“Bɛnle Ɛtane Ewiade Ɛdeɛ”
Tile 18
“Bɛnle Ɛtane Ewiade Ɛdeɛ”
1. (a) Duzu asɔne a Gyisɛse yɛle manle ye ɛdoavolɛ ne mɔ kolaa na yeawu a? (b) Duzu ati a yɛ nwo mɔɔ yɛtwe yɛavi ewiade ne anwo la hyia kpalɛ a?
NƆE ne mɔɔ aleɛ kye a bɛbahu Gyisɛse la, ɔzɛlɛle ɔmanle ye ɛdoavolɛ ne mɔ. Kɛmɔ ɛnee Gyisɛse ze kɛ Seetan bamaa bɛ nwo ahyele bɛ kpole la ati, ɔzele ɔ Ze kɛ: “Membiza kɛ ɛye bɛ ɛvi ewiade ye anu, mesɛlɛ kɛ ɛkɛzie bɛ gyɛlɛɛnye ɛkɛvi amumuyɛnli Seetan asa anu. Kɛmɔ menle ɛtane ewiade ɛdeɛ la, bɛdabɛ noko bɛnle ye ɛdeɛ.” (Dwɔn 17:15, 16) Duzu ati a yɛ nwo mɔɔ yɛtwe yɛavi ewiade ne anwo la hyia kpalɛ a? Ɔhyia ɔluakɛ Seetan a di ewiade ɛhye azo belemgbunli a. Keleseɛnema ɛnrɛhulo kɛ bɛkɛyɛ ewiade ne mɔɔ wɔ ye tumi bo la ɛdeɛ.—Luku 4:5-8; Dwɔn 14:30; 1 Dwɔn 5:19.
2. Duzu a kile kɛ ɛnee Gyisɛse ɛnle ewiade ɛdeɛ a?
2 Ewiade ne mɔɔ ɛnee Gyisɛse ɛnle ye ɛdeɛ la ɛngile kɛ ɛnee ɔngulo menli. Ɔboalekɛ, ɔyɛle mɔɔ ɛnde kpɔkɛ la ayile, ɔdwazole mɔɔ ɛwu, yɛɛ ɔbɔle Nyamenle Belemgbunlililɛ ne nolo. Ɔvale ye ngoane bɔbɔ ɔdole aze ɔmanle alesama. Noko yeangulo subane nee nyɛleɛ ɛtane mɔɔ menli mɔɔ li Seetan ewiade ne anzi da ye ali la. Ɛhye ati, ɔbɔle atiakunluwɔzo ɛtane, anwonyia ɛhulolɛ, nee duma ɛkpondɛlɛ nwo kɔkɔ. (Mateyu 5:27, 28; 6:19-21; Luku 20:46, 47) Yemɔti, ɔnyɛ azibɛnwo kɛ Gyisɛse mumua ne kpole ewiade maanyɛlɛ a. Ɔwɔ nuhua kɛ ɛnee ɔle Dwuunli ɛdeɛ, noko yeanva ɔ nwo yeanwulowula Dwuuma nee Wulomuma maanyɛlɛ edwɛkɛ nu.
“Me Belemgbunlililɛ ne Ɛnle Ewiade Ɛhye Anu”
3. (a) Duzu edwɛkɛ a Dwuu ɛzonlenlɛ mgbanyima ne mɔ hanle dole Gyisɛse abo wɔ Paelɛte anyunlu a, na duzu ati ɔ? (b) Duzu a kile kɛ ɛnee Gyisɛse ɛngulo kɛ bɛkɛzie ye belemgbunli wɔ azɛlɛ ye azo a?
3 Suzu mɔɔ zile mekɛ mɔɔ Dwuu ɛzonlenlɛ mgbanyima ne mɔ manle bɛhyele Gyisɛse na bɛvale ye bɛhɔle Wulomu amɛnlado Pɔnteɛse Paelɛte ɛkɛ ne la anwo. Nɔhalɛ nu, zɔhane mgbanyima ne mɔ vale ɛya ɔluakɛ ɛnee Gyisɛse ɛkpa bɛ nabalaba nyɛleɛ ne anwo ɛdanlɛ. Amaa amɛnlado ne ahwe Gyisɛse anzo la, bɛdoanle Gyisɛse kɛ: “Yɛhyele nrenya ɛhye kɛ ɔlɛsɛkye yɛ menli ne mɔ adwenle, ɔse bɛmmatua adwule bɛmaa Maanle Maanle Belemgbunli ne na eza ɔkilehile kɛ ɔdaye mumua ne ɔle Kelaese, belemgbunli bie.” (Luku 23:2) Ɔda ali wienyi kɛ, ɛnee ɛhye ɛnle nɔhalɛ ɔluakɛ mekɛ ekyi bie mɔɔ ɛze ɛhɔ la menli ne yɛle kɛ bɛsie Gyisɛse belemgbunli, noko ɔkpole. (Dwɔn 6:15) Ɛnee ɔze kɛ kenlebie ɔbali belemgbunli wɔ anwuma. (Luku 19:11, 12) Bieko, ɛnee Gyihova a bazie ye belemgbunli a na tɛ menli ɔ.
