Ɛ Nee Mgbɔnwɔkavoma Nna Ne Bɛnriandi bɛba bɛ nyunlu, bɛ gyakɛ abo ɛlɛdi kikilikikili! Saa ɛpɛ mgbɔnwɔ ne mɔ nee menli mɔɔ ɛlɛka la anwo nvoninli wɔ wɔ adwenle nu a, ɔle kɛ asɛɛ bɛlɛye ye vidio wɔ Baebolo ne anu bɛahile wɔ la! Ɛkpɔnwɔ mɔɔ limoa la le fufule, ahenle mɔɔ de zo la le belemgbunli fofolɛ mɔɔ bɛwula ye anyunlunyia. Ɛkpɔnwɔ mɔɔ doa ye la le kɔkɔlɛ, na ahenle mɔɔ de zo la ɛlɛye anzodwolɛ avi azɛlɛ ye azo. Ɛkpɔnwɔ mɔɔ tɔ zo nsa mɔɔ le bile kisii la li ɔ nzi, kavolɛ ne lɛ tone ɔ sa nu na ɔlɛbɔ alɔbɔlɛ edwɛkɛ bie mɔɔ fale ɛhɔne nwo la nolo. Ɛkpɔnwɔ mɔɔ tɔ zo nna la le nzonle, ɛhye le anwodolɛ nee anwonyane nwo sɛkɛlɛneɛ. Ewule mumua ne a ɛlɛka ɛkpɔnwɔ ne a. Yɛɛ Nla doa ye na ɔlɛkuhu menli dɔɔnwo!​—Yekile 6:1-8.

“Mɔɔ mengengale mgbɔnwɔkavoma nna ne anwo edwɛkɛ la, me ahonle dule. Ɔyɛle me kɛ Ndɛnebualɛ Kenle ne ɛdwu na ɔluakɛ metɛsieziele me nwo la ati, menrɛnyia ngoane.”​—Crystal.

“Menwunle mgbɔnwɔkavoma ngaklie nna ne mɔɔ bɛde mgbɔnwɔ mɔɔ asolo biala kɔla ne azo la, ɔzinli me nwo. Noko mɔɔ menwunle mɔɔ yekile ne kile la, mendele ɔ bo kpalɛ.”​—Ed.

Asoo ɛte nganeɛ kɛ mɔɔ Crystal anzɛɛ Ed dele la ɔ?Kɛ ɔde ye biala la, mgbɔnwɔkavoma nna ne anwo edwɛkɛ mɔɔ wɔ Yekile, Baebolo buluku mɔɔ li awieleɛ anu la boka ninyɛne mɔɔ menli ze ye kpalɛ la anwo. Noko ɛnyelɛzodeɛnwunlɛ ɛhye mɔɔ ɛbade ɔ bo la baboa wɔ. Adenle boni azo? Nyamenle ɛbɔ ɛwɔkɛ kɛ saa ɛkenga, ɛsukoa na ɛfa edwɛkɛ mɔɔ wɔ ngapezo buluku ɛhye anu la ɛdi gyima a, ɛ nye balie.​—Yekile 1:1-3.

Menli bie mɔ sulo ɛnyelɛzodeɛnwunlɛ ɛhye noko bɛanyɛ kɛ bɛfa banwunlonwunla wɔ. Nɔhalɛ nu, menli mgbe dɔɔnwo ɛnwu kɛ ɛnyelɛzodeɛnwunlɛ zɔhane ɛmaa bɛ diedi nu ɛmia na bɛnyia kenle bie anyelazo. Ɔbahola yeaboa ɛdawɔ noko! Yɛsɛlɛ wɔ, toa zo kenga.