1, 2. Saa ngyegyelɛ wɔ agyalɛ bie anu a, kpuyia boni a ɔwɔ kɛ bɛbiza a?

WƆ 1988 anu, raalɛ bie mɔɔ wɔ Italy mɔɔ bɛfɛ ye Lucia la arɛle bɔle kpole. * Ɛnee ye agyalɛ mɔɔ ɛli ɛvolɛ bulu la ɛlɛsɛkye. Yebɔ mɔdenle fane dɔɔnwo kɛ ɔbaziezie ɔ nee ɔ hu avinli, noko ɔyɛ biala a ɔnyɛ boɛ. Yemɔti kɛmɔ yeangola yeanziezie bɛ avinli la ati, yetete agyalɛ ne anu na kɛkala ɔ ngomekye ɔlɛtete ngakula mraalɛ nwiɔ. Saa Lucia kakye mekɛ zɔhane a ɔka kɛ: “Ɛnee meze kɛ debie biala ɛnle ɛkɛ mɔɔ bamaa agyalɛ ne ayɛ kpalɛ a.”

² Saa ɛlɛyia ngyegyelɛ wɔ agyalɛ nu a, ɛbahola wɔade Lucia edwɛkɛ ne abo. Bie a ngyegyelɛ mɔɔ wɔ agyalɛ ne anu la ɛlɛmaa wɔadwenle kɛ saa ɔbayɛ kpalɛ a. Saa ye zɔhane a, ɔbayɛ kpalɛ kɛ ɛkɛzuzu kpuyia ɛhye anwo: Asoo meli folɛdulɛ kpalɛ kɔsɔɔti mɔɔ Nyamenle ɛva ɛmaa wɔ Baebolo ne anu kɛ ɔboa ɔmaa agyalɛ ɛyɛ kpalɛ la azo?​—Edwɛndolɛ 119:105.

3. Ewolebɔlɛ ɛlɛkɔ zo ɛdeɛ, noko nganeɛdelɛ boni a bɛhile kɛ menli dɔɔnwo mɔɔ bɔ ewole nee bɛ mbusua da ye ali ɛ?

³ Saa ngyegyelɛ kpole ba nrenya nee ɔ ye avinli a, ɔbahola yeayɛ kɛ saa bɛsɛkye agyalɛ ne a yemɔ a le kpalɛ a. Noko, ɔnva nwo kɛ agyalɛ dɔɔnwo ɛlɛsɛkye wɔ maanle ngakyile nu la, neɛnleanu mɔɔ bɛyɛ ye kenlensa ye la kile kɛ mrenya nee mraalɛ mɔɔ bɔ ewole la anu dɔɔnwo nu bɛ nwo kɛ bɛbɔle ewole la. Bɛ  nuhua dɔɔnwo nyia nwonane nee adwenle nu kpɔkɛdelɛ nwo ngyegyelɛ tɛla bɛdabɛ mɔɔ bɛtɛnla bɛ agyalɛ ne anwo la. Ngakula mɔɔ bɛ awovolɛ kɛbɔ ewole la yɛ basaa na bɛnda bɛnnyia anyelielɛ wɔ ɛvolɛ dɔɔnwo anu. Menli mɔɔ kɛbɔ ewole la awovolɛ nee bɛ gɔnwo mɔ noko nwu amaneɛ. Na kɛzi Nyamenle, agyalɛ Hyehyɛvolɛ ne bu tɛnlabelɛ ne ɛ?

4. Kɛzi ɔwɔ kɛ bɛdi agyalɛ nu ngyegyelɛ nwo gyima ɛ?

⁴ Kɛmɔ yɛnwu ye wɔ tile ne mɔ mɔɔ lumua anu la, ɛnee Nyamenle bodane a le kɛ agyalɛ badɛnla ɛkɛ ne dahuu. (Mɔlebɛbo 2:24) Ɛnee duzu ati a agyalɛ dɔɔnwo sɛkye ɛ? Ɔmba arɛlevilɛ nu ala. Bɛta bɛnwu ninyɛne mɔɔ fa ba la. Agyalɛ nu ngyegyelɛ ngyikyi kola yɛ kpole dedee kɔdwu ɛleka mɔɔ bɛyɛ nwolɛ ɛhwee a ɔnyɛ boɛ la. Noko saa bɛdua Baebolo ne azo bɛdi ngyegyelɛ ɛhye anwo gyima ndɛndɛ a, ɔnrɛmaa agyalɛ dɔɔnwo ɛnrɛzɛkye.