4. Duzu a Gyisɛse hanle ye wɔ adwule ɛdualɛ nwo a?
4 Ɔhale kenle nsa na bɛahye Gyisɛse la, Falasiima ne bɔle mɔdenle kɛ bɛmaa Gyisɛse adendɛ atia adwule ɛdualɛ. Noko ɔhanle kɛ: “Bɛva dwɛtɛ fufule [Wulomuma ezukoa] bɛrɛla bɛmaa menea. Nwane nvoninli nee ye duma a wɔ zolɛ la?” (Luku 20:20-24) Mɔɔ bɛbuale kɛ “Siza” la, ɔhanle kɛ “ɛnee noko bɛva mɔɔ le Siza ɛdeɛ la bɛmaa ye ɛ, na bɛva mɔɔ le Nyamenle ɛdeɛ la bɛmaa ye.”—Maake 12:16, 17.
5. (a) Duzu a Gyisɛse hilele ye ɛdoavolɛ ne mɔ wɔ mekɛ mɔɔ bɛhyele ye la ɛ? (b) Kɛzi Gyisɛse hilehilele mɔɔ ɔyɛle la anu ɛ? (d) Duzu a vi ye edwɛkɛlilɛ ne anu rale a?
5 Gyisɛse angilehile kɛ bɛde ewiade arelemgbunli nwo atua. Mekɛ mɔɔ sogyama nee menli gyɛne rale Gyisɛse ɛhyelɛ la, Pita hwenle dadeɛ pɛle nrenya ko anzo. Noko Gyisɛse zele ye kɛ: “Fa wɔ dadeɛ ne wula ye boa ne anu, ɔluakɛ bɛdabɛ mɔɔ bɛtwe dadeɛ la, bɛwu dadeɛ nloa.” (Mateyu 26:51, 52) Aleɛ hyenle la Gyisɛse hilehilele mɔɔ ɔyɛle la anu ɔhilele Paelɛte: “Me belemgbunlililɛ ne ɛnle ewiade ɛhye anu; saa me belemgbunlililɛ ne wɔ ewiade ye anu a, anrɛɛ me ɛlɔnema kɛho kɛmaa me na bɛnrɛmaa bɛnrɛva me bɛnrɛmaa Dwuu mgbanyima ne mɔ.” (Dwɔn 18:36) Paelɛte hanle kɛ “mennwu debie biala mɔɔ tia” Gyisɛse wɔ edwɛkɛ mɔɔ bɛha la anwo a. Noko Paelɛte zulole menli ne na ɔmanle bɛbɔle Gyisɛse baka nu.—Luku 23:13-15; Dwɔn 19:12-16.
Ɛdoavolɛ ne mɔ Lile Gyisɛse Neazo ne Anzi
6. Duzu a alumua Keleseɛnema ne yɛle hilele kɛ bɛkyi ewiade subane ne noko bɛkulo menli ɛ?
6 Gyisɛse ɛdoavolɛ ne mɔ dele mɔɔ ewiade ne mɔɔ bɛnle ye ɛdeɛ la kile la abo. Ɛnee ɔkile kɛ ɔwɔ kɛ bɛkpo ewiade nyɛleɛ nee ye subane ɛtane ne, mɔɔ ɛnee Wulomuma nwɔhoalilɛ mɔɔ ɛbɛlatane nee basabasayɛlɛ wɔ nu la boka nwo la. Ɔlua ɛhye azo, bɛhanle kɛ ɛdoavolɛ ne mɔ kyi menli. Noko ɛnee ɛhye ɛnle nɔhalɛ fee, ɔluakɛ bɛyɛle gyima ɛsesebɛ bɛboale awie mɔ amaa menli ɛhye mɔ anyia ngoanelielɛ nziezielɛ mɔɔ Nyamenle ɛyɛ la anu nvasoɛ.
7. (a) Ɔluakɛ ɛnee alumua ɛdoavolɛ ne mɔ ɛnle ewiade ne ɛdeɛ la ati, duzu a dole bɛ a? (b) Duzu adwenle a ɛnee bɛlɛ wɔ maanle mgbanyima nee adwule ɛdualɛ nwo a, na duzu ati ɔ?
