛbɛ mɔɔ wɔ Baebolo ne anu la sikalɛ kɛ: ‘Medame a mele Gyihova bɛ Nyamenle ne, mɔɔ kilehile bɛ mɔɔ le kpalɛ ɔmaa bɛ la.’—Ayezaya 48:17.

13. Duzu edwɛkɛ a Gyihova sunsum hanle ngapezonli Ayezaya manle ɔhɛlɛle ɔvanenle Babelɔn anwo a?

¹³ Ngapezo dɔɔnwo wɔ Baebolo ne anu, na bɛ nuhua dɔɔnwo ɛlumua ɛra nu. Suzu neazo ko anwo nea. Gyihova luale ngapezonli Ayezaya, mɔɔ dɛnlanle aze wɔ ɛvoya mɔtwɛ K.Y.M. la anwo zo hanle dole ɛkɛ ne kɛ bɛbazɛkye Babelɔn. (Ayezaya 13:19; 14:22, 23) Ɔhilele adenle kpɔtee mɔɔ ɛnee bɛbalua zo bɛazɛkye suakpole ne la. Ɛlɔnema mɔɔ ɛnee ɛlɛba arazɛkye sua ne la bamaa Babelɔn azudenle ne asesa na bɛahɔ sua ne azo mɔɔ awie biala nee bɛ ɛnrɛho a. Tɛ yemɔ angome ala ɛne. Ayezaya ngapezo ne eza bɔle belemgbunli ne mɔɔ bali Babelɔn anwo zo konim la duma—Saelɛse.—Ayezaya 44:27–45:2.

14, 15. Adenle boni azo a Ayezaya ngapezo mɔɔ fane Babelɔn anwo la bie luale rale nu a?

¹⁴ Kɛyɛ ye ɛvolɛ 200 anzi, wɔ October kenle mɔɔ tɔ zo 5 nee 6 ne nɔɔzo, 539 K.Y.M., ɛlɔnema bie rayɛle bɛ azokoɛleɛ wɔ ɛleka mɔɔ bikye Babelɔn. Ɛnee nwane a li bɛ nyunlu a? Pɛhyea belemgbunli bie mɔɔ bɛfɛlɛ ye Saelɛse la ɔ. Ɛhye ati ɛnee mekɛ ɛdwu kɛ ngapezo bie mɔɔ yɛ nwanwane la ba nu. Noko asoo ɛnee Saelɛse ɛlɔnema bava Babelɔn aze mɔɔ bɛnrɛho, kɛmɔ bɛhanle bɛdole ɛkɛ ne la ɔ?

¹⁵ Ɛnee Babelɔnma ɛlɛdi ɛvoyia wɔ zɔhane nɔe ne na ɛnee bɛte nganeɛ kɛ kɛmɔ bɛlie bɛ sua ne anwo bane kpole bɛyia la ati bɛlɛ anwobanebɔlɛ. Mekɛ ko ne ala anu, Saelɛse luale nrɛlɛbɛ adenle  zo hakyile azule ne mɔɔ se fa sua ne azo la anye dole ɛleka fofolɛ. Yeangyɛ azule ne sesanle na ye menli ne wudwule azule ne pɛle hɔle sua ne bane ne anwo. Noko ɛnee adenle boni azo a Saelɛse ɛlɔnema ne balua ahɔ Babelɔn sua ne azo a? Ɔlua debie bie ati, zɔhane nɔe ne bɛgyakyile sua ne nlenkɛ ne mɔ bɛguale nwolɛ mɔɔ bɛando nu a!

16. (a) Duzu a Ayezaya hanle vanenle mɔɔ awieleɛ kolaa bara Babelɔn anwo zo la anwo a? (b) Adenle boni azo a Ayezaya ngapezo ne mɔɔ fane Babelɔn ɛzɛkyelɛ ne anwo la rale nu a?

¹⁶ Bɛhanle bɛdole ɛkɛ ne wɔ Babelɔn anwo kɛ: “Awie ɛnrɛdɛnla nuhua ɛlɛ wɔ awolɛndoazo muala anu. Arelabenli biala ɛnrɛzi ye ndanlɛ sua wɔ ɛkɛ ne afoa nu, yɛɛ mboaneneavolɛma ɛnrɛva bɛ mboane ɛnrɛhɔ ɛkɛ ne adidi.” (Ayezaya 13:20) Tɛ sua ne ɛzɛkyelɛ angomekye anwo edwɛkɛ a wɔ ngapezo ɛhye anu a. Ɔmanle ɔlale ali kɛ Babelɔn babɔ bɔkɔɔ. Ɛbahola wɔanyia edwɛkɛ ɛhye mɔɔ ɛra nu la anwo daselɛ. Tete Babelɔn mɔɔ ɛyɛ suadu, mɔɔ la Baghdad nyiakɛ wɔ Iraq na ɔ nee ye bɛ avinli kɛyɛ mayɛlɛ 50 la, di daselɛ kɛ mɔɔ Gyihova luale Ayezaya anwo zo hanle la ɛra nu kɛ: ‘Mebava ɛzɛkyelɛ sane ne meapia ye meahɔgua.’—Ayezaya 14:22, 23. *