5. Debie mɔɔ le nɔhalɛ la boni a ɔwɔ kɛ bɛdie bɛto nu wɔ agyalɛ nu ɛ?

⁵ Debie mɔɔ ɔyɛ a ɔfa ngyegyelɛ ɔba la a le debie nwo adwenle kpalɛ mɔɔ agyalɛma ne anu ko anzɛɛ bɛ mu nwiɔ bɛnnyia la. Ɛhulolɛ nwo edwɛkɛ, magazine mɔɔ ɛlie duma, TV zo gyimalilɛ kola maa bɛnyia ninyɛne nwo adwenle mɔɔ le ngakyile kolaa wɔ mɔɔ kɔ zo wɔ ɛbɛlabɔlɛ nu la anwo. Saa ninyɛne ɛhye mɔ anyɛ zɔ a, awie bahola ade nganeɛ kɛ bɛlɛsisi ye, ɔnnyia ahunlundwolɛ na bɔbɔ yeava nwolɛ ɛya kpole. Noko, kɛ ɔkɛyɛ na menli nwiɔ mɔɔ bɛnli munli la anyia anyelielɛ wɔ agyalɛ nu ɛ? Ɔhyia mɔdenlebɔlɛ na bɛ agyalɛ ne ali munli.

6. (a) Agyalɛ nwo adwenle kpalɛ boni a Baebolo ne fa maa a? (b) Ninyɛne mɔɔ ɔmmaa agyalɛma avinli ɛnzɛ la bie mɔ a le boni?

⁶ Baebolo ne boa wɔ ɛhye anwo. Ɔka kɛ anyelielɛ wɔ agyalɛ nu, noko eza ɔbɔ kɔkɔ kɛ menli mɔɔ kɛgya la anwo ‘bahyele bɛ kpalɛ.’ (1 Kɔlentema 7:28) Kɛmɔ yɛnwu ye la, agyalɛma ne ɛnli munli yɛɛ bɛkola bɛyɛ ɛtane. Bokavolɛ ko biala adwenle nee ye nganeɛdelɛ nee kɛzi bɛtetele ye la le ngakyile. Ɔyɛ a agyalɛma adwenle ɛnnyia wɔ ezukoa, ngakula yɛɛ bɛ ase mɔ anwo. Mekɛ mɔɔ bɛnnyia bɛnyɛ ninyɛne bɛmbɔ nu nee nla nwo ngyegyelɛ noko kola fa edwɛkɛ ba. * Ɔhyia mekɛ na bɛahola bɛali ngyegyelɛ ɛhye anwo gyima, noko maa wɔ ahonle ɛdɔ wɔ azule nu! Agyalɛma dɔɔnwo gyinla ngyegyelɛ ɛhye mɔ anloa na bɛkpondɛ ye sɔbelɛ.

7, 8. Saa nyanelilɛ anzɛɛ edwɛkɛ wɔ agyalɛma avinli a, kɛzi Ngɛlɛlera ne kile kɛ bɛli nwolɛ gyima ɛ?

⁷ Ɔyɛ se ɔmaa menli dɔɔnwo kɛ bɛbado bɛ rɛle aze  wɔ mekɛ mɔɔ bɛlɛka edwɛkɛ mɔɔ yɛ bɛ nyiane, ɔfa mgbonde ɔba anzɛɛ debie mɔɔ bɛngola bɛnyɛ anwo edwɛkɛ la. Kɛ anrɛɛ ɛbaha ye wienyi kɛ: “Mete nganeɛ kɛ ɛnde me edwɛkɛ bo la,” bokavolɛ bie bahola ava ɛya na yeawudu edwɛkɛ ne anu. Menli dɔɔnwo ka kɛ: “Ɛdwenle ɛ ngomekye ɛ nwo,” anzɛɛ “Ɛnlɛ me nwo ɛlɔlɛ.” Saa bokavolɛ ko ne ɛngulo kɛ edwɛkɛ ne yɛ kpolera a, bie a ɔnrɛha nwolɛ ɛhwee.