7 Fane dɔɔnwo ne ala, arane mgbanyima mɔɔ ɛnlɛ ɛdoavolɛ ne mɔ anwo adwenle mɔɔ tenrɛ la kpɔle bɛ kɛmɔ bɛkpɔle Gyisɛse la. Noko ɛzoanvolɛ Pɔɔlo hɛlɛle ye kɛyɛ 56 Y.M. hɔmanle Keleseɛnema mɔɔ wɔ Wulomu la ɔdule bɛ folɛ kɛ “ɔwɔ kɛ awie biala bu mgbanyima mɔɔ ɛlɛbu maanle ne la, ɔboalekɛ tumi biala ɛnle ɛkɛ mɔɔ Nyamenle ɛnze nu a.” Ɛhye ɛngile kɛ Gyihova a fa ewiade arelemgbunli sie ɛkɛ a, emomu yemaa bɛ adenle kɛ bɛdɛnla ɛkɛ ɔhɔdwu mekɛ mɔɔ ye Belemgbunlililɛ ne angomekye bali azɛlɛ ye amuala azo la. Ɛhye ati saa Pɔɔlo dule Keleseɛnema folɛ kɛ bɛva ɛbulɛ bɛmaa maanle mgbanyima na bɛdua adwule a ɛnee ɔfɛta.—Wulomuma 13:1-7; Taetɛse 3:1, 2.
8. (a) Nienwu a Keleseɛnema tie ewiade tumivolɛma kɔdwu a? (b) Kɛ alumua Keleseɛnema ne zile lile Gyisɛse neazo ne anzi ɛ?
8 Noko akee, ɛdielɛ mɔɔ yɛtie ewiade tumivolɛma la lɛ ye ɛweɛne. Saa sonla mɛla tia Gyihova mɛla a, menli mɔɔ sonle Gyihova la di Ye mɛla zo. Yɛ mɔɔ On the Road to Civilization—A World History buluku ne ka ye wɔ alumua Keleseɛnema ne anwo la nzonlɛ: “Keleseɛnema ne kpole ninyɛne bie mɔ mɔɔ ɛnee Wulomuma yɛ la. Keleseɛnema ne . . . nwunle kɛ sogyalilɛ tia bɛ diedi. Bɛanlie maanyɛlɛ nu dibilɛ biala. Bɛanzonle maanle maanle belemgbunli ne.” Mekɛ mɔɔ Dwuuma kɔɔto kpole ne duale ɛdoavolɛ ne mɔ kɛ “bɛmmabɔ” edwɛkpa ne nolo la, bɛbuale kɛ: “Ɔwɔ kɛ yɛtie Nyamenle yɛtɛla sonla.”—Gyima ne 5:27-29.
9. (a) Duzu a manle Keleseɛnema mɔɔ wɔ Gyɛlusalɛm la yɛle mɔɔ bɛyɛle wɔ 66 Y.M. la a? (b) Adenle boni azo a ɛhye le kilemunli kpalɛ a?
9 Ɛdoavolɛ ne mɔ anva bɛ nwo anwulowula maanyɛlɛ nee sogyama edwɛkɛ nu. Dwuuma mɔɔ wɔ Dwudiya la dele Siza anwo atua wɔ 66 Y.M. Yeangyɛ, yɛɛ Wulomu sogyama rabɔle Gyɛlusalɛm anwo yiale a. Duzu a Keleseɛnema mɔɔ wɔ suakpole ne azo la yɛle a? Bɛhakyele Gyisɛse folɛdulɛ ne mɔɔ kile kɛ bɛvi suakpole ne azo la. Mekɛ mɔɔ Wulomuma ne hwenle bɛ nzi ekyii la, Keleseɛnema ne nriandile pɛle Dwɔdan Azule ne hɔle Pella awoka ne mɔ azo. (Luku 21:20-24) Afoa biala mɔɔ ɛnee bɛnle la ɛyɛ kilemunli ɛmaa nɔhalɛ Keleseɛnema mɔɔ li amozi la.
Keleseɛnema Ɛnle Afoa Biala wɔ Awieleɛ Mekɛ Ye Anu
10. (a) Duzu gyima a Gyihova Alasevolɛ anye ɛkpota ye ɛyɛlɛ nwo a, na duzu ati ɔ? (b) Duzu a bɛnva bɛ nwo bɛnwulowula nu a?