17. Adenle boni azo a Baebolo ngapezo mɔɔ ɛra nu la maa diedi nu mia a?

 ¹⁷ Saa yɛsuzu kɛzi Baebolo ne le buluku mɔɔ yɛkola yɛfa yɛ nwo yɛto nuhua ngapezo ne azo la anwo a, ɔmaa yɛ diedi nu mia, ɔnle zɔ ɔ? Mɔɔ ɔde la a le kɛ, saa Gyihova Nyamenle ɛmaa ye ɛwɔkɛ dɛba ne mɔ ɛra nu a, ɛnee yɛlɛ anwodozo kɛ ɔbamaa ye paladaese azɛlɛ ne anwo ɛwɔkɛ ne noko ara nu. (Ɛdianlɛ 23;19) Nɔhalɛ nu, ‘yɛlɛ ngoane mɔɔ ɛnlɛ awieleɛ mɔɔ Nyamenle ne mɔɔ ɛmbɔ adalɛ ɛlɛ la, vale bɔle yɛ ɛwɔkɛ vi tete la anu anyelazo.’—Taetɛse 1:2. *

18. Edwɛkɛ mɔɔ tumi wɔ nuhua la boni a Keleseɛnenli ɛzoanvolɛ Pɔɔlo hanle vanenle “Nyamenle edwɛkɛ” ne anwo a?

¹⁸ Edwɛkɛ mɔɔ yɛzuzu nwolɛ wɔ tile ɛhye anu la maa ɔda ali wienyi kɛ Baebolo ne le buluku mɔɔ ɔle ngakyile amgba a.  Noko akee, bolɛ mɔɔ ɔsonle la tɛla nuhua edwɛkɛ mɔɔ le ko nee pɛpɛɛpɛ mɔɔ ɔde wɔ abɔdeɛ nwo nrɛlɛbɛ nee tetedwɛkɛ nu, nvasoɛ mɔɔ wɔ zolɛ yɛɛ ye ngapezo mɔɔ anwodozo wɔ nu la ala. Keleseɛnenli ɛzoanvolɛ Pɔɔlo hɛlɛle kɛ: “Nyamenle edwɛkɛ ne gyi zo [“Ngoane wɔ Nyamenle edwɛkɛ ne anu,” NW] na ɔyɛ se, ɔyɛ nla ɔtɛla dadeɛ anye nwiɔ biala. Ɔpɛ to, ɔdua ɛkɛla nee sunsum ayia zo, ɔgya mbowule agbɔkɛ nee mbowule ɛnlome ɛweɛne na ɔfede adwenle nee ahonle nu ɔnwu bɛ nzuzulɛ muala.”—Hibuluma 4:12.

19, 20. (a) Kɛzi Baebolo ne bahola aboa wɔ yeamaa wɔanleɛnlea ɛ nwo nu ɛ? (b) Kɛ ɛbazi wɔahile anyezɔlɛ wɔ Nyamenle ahyɛlɛdeɛ, Baebolo ne, mɔɔ le ngakyile la anwo ɛ?

¹⁹ Nyamenle “edwɛkɛ” ne anzɛɛ nrɛlaleɛ ne mɔɔ wɔ Baebolo ne anu la ɛgengalɛ bahola ahakyi yɛ ɛbɛlabɔlɛ. Ɔkola ɔboa yɛ ɔmaa yɛneɛnlea yɛ nwo nu kpalɛ. Bie a yɛbaha kɛ yɛlɛ Nyamenle anwo ɛlɔlɛ, noko kɛzi yɛyɛ yɛ nyɛleɛ wɔ mɔɔ ye Edwɛkɛ, Baebolo ne, kilehile la anwo la, bamaa adwenle mɔɔ yɛlɛ nee mɔɔ wɔ yɛ ahonle nu bɔbɔ la ala ali.

²⁰ Baebolo ne le buluku mɔɔ vi Nyamenle ɛkɛ ne amgba a. Ɔle buluku mɔɔ ɔwɔ kɛ yɛkenga, yɛsukoa na yɛ nye die nwolɛ a. Kɔ zo kenga Nyamenle ahyɛlɛdeɛ ɛhye fa kile anyezɔlɛ mɔɔ ɛlɛ wɔ nwolɛ la. Mekɛ mɔɔ ɛlɛyɛ zɔ la, ɛbanyia atiakunlukpɔkɛ mɔɔ Nyamenle lɛ maa alesama la anwo anyezɔlɛ kpole. Yɛbazuzu zɔhane atiakunlukpɔkɛ ne nee kɛzi ɔbara nu la anwo wɔ tile ne mɔɔ doa zolɛ la anu.