⁸ Adenle kpalɛ mɔɔ bɛbahola bɛava zo la a le kɛ bɛbali Baebolo ne folɛdulɛ ɛhye azo: “Saa ɛfa ɛya a, mmamaa ɔfa wɔ ɔkɔ ɛtane nu; eza mmamaa sɛnzɛne ne tɔ wɔ ɛya zo.” (Ɛfɛsɛsema 4:26) Bɛbizale agyalɛma mɔɔ bɛva anyelielɛ bɛgya ɛvolɛ 60, na bɛlɛdi nwolɛ ɛvolɛ la debie mɔɔ ɛmaa bɛ agyalɛ ne ɛgyinla la. Kunli ne hanle kɛ: “Yɛyɛ kɛ ɔnva nwo edwɛkɛ ekyi biala mɔɔ kɛzi la, kyesɛ yɛsiezie kolaa na yɛala.”

9. (a) Duzu a Ngɛlɛlera ne kile kɛ ɔle debie mɔɔ nwolɛ hyia wɔ adwelielilɛ nu a? (b) Saa bɔbɔ ɔhyia akɛnrasesebɛ nee mɛlɛbɛnwoaze a, duzu a ɔwɔ kɛ agyalɛma ta yɛ a?

⁹ Saa kunli nee yelɛ adwenle annyia wɔ edwɛkɛ nwo a, bɛ nuhua ko biala ɔwɔ kɛ “tie ɔ nzo anwo, ɔmmatendɛ dɔɔnwo yɛɛ ɔmmafa ɛya.” (Gyemise 1:19) Saa bɛtie edwɛkɛ kpalɛ a, agyalɛma nwiɔ ne banwu kɛ ɔhyia kɛ bɛkpa kyɛlɛ. (Gyemise 5:16) Ɔhyia mɛlɛbɛnwoaze nee akɛnrasesebɛ na bɛaha ye nɔhalɛ nu kɛ, “Gyakyi maa ɔha.” Noko saa bɛdi ngyegyelɛ nwo gyima wɔ adenle zɛhae azo a, ɔbaboa agyalɛma ne yeamaa bɛali ngyegyelɛ nwo gyima na eza bɛanyia ɛlɔlɛ kpole bɛamaa bɛ nuhua ko biala.

10. Debie mɔɔ Pɔɔlo hilele kɛ ɔbaboa Keleseɛnema mɔɔ wɔ Kɔlente la boni a bahola aboa Keleseɛnema ɛnɛ a?

¹⁰ Mekɛ mɔɔ ɛzoanvolɛ Pɔɔlo hɛlɛle Kɔlentema la ɔhanle kɛ, ‘ɔlua adwɔmanebɔlɛ ti bɛgya.’ (1 Kɔlentema  7:2) Ɛnɛ ewiade ne ɛzɛkye bɔkɔɔ ɛdɛla tete Kɔlente ɛdeɛ ne. Ɛbɛlatane nwo edwɛkɛ mɔɔ ewiade ne anu amra ka ye wienyi, bɛ nwo mɔɔ bɛnziezie ye kpalɛ, yɛɛ nla nwo edwɛkɛ mɔɔ wɔ magazine nee mbuluku nu, TV zo yɛɛ video nu la kɔsɔɔti maa menli nyia nla nwo atiakunluwɔzo ɛtane. Ɛzoanvolɛ Pɔɔlo hanle hilele Kɔlentema mɔɔ ɛnee bɛlɛyia ngyegyelɛ ko ne ala la kɛ: “Ɔle kpalɛ kɛ bɛkɛgya bie tɛla kɛ bɛ nwo kɛhyele bɛ na bɛnrɛhola bɛ nwo sɔ a.”​—1 Kɔlentema 7:9.

11, 12. (a) Duzu a ɔwɔ kɛ kunli nee yelɛ fa maa bɛ nwo a, na subane boni a ɔwɔ kɛ bɛda ye ali wɔ nwo a? (b) Saa ɔwɔ kɛ bɛtwe bɛ nwo bɛfi nla nwo wɔ mekɛ ekyi anu a, kɛzi ɔwɔ kɛ bɛdi nwolɛ gyima ɛ?