10 Asoo tetedwɛkɛ da ye ali kɛ ekpunli bie wɔ awieleɛ mekɛ ye anu mɔɔ ɛnle afoa biala kɛmɔ alumua Keleseɛnema ne yɛle la ɔ? Ɛhɛe, Gyihova Alasevolɛ ɛyɛ zɔ. Wɔ mekɛ ɛhye mɔ amuala anu, bɛhɔ zo bɛbɔ ye nolo kɛ Nyamenle Belemgbunlililɛ ne angomekye a bava dahuu anzondwolɛ, ɛkpazilɛ, nee anyelielɛ arɛlɛ menli mɔɔ kulo tenleneyɛlɛ a. (Mateyu 24:14) Noko bɛnva bɛ nwo bɛnwulowula maanle maanle ne mɔ edwɛkɛ nu fee.
11. (a) Kɛzi afoa biala mɔɔ Alasevolɛ ne mɔ ɛnle la le ngakyile fi mɔɔ ɛzonlenlɛ nu mgbanyima ne mɔ yɛ la anwo ɛ? (b) Duzu a Gyihova Alasevolɛ yɛ ye wɔ bɛdabɛ mɔɔ bɛfa bɛ nwo bɛwulowula maanyɛlɛ nu la anwo a?
11 Mɔɔ nee ɛhye ɛnle ko la, ewiade ɛzonlenlɛ ne mɔ anu mgbanyima ɛva bɛ nwo ɛwula maanyɛlɛ nu. Wɔ maanle bie mɔ anu, bɛgyinla menli mɔɔ pele maanyɛlɛ nu dibilɛ la bie anzi yɛɛ bɛdwazo bɛtia bie mɔ. Ɛzonlenlɛ nu mgbanyima bie mɔ bɔbɔ lɛ dibilɛ wɔ maamulɛ nu. Bie mɔ noko di arane mgbanyima adwenle maa bɛdi ngyehyɛleɛ mɔɔ ɛzonlenlɛ nu mgbanyima ne mɔ die to nu la azo. Noko akee, Gyihova Alasevolɛ ɛnva bɛ nwo ɛnwulowula maanyɛlɛ nu. Yɛɛ saa awie mɔ ɛlɛfa bɛ nwo awula maanyɛlɛ eku nu, anzɛɛ bɛlɛpele maanyɛlɛ nu dibilɛ bie, anzɛɛ bɛlɛto ɛra a, bɛnzi bɛ adenle. Gyisɛse hanle kɛ ye ɛdoavolɛ ne mɔ ɛnle ewiade ne ɛdeɛ, yemɔti Gyihova Alasevolɛ ɛnva bɛ nwo ɛnwulowula maanyɛlɛ nu.
12. Ɔluakɛ ewiade ɛzonlenlɛ ne mɔ fa bɛ nwo wulowula maanyɛlɛ nu la ati, duzu a ɛvi nu ɛra a?
12 Kɛmɔ Gyisɛse hanle la, maanle maanle ne mɔ ko dahuu. Menli ekpunli ekpunli mɔɔ wɔ maanle maanle ne mɔ anu la ko tia bɛ nwo. (Mateyu 24:3, 6, 7) Ɛzonlenlɛ nu mgbanyima ne mɔ kɔ zo gyinla maanle anzɛɛ ekpunli bie mɔ anzi wɔ konle ɛhye mɔ anu na bɛwula bɛ ɛzonlenlɛ nu amra anwosesebɛ kɛ bɛyɛ zɔhane ala. Mɔɔ vi ɛhye anu ɛra la a le kɛ menli mɔɔ wɔ ɛzonlenlɛ ko anu la kuhu bɛ nwo wɔ konle nu ɔluakɛ bɛnvi maanle ko anzɛɛ aneɛ ekpunli ko anu la ati. Ɛhye nee Nyamenle ɛhulolɛdeɛ ɛnyia fee.—1 Dwɔn 3:10-12; 4:8, 20.