¹¹ Ɛhye ati, Baebolo ne ka kile Keleseɛnema mɔɔ bɛgya la kɛ: ‘Ɔwɔ kɛ nrenya biala fa mɔɔ fɛta ɔ ye la maa ye, na yelɛ noko yɛ zɔhane ala maa ɔ hu.’ (1 Kɔlentema 7:3) Yɛ ye nzonlɛ kɛ, bɛhwe adwenle bɛzie ɛmanlɛ zo bɛdɛla ɛlielɛ. Saa bokavolɛ ko biala dwenle ɔ gɔnwo boɛyɛlɛ nwo a, yɛɛ agyalɛ nu nla bayɛ anyelielɛ kpalɛ a. Kɛ neazo la, Baebolo ne tu mrenya folɛ kɛ bɛ nee bɛ ye mɔ ɛdɛnla “wɔ nrɛlɛbɛ nu.” (1 Pita 3:7, NW) Ɛhye le zɔ titile wɔ mekɛ mɔɔ bɛlɛfa agyalɛ nu nla ne bɛamaa nee mekɛ mɔɔ bɛlɛdie la. Saa bɛanla ɛlɔlɛ ali bɛangile raalɛ a, bie a ɔbayɛ se kɛ ɔ nye balie agyalɛ nu deɛ ɛhye anwo.

¹² Mekɛ bie wɔ ɛkɛ mɔɔ agyalɛma bɛahola ava agyalɛ nu nla abɔ bɛ nwo abokɛ a. Ɛhye bahola ayɛ zɔ wɔ raalɛ ne afoa nu wɔ siane ne anu mekɛ bie mɔ anu mɔɔ ɔte nganeɛ kɛ yevɛ kpalɛ la. (Fa to Sɛlɛvolɛma 18:19 anwo.) Ɔbahola yeayɛ zɔ noko wɔ nrenya ne afoa nu wɔ mekɛ mɔɔ ɔgyi ngyegyelɛ kpole bie anloa wɔ gyima nu na yewie debie yɛ la. Agyalɛ nu nla mɔɔ bɛtwe bɛ nwo bɛfi nwo wɔ mekɛ ekyi nu la le debie mɔɔ ɔwɔ kɛ agyalɛma nwiɔ ne dua adenle kpalɛ zo ka nwolɛ edwɛkɛ wienyi na “bɛdumua bɛkponle zolɛ” a.  (1 Kɔlentema 7:5) Bɛyɛ ɛhye a, ɔnrɛmaa bɛ nuhua ko biala ɛnrɛnyia nwolɛ adwenle ɛtane. Noko, saa yelɛ anye fuu fa nla bɔ ɔ hu abokɛ anzɛɛ kunli anye fuu kpo kɛ ɔnrɛva agyalɛ nu nla ɔnrɛmaa wɔ ɛlɔlɛ adenle zo a, bokavolɛ ne bahola ayia sɔnea. Ɛhye bahola ava ngyegyelɛ ara agyalɛ ne anu.

13. Kɛ ɔkɛyɛ na Keleseɛnema amaa bɛ nzuzulɛ nwo ade ɛ?

¹³ Kɛmɔ Keleseɛnema kɔsɔɔti yɛ la, ɔwɔ kɛ Nyamenle azonvolɛ mɔɔ bɛgya la koati nla nwo nvoninli mɔɔ maa bɛkola bɛnyia atiakunluwɔzo ɛtane la. (Kɔlɔsaema 3:5) Ɔwɔ kɛ bɛnea bɛ nzuzulɛ nee bɛ nyɛleɛ boɛ wɔ mekɛ mɔɔ bɛ nee awie mɔɔ ɔnle bɛ hu anzɛɛ bɛ ye wɔ la. Gyisɛse bɔle kɔkɔ kɛ: “Saa nrenya nea raalɛ maa ɔ nwo dɔ ye a ɛnee yeva ye wɔ ye ahonle nu.” (Mateyu 5:28) Saa agyalɛma fa Baebolo ne anu folɛdulɛ mɔɔ fane nla nwo la di gyima a, ɔwɔ kɛ bɛkola bɛkoati sɔnea mɔɔ bamaa bɛazɛkye agyalɛ la. Bɛbahola bɛahɔ zo bɛanyia anyelielɛ na bɛabu nla kɛ ɔle ahyɛlɛdeɛ kɛnlɛma mɔɔ vi Gyihova, agyalɛ Hyehyɛvolɛ ne ɛkɛ a.​—Mrɛlɛbulɛ 5:15-19.