13. Duzu daselɛ a wɔ ɛkɛ mɔɔ kile kɛ Gyihova Alasevolɛ ɛnle afoa biala a?
13 Noko akee, Gyihova Alasevolɛ ɛnva bɛ nwo ɛnwula konle nu. November 1, 1939, The Watchtower ne hanle kɛ: “Bɛdabɛ mɔɔ bɛwɔ Awulae afoa la kɔsɔɔti ɛnle afoa biala wɔ maanle maanle ne mɔ konle konle ne anu.” Gyihova Alasevolɛ mɔɔ wɔ ewiade amuala la di ɛhye azo wɔ gyinlabelɛ biala anu. Bɛmmaa ewiade maanyɛlɛ edwɛkɛ anzɛɛ konle konle mɔɔ fa mgbakyemgbakyenu ba la ɛnzɛkye bɛ ewiade amuala mediemayɛlɛ ne. Bɛmaa ngapezo ɛhye ɛra nu wɔ bɛ afoa nu: “Bɛbabolo bɛ konle dadeɛ ne mɔ bɛayɛ ɛyazonlɛ mbulalɛ, na bɛbabolo bɛ atwɛ ne mɔ bɛayɛ ɛdedadeɛ.” Kɛmɔ bɛnle afoa biala la ati, bɛnzukoa konle ɛhonlɛ bieko.—Ayezaya 2:3, 4; 2 Kɔlentema 10:3, 4.
14. Ɔluakɛ Gyihova Alasevolɛ ɛnle afoa biala wɔ ewiade ne anu la ati, duzu a ɛdo bɛ a?
14 Duzu a ɛvi afoa biala mɔɔ bɛnle la anu ɛra a? Gyisɛse hanle kɛ: “Bɛnle ɛtane ewiade ɛdeɛ. Ɛhye ati ɛtane ewiade ɛhye anu amra kpɔ bɛ.” (Dwɔn 15:19) Kɛmɔ Gyihova Alasevolɛ ne mɔ le Nyamenle azonvolɛ la ati, bɛgua bɛ nuhua dɔɔnwo efiade. Bɛyɛ bie mɔ kpɔdekpɔde, bɔbɔ bɛhu bie mɔ, kɛmɔ bɛyɛle ɛvoya ne mɔɔ lumua la anu Keleseɛnema ne la. Bɛyia ɛhye ɔluakɛ Seetan, “ɛtane ewiade ɛhye nyamenle ne,” kpɔ Gyihova azonvolɛ mɔɔ ɛnle ewiade ne afoa la.—2 Kɔlentema 4:4; Yekile 12:12.
15. (a) Nienwu a maanle maanle ne mɔ amuala ɛdo ɛlɔnwɔne ɛlɛkɔ a, na duzu a Gyihova Alasevolɛ bɔ mɔdenle kɛ bɛbahoati a? (b) Duzu ati a ɔhyia kɛ yɛtwe yɛ nwo yɛfi ewiade ne anwo a?
15 Gyihova azonvolɛ anye die kɛ bɛnle ewiade ne ɛdeɛ, ɔluakɛ maanle maanle ne mɔ amuala ɛdo ɛlɔnwɔne ɛlɛkɔ bɛ awieleɛ wɔ Amagɛdɔn. (Daneɛle 2:44; Yekile 16:14, 16; 19:11-21) Kɛmɔ yɛtwe yɛ nwo yɛfi ewiade ne anwo la ati, yɛbahoati ɛzɛkyelɛ ɛhye. Kɛ menli mɔɔ ɛyɛ ko wɔ ewiade amuala la, yɛdi nɔhalɛ yɛmaa Nyamenle anwuma Belemgbunlililɛ ne. Nɔhalɛ nu, ɔluakɛ yɛnle ewiade ne ɛdeɛ la ati, bɛgolo yɛ nwo yɛɛ bɛkpɔ yɛ. Noko ɔnrɛhyɛ biala ɛhye mɔ amuala abo bapɛ, ɔluakɛ bɛbazɛkye ewiade ɛtane ɛhye mɔɔ wɔ Seetan tumi bo la bɔkɔɔ. Noko bɛdabɛ mɔɔ bɛsonle Gyihova la badɛnla aze dahuu wɔ ye tenlene ewiade fofolɛ ne mɔɔ Nyamenle Belemgbunlililɛ ne a bali zo la anu.—2 Pita 3:10-13; 1 Dwɔn 2:15-17.
Suzu nwo Fa Ti Nu
• Kɛzi Gyisɛse lale mɔɔ ewiade ne mɔɔ yɛnle ye ɛdeɛ la kile la ali ɛ?
• Duzu subane a alumua Keleseɛnema ne lale ye ali wɔ (a) ewiade nyɛleɛ, (b) maanle mgbanyima, yɛɛ (d) adwule ɛdualɛ nwo a?
• Adenle boni azo a Gyihova Alasevolɛ mɔɔ wɔ ɛkɛ ne ɛnɛ la ɛhile kɛ bɛnle afoa biala ɛ?
[Debiezukoalɛ kpuyia ne mɔ]
[Nvoninli wɔ mukelɛ 165]
Gyisɛse hilehilele nu kɛ ɔ nee ye ɛdoavolɛ ne mɔ ɛnle “ɛtane ewiade ɛdeɛ”