14. Edwɛkɛ mɔɔ yɛ alɔbɔlɛ la boni a ɔyɛ a ɔba a? Na duzu ati ɔ?

¹⁴ Ɔyɛ anyelielɛ kɛ wɔ Keleseɛnema dɔɔnwo agyalɛ nu, ngyegyelɛ biala mɔɔ kɛra la bɛdi nwolɛ gyima. Noko akee, ɔdwu mekɛ ne bie a, ɔmba ye zɔ. Kɛmɔ alesama tɔ sinli na bɛwɔ ewiade ɛtane mɔɔ Seetan a nea zo anu la ati, agyalɛ bie mɔ sɛkye. (1 Dwɔn 5:19) Kɛzi ɔwɔ kɛ Keleseɛnema di edwɛkɛ ɛhye mɔɔ yɛ se la anwo gyima ɛ?

15. (a) Duzu a Ngɛlɛlera ne maa bɛgyinla zo bɛbɔ ewole na bɛgya fofolɛ a? (b) Duzu ati a bie mɔ ɛbɔ kpɔkɛ kɛ bɛnrɛbɔ bokavolɛ mɔɔ anli nɔhalɛ wɔ agyalɛ nu la ewole ɛ?

¹⁵ Kɛmɔ bɛhanle nwolɛ edwɛkɛ wɔ buluku ɛhye Tile 2 ne la, adwɔmanebɔlɛ ala a Ngɛlɛlera ne maa  adenle maa bɛgyinla zo bɛbɔ ewole na bɛgya fofolɛ a. * (Mateyu 19:9) Saa ɛlɛ daselɛ wienyi mɔɔ kile kɛ wɔ agyalɛ nu bokavolɛ ne anli nɔhalɛ a, ɛnee ɔwɔ kɛ ɛsi kpɔkɛ mɔɔ ye ɛzilɛ yɛ se a. Ɛbadoa agyalɛ ne azo anzɛɛ ɛbabɔ ewole ɔ? Mɛla biala ɛnle nwolɛ. Keleseɛnema bie mɔ ɛva ɛhyɛ bokavolɛ mɔɔ ɛnlu ɔ nwo nɔhalɛ nu la na agyalɛ ne ɛyɛ kɛnlɛma. Bie mɔ noko, ɔlua ngakula ne mɔ ati bɛambɔ ewole.

16. (a) Ninyɛne mɔɔ ɛmaa bie mɔ ɛbɔ bɛ bokavolɛ ewole la bie a le boni? (b) Saa bokavolɛ mɔɔ ɛnze nwolɛ bie la si kpɔkɛ kɛ ɔbɔ ewole anzɛɛ ɔnrɛbɔ ewole a, duzu ati a ɔnle kɛ awie tendɛ tia ye kpɔkɛzilɛ ne ɛ?

¹⁶ Noko akee bie a ɛnee ɛbɛlatane ne ɛva ɛnrenzɛlɛ anzɛɛ nla nu ewule ɛra. Anzɛɛ bie a ɛnee ɔwɔ kɛ bɛbɔ ngakula ne mɔ anwo bane bɛfi awovolɛ mɔɔ bazɛkye bɛ la anwo. Ɔda ali wienyi kɛ ninyɛne dɔɔnwo wɔ ɛkɛ mɔɔ ɔwɔ kɛ ɛsuzu nwolɛ kolaa na wɔazi kpɔkɛ a. Noko saa ɛnwu kɛ wɔ agyalɛ nu bokavolɛ anli nɔhalɛ, na yemɔ anzi ɛ nee ye kɔ zo nyia nla nu ngitanwolilɛ a, ɛnee ɛlɛfa wɔahile kɛ wɔva ye ɛtane wɔhyɛ ye na ɛkulo kɛ bɛtoa agyalɛ ne azo. Ɛngola ɛngyinla Ngɛlɛlera ne azo ɛmbɔ ewole na ɛngya awie fofolɛ. Ɔnle kɛ awie biala yɛ akpɔsemadi na ɔbɔ mɔdenle kɛ ɔmaa wɔahakyi wɔ adwenle yɛɛ ɔnle kɛ awie biala tendɛ tia wɔ kpɔkɛ mɔɔ ɛbazi la. Ɔwɔ kɛ ɛgyinla mɔɔ bavi wɔ kpɔkɛzilɛ ne anu ara la anloa. “Awie biala ɔdaye ɔbazoa ye adesoa.”​—Galeehyeama 6:5.

17. Saa adwɔmanebɔlɛ ɛnle nu a, ɛweɛne boni a Ngɛlɛlera ne fa to agyalɛ nu ɛtetelɛ nee ewolebɔlɛ nwo a?

¹⁷ Asoo ninyɛne bie wɔ ɛkɛ mɔɔ bahola amaa awie  atete agyalɛ nu anzɛɛ abɔ ewole wɔ mekɛ mɔɔ ye bokavolɛ ne ɛtɛbɔle adwɔmane la? Ɛhɛe, noko saa ɔba ye zɛhae a Keleseɛnenli ɛnlɛ adenle kɛ ɔgya awie fofolɛ. (Mateyu 5:32) Baebolo ne die to nu kɛ bɛ nuhua kola tete ɛdeɛ, noko ɔka ɔkile mɔɔ ɛlɛkɔ la kɛ, “ɔmmakɔ agyalɛ fofolɛ; anzɛɛ ɔzia ɔ nee ɔ hu dɛba ne ɛhɔbɔ nu.” (1 Kɔlentema 7:11) Ninyɛne mɔɔ gyegye kpalɛ mɔɔ bamaa bɛatete agyalɛ nu la bie mɔ a le boni?

18, 19. Edwɛkɛ bie mɔ mɔɔ anu yɛ se la boni a bahola amaa bokavolɛ bie alua mɛla adenle zo atete agyalɛ ne anu anzɛɛ yeabɔ ewole wɔ mekɛ bɔbɔ mɔɔ ɔgya awie fofolɛ a ɔnyɛ boɛ la ɛ?

¹⁸ Abusua ne bahola ali ehyia, ɔluakɛ nrenya ne le mgbovonle na ɔmbɔ ɛbɛla kpalɛ la ati. * Ɔbahola yeava abusua ezukoa yeado kyakya anzɛɛ ɔbava yeadɔ nyile ɛtane nee nza yeanlo. Baebolo ne ka kɛ: “Saa awie ɛngola ye mbusua nea . . . a, ɛnee yekpo diedi ne na yezɛkye yedɛla sonla mɔɔ ɛnlɛ diedi la.” (1 Temɔte 5:8) Sonla zɛhae tu ɔ gye kɛ ɔnrɛzenza ye subane na bɔbɔ ɔfa ɔ ye ezukoa ɔbɔ ninyɛne mgbane mgbane mɔɔ ɔyɛ la anwo kakɛ a, ɔ ye bahola abɔ kpɔkɛ kɛ ɔdua mɛla adenle zo yeatete agyalɛ ne anu yeava yeabɔ ɔ nee ngakula ne mɔ anwo bane.

¹⁹ Bɛbahola noko bɛalua mɛla adenle ɛhye azo saa bokavolɛ ne yɛ ɔ gɔnwo ne basabasa, titile saa ɔta ɔbo ye na ye kpɔkɛdelɛ nee ye ngoane bɔbɔ la esiane nu a. Bieko, saa awie dahuu kɔ zo yɛ kyengye kɛ ɔmaa ye bokavolɛ abu Nyamenle mɛla zo wɔ adenle bie azo a, bokavolɛ ne mɔɔ ɔlɛgyegye ye la bahola azuzu nwo kɛ ɔtete agyalɛ ne anu, titile saa edwɛkɛ ne dwu ɛleka mɔɔ ye sunsum nu gyinlabelɛ la esiane nu la a. Bie a bokavolɛ ne mɔɔ ye ngoane la esiane nu la baha kɛ,  adenle ko mɔɔ ɔwɔ kɛ ɔdua zo ‘ɔtie Nyamenle ɔtɛla sonla’ la a le kɛ ɔbalua mɛla adenle zo yeatete agyalɛ ne anu.​—Gyima ne 5:29.

20. (a) Saa agyalɛ bie sɛkye a, duzu a agɔnwolɛ nee mgbanyima mɔɔ bɔ mɔdenle la bahola ayɛ a, na duzu a ɔnle kɛ bɛyɛ a? (b) Duzu a ɔnle kɛ agyalɛma dua agyalɛ nu ɛtetelɛ nee ewolebɔlɛ nwo edwɛkɛ mɔɔ wɔ Baebolo ne anu la azo yɛ a?

²⁰ Wɔ bokavolɛ mɔɔ bɛyɛ ye basabasa mɔɔ anu yɛ se la anwo edwɛkɛ biala anu, ɔnle kɛ awie maa bokavolɛ ne mɔɔ ɛnze nwolɛ bie la anwo kyele ye kɛ ɔtete agyalɛ ne anu anzɛɛ ɔdɛnla nwolɛ. Agɔnwolɛma nee mgbanyima mɔɔ bɔ mɔdenle la bahola agyinla Baebolo ne azo ava folɛdulɛ amaa ɛdeɛ, noko menli ɛhye ɛnrɛnwu edwɛkɛ kɔsɔɔti mɔɔ kɔ zo wɔ nrenya nee ɔ ye avinli la. Gyihova ala a kola nwu ye a. Nɔhalɛ nu, saa Keleseɛne yelɛ dua adalɛ edwɛkɛ bie azo bɔ ewole a, ɔkile kɛ ɔnli Nyamenle agyalɛ ngyehyɛleɛ ne eni. Noko, saa gyinlabelɛ mɔɔ esiane kpole wɔ nu la tɛkɔ zo na ɔsi kpɔkɛ kɛ ɔtete nu a, ɔnle kɛ awie biala tendɛ tia ye. Edwɛkɛ ko ne ala a yɛbaha ye wɔ Keleseɛne kunli mɔɔ kɛzi kpɔkɛ kɛ ɔtete agyalɛ nu la anwo a. “Yɛ muala yɛbagyinla Nyamenle ndɛnebualɛ ebia ne anyunlu.”​—Wulomuma 14:10.

21. Anwubielɛ boni a kile kɛ agyalɛ nwo folɛdulɛ mɔɔ wɔ Baebolo ne anu la boa ɛ?

²¹ Lucia, mɔɔ yɛlumua yɛha ɔ nwo edwɛkɛ la nee ɔ hu tetele agyalɛ ne anu la ye siane nsa anzi ɔ nee Gyihova Alasevolɛ yiale na ɔbɔle ɔ bo kɛ ɔsukoa Baebolo ne. Ɔka kɛ: “Ɔzinle me nwo kpole kɛ, Baebolo ne manle menwunle mɔɔ meyɛ a mebanyia me ngyegyelɛ ne sɔbelɛ la. Yɛzukoale debie dapɛne ko ala la, ɛnee mekulo kɛ mesia me nee me hu kɔbɔ nu ndɛndɛ. Ɛnɛ,  mekola meka kɛ Gyihova ze kɛzi bɛbɔ agyalɛ mɔɔ ngyegyelɛ wɔ nu la anwo bane a, ɔluakɛ ye ngilehilelɛ ne boa agyalɛma maa bɛnwu kɛzi ɔwɔ kɛ bɛnyia ɛbulɛ bɛmaa bɛ nwo la. Edwɛkɛ mɔɔ bie mɔ ka kɛ Gyihova Alasevolɛ fa mgbakyemgbakye ba abusua nu la ɛnle nɔhalɛ. Wɔ me afoa nu, me agyalɛ ne yɛle boɛ.” Lucia zukoale kɛzi bɛfa Baebolo ngyinlazo bɛbɔ bɛ ɛbɛla la.

22. Duzu a ɔwɔ kɛ agyalɛma kɔsɔɔti nyia anwodozo wɔ nu a?

²² Tɛ Lucia angome a edwɛkɛ ɛhye bie ɛdo ye a. Ɔwɔ kɛ agyalɛ yɛ nyilalɛ, ɔnle kɛ ɔyɛ adesoa. Amaa yeayɛ zɔ la, Gyihova ɛva agyalɛ nwo folɛdulɛ kpalɛ mɔɔ tɛla biala mɔɔ bɛhɛlɛ​—ye Edwɛkɛ ne mɔɔ sonle bolɛ la ɛmaa. Baebolo ne kola maa “mɔɔ ɛnze nrɛlɛbɛ la nwu nrɛlɛbɛ.” (Edwɛndolɛ 19:7-11) Yeboa agyalɛ dɔɔnwo mɔɔ ɛnee ɛlɛsɛkye la yemaa bɛyɛ boɛ yɛɛ yemaa bie mɔ mɔɔ ɛnee bɛlɛ ngyegyelɛ kpole la ɛyɛ kpalɛ. Ɔrɛla ye kɛ, agyalɛma kɔsɔɔti banyia anwodozo kpole wɔ agyalɛ nwo folɛdulɛ mɔɔ Gyihova Nyamenle fa maa la anu. Ɔboa amgba